1, 2. (1) Pakayni to ˈalomanay a tamdaw, o manan ko masaka limlaan nangra? (2) Misarocod kita midopo to satadamaanay noka pikowan ni Yihofa hano o masaka limlaan hani?

ANINI, pakayni to ˈalomanay a tamdaw, o payci ko masaka limlaan nangra. Misamacayay cangra mietan to payci anca mitaling to hafay nangra. O romaroma tamdaw misakaretengay to paro no lomaˈ, sakatanoktok no tireng ato saaroˈan no niyah.

² ˈArawhan, o masaka limlaan a demak i, o sapisawacayaw to satadamaanay noka pikowan ni Yihofa. Nolatekay, tona matayalay kita to sakaˈorip anca marawraway to pasangar no niyah, hato matawalayto o manan ko masaka limlaan a demak. Kawra, ano misarocod kita midopo to satadamaanay noka pikowan ni Yihofa i, papadama kitanan a misiˈayaw to maamaan a roray nokaˈorip, miingid ci Yihofaan.

3. Pakayni i satadamaanay noka pikowan no Kawas, o manan ko misalalicayan ni Satan?

³ Ci Akoma Satan misalalicayay to satadamaanay noka pikowan ni Yihofa to matatodongay hokira. O sowal ni Satan, o mariˈangay  a mikowanay ko Kawas, maˈidiay paladaˈ to tamdaw sanay. Tatodong nora sowal, o tamdaw ko mikowan to niyah wangaˈ mahemek sanay. (Satapangan 3:1-5) O roma i, awaay ko soˈlinay ko falocoˈ a madimadiay to Kawas, ano tahalifa sa to pasangar i, cowato kakahi a midofdof to Kawas sanay. (Yopu 2:4, 5) Toha sapacaˈofaw to pisalalicay ni Satan, pasalatan no Kawas ko tamdaw a papikowan to cecay a laliyadan, ho mahapinang to manan ko teloc ano caka picada to pikowan no Kawas.

4. O satadamaanay noka pikowan a lacongis hano misaaliay to sapisaysayaw?

⁴ Mafanaˈay ci Yihofa to mararaway ko sowal ni Satan. Hay, ano hatiraay i, hano pasalaten ni Yihofa padadotoc kora lacongis, pafelien ci Satan to toki a misawacay to soˈlinay ko sowal ningra hani? Samanen oni demak milingatay to coyoh ato tamdamdaw. (ˈOsien ko ˈOlic 83:18.) Micoliay ci Atam aci Ifa to pikowan no Kawas, mikihatiyaay ko ˈalomanay tamdaw, alatek soˈlinay kora sowal ni Satan, sanay ko roma tamdaw. Ano cahoka masaysay kora lacongis, wa cowa ko papatikor a dipayal ko kakarayan ato sera a mapolong. Kawra, ano masaysay kora lacongis ngaˈ, o madimadiay a coyoh ato tamdamdaw ngangaˈay tahadaˈoc a makowan no Kawas, patikor a dipayal ko tahepo no kakarayan.​—Ifiso 1:9, 10.

5. Misamaan kita paihekal to nika pidopo to pikowan no Kawas?

⁵ Ano ikor, o satadamaanay noka pikowan no Kawas o mamasawacay too matatodongay, o pikowan ni Satan ato tamdaw o mamasaheci a mapalasawad. Itiyato i, o pakaynian no Kawas i pikowan no Misiya Hongti Kitakit ko papaira to sakalipahak, mamisawacay ko madimadiay a tamdaw, o ngangaˈay a mitiˈer ko tamdaw a midopo to pikowan no Kawas. (Isaya 45:23, 24) Makalimay ko falocoˈ ita madimadi a tahadaˈoc to Kawas. Mihaenay haw i, tada masaka limlaan ano mafanaˈ to manan ko mahawpay nora lacongis.

6. Misawacay to matatodongay ko satadamaanay noka pikowan no Kawas mikikakaay to manan?

⁶ Pakaynien i polong a tamdaw, misawacay to matatodongay ko satadamaanay noka pikowan ni Yihofa mikikakaay ko nika masaka limlaan to sakalipahak no mita. Hay, ora sowal, o pilidong to tamdamdaw cowa ko masaka limlaan, anca cowa pikihar ko Kawas kitanan o sanay han? Cowa ka hatira. Misamaanay hani?

7, 8. O papalaˈosi ko Kawas to nikiˈokan Ningra hano milingatay to satadamaanay noka pikowan Ningra?

⁷ Misakaretengay ci Yihofa a maolah to tamdamdaw, makalimay Cingra patafang to ˈorip no wawa, to saka midaˈocaw a maˈorip kita. (Yohani 3:16; 1 Yohani 4:9) Ano caka palaˈosien ni Yihofa ko mikiˈokan Ningra, caka pilidong to moecelay a tamdaw i, wa cisowal ci Akoma to misamangahay ko Kawas, cowa ka sadafdaf ko pikowan Ningra, samanen cowa pafeli to ngaˈayay dafong i tamdaw wa saan. Ora towa milikafay to Kawas a tamdaw wa mihaen ko sowal: “O mamiliyaw a tayni ci Kristo, saan ko niketonan a sowal i, icowaayto saw? Nai satapangan no hekal tahanini i, awaay ko kafalican no maamaan,” saan. (2 Pitiro 3:3, 4) Misahatiraay, mamisawacay ci Yihofa to matatodongay ko pikowan Ningra, halo o mamilidong to midofdofay a tamdaw. (ˈOsien ko Isaya 55:10, 11.) O pikowan ni Yihofa misalalangiay to olah. O papasoˈlinen ita to maolahay ci Yihofa to madimadiay a sikawdan  Ningra, misalimla halo mahemeken to nika madimadi nangra.​—Kasadakan 34:6.

⁸ O satadamaanay noka pikowan ni Yihofa tada o masaka limlaan, kawra awaay ko epoc ita itini noka pinengneng ni Yihofa, cowa pisakareteng to sapilidongaw kitanan cowa ka saan. Papadotocen ita paira ko matatodongay noka pinengneng to lacongis pakayni to satadamaanay noka pikowan ato sapilidongaw ni Yihofa, ano mihaen wa ngangaˈay kita misamacay to mikikakaay ko nika masaka limlaan a demakan halo midopo to moecelay a sakowan ni Yihofa.

9. Pakayni ci Yopuan, o manan ko sowal ni Satan? (Nengnengen ko satapangan coka.)

⁹ O saˈayaway a matilid ko Yopu a cudad no Fangcalay Cudad. Naitini toni cudad maˈaraway ita, matatodong ko noka pinengneng to demak tada o masaka limlaan. Somowalay ci Satan, ano tahacada ci Yopu to pades wa tangsol a miliyas to Kawas sanay, miowingay to Kawas a pasemsem ci Yopuan. Cowa ka pihaen ci Yihofa, kawra pasalatan Ningra papilifet ci Yopuan, mihaen a pasowal ci Satanan: “Miso sa a harateng a miala to dafong ningra a maemin.” (ˈOsien ko Yopu 1:7-12.) Itini i ˈapotoay a toki, palahedawan ni Satan ko matayalay ningra, sakaˈorip a maamaan ato mamoetep a kanonoˈan a wawa ningra. Ano nengnengen hato o Kawas ko mipadesay ci Yopuan. (Yopu 1:13-19) Paadadaanho ni Satan ci Yopu. (Yopu 2:7) Kasomadan ni Yopu i, milokesay ko fafahi, ano oya misawidawidangay a tatolo tamdaw pasowalay a midokaˈ to falocoˈ ningra.​—Yopu 2:9; 3:11; 16:2.

10. (1) Samaanay paihekal ci Yopu to nika madimadi ningra to Kawas? (2) O mamifalic ci Yopu to manan a pakayraan?

¹⁰ Nawhani, mitafoay ci Yopu to madimadi tahatolas, cowa piliyas to Kawas, misawacayay koni to mararaway ko sapakokot ni Satan. (Yopu 27:5) Nikawrira, malahedaway ko matatodongay noka pinengneng ni Yopu, sapisawacayaw to moecelay cingra, misaaliay to pasowalen no Kawas cingra hano misemsem cingra. (Yopu 7:20; 13:24) Alatek wa saan kita, mana eca ka hatira ko harateng ni Yopu saw, hati:raay ko nika roray ningra. Kawra, maˈaraway no Kawas to sasalofen ci Yopu. Hay, samaanan ni Yihofa padama ci Yopu hani?

11, 12. (1) Samaanan ni Yihofa padama ci Yopu? (2) Samaanayto ko harateng ato sowal ni Yopu?

¹¹ Matiliday i Yopu saka 38 tahira saka 41 fedengan ko sowal no Kawas. Itini toni sepat fedengan, cowa pisaheci ko Kawas pasowal to lalangian no kapisemsem ni Yopu.  Samanen cowa ko sapitadtadaw to misamaanay hano misemsem cingra, hato sapisawacayaw ko Kawas to nika o moecelay ko Niyah. Pasifanaˈay ci Yihofa ci Yopuan, to nika o mimingay ko tamdaw, awaay ko pakayraan palalini to satakaraway a Kawas. Padamaan ni Yihofa, to sasasinanoten ni Yopu ko masaka limlaan a demak. (ˈOsien ko Yopu 38:18-21.) O sowal no Kawas padamaay ci Yopuan mifalic to kapinengneng ningra.

¹² Harek saho misemsem ci Yopu, patodicek han ni Yihofa mirikec cingra, tada pakinaliay kora han? Cowa, caay ka haen ko harateng ni Yopu. Ikor mifalicay ci Yopu, micada to sasalof no Kawas, saan a somowal cingra: “Orasaka, mangodoto kako toya nisowalan ako a sowal, aroˈ sato kako i sera ato i ˈafoˈafoan a mifalic to falocoˈ,” sanay. Sapalimoˈot ni Yihofa ihekalay mikowad to tamdaw, paˈicel ci Yopuan. (Yopu 42:1-6) O roma i, kaemangay a Ilihuan pasowalay to matatodongay a sapalimoˈot. (Yopu 32:5-10) Ta mitengil ci Yopu to sapalimoˈot a mifalic ikor, patahekalay ko Kawas to nika hemek noka madimadi ni Yopu.​—Yopu 42:7, 8.

13. Mataˈlifto kora pades i, ciepocayho ci Yopuan koya sapalimoˈot ni Yihofa han?

¹³ Mataˈlifto kora pades i, ciepocayho ci Yopuan koya sapalimoˈot ni Yihofa han? Soˈlina “i saikoikorayto no ˈorip ni Yopu i, palemeden [ni Yihofa] cingra, ikaka haca noya iˈayaway a ˈorip ningra ko nika adihayto no nilayapan ningra, papito ko faˈinayan a wawa, tatolo ko fafahiyan a wawa ningra,” kawra halafinho ngaˈ masaysayay ko falocoˈ to nika malahedaw no hafay. (Yopu 42:12-14) Maedeng maˈilolay toya mapatayay a wawa, latelatek maˈiwilay ko falocoˈ. Soˈlinto mamafanaˈ no ikor to lalangian no pisemsem ano han i, wa iraho ko hatiniay a harateng alatek: Misamaanay hano o kako ko tahalifaay to mahaenay a roray saw? Ano mananto ko harateng ni Yopu, deng ano micalepan a misimsim ko sapalimoˈot no Kawas, o mamatafoto ningra ko matatodongay a kapinengneng halo masayar ko falocoˈ.​—ˈOlic 94:19.

14. O manan ko mamananam ita to nalifetan ni Yopu?

¹⁴ Nalifetan ni Yopu papadama kitanan ira ko matatodongay noka pinengneng halo malifok ko sasayar. Tereken ni Yihofa koni maˈoningay tahanini, “o sapasifanaˈ i titaanan to sakakodait ita ta mapaˈicel no Fangcalay Cudad kita to sapasayraaw ita i kacifalocoˈan.” (Loma 15:4) O mamananam ita nai ci Yopuan, aka a misamacay i pasangar no niyah, mawalawal to mamisakiemel a midopo to satadamaanay noka pikowan no Kawas. Matira ci Yopuan, soˈliˈlin ano  tahapades kamayan madimadi to Kawas, midopo to pikowan no Kawas.

15. Ano tahapades kita madimadi to Kawas, papalaˈosi to manan a patosokan hani?

¹⁵ Haratengen, ano tahapades i, mitafo to madimadi, papalaˈosi to manan a patosokan, mamasayarto ko falocoˈ. Ano tahapades kita cowa ko nika keter ni Yihofa kitanan. ˈArawhan pairaay to toki kitanan patahekal to midopoay to satadamaanay noka pikowan no Kawas. (Taneng 27:11) Ano miemem kita mamilayap to “kahemek no Kawas”, hanaca matongal ko nika pasoˈlin to hanoikoran. (ˈOsien ko Loma 5:3-5.) Nai tinakoan ni Yopu maˈaraway ita ci Yihofa matomesay ko sidaˈit. (Yakop 5:11) Pasoˈlinen ita, o papalifon ci Yihofa to polong midopoay to satadamaanay noka pikowan Ningra a tamdaw, mafanaˈ toni papadama kitanan mihadidi, lipahaken a miemem.​—Kolosay 1:11.

16. Misamaanay hano patalipaˈelalen ko niyah, midopo to satadamaanay noka pikowan ni Yihofa o masaka limlaan hani?

¹⁶ Nikawrira, padadotoc a midopo to satadamaanay noka pikowan ni Yihofa cowa ko madoloay, nolatekay, mapaˈkelay no pasangar kita. Kawra ano pakidem kita cariraw to malifaay a demak, o mamisataˈangay to mimingay a pasangar. Mankora, ano tahalifa kita to pades i, patalipaˈelalen ko niyah, midopo to satadamaanay noka pikowan ni Yihofa ko sakalimlaan a demak.

17. Misamaanay mararid mitosil papadama kitanan a misamacay to sakalimlaan a demak?

¹⁷ Ano mararid a mitosil kita, o papadadotoc a misamacay to sakalimlaan a demak. O cecay ci Reni a fafahiyan salikaka halafinayto adada ko tireng, macongfongay maekangay cingra. Ano paising cingra i, mitosilan ko matayalay, adadaay tamdaw ato milisoˈay tamdaw. Miniwingay to tosa ira ko kalitosa a lipay, 80 ko toki a misawacay cingra. Ya mamapatay cingra, padadotocay a midopo to satadamaanay noka pikowan ni Yihofa, padama cingranan rihaday ko falocoˈ.

18. Misaˈicel a midopo to satadamaanay noka pikowan ni Yihofa iraay ko manan a epoc? Sadaken ko tinakoan.

¹⁸ Ano soˈlinto tahalifa kita to saroero ato pades no kaˈorip, dopoenho ita ko satadamaanay noka pikowan ni Yihofa. O cecay ci Cinifo a fafahiyan salikaka, toloay romiˈad i hikociw a mitala to hikoki to sapinokayaw. Kinapinapinaay a malakisaw ko hikoki, marorayay matoˈolay cingra, kawra cowa ka haharateng han ningra kora demak, ˈarawhan mitolonay to Kawas padama cingranan misawacay to mitalaay to hikoki a tamdaw, teloc mapalilamay ningra ko adihayay a cudad. Saan ko sowal ningra: “Soˈlin malifa ko hatiniay a demak, kawra malifetay ako ko sapadama ni Yihofa, paˈicel takowanan, papitenak to ngangan Ningra, tada masaka hemekan koni nalifetan.”

19. O matatodongay a pihakelongan ko mitooran ita, mamisamaan to demak kita?

¹⁹ O matatodongay a pihakelongan midopoay to satadamaanay noka pikowan ni Yihofa, mararaway a pihakelongan cowa pihaen. O matatodongay a pihakelongan ko mitooran ita, oha mamisaˈicel kita a midopo to satadamaanay noka pikowan ni Yihofa.

20. Ano midopo kiso to satadamaanay noka pikowan no Kawas, samaanay ko falocoˈ ni Yihofa?

²⁰ Midopo kita to satadamaanay noka pikowan no Kawas, miemem to pades, madimadi a matayal, cowa ko mamatawal ni Yihofa. (ˈOlic 18:25) Ilaenoay lalakaw mamilengo, o satadamaanay noka pikowan ni Yihofa hano o sasarocoden iso ko falocoˈ a midopo, ato misamaan to demak kiso.