PAKASOˈLINAY kita, itini ‘salikoray romiˈad,’ mikayatay ci Yihofa to likakawa Ningra, padama to finawlan Ningra miingid Cingraanan. (2 Timoti 3:1) Kawra oha mamidofdof kita o kahacecay tamdaw Cingranan. O pakayraan ita malecaday o nolitengan a Israil tamdaw, itini cangra i kohkohan matengil ko honi no laepa, o tatangsol a midemak.

Palimoˈotan ni Yihofa ci Mosi misangaˈ to tosa ekim a laepa, ‘sapisaˈopo to finawlan ato miowaw to finawlan milinah to kopang.’ (Saˈosi 10:2) Pakayni sapilasil to cowa kalecad a sakayat, o saysi tano cowa kalecad a pakayraan mihoni to laepa. (Saˈosi 10:3-8) Anini, o finawlan no Kawas tano cowa kalecad a pakayraan milifok to sakayat, oniya lalakaw wa milengo to tolo pakayraan: Taykay, sapahatatanam to kantok, mikitini kasakopang milifok to safaelohay a sakayat.

Ano misaali ci Yihofa to ‘polong a finawlan’ tayra i kawaliay fawahan no pakopangan a masaˈopo i, wa palecaden no saysi ko tosa a laepa mihoni. (Saˈosi 10:3) Itiniay taliyok no pakopangan a pataloˈan a polong finacadan wa pakatengil to honi no laepa, itiniay i ngata no fawahan no pakopangan a tamdaw wa kaliki a tahira, kawra o miraayay ko kitiraan a tamdaw wa mihadak to adihayay toki ato ˈicel. Ano maraayto mangatato, misaaliay ci Yihofa to polong a tamdaw masaˈopo, mitengil to sakayat Ningra.

Anini, cowato kalecad kita to Israil tamdaw masaˈopo i fawahan no pakopangan, kawra kamayan o mamasaˈopo ato salikaka, tinakoen mirienang to kasapala taykay anca roma mikiriwiˈay a saˈopo. Itini pitaykayan, wa matengil ita ko kalimlaan a salasil ato sakayat. Itini cowacowa pala a salikaka ngaˈayay milifok to malecaday a kamok, mihaenay o polong mirienangay toniya taykay a tamdaw ngaˈayay lipahak a malacafay to salikaka. O roma tamdaw maraayay ko kitiraan, wa mihadak to adihayay ˈicel ngaˈ ngaˈay mirienang to taykay, kawra tada ciepocay mihaen to demak sanay cangra.

Mihaenay, itiniay i maraayay ko kitiraan a salikaka sasamaan hani? Misaka dademakan no likakawa no Kawas ko wangcan, wa ngaˈay cangra mitengil a minengneng to malecaday a kamok, micada to olah no taˈangayay paro no lomaˈ no Kawas. Tinakoen kinacecayay o taypiyaw no congpo milisoˈ to Pining i, pasadakan no Fenpo ko kamok tayra i Aelite no Niler. Oniya mimingay niyaroˈ itiniay tafotafokan no Sahara, adihayay ko sikitang. Itiya 21 ko salikaka ato pacekiwan minengnengay to kamok, soˈlin maraayay ko kitiraan nangra, kawra hato malacafayay to  44,131 a salikaka mirienang toniya mikiriwiˈay a saˈopo. Cecay salikaka itini sapatikami to Fenpo sanay: “Tada miakoˈiday kako pasadak kamo to kamok, malifetay niyam ko soˈliˈlinay a olah.”

Itini i kohkohan ko Israil tamdaw i, ano matengil ko pihoni no saysi to cecay laepa i, ‘edengan o ˈaˈideman’ ko tatayra i pakopangan masaˈopo, oniya ˈaˈideman o mikeriday i lalomaˈ no Israil tamdaw. (Saˈosi 10:4) Wa malifok nangra ko sakayat ato sapahatatanam ni Mosi, tano ngaˈayay a pakayraan mikerid to finacadan no niyah. O masalalomaˈay a ˈaˈideman kiso, maedeng o mamisamacay ko harateng iso, tayra a micada to sakayat.

Anini, cowa ko ˈaˈideman no kasakopang ko malohemay malitengay, cowa ko mamiroero cangra to salikaka. (1 Pitiro 5:1-3) Wa misarocod cangra midimokos to siri no Kawas. Mihaenay, ano mihadak ko likakawa no Kawas to sapahatatanam, tinakoen mitahidang cangranan mirienang to Sapahatatanam to Ciˈinorongay a Kantok i, makahiay cangra a midemak, micada to sapahatatanam. Oniya pihatatanam wa padama to malohemay malitengay tano ngaˈayay a pakayraan midimokos to kasakopang. Mihaen, o malohemay malitengay ato midimokosan nangra a tamdaw wa matongal ko piingid ci Yihofaan. Soˈlin cowaho pirienang kiso toniya pihatatanam, itihiay iso micadaay to sapahatatanam a salikaka maedeng adihayay ko sadama tisowanan.

Latekay matengilay no Israil tamdaw ko ‘macalohay a honi no laepa’ no saysi, paihkalay konini to misaaliay ci Yihofa to polong no Israil milinah to kopang a malingad. (Saˈosi 10:5, 6) Ano malinah ko Israil tamdaw i masieroday, kahacecay tamdaw iraay ko tayal. Kawra o roma tamdaw cowa ka makahi a malinah. Misamanay hani?

Harateng no roma tamdaw tada marariday a mihoni to laepa, anca fahal sanay nolatekay. Ano macokacok ko toˈem i fafekang no pakopangan, o mamilinahto ko Israil to kopang, kawra ‘o katerek no toˈem latekay mikitini picoreman no cidal tangasa papacem,’ latekay ‘tosaay romiˈad, cecayay folad’ a materek, anca halafinay a tatokian. (Saˈosi 9:21, 22) Kinapinaay ko Israil a malinah hani? Itini Saˈosi saka 33 fedengan masowalay ko 40 a kalinahan nangra a pala.

Latekay, o pakopangan iraay ko lidong. Itini ‘kakahaday a katalawan a kohkoh,’ o hatiniay a kitiraan tada misolotay to tamdaw. (Limoˈot 1:19) O roma Israil tamdaw calemcemay to cowa ka ngaˈay ko kalinahan noikor, masa caka makahi a malinah.

Ano milinah to kopang ko Israil tamdaw i, mihadidiay mitala ko roma tamdaw. Soˈlin matengilay no ˈalomanay ko honi no laepa, kawra cowa ka ngaˈay malecad ko kalingad no polong a tamdaw. Sakinacecay no saysi mihoni to macalohay a laepa i, i kawaliay no pakopangan a Yuta, Isakar ato Cipulun ngasaw ko sasalakat a malingad. (Saˈosi 2:3-7; 10:5, 6) Miliyasto cangra i, mihoni ko saysi to sakatosa a laepa, o katimolay tolo a ngasaw ko mamidotoc a malingad. Ikor miliyaw ko sasysi mihoni to laepa, tahira ka lingadan no polong a tamdaw ko tolas.

Latekay, pasangaray kiso micada to pisalof no likakawa alatek. Dadotodotoc sanay ko kafalic alatek, hato awaayto ko pinang iso, anca marenecay kiso toya telang a limasmas, caka makahi a mifalic. Ano samaanto ko lalangian, pasangaran nanay kiso mananam to faelohay a limasmas, misaaliay to halafinay a toki misalof. Soˈlin mahaen, ano misarocod kiso a midofdof, wa pakaˈaraw to ngaˈayay no kafalic, wa ngaˈayho pakahemek ci Yihofaan.

Itini lintad ni Mosi, mikeridan ni Yihofa ko pinaay soˈot ˈofad a tamdaw milakowit to kohkohan. Ano cowa ko pidimokos ni Yihofa, cowa ko mamaˈorip cangra. Itini salikoray romiˈad, wa padadotoc ci Yihofa mikerid kitaanan, padama kitaanan miingid Cingraanan, matongal ko tanektek no pakasoˈlin Cingraanan. Mihaenay, nanay misetek kita to falocoˈ pasayra i madimadiay a Israil tamdaw minanam, ano mahoni ko ‘laepa’ i, tangsol a midemak!