CI TAFONG, o Misawacayay Tamdaw ni Yihofa i Kanata cingra, kiemelay cingra mitosil to mirarakatay awaay ko lomaˈ a tamdaw. Somowalay cingra to cecay ci Pitiro hananay ko ngangan a mirarakatay awaay ko lomaˈ a faˈinayan. Sanay ko sowal: “O sakakaditay a malitemohay ako i lalan cingra. Maacekay ko ˈalomanay tamdaw cingranan, matalaway cingra ngataen no tamdaw. Ano ira ko tayraay sapipadangaw cingranan i, cowa kakahi.” Soˈliˈlin hatira, mataˈlifay ko 14 miheca, cowa ka pisawad ci Tafong mipadang ci Pitiroan.

To cecay a romiˈad, licay han ni Pitiro ci Tafong: “Hano tatayni sa kiso a micara takowanan saw? O tao mira:ayay miliyas takowan, kiso sa, hano mikihar takowanan aki?” Kalasaka dademakan ni Tafong ko tolo a sinael, mitemer to falocoˈ ni Pitiro. Saˈayaw, licayan ci Pitiro to mafanaˈay to iraay ko ngangan no Kawas han? Papiˈosian ci Pitiro to ˈOlic 83:18. Dotoc, mifanaˈan hano mikihar i cingranan, papiˈosian ni Tafong ci Pitiro to Loma 10:13, 14, sanay kora sowal itira “ano cimacimato ko mitahidangay a milongoc to pipadama [ni Yihofa] i, caay kaeca o mamapaˈorip.” Salikor ˈosian ni Tafong ko Matay 9:36, miliyawan papiˈosi ci Pitiro. Sanay kora sinael: “Nengneng sa ci Yis to finawlan i, saadayay sa cingra, nawhani marawraw cangra a matiya o malafelay a siri to awaay ko pakaenay.” Itiyato i, cilosaˈay ci Pitiro a milicay: “O cecay nora malafelay a siri kako han?”

Satapangto mafalic ci Pitiro. Maynoˈayto cingra, misolimet to ngisngis, harikoˈanto koya sapafeli a rikoˈ ni Tafong. Padadotocay ci Pitiro a misolimet to tireng.

To cerid no romiˈad iraay ko nanaman ni Pitiro mitilid to demak no romiˈamiˈad. Saˈayaˈayaw a mitilidan ningra sahetoay o masomaday demak, kawra ikor mafalicayto. O cecay matiliday ningra sanay: “Anini, mafanaˈayto kako to ngangan no Kawas. Nohatini mitolon kako i, ci Yihofa ko mingitangitan. O ngangaˈay  mala widang ako ci Yihofa sa ci Tafong, ano hacowato ngaˈayay mitolon to Kawas, pasowal to maamaan demak i Cingranan, o mamakahi a mitengil Cingra sanay.”

Salikor a mitilidan ni Pitiro o sapafeli to salikaka ningra, sanay a mitilid:

“Anini, coka ngaˈay ko tireng ako. Alatek malitengayto kako! Ano soˈlinto tahanini aca ko ˈorip ako, mafanaˈay kako to mamaˈaraw ko widang ako [ci Tafong], itini i Lakoing. Maˈosiayto namo koni sowal i, mapatayayto kako. Ano maˈaraw namo ko cecay faˈinayan i pikimadan to patay ako i, sacaciyawen cingra, nanay ˈosien namo koni mimingay langdaway a cudad [“Mikayatay to Saka Tahadaˈocaw a Maˈorip”]. * Itira tora cudad somowalay to mamaˈaraw ako ko widang i Lakoing sanay. Pakasoˈlinay ko falocoˈ ako. Kanonoˈan namo salikaka, Pitiro.”

Ikor, pasowalay ko fafahiyan kaka ci Omi: “Maedeng ˈayaw no tosa miheca, tayniay ci Pitiro. Halafinayto miheca, sakina cecay maˈaraw ako ko kahemek ningra. Matawaay ko pising.” Sanay pasowal ci Tafongan: “Aˈosiento ako koni langdaway cudad, ano matemeray ko falocoˈ no safa, maedeng o mikiriwiˈay koni cudad.” Mihayiyay ci Omi a micekiw to Hapinangen ko Soˈlinay a Kimad no Fangcalay Cudad ato Misawacayay Tamdaw ni Yihofa.

Aka a tano papotal no tamdaw a minengneng cangranan, patahekalen ko mihadidiay ato soˈlinay olah to masamaamaanay a tamdaw. (1 Timoti 2:3, 4) Ano mihaen kita i, halatek masemer ko falocoˈ no tao, matira ci Pitiroan kapiliˈan no tao ko papotal, kawra makapahay ko falocoˈ. Papasoˈlinen ita, “o falocoˈ ko minengnengan” no Kawas, papadama to misapoeneray ko falocoˈ a tamdaw, malengaw a cilamit ko kimad i falocoˈ nangra.​—1 Samuil 16:7; Yohani 6:44.