1, 2. (1) Pafelian ni Yihofa kita to manan a tolo noˈadingoan a odoˈ? (2) Oniya lalakaw wa milengo to manan?

ITINI paro no kakarayan o sacihafayay ci Yihofa. (1 Rayray 29:11, 12) O hinapafeliay a Wama ci Yihofa, makahiyay paladaˈ to maolahay to noˈadingoan odoˈ a tamdaw to hafay Ningra. Tada miakoˈiday kita pafeli ci Yihofa to noˈadingoan a odoˈ i kitanan, mahawpay ko (1) Hongti Kitakit no Kawas, (2) mitenak to paˈoripay a lihaf, (3) kalimlaan a soˈlinay kimad i Fangcalay Cudad! Ano caka pinaˈon kita, mamatawal ko nika piakoˈid to noˈadingoan ita a odoˈ, catoka pisalimla tora odoˈ. O sowal ni Yis: “Nawhani ano icowa ko dafong [anca odoˈ] namo i, itira ko falocoˈ namo,” sanay.​—Luka 12:34.

² Haratengen hena, misamaan kita ngaˈ matongal ko olah ato pisalimla to Hongti Kitakit no Kawas, mitosilay a demak ato soˈlinay kimad no Fangcalay Cudad. Ano micekiw kita toni lalakaw i, simsimen a miharateng: Toha sakatangongolaw ko nika olah  to noˈadingoan a odoˈ, wa misamaan kako hani?

3. O manan ko demak noni misasingdiay tamdaw toha sapicakayaw tora matekesay ko ˈaca a cinco? (Nengnengen ko satapangan coka.)

³ ˈOsien ko Matay 13:45, 46. Somowalay ci Yis to cecay sapatinako, o pakayniay to cecay mikilimay to cinco (odoˈ) a misasingdiay tamdaw. Pinaayto miheca mipaliwal to cinco, maedeng adihayayto ko maˈaraway ningra a cinco. Kawra, mahelaay ningra ko cecay matekesay ko ˈaca a cinco, tada mahemekay cingra. Toha sapicakayaw tora cinco, oha papaliwalen ningra ko kihecod a dafong ningra. Pakayra i cingranan ko sowal, oni cinco tada masaka limlaan i cingranan!

4. O olah ita to Hongti Kitakit ano malecaday to olah nora misasingdiay to cinco, wa samaan ko demak ita?

⁴ O manan ko mamananam ita itini toni sapatinako hani? O kimad no Hongti Kitakit mahecaday o matekesay ko ˈaca a cinco, o olah ita to Hongti Kitakit ano malecaday to olah nora misasingdiay to cinco i, o mamakalim a mikinafalah to kihecod no mita to sakala tamdawaw no Hongti Kitakit. (ˈOsien ko Marko 10:28-30.) Nengnengen ita ko tosa milifetan no tamdaw.

5. Pakayni to Hongti Kitakit no Kawas, ci Cakay tangsol sa mimaan to demak?

⁵ Itini i lintad ni Yis, ci Cakay o kakeridan no milisataay o cihafayay cingra, marariday miˈafas to payci no tamdaw cingra. (Luka 19:1-9) Matengil ningra ko mitosilan ni Yis a kimad no Hongti Kitakit, tangsolay mahapinang to tada kalimlaan koni kimad, mitatoy cingra to demak. Pasowal ci Yisan: “Tapangaw, pafelien ako ko pakoyocay a tamdaw to latosa no dafong ako. Ano cima ko nisafanaˈan ako a miala to maan i, sepatento ako a patiko i cingraan.” Mahemekay cingra misawad to miˈafasan ningra a maamaan.

6. Misamaanay a mifalic ci Rosi? Hano mihaen cingra?

⁶ Ci Rosi pakatengilay to lihaf no Hongti Kitakit ˈayaw no pina a miheca, o fafahiyan cingra maolahay madadiiˈ mikalona to fafahiyanto, o kakeridan no matiraay tamdaw a lekakawa. Misatapang ci Rosi minanam to Fangcalay Cudad ikor, mahapinangay ko nika masaka limlaan no kimad no Hongti Kitakit, saka miharatengay to sapifalicaw to niyahan. (1 Korinto 6:9, 10) Misawadan ningra kora kakeridan a ˈinorong, misawad to mahaenay a waywayan a maolah to fafahiyanto. Micadaay to inoˈ ci Rosi isaka 2009 a miheca, 2010 miheca mala misakafahay cingra. O olah ningra ci Yihofaan ato Hongti Kitakit mikikakaay ko nika olah to kaacekan a waywayan.​—Marko 12:29, 30.

7. Samaan ko demak ita ngaˈ padadotoc misarocod to falocoˈ a maolah to Hongti Kitakit no Kawas?

⁷ Toha sakala tamdawaw no Hongti Kitakit no Kawas, adihayay ko noka pifalic ita i nokaˈorip. (Loma 12:2) Kawra oha papadotoc a mihaen to demak, aka a pasalaten ko maamaan a demakan a miˈafas to olah ita to Hongti Kitakit, mahaenay o coos to dafong ato kaacekan a waywayan. (Taneng 4:23; Matay 5:27-29) Sapadamaaw ci Yihofa kitanan padadotoc misarocod to falocoˈ a maolah to Hongti Kitakit, pafeliayho to roma matekesay ko ˈaca a odoˈ.

8. (1) Hano o tadamaanay a dafong mitelian i sera a koreng sa ci Pawlo to mitosilay demak? (2) Misamaanay paihekal ci Pawlo to nika olah to mitosilay demak?

⁸ Patorodan ni Yis kita to mitenakay ato pasifanaˈay to Hongti Kitakit a demak.  (Matay 28:19, 20) Misalimlaay ci Pawlo to mitosilay, ora demak malecaday o “tadamaanay a dafong” mitelian i “sera a koreng,” sanay. (2 Korinto 4:7; 1 Timoti 1:12) O cowa ka lefot a “sera a koreng” kita, kawra ora mitenakan ita a ratoh o sakaciˈorip no tamdamdaw. Mankora, sowal sa ci Pawlo: Pakayni to ngaˈayay ratoh, makalim kako midemak to maamaan a demakan, ho mapatenak ko ngaˈayay ratoh i ˈalomanay tamdaw. (1 Korinto 9:23) O olah ni Pawlo to mitosilay micolohay cingranan misaˈicel a padama to tamdaw malo Krisciyang. (ˈOsien ko Loma 1:14, 15; 2 Timoti 4:2.) O matiniay a noka olah padamaay cingranan a pakaremo to saroero padotoc a mitosil. (1 Tisalonika 2:2) Misamaan kita matira ci Pawloan a maolah to mitosilay demak hani?

9. Samaan paihekal kita to nika olah to mitosilay a demak?

⁹ Maolahay to mitosilay demak ci Pawlo, miˈametay to toki mitenak to kimad. Ngaˈayay todongen ita ci Pawlo ato isaka cecayay hahekalan a Krisciyang, itini icowacowa kitiraan a misawacay, anca pakalomalomaˈan a mitosil. (Dmak 5:42; 20:20) Ano oha ngangaˈay kita i, haratengen ko kahirahiraay a noka matayal, mala padamaay misakafahay anca miceriday misakafahay, minanam to roma kitakit a sasowalen, malinah tayra i roma niyaroˈ, anca i roma a kakitakitan.​—Dmak 16:9, 10.

10. Misaˈicelay ci Alin mitosil, teloc milifokay to manan sapalemed?

¹⁰ Nengnengen ko tinakoan ni Alin. Cowaho ka ciraramod a fafahiyan salikaka. Makalimay to sakatayraaw mitosil to naitiniay i Rowasiya a malinahay a pacarcaray tamdaw. Isaka 1993 miheca, mirienangay to sano Rowasiyaay sowal a kapot i Niwyok, itiya 20 aca ko mitosilay. Ci Alin 20 mihecaan matayal tora kilac, kawra saan ko sowal ningra: “Cowaho ka malaymay kono Rowasiya a sowal ako.” Nikawrira, kamayanay palemeden ni Yihofa cingra atora itiraay a mitosilay. Anini, itini i Niwyok a pala enemayto ko sano Rowasiya sowal a kasakopang. O mapadamaay ni Alin 15 ko micadaay to inoˈ, o romaroma nangra o misakafahay, matayalay i Pitil anca malo malohemay malitengay. Sanay ko sowal ni Alin: “Awaay ko maharatengay ako a roma demakan to pairaay to hatiniay ko nika adihay a hemek i takowanan.” Hay, misalimlaay to mitosilay demak cingra!

11. Ano padadotoc a mitosil itini pakidemay a saroero, papaira to manan ngaˈayay a teloc?

¹¹ Mahecaday kita ci Pawloan a misalimla to mitosilay demak, itini i saroero padadotocay a mitosil. (Dmak 14:19-22) Isaka 1930 tangasa 1940 a hahekalan, itiniay i Padaka a salikaka tahacadaay to pakidemay a saroero, kawra fanekfekayho cangra mitosil.  Toha sapidamaaw to fadangalan a mitosil, marariday tayra i hoing cangra. Isaka 1943 miheca, salikaka ci Nolo pakayni to kapilowid i Saˈakawangay Hoing no Padaka, saan ko sowal ningra: “Oni noka pilowid, o nano ˈicel namo. Ano caka padadotoc ko mitosilay tamdaw i, cowa ito ko tatayni i hoing a milowid to fadangalan ita mitosil. Kawra, tona o kamo ko sakakiemel no icowacowaay salikaka padadotoc a mitosil, hato iraay ko mahaenay a minaroˈan. Fanekfekay ko tamdaw no Tapang, hato pakalowidayto kamo.” Itini i romaroma kitakit a salikaka fanekfekay a milowid tono hoing a demakan. Maˈaraway ita, o olah to mitosilay demak papadama kitanan pakaremo to talaw, maroero padadotocayho a mitosil kita.

12. Itini mitosilay demak, wa samaan ko saˈosi no falocoˈ iso?

¹² Pakayni to mitosilay demak o matekesay ko ˈaca a odoˈ to sapafeli ni Yihofa ano saan a minengneng kita i, cowa ko sapisaˈosiaw aca to toki a mitosil kita. O mamisaˈicel a milaheci to misawacayay demak. (Dmak 20:24; 2 Timoti 4:5) Pasifanaˈen ita to manan ko tao hani? Sinanoten ita ko saka tolo a noˈadingoan a odoˈ.

13, 14. (1) Oya nisowalan ni Yis itini i Matay 13:52 a “paˈaririan (pasokoan)”, o manan kora? (2) Misamaan mitomes tora “paˈaririan (pasokoan)” no mita?

¹³ Saka tolo noˈadingoan a odoˈ i, o kimad no Fangcalay Cudad. O lalangian no soˈlinay kimad ci Yihofa. (2 Samuil 7:28; ˈOlic 31:5) O hinapafeliay ko Wama, makalimay paladaˈ to soˈlinay kimad i midokoay Cingranan a tamdaw. Tiya pakatengil to ngaˈayay ratoh, misatapangayto a misoped tora kimad, mikitini i picekiw to Fangcalay Cudad ato mitepangan cudad, mirienang to taykay ato saˈopo a mihaen. O mananamay ita naiti:yaho tahanini a kimad, matiraay ya nisowalan ni Yis a “paˈaririan” no “faelohay ato matelangay a dafong.” (ˈOsien ko Matay 13:52.) Ano hatira o mikarkaray to odoˈ ko noka pikilim to soˈlinay kimad i, o papadamaen ni Yihofa kita miparo to faelohay kimad itini i “paˈaririan” ita. (ˈOsien ko Taneng 2:4-7.) Wa misamaan to demak hani?

¹⁴ O mamicerid kita a misongilaˈ a micekiw to Fangcalay Cudad ato mitepangan cudad, ngaˈ mahela ita ko “faelohay” kimad, oyaan cowaho ka mananam ita a kimad no Fangcalay Cudad. (Yosuwa 1:8, 9; ˈOlic 1:2, 3) Isaka 1879 miheca saka 7 folad a Mikecolay, sanay ko sowal: “O soˈlinay kimad malecaday o mimingay hana i kohkohan, italiyok nira malengaway ko mararaway kimad a talod, maedengay mipatay to sano hanaay a kimad. Ano sapakatamaaw kiso toni hana misaˈicel kiso wangaˈ. . . . Ano sapipitinaw kiso miroho a mipitin wangaˈ. Aka marenecen to cecay aca a sano hanaay a kimad. . . . Padadotocen a mipitin, padadotocen a mikilim.” Hay, mihaen kita a makalim ko falocoˈ a mitomes to paˈaririan no soˈlinay kimad ita.

15. (1) O manan a soˈlinay kimad mahecaday o “matelangay” a odoˈ? (2) O manan ko misalimlaan no miso a noˈadingoan odoˈ?

¹⁵ Isalakat adihayay ko mananamay ita soˈlinay kimad, oniya kimad mahecaday o “matelangay” a odoˈ. Itini i lalan no Krisciyang masopeday ita ko manan a odoˈ hani? Mananamay ita ci Yihofa ko misangaˈay a Tatapangan o pipowaran no ˈorip, iraay ko ihekalay a araaw Ningra. Mananamayho ita to sidaˈitay a pafeli ko Kawas to wawa Ningra malo sapatefoc, pakaliyas kita to raraw ato patay. Roma i, mananamay ita to papalahedawen no Hongti Kitakit ko kihecod a roray, iraay ko hatokel no tamdamdaw midaˈoc a rihaday ko ˈorip i sakowan no Hongti Kitakit.​—Yohani 3:16; Paˈarawan 4:11; 21:3, 4.

16. Ano mifalic ko likakawa no Kawas to pitadtad to soˈlinay kimad i, sasamaan ko demak ita?

 ¹⁶ Mataˈlif ko toki, likakawa no Kawas nolatek mifalicay to noka pitadtad to sapairasol no Fangcalay Cudad ato pitadtad to sinael. Mihaenay haw i, palaken ita ko toki misongilaˈ a micekiw ato misimsim a misinanot tora faelohay a pitadtad. (Dmak 17:11; 1 Timoti 4:15) Cowa ko nika fanaˈ aca to faelohay a noka pitadtad, oha mamafanaˈho to kalalaˈed nora faelohay ato matelangay a noka pitadtad. Ano inaneng kita micekiw, ora faelohay a soˈlinay kimad o mamaparo i noˈadingoan a paˈaririan. Mihaen a misaˈicel kita hano ciepocay i kitanan hani?

17, 18. Samaanay padama ko fangcalay saocor i kitanan?

¹⁷ Na somowalay ci Yis, papadama ko fangcalay saocor kitanan pakaharateng to mananamayto ita a soˈlinay kimad. (Yohani 14:25, 26) Misamaanay a padama to mitosilay demak hani? Nengnengen ko nalifetan ni Pitiro. Isaka 1970 miheca 19 ko mihecaan ni Pitiro, itiya comod sanayho i Pitil no Ikok. O cecay a romiˈad, pakalomalomaˈan mitosil cingra i, malitemohay ko cecay cingisngisay a faˈinayan, maedeng 50 ko mihecaan. Licay hananay ni Pitiro koni faˈinayan to mamakahi cingra a minanam to Fangcalay Cudad hokira? O misasingsiay no Yutaya kako sanay, caay ka harateng to aaira ko papasifanaˈ cingranan to Fangcalay Cudad. Sapilifetaw cingra ci Pitiroan, licay saan: “Oy! Kapahaw! O Taniil a cudad, tano manan a sowal a matilid saw?” Pacaˈof ci Pitiro: “Tano Araman a sowal a mitilid ko pinapina nora cudad.” Sanay milomal ci Pitiro: “Ora Yutaya a misasingsiay, macekokay pakatengil to caˈof ako, kawra, o kako ko macekokay i takowanan! Hano mafanaˈ kako tora caˈof saw! Ikor minokayto kako, mitihedakan ako ko Mikecolay ato Katalipaˈelal! ˈArawhan, na maˈosiayto ako lalakaw somowalay to tano Araman a sowal mitilid ci Taniil.” (Taniil 2:4) Mihaenay, padamaay ko fangcalay saocor kitanan pakaharateng to masopeday ita kimad i noˈadingoan a paˈaririan.​—Luka 12:11, 12; 21:13-15.

¹⁸ Ano misalimlaay kita to taneng ni Yihofa, wa taˈangay ko kalim no falocoˈ sapitomesaw tora paˈaririan to faelohay ato matelangay a odoˈ. Toha sapihaenaw to demak, micerid a micekiw to Fangcalay Cudad, hongaˈ matongal ko olah to Kawas ato miakoˈiday a falocoˈ, hanaca o mamalo ngaˈayay a mitosilay.

19. Misamaanay hano simawen ko noˈadingoan a odoˈ no niyah?

¹⁹ Toni lalakaw mananamay ita, misalimla to noˈadingoan a odoˈ tada o masaka limlaan a demak. Kawra, ci Satan atoniya hekal misahalakaay to sapifasawaw to olah ita to noˈadingoan a odoˈ, kalasaka dademakay to sakacihafayaw a falocoˈ, kadofah ko kaˈorip anca pasengiay to saaroˈan a mikayhid kitanan. Nanaˈonen ita, aka pisafayaˈ to noˈadingoan a odoˈ. Tarokos ci Yohani patalipaˈelalay kitanan, oni hekal ato ˈanof no tireng o mamala sawad sanay. (1 Yohani 2:15-17) Padadotocen ita miakoˈid ci Yihofa, misimaw tono niyah a noˈadingoan a odoˈ.

20. Sasamaan a misaˈosi to falocoˈ kiso misimaw tono niyah a noˈadingoan a odoˈ?

²⁰ Falahen ita ko mamiconged kitanan maolah to Hongti Kitakit a maamaan a demak, padadotoc ˈifowa to mitosilay to sakaciˈorip a lihaf, padadotoc a mikilim to soˈlinay kimad no Fangacalay Cudad. Ano mihaen to demak kita wa “manaˈang i kakarayan ko caay ko mamala sawad a malo dafong [odoˈ] namo. Nawhani caay ko mamaraod no mitakaway, caay ko mamakaen no aˈayad itira. Nawhani ano icowa ko dafong [odoˈ] namo i, itira ko falocoˈ namo.”​ —Luka 12:33, 34.