1, 2. Pakayni to satadamaanay noka pikowan ni Yihofa, pakasoˈlinay kita to manan? (Nengnengen ko satapangan coka.)

ITINI i kaˈayaway lalakaw milengoay, cowa ka sadafdaf ko pikowan ni Yihofa, o tamdaw ko mikowan ngangaˈay sanay ci Akoma. Matatodongay kora sowal han? O tamdaw, ano o niyah ko mikowanay a tahadaˈoc a maˈorip, coko ngangaˈayto a miliyas to sakowan no Kawas a nimaan? Ano caka picada kiso to sakowan no Kawas midaˈoc a maˈorip, mamahemek kiso han?

² Kita, o cecacecay a tamdaw mamiharateng tora salicay, hongaˈ ira ko pinang ita, o pikowan no Kawas tada matatodongay, hanaca o sangaˈayay ko pikowan Ningra, citatodongay to sasarocoden ita midopo. Pakayni toninian adihayay ko wacay i Fangcalay Cudad, nengnengen ita nohatini, samaanay somowal ko Fangcalay Cudad to satadamaanay noka pikowan ni Yihofa masaheciay ko nika tatodong.

3. Hano edeng ci Yihofa ngaˈ iraay ko fadangalan mikowan to polong a maˈoripay?

³ Iraay ko masaheciay fadangalan ni Yihofa mikowan to polong a maˈoripay, samanen o malefotay ko ˈicel a Kawas ato misangaˈay a Tatapangan Cingra. (1 Rayray 29:11; Dmak 4:24) Matiliday i  Paˈarawan 4:11, oya kalacafayay ci Kristoan i kakarayanay a 144,000 a mapasimalay Krisciyang sanay pasowal: “[Yihofaaw] Kawas niyam, matatodongay Kiso a mapahemek a mapacakat ko ngangan a mapafeli to ˈicel. O misangaˈay Kiso to maamaan.” Hay, misangaˈay to kihecod ci Yihofa, iraay ko fadangalan Ningra mikowan to tamdamdaw ato coyoh.

4. Ano misafelit ci Yihofaan, hano o misaloyaˈay to pasalat ita?

⁴ Cowa ko misangaˈay a Tatapangan ci Satan, awaay ko fadangalan a mikowan. Cingra aci Atam aci Ifa misafelitay ci Yihofaan, patahekalay to maritaˈangay a waywayan. (Yirimiya 10:23) Iraay ko pasalat no harateng no tamdamdaw ato coyoh, ngaˈay mipiliˈ cangra a misateked, caka pidofdof to Kawas, kawra iraay ko fadangalan nangra mihaen to demak han? Awaay. O tamdaw iraay ko pasalat misaˈosi to demak, kawra awaay ko fadangalan a misafelit toya pafeliay to ˈorip kitanan a misangaˈay Tatapangan. Ihekalay koni demak, misafelit ci Yihofaan o misaloyaˈay to pasalat ita, o tamdaw hananay, o mamicadacada aca to sakowan ni Yihofa.

5. Hano pakasoˈlinen ita sahetoay o masadafdafay ko demak no Kawas?

⁵ Iraay ko masaheciay a fadangalan ni Yihofa mikowan, o pakayraan no pikowan Ningra masarocoday a masadafdaf. Sanay Cingra: “[Ci Yihofa Kako], o midaˈocay ko olah Ako. O caay pisakakinih, o moecelay ko demak Ako. O matiniay a demak ko kaolahan Ako.” (Yirimiya 9:24) Caay pitoor ci Yihofa to misangaˈan no tamdaw a rikec, misawkit too manan ko masadafdafay, manan ko moecelay. Masaheciay ko nika sadafdaf ni Yihofa, moecelay ko palinian Ningra, misalalangiay toni palinian a pafeli to rikec i tamdaw. Somowalay ko Fangcalay Cudad to “o moecelay ato marayasay a demak ko paranaan no Kitakit” Ningra, mansa pakasoˈlinen ita o sarikec, palinian ato sasawkit no Kawas sahetoay o moecelay. (ˈOlic 89:14; 119:128) Mipakokot ci Satan to cowa ka ngaˈay ko pikowan no Kawas, ˈarawhan o cingra ko cowa ko papaira to masadafdafay moecelay toni hekal.

6. O cima ko iraay ko sifanaˈ ato taneng mikowan toni hekal?

⁶ Iraay ko masaheciay a fadangalan ni Yihofa mikowan, samanen iraay ko sifanaˈ ato taneng Ningra a mikowan to maamaan i paro no kakarayan. Patinakoen, pafelian ni Yihofa ci Yis to ˈicel, miadah to cowa pakafilo ko ising miadah a adada. (Matay 4:23, 24; Marko 5:25-29) Itini i pinengneng ni Yihofa, cowa ko kafahekaan demak koni, samanen mafanaˈay Cingra to tatirengan no tamdaw, miadah to adada, palahedaw to dangoc no tireng. Cowa koninian aca, iraay ko ˈicel Ningra paˈorip to mapatayay, miconged to maamaan a pades.

7. O taneng ni Yihofa hano mikikakaay tono tamdaw hani?

⁷ Oni mikowanan ni Satan a hekal, mikilimayho to hapakayraan a misaysay to lacongis no kasakitakit, kawra edeng ci Yihofa iraay ko taneng a paira to dipayal no hekal. (Isaya 2:3, 4; 54:13) Ano matongal ko fanaˈ ita to sifanaˈ ato taneng ni Yihofa i, o mamatira ci Pawloan ko harateng, sanay mitilid cingra i sapatemer no fangcalay saocor: “Wata: ko nika talolong no siniˈada ato taneng ato fanaˈ no Kawas!”​—Loma 11:33.

8. Hano mahapinang iso too sangaˈayay ko pikowan ni Yihofa?

⁸ Somowalay ko Fangcalay Cudad to misamaanay hano cifadangalay ci Yihofa mikowan to paro no kakarayan, hanaca o sangaˈayay ko pikowan Ningra. O cecay lalangian i, samanen ciolahay ko pikowan Ningra. Misemeray to falocoˈ ita ko kapikowan Ningra,  samanen Cingra “o adayayay o siniˈadaay a Kawas, o caay ka ranikay a maketer, tadamaanay ko olah ato nika soˈlin.” (Kasadakan 34:6) Mikangodoay ko Kawas a micada to madimadiay sikawdan, patenesay kitanan. Mikikakaay kitanan ko nika fanaˈ to manan ko saali ita. Cowa pafeli ci Yihofa to ngaˈayay dafong i finawlan Ningra sanay ci Akoma, ˈarawhan i, cowa ko soˈlinay koni. Napafeliay ci Yihofa to kanonoˈan a wawa i tamdamdaw, toha sakamidaˈocaw a maˈorip kita.​—ˈOsien ko ˈOlic 84:11; Loma 8:32.

9. Samaanay mahapinang ita, mikiharay ko Kawas to cecacecay a tamdaw hani?

⁹ Cowa ka pikihar aca ci Yihofa to kangaˈayan no polong a finawlan Ningra, mikiharay to cecacecay a tamdaw. Patinakoen, lalomaˈ no 300 mamihecaan, mipiliˈan ni Yihofa ko papinapina a kakitaan paˈorip to finacadan no Israil miliyas to saroero no ˈada. Itini toni kaforifodan a laliyadan, maˈaraway Ningra ko cecay roma finacadan a fafahiyan ci Rucu, toha sapihakelongaw to matatodongay a pihakelongan, adihayay ko kinafalahan ningra. Palemedan ni Yihofa ci Rucu, pafelien to ngaˈayay faˈinay ato faˈinayan a wawa. Cowa ka hatini aca ko sakalahekel ni Rucu, ikor ano patikor a maˈorip ci Rucu i, o mamahemek mafanaˈ, o wawa no niyah nao tatoˈasan ni Misiya, hanaca mialaan ko ngangan ningra pangangan to cecay cudad no Fangcalay Cudad mitilid to nalifetan ningra.​—Rucu 4:13; Matay 1:5, 16.

10. O pikowan ni Yihofa hano caka mariˈang caka ˈatekak hani?

¹⁰ O pikowan ni Yihofa caka mariˈang caka ˈatekak, pafeliay to pasalat ato hahemek no tamdaw. (2 Korinto 3:17) Sanay ci Tafiti: “Mataliyok no ˈdil ato kasenengan [ko Kawas]. Matomes no ˈicel ato lipahak ko Pitaˈongan a Lomaˈ Ningra.” (1 Rayray 16:7, 27) Ci Itan ya mitiliday to ˈOlic mihaen ko sowal: “Tadamalemeday ko paˈolicay a romadiw a mitaˈong i Tisowanan a tamdaw. O mapatediay no siniˈada Iso ko ˈorip nangra. O nano Miso ko sakasaromiˈad sa cangra a lipahak, mipahemek cangra a romadiw to nika ngaˈay Iso.”​—ˈOlic 89:15, 16.

11. Misamaan kita ngaˈ pakasoˈlin too sangaˈayay ko pikowan ni Yihofa hani?

¹¹ Rariden misimsim ko nika ngaˈay ni Yihofa, ho pasoˈlin too sangaˈayay ko kapikowan Ningra. Wa malecad ko harateng ita to mitiliday to ˈOlic: “O nika maroˈ i lomaˈ Iso to cecay a romiˈad ko ngaˈay to nika maroˈ i roma a kamaroˈan to cecay a patek a romiˈad.” (ˈOlic 84:10) Wa icowaho mitama kiso to mahaenay mikowanay saw? Ci Yihofa o sidaˈitay a misangaˈay, mafanaˈay to manan ko sakahemek ita, mirenec to saali ita. Ano o mananto ko saali ni Yihofa, sahetoay o sakangaˈay ita. Midofdof ci Yihofaan soˈlina mamikinafalah to maanan, saikor o mamalifok ko taˈangayay hemek.​—ˈOsien ko Isaya 48:17.

12. O manan ko sakakaay lalangian ita midopo to satadamaanay noka pikowan ni Yihofa hani?

¹² Paliˈayaway ko Fangcalay Cudad, ikor no 1,000 miheca a pikowan, wa ira ko misafelitay to satadamaanay noka pikowan ni Yihofa sanay. (Paˈarawan 20:7, 8) Hano mihaen cangra hani? Samanen matedalto ci Akoma ikor, o mamiliyaw misaˈefit to tamdaw, miowing to misatekeday waywayan a miolat to tamdaw. Alatek mamisahalaka cingra misawi to tamdaw, hamaan mitengil to Kawas ngaˈayay midaˈoc ko ˈorip wa saan. Cowa ko ˈosi kora sowal. Kawra ora licay i: Wa masolot no hatiniay kadaw kita han? Ano maolahay kita ci Yihofaan, samanen maolahay to nika kapah Ningra, mihayi to cifadangalay mikowan Cingra, wa ˈintehen kita tora mariˈangay a mangah. Ano samaamaanen ni Satan a mikayhid kita, o kalim ita edengan to sakaˈoripaw ilaeno no sidaˈitay a sakowan ni Yihofa.

13. Misamaan kita patahekal to nika pidopo to satadamaanay noka pikowan ni Yihofa hani?

¹³ Citatodongay ci Yihofa micada to misarocoday a pidopo to satadamaanay noka pikowan Ningra. Mahapinangay ita, iraay ko fadangalan Ningra mikowan, ngaˈayay ko pikowan Ningra. Ano midopo kita to satadamaanay noka pikowan Ningra i, o mamadimadi kita, midoko Cingranan. O mamisamaanho kita midopo Cingranan hani? Doedoen ko palinian ni Yihofa. Mitodong ci Yihofaan, mihaen a patahekal to maolahay kita to pakayraan Ningra a mikowan, makahi a midopo to pikowan Ningra.​—ˈOsien ko Ifiso 5:1, 2.

14. O tawki no paro no lomaˈ ato malohemay malitengay misamaan a mitodong ci Yihofaan?

¹⁴ Pakayni i picekiw to Fangcalay Cudad, mafanaˈay kita to ciolahay ci Yihofa a mikowan. O tawki no paro no lomaˈ ato malohemay malitengay ano maolahay to pikowan ni Yihofa todongen Cingra, aka mariˈang a kalasaka dademak to mikeriday a fadangalan. Ci Pawlo mihaenay a misaˈicel a mitodong ci Yihofaan aci Yisan. (1 Korinto 11:1) Ci Pawlo cowa mipakangodo a mipaekel to tamdaw pacieci a papisamaan. Mingitangitay to salikaka papicada to sapalimoˈot. (Loma 12:1; Ifiso 4:1; Filimon 8-10) Mahapinangay itini, ano tano olahaen ita micada ko tao, o patahekalay kita to maolahay to nika pikowan ni Yihofa, makahiyay a midopo to satadamaanay noka pikowan Ningra.

15. Misamaan kita midopo to limasmas no kakeridan hani?

¹⁵ Misamaan kita midopo to limasmas no kakeridan hani? Sakaretengen ita patoor ko ciˈinorongay a tamdaw. Soˈlina cowa ka tadacipinang anca cowa pihayi kita to maanan a saˈosi, kamayanen a midopo ko limasmas no likakawa no Kawas. Mihaen to demak caay kalecad tono hekal a pakayraan, kawra micadaay to pikowan no Kawas a tamdaw makahiyay mihaen to demak.  (Ifiso 5:22, 23; 6:1-3; Hipray 13:17) Sahetoay o sakangaˈay ita ko miharatengan no Kawas, mankora, ano tengilen ita ko limasmas no mikeriday o caciepoc kita.

16. Ano midopo to satadamaanay noka pikowan no Kawas wa misamaan ko saˈosi ita?

¹⁶ O misangaˈan ita a saˈosi papatahekal to midopoay kita to satadamaanay noka pikowan no Kawas. Cowa pisaheci misaˈosi ci Yihofa to maamaanan a demak to mamisamaan kita. Pasifanaˈan Ningra kita to harateng Ningra a mikayat kitanan. Patinakoen, pakayni i caˈedong no Krisciyang cowa pisongilaˈ a misaˈosi ko Kawas, kawra mitokelay kitanan, mipiliˈan a rikoˈ ato caˈedong sanengseng a matatodong to saaroˈan no Krisciyang wangaˈ. (1 Timoti 2:9, 10) Hanaca o nisaˈosian ita cowa pakapolin to tao ato tatiihen ko falocoˈ. (1 Korinto 10:31-33) Ano misaˈosi kita i, cowa ko kaolahan aca no niyah, ao isalakatan a misinanot ko pinengneng ni Yihofa, paihekalay kita to maolahay to pikowan ni Yihofa, makahi a midopo to satadamaanay noka pikowan Ningra.

17, 18. O ciraramodayto a Krisciyang mamisamaan a midopo to satadamaanay noka pikowan ni Yihofa hani?

¹⁷ O ciraramodayto a Krisciyang mamisamaan a midopo to satadamaanay noka pikowan no Kawas hani? Ano adihayay ko pasangar no kararamod, marorayen ko falocoˈ iso, wa misamaanto hani? Haratengen to samaanay ci Yihofa micada to litengan a Israil tamdaw. Patatinakoan ni Yihofa too faˈinay no Israil tamdaw ko Niyah. (Isaya 54:5; 62:4) Kinapinapinaay a masomad ko falocoˈ ni Yihofa to Israil tamdaw, tada o tatiihay a “raramod” cangra! Kawra, cowa ka tangsol sa sawaden ni Yihofa ko “raramod”, kamayanay a siniˈadaen Ningra ko Israil tamdaw a madimadi mitoor to katatelekan nangra. (ˈOsien ko ˈOlic 106:43-45.) Mipaihekalay ci Yihofa to midaˈocay a olah, tada makalimay kita to sapiingidaw Cingranan.

¹⁸ O ciraramoday Krisciyang ano maolahay ci Yihofaan tatodongen Cingra. Ano ira ko pasangar no kararamod i, cowa ko tatano misafelitay to safalod no Fangcalay Cudad a pakayraan mipalasawad to raramod. Mafanaˈay cangra “malacecayayto ko tireng” nangra oha tatahadaˈoc a matateko cangra. O edengan cecay lalangian to sakalacinowas no raramod i, ano maˈodang ko cecay nangra. (Matay 19:5, 6, 9) O ciraramoday Krisciyang misaˈicel a misaysay anca misalof to kararamod i, paihekalay to maolahay cangra to pikowan ni Yihofa, makahi a midopo to satadamaanay noka pikowan Ningra.

19. Ano mararaw kita i, wa samaan ko demak ita?

¹⁹ Cowa ko malefotay tamdaw kita, cowa ka eca pidemak to mamisomad to falocoˈ ni Yihofa a demak. Mafanaˈay ko cinonoˈay a Wama toninian, mansa pakaynian i sapatefoc ni Kristo a mipadang kitanan. Mankora, ano mararaw kita i, ngitangiten ko sasodod ni Yihofa. (1 Yohani 2:1, 2) Ano mararawto kita, aka a rarikec han ko niyah, mamaan kitini toni raraw a miala to sapasifanaˈ. Misaˈicel a miingid ci Yihofaan, o sasododen Ningra kita, paˈicel kitanan i noˈadingoan, hanaca cato piliyaw a mararaw.​—ˈOlic 103:3.

20. Misamaanay hano nohatiniho kita midopo to satadamaanay noka pikowan ni Yihofa?

²⁰ Itini i faelohay hekal, o mamapolong kita micada to pikowan ni Yihofa halo minanam to moecelay a palinian Ningra. (Isaya 11:9) Nikawrira, nohatiniho minanam to adihayay sifanaˈ ni Yihofa. O lacongis pakayni to satadamaanay noka pikowan mangataayto masaysay. Mihaenay, nohatiniho mitafo to madimadi, ˈifowa a mitosil, mikiemel a itini i maamaan demak mitodong ci Yihofaan, mihaen to demak o midopoay to satadamaanay noka pikowan no Kawas.