1, 2. Ano tahapades kita i, misamaanay ci Yihofa mihinom kitanan? Samaanay mikiˈok to sowal ko Fangcalay Cudad?

O CECAY ci Atewa sanay ko ngangan a kapah salikaka, milicayay ci Stifenan o cecay ciraramodayto a malohemay malitengay pakayni to tatodong no 1 Korinto 7:28: “O mamaroray ko mararamoday a tamdaw,” sanay. Milicay cingra: “O manan kora roray hananay, ano ciraramod kako wa mamisamaan kako hani?” ˈAyaw no papacaˈof ci Stifen, pasowalay ci Atewaan, papiharatengen to nano sowal ni Pawlo, ci Yihofa: “O halihinomay a Kawas. Yo mapades kami to masamaamaanay i, mihinom Cingra i tamiyanan.”​—2 Korinto 1:3, 4.

² O manonoˈay a Kawas ci Yihofa, tahapades kita mihinomay i kitanan. Alatek malifetay iso, pakayniay i Fangcalay Cudad a midama halo mikayat ko Kawas i tisowanan. Papasoˈlinen ita o sakangaˈay ita ko miharatengan ni Yihofa, matira  o nika ciharateng Ningra to nolitengan a madimadiay a sikawdan.​—ˈOsien ko Yirimiya 29:11, 12.

3. Oni lalakaw mamilengo to manan a salicay?

³ Ano mafanaˈ kita tora lalangian nora roray ato pades ita i, o mamadolo a misiˈayaw tora demak. Ano mamisiˈayaw kita tono raramod anca no paro no lomaˈ a roray, mafanaˈ kita tora lalangian wangaˈ. Itini i nokaˈorip o manan demak ko papaira tora nisowalan ni Pawlo a pades hananay hani? Nano litengan tahanini iraay ko manan tinakoan mamihinom kitanan ano tahapades kita?

4, 5. Faelohay a mararamoday tataha siˈayaw to manan a roray?

⁴ Ya patireng ci Yihofa to saka cecay a raramod i, sanay ko sowal: “Liyasen no tamdaw ko wama ato wina ningra a malacecay ato fafahi ningra, o malacecayayto ko tireng nonini a tatosaay.” (Satapangan 2:24) Kawra, mararamod ko cowa ka lefot a tamdaw ato ciwawato i, iraayto ko cariraw no kalalaˈed no paro no lomaˈ. (Loma 3:23) Nohatini o faˈinayto ko tawki no lomaˈ cowato ko wama wina. Pafelianto no Kawas ko faˈinay malo tangal no fafahi. (1 Korinto 11:3) Pakayni toninian cowa ka dolo to faelohay a mararamoday. Kawra o sowal no Fangcalay Cudad, o mamicada ko fafahi to sakayat no faˈinay ao cowato ko wama wina ningra sanay. O kalalaˈed no tosaay lomaˈ a malitengay alatek o sakaroray nora mararamod.

⁵ Ano pasowalen no fafahi ko faˈinay to mapoyapoyayto cingra i, mamahemek cangra, kawra mamarawraw ko falocoˈ, ano adada ko fafahi to kacipoyapoyan o manan ko sapaising. Anca mahofocto ko wawa, ano awa ko payci, samaanto aki. Cowa koninian aca, ano cato ka sikor ko faˈinay tona matayal a midimokos to wawa i, masomaden ko faˈinay alatek. O kakaretengto ko ˈinorong nora faelohay wama, samanen o papaliliˈto to saali no wawa cingra.

6-8. Hano caka ngaˈay mahofoc to wawa matoled ko falocoˈ?

⁶ O romaroma roray no mararamoday, saka ciwawaaw ˈarawhan cowa ka ngaˈay a mahofoc, alatek mamasomad ko fafahi tona caka ngaˈay a cipoyapoy. Ano ciraramodto anca ciwawato iraay ko roray, manaokaniw saka ciwawaaw kawra awa ko wawa o pades kora. (Taneng 13:12) Itini i lintad no Fangcalay Cudad, maasic ko fafahiyan tada o kangodoan kora. Ci Rakil, fafahi ni Yakop masomadan nanay maˈaraw ira ko wawa no kaka. (Satapangan 30:1, 2) O milakowitay to riyar a matayalay ano tayni i ˈalomanay ko wawa a kakitakitan a dademak i, marariday malicay hano caka ciwawa cangra. Soˈlinto tadtaden cangra, cisowalayho: “Paisingen mamaan!” Sanay.

⁷ Itini i Ingkelan, saka ciwawaaw ko cecay fafahiyan salikaka, ˈarawhan awaay ko wawa. Ikor liteng sato cingra. Tona awaayto ko pakayraan a ciwawa, matoleday ko falocoˈ. Oraanto sapidipotaw to wawa no tao cangra mararamod. Saan ko sowal nora fafahiyan salikaka: “Mararomay ko falocoˈ ako, midipot to wawa no tao cowa ka hecad to mihofocan no niyah, ikorto ngaˈ mananamayto ko falocoˈ ningra.”

⁸ Somowalay ko Fangcalay Cudad o Krisciyang fafahiyan “itini i nika hofoc ningra to wawa a mapaˈorip cingra,” sanay. (1 Timoti 2:15) Kawra ciwawa  cingra ngaˈ midaˈoc a maˈorip cingra cowa ka saan, mitoroˈan nora o fafahiyan matayal a midimokos to wawa ato demak no paro no lomaˈ, cowa ito ira ko limaw mirarakat miyakayak to sanaysanay a sowal micapid to demak no tao. Nikawrira, o fafahiyan kamayanay ira ko roray pakayni i raramod ato nokaˈorip no paro no lomaˈ.

9. O patay no raramod ato roray itini kalalaˈed no raramod hano cowa ka lecad?

⁹ Pakayni to roray no mararamoday hananay, o ˈalomanay cowa ka tangsol sa maharateng to mamapatay ko raramod. O roray itini kalalaˈed ato raramod cowa ka lecad to nika pisiˈayaw to patay no raramod, samanen o mararamoday tamdaw cowa ka maharateng to mamapatay ko raramod itini toni a lintad. Ano soˈlinto mapatay ko raramod, o tokel to papatikor a maˈorip ko mapatayay taˈangayay ko pihinom to Krisciyang. (Yohani 5:28, 29) Soˈlinay haw i, ano taharoray kita i, cisidaˈitay a Wama o papakayni i Fangcalay Cudad a midama ato mihinom kitanan. Nohatini sinanoten ita ko nolitengan a sikawdan, nengnengen to samaanay mahinom ni Yihofa cangra.

10. Taharoray ci Hana samaanay mahinom ko falocoˈ ningra? (Nengnengen ko satapangan coka.)

¹⁰ O fafahi ni Ilkana ci Hana tada mikiriwiˈay ko masiˈayaway ningra a roray. Maasicay cingra, o roma a fafahi no faˈinay ci Pinina iraay ko wawa. (ˈOsien ko 1 Samuil 1:4-7.) To mihecahecaan misamsaman ni Pinina cingra, marorayay ci Hana. Mikilimay to pihinom ni Yihofa a mitolon. Sanay ko Fangcalay Cudad: “Halafin ko nipilongoc ni Hana a mitolon i kaˈayaw [ni Yihofa].” Mitokelay ci Hana to papacaˈofen ni Yihofa ko saali ningra. Soˈlin cowa ka fanaˈ ci Hana to sasamaan ko teloc nora demak, kawra maharek a mitolon i, “caayto ka rarom cingra.” (1 Samuil 1:12, 17, 18) Pakasoˈlinay ci Hana to papacaˈofen ni Yihofa cingra, anca tano manan a pakayraan a misalo tora noka maasic ningra.

11. O mitolonay misamaanay mihinom to falocoˈ ita?

¹¹ Cowa ka lefot kita hanaca maˈoripay itini toni miˈemetan ni Satan a hekal, cowa ko aawa ko sapalifet ato roray. (1 Yohani 5:19) Mafanaˈ ci Yihofaan to “halihinomay a Kawas”, tada kahemekan! Toha ngangaˈay pakaremo to roray a cecay pakayraan i, o mitolonay. Fowahan ni Hana ko falocoˈ i ci Yihofaan, ano taharoray kita i, cowa ko nika somowal aca to harateng ci Yihofaan, o mamingitangit to sapadama Ningra, fowahen ko falocoˈ a mitaktak to harateng i Cingranan.​—Filipi 4:6, 7.

12. O manan ko padamaay ci Annaan milifok to hemek hani?

¹² Ano, o pakayniay noka awa no wawa anca mapatay ko raramod a matoleden, wa ngaˈay a mahinom ko falocoˈ ita han? Itini i lintad ni Yis, ci Anna pito ko mihecaan a mararamod mapatayayto ko faˈinay, awaay ko sowal no Fangcalay Cudad to iraay ko wawa ningra. Samaanay ci Anna milifok to hemek hani? Sanay ko sowal no Luka 2:37: “Caay piliyas cingra to Pitaˈongan. To dadaya to romiˈad misaliway, mitolon cingra a mitaˈong to Kawas.” Tangasa 84 ko mihecaan ni Anna padadotocay a midoko to Kawas, itiniay cingra milifok to sahinom ato hemek.

13. Sadaken ko tinakoan, o soˈlinay widang mamihinom kitanan, soˈlin ano awa ko paro no lomaˈ a mihaen to demak.

 ¹³ Mararid kita micawmaˈ to salikaka, mamahela ko soˈlinay widang ato cafay. (Taneng 18:24) Lima ko mihecaan ni Paula miliyasay to kimad ko wina, mararomay cingra itiya. Miremo to matiniay a sapalifet cowa ko madoloay, kawra itini i kasakopang iraay ko cecay misakafahay a fafahiyan salikaka ci Aan, ciharatengay to noˈadingoan ni Paula a pakalalok cingranan. O sowal ni Paula: “Soˈlin cowa ko paro no lomaˈ ako ci Aan, kawra cisidaˈitay cingra takowanan, padama takowanan padadotoc a midoko ci Yihofaan.” Nohatini kamayanay madimdi ci Paula, o roma i, mahemekay maˈaraw ko wina patikor tayni i kasakopang. Tada mahemekay ci Aan mipadang ci Paulaan padadotoc a midoko ci Yihofaan.

14. Ano ciharateng kita a mihinom to tao mamalifok ko manan a sakalahekel?

¹⁴ O sasinanoten ita i, ano paihekalen ita ko kaciharateng to tao, o mamalowan ko tatiihay a harateng. O fafahiyan salikaka ano ciraramoday ha anca cowa ka ciraramod, matinakoay nangra ano kapoten ko Kawas a mitenak to ngaˈayay ratoh o tataˈangay ko hemek. Sapaˈodingaraw to Kawas cangra a midofdof to araaw Ningra. ˈArawhan mirienang to mitosilay demak o sakangaˈay no tireng  ato falocoˈ sanay ko roma tamdaw. Ano ciharateng kita to tao, ano itiniayto i kasakopang a salikaka ato i kilacay a tamdaw, o papakelec to nika lacecay no mita. (Filipi 2:4) O ngaˈayay taˈarawan ci Pawlo, ciharatengay cingra a midimokos to Tisalonika a kasakopang, matira o wama wina a midimokos to wawa.​—ˈOsien ko 1 Tisalonika 2:7, 11, 12.

15. O cima ko sakakaˈay a ciˈinorongay a pasifanaˈ to wawa to Fangcalay Cudad?

¹⁵ Misamaan kita mipadang to paro no lomaˈ no salikaka hani? O romaroma wama wina cowaho ka halafin micada to inoˈ, alatek misaaliay to malohemay Krisciyang mipadang a pasifanaˈ to wawa nangra, anca pacekiwen cangra. Kawra o safalod no Fangcalay Cudad, o pasifanaˈay to wawa a ˈinorong itiniay i wama winaan. (Taneng 23:22; Ifiso 6:1-4) Soˈliˈlin misaaliay ko romaroma wama wina to matiniay a sapadama, hanaca miakoˈiday cangra toninian, kawra awaayto ko ˈinorong nangra pasifanaˈ to wawa cowa ka saan, mamicerid cangra paira to ngaˈayay noka caciyaw ato wawa.

16. Ano pasifanaˈ to wawa no tao to Fangcalay Cudad i, sasinanoten ko manan?

¹⁶ Ano papipasifanaˈen no wama wina ko tao to wawa nangra, cowa ko ngangaˈay cangra mikotay to ˈinorong no wama wina. O romaroma a wama wina soˈlin awaay ko hemek to kimad, kawra pasalatan ko Krisciyang papipasifanaˈ to wawa nangra. Haharatengen no Krisciyang, o padamaay aca cangra pasifanaˈ to Fangcalay Cudad, ao cowa ko malo wama winaay nangra. Ano pasifanaˈ tora wawa i, ira ko wama wina i tatihi a mirienang, ano awa i lomaˈ ko wama wina ngaˈayay pohayen ko cecay malohemay a Krisciyang mirienang tora pacekiway, anca itini i kaˈalomanan a kitiraan a pacekiw. Ho caka ira ko manan tatiihay demak a mafekad. Manaokaniw, o tokel ita i, mamitamorong ko wama wina tora sapatorod no Kawas a ˈinorong, songilaˈen a pasifanaˈ ko wawa.

17. Misamaanay a mihinom ko wawa to paro no lomaˈ?

¹⁷ Mafanaˈ ko wawa maolah to Kawas, midofdof to sapalimoˈot Ningra, lalipahak ko paro no lomaˈ. Patinakoen, mafanaˈ cangra mikangodo to wama wina, mipadang to demak no lomaˈ, anca mipadang to noˈadingoan a demak. ˈAyaw no lenlen, teloc ni Sit ci Lamik o midokoay ci Yihofaan a tamdaw, tiya somowal cingra to wawaan ci Nowa i, sanay ko sowal: “O niˈkakan [ni Yihofa] ko sera, saka maroray kita a matayal, oninito a wawa ko sakahinom no roray ita.” Ya palasawaden ni Yihofa ko noka piˈkak to sera i, malaˈosiayto koni sapairasol a sowal. (Satapangan 5:29; 8:21) Anini, ano minanam ko wawa to Fangcalay Cudad i, mamahinom ko paro no lomaˈ, samanen o papadama cingra to paro no lomaˈ a misiˈayaw to pasangar, hanaca ngaˈay a padama to paro no lomaˈ milakowit to mikikakaay to lenlen a padiing.

18. O manan ko papadama kitanan timolo a misiˈayaw to masamaamaanay a pades?

¹⁸ Anini, ˈalomanay tahapadesay tamdaw ngaˈayay pakayni i pitolon, misimsim to matiliday i Fangcalay Cudad ato micawmaˈ to tamdaw ni Yihofa a milifok to sapahinom. (ˈOsien ko ˈOlic 145:18, 19.) O papadotoc pafeli ci Yihofa to sapahinom i kitanan, tona mafanaˈ toninian i, ano aninito anca noikor, tatimoloto a misiˈayaw to masamaamaanay a pades.