1. Samanay ko pinengneng ni Yihofa kitaanan o kahacecay tamdaw?

MISOLOTAN ni Yihofa kita o kahacecay tamdaw tayra i tatihi Ningra. (Yohani 6:44) Haratengen hena, o maanan ko tatodong nonini? Mihapinang ci Yihofa to ˈalomanay tamdaw i, manengnengay Ningra iraay ko soˈliˈlinay falocoˈ iso, mafanaˈay to mamaolah kiso Cingranan. Pakayni Cingranan o kalimlaan konini. (1 Rayray 28:9) Mafanaˈay ci Yihofa tisowanan, cipinangay tisowanan, maolahayho tisowanan. Tada mitemeray to falocoˈ!

2. Ci Yis tano maanan a sapatinako mitadtad to ciharatengay ci Yihofa to kahacecay a siri?

² Tada ciharatengay ci Yihofa tisowanan, ciharatengayho to roma salikaka. Sapitadtadaw tonini, patinakoan ni Yis ci Yihofa to pakaenay a tamdaw. Lalomaˈ no 100 a siri ano mahiday ko cecay, samanay ko demak no pakaenay tamdaw hani? ‘Miterekan ningra koya 99 siri i lotok, mikilim toya mahidayay a siri.’ Ano mahela ningra koya mahidayay a siri cowa piroroh ciranan patelas sanay comikay, ao mahemekay cingra. Mitadtaday konini to manan hani? Pakaynien ci Yihofaan, o kahacecay a siri sahtoay a kalimlaan. Sanay ci Yis: ‘Malecaday, o kakarayan Wama ako cowa ka makahi a malaˈafo ko cecay no sasafaay tamdaw.’—Matay 18:12-14.

3. Oniya lalakaw wa milengo to maanan?

³ Caay ka ciharateng kita pakatoled to salikaka. Mihaenay, sasamaan kita ngaˈ eca pakapolin to tamdaw hani? Ano pakararaw ko tao kitaanan, sasamaan ko demak ita hani? Oniya lalakaw wa pacaˈof toniya salicay. Kawra salakatho kita minengneng, masowalay i Matay 18 fedengan a ‘sasafaay a tamdaw’ o cima ko mitoroˈan?

4. ‘Oniya sasafaay a tamdaw’ cima ko mitoroˈan?

⁴ ‘Oniya sasafaay a tamdaw’ o polong a nisawawaan ni Yis ko mitoroˈan. Ano hakowato ko mihecaan, ‘malecaday o wawa’ cangra makahiay micada to sapasifanaˈ ni Yis. (Matay 18:3) Soˈlin cowa ka lecalecad ko lalengawan ato kalomahadan, o pinengneng ato pinangan cowa kalecad, kawra pakasoˈlinay a mihakelong ci Kristoan, ano ci Kristo maolahay cangranan.—Matay 18:6; Yohani 1:12.

5. Maˈaraw ni Yihofa ko pakapolinay anca midokaˈay to sikawdan Ningra a tamdaw, samanay ko harateng Ningra?

⁵ Tada misalimlaay ci Yihofa ‘toniya sasafaay a tamdaw.’ Saka cipinangaw to samanay ko picada ni Yihofa to hatiniay a tamdaw, ngaˈayay haratengen ita ko niyah samanay a micada to kaemangay. Maolahay kita cangranan, sapidipotaw cangranan, samanen o malonayay cangra, cangoˈotay to sifanaˈ ato nalifetan. Cowa ka ciharateng kita madokaˈ ko kahacecay tamdaw, kawra ano maˈaraw ko wawa madokaˈ i mikiriwiˈay a masomad, anca o mamaketer alatek. Malecaday, makalimay ci Yihofa sapidipotaw kitaanan, maˈaraw ko pakapolinay anca midokaˈay to sikawdan Ningra a tamdaw, masomaday, maketeray Cingra.—Isaya 63:9; Marko 9:42.

6. Mikitini 1 Korinto 1:26-29, samanay ko pinengneng no kalowa tamdaw to niswawaan ni Yis?

⁶ Ano falicen ko pakayraan minengneng, o nisawawaan ni Yis o ‘sasafaay a tamdaw.’ Haratengen, o masamanay tamdaw ko misaaretengan no tamdaw minengneng hani? Oya adihayay ko payci, cinganganay, cifadangalay a tamdaw. Kawra o nisawawaan ni Yis awaay ko saaroˈan, cowa ko kalimlaan, ano nengnengen o ‘sasafaay a tamdaw.’ (ˈOsien ko 1 Korinto 1:26-29.) Kawra cowa kalecad ko pinengneng ni Yihofa.

7. Mitokelay ci Yihofa samaan ko pinengneng ita to salikaka?

⁷ Ano hakowato ko halafin no cecay tamdaw midoko ci Yihofaan, anca faelohayho micada to paputisem, maolahay ci Yihofa cingranan. Polong a salikaka sahtoay o kalimlaan sanay ci Yihofa, o mamihaen ko pinengneng ita cangranan. O ‘mamaolah kita to polong kasacefang no salikaka,’ cowa ko papina aca nangra. (1 Pitiro 2:17) O mamisarocod kita a ciharateng ato midipot to salikaka. Ano mafanaˈ kita midokaˈay ko niyah anca pakararaway to cecay tamdaw, aka talimaan saan ko harateng, cowa ka ngaˈay miharateng to hinaketeray ko tao, o raremoen ningra a dangoc konini saan. Hano madokaˈay saan ko harateng no roma tamdaw hani? Roma tamdaw pakayniay kalomahadan a madolo matoled ko harateng. Roma tamdaw cowaho ka halafin mafanaˈ to soˈlinay kimad, cowa pinanam to sasamaan misodod to tao. Ano samaanto, wa misarocod kita a misaysay to pasangaray. Roma i, ano marariday pakararawen no tao ko niyah saan miharateng, o mamihai to o sasalofen no niyah a dangoc konini. O mamihaen cingra to demak, ngaˈ rihaday ko falocoˈ, ngaˈayho malakangaˈay to salikaka.

8. O nisawawaan ni Yis mafiyoray no maanan pinangan no lekakawa hani?

⁸ Hano milengo ci Yis toniya ‘sasafaay a tamdaw’ hani? Samanen milicayay ko nisawawaan ningra to cecay a salicay: ‘Itini kakarayan Hongti Kitakit, o cima ko sakakaay hani?’ (Matay 18:1) Toya lintad, misaaretengan no Yutaya tamdaw minengneng ko saaroˈan. Cecay mikakingkiway tamdaw sanay: “Hakelong no kaˈorip no tamdaw micangacangay to ˈdil, ngangan, ato pihayda pikangodo no tao, makahiay pakayni a mapatay.”

9. O sasamaan ko hademak no nisawawaan ni Yis?

 ⁹ Mafanaˈay ci Yis wa misaˈicel ko nisawawaan ngaˈ masawad ko malalifetay a harateng, samanen o mahaenay a harateng cilamitayto i lekakawa no Yutaya. Mansa pasowal cangranan: ‘O sakakaay i lalomaˈ namo i, haenen o sasafaay, o mikeriday i, haenen o matayalay saki tao.’ (Luka 22:26) Ano ‘ikakaay no mako ko tao’ saan ko pinengneng ita, micada to tamdaw a dademak wa malecad ‘o sasafaay.’ (Filipi 2:3) Ano misaˈicel kita palahad to mahaenay waywayan, wa maliyas ko sapakapolinaw to tao.

10. O haharatengen ita ko maanan a limoˈot ni Pawlo hani?

¹⁰ Polong a salikaka itini cecay pakayraan mikikakaay kitaanan. Ano o kangaˈayan no tao ko minengnengan ita, o mamahapinang konini. O haharatengen ita ko limoˈot no tarokos ci Pawlo to Korintoay a kasakopang, sanay cingra: ‘O cima ko pasilomaay tisowanan to tao hani? O maanan ko cowa ko micadaan iso hani? Ano o micadaan a maemin, hano maliko hato cowa ko micadaay hani?’ (1 Korinto 4:7) Ka pinaˈon kita, aka soloten ko harateng no tao tayni i tireng no niyah, aka malitaˈang to niyah. Ano mafanaˈay mikimad ko cecay faˈinayan salikaka, anca mafanaˈ ko cecay fafahiyan salikaka patireng to pacekiwan, aka mapawan panokay to ˈdil ci Yihofaan.

11. Mikitini hongti ato koli a sapatinako mananamay ita ko manan?

¹¹ Patalipaˈelalay ci Yis to nisawawaan aka pakapolin to tao. Ikor caka halafin, somowalay to pakayniay hongti ato koli a sapatinako. Adihayay ko kiyam no koli to hongti, hakelong no kaˈorip cowa ko mamaemin patikol, kawra palasawad hananay no hongti ko kiyam ningra. O roma koli cikiyamay toniya koli to miming a payci, cowa kakahi koniya koli a misodod. Saikor, mipalitan no hongti koniya awaay ko olah a koli. Mananamay ita ko maanan hani? Sanay ci Yis: ‘Kamo kahacecay tamdaw ano eca ka mikifalocoˈ a misodod to salikaka, i kakarayan a Wama ako wa mihaen a micada tamowanan.’—Matay 18:21-35.

12. Ano eca kakahi kita misodod, wa samaan a midokaˈ to tao hani?

¹² O waywayan noniya koli mipalakay to niyah ato tao. Salakat, midokaˈan ningra koya cikiyamay cingranan a koli, awaay ko olah ‘patayra i kapalitan, tahira kaemin no pipatikol to kiyam ko tolas.’ Dotoc, midokaˈay to roma a koli, samanen ‘maˈaraw no roma koli koniya demak, tada mararomay.’ Malecaday, o waywayan ita o mamilingat to tao. Ano eca kakahi kita misodod to pakararaway kitaanan a tamdaw, wa samaanto ko teloc hani? Salakat, o mamidokaˈ kita tora tamdaw, samanen cowa kakahi kita misodod cingranan, eca pisikol cingranan, eca ciharateng cingranan. Dotoc, eca kakahi kita malakangaˈay tora tamdaw, o papakasomad to roma salikaka i kasakopang.

13. Mikitini nalifetan no cecay misakafahay mananamay iso ko maanan?

¹³ Roma i, ano misodod kita to salikaka, o sakangaˈay no niyah ato tao. Nengnengen ita ko cecay nalifetan. Cecay misakafahay ci Kelisetee *, na madokaˈay no cecay fafahiyan salikaka i kasakopang, sanay cingra: “O sowal noniya salikaka cicekaay, malecaday o poˈot mipacok takowanan. Mapiliˈay kako malacafay cingranan mitosil. Palidlid saan, mafasaw ko falocoˈ ato lipahak ako.” Miharateng ci Kelisetee, matoled ato maketer cingra o matatodongay. Kawra cowa ka papiˈimeren ningra koniya tatiihay a harateng to niyah. Miasipay cingra to Mikecolay 1999 miheca 10 folad 15 romiˈad “Mikitini Falocoˈ a Misodod to Tamdaw” a lalakaw ikor i, misapoeneray ko falocoˈ  micada to sapaini, misodod tora salikaka. Sanay cingra: “Mahapinangay ako wa misaˈicel ko kahacecay tamdaw micaˈedong to faelohay capeling, ci Yihofa misododay to raraw ita to romiˈamiˈad. Mihaen ko harateng ako, hato mahepolay ko karetengay a ˈinorong, miliyawayto a lipahak.”

14. (1) Mikitini Matay 18:21, 22, miharateng ci Pitiro pasangaray ko niyah midemak to maanan? (2) Wa samaan ko demak ita, madoloto a misodod to tao?

¹⁴ Mafanaˈay kita misodod to tao o matatodongay, o hahaenen ko demak. Madoloay a sowalen, pasangaray demaken. Iraay ko mahaenay harateng no tarokos ci Pitiro. (ˈOsien ko Matay 18:21, 22.) Samaan ko demak ita, wa madoloto a misodod to tao hani? Salakat, haratengen kinapinaay ci Yihofa a misodod kitaanan. (Matay 18:32, 33) Soˈlin awaay ko tatodong ita milifok to sasodod ni Yihofa, kawra kamayan Cingra mikifalocoˈ a misodod kitaanan. (ˈOlic 103:8-10) Ano mahaenay, ‘o mamasasiolah kita.’ Sakoniya sowal, iraay ko ˈinorong ita a misodod to salikaka, o mamihaen ko hademak. (1 Yohani 4:11) Dotoc, haratengen ko ngaˈayay minaroˈan no misododay. Mikifalocoˈ kita a misodod, o sakangaˈay noya pakararaway kitaanan a tamdaw, wa ngaˈayho micowat to kakelec no kasakopang, midama to kalawidang ita ci Yihofaan, ato mihepol to karetengay ˈinorong no falocoˈ. (2 Korinto 2:7; Kolosay 3:14) Saikor, tolonen ko Kawas micangacang to sapadama, samanen o Kawas ko misaaliay kitaanan misodod to tao. Aka pairaen ko hatoki ni Satan, mipalak to rihaday ita i kalalaˈed to salikaka. (Ifiso 4:26, 27) Misaaliay kita to sadama ni Yihofa, ho eca ka makefeng i talakal ni Satan.

15. Mikitini Kolosay 3:13, o sasowalen ato waywayan no cecay faˈinayan anca fafahiyan salikaka pakasomaday tisowanan, sasamaan ko demak iso hani?

¹⁵ O sasowalen ato waywayan no cecay faˈinayan anca fafahiyan salikaka pakasomaday tisowanan, sasamaanto kiso hani? Sarocoden  a micowat ko rihadayay. Fanekfek a mitolon ci Yihofaan, mingitangi Cingranan palemed toya pakararaway tisowanan a tamdaw, hanaca padama tisowanan mihapinang to kangaˈayan ningra. Maolahay ci Yihofa cingranan, samanen maˈaraway koniya ngaˈayay. (Luka 6:28) Ano kamayan pasangar kiso a misodod cingranan, miharateng to sasamaan a masasowal cingranan. Aka misaˈosi to padetengay kora tamdaw a midokaˈ tisowanan. (Matay 5:23, 24; 1 Korinto 13:7) Ano masasowal kiso cingranan i, pakasoˈlinen to awaay ko tatiihay harateng ningra. Ano eca kakahi cingra malakangaˈay tisowanan, sasamaanto hani? Ka padadotoc a masahepol, paihkal to mihadidiay. (ˈOsien ko Kolosay 3:13.) Sakakaay i aka ˈinteh ko falocoˈ, samanen mihaen ko demak o mamipalak to kalawidang iso aci Yihofaan. Aka a pakayni i tamdaw anca cecay demak a mapolin. Mihaen, wa ngaˈay kiso misawacay sakakaay kaolahan iso o Kawas ci Yihofa.—ˈOlic 119:165.

16. Kita o kahececay a tamdaw iraay ko ˈinorong samaan ko demak hani?

¹⁶ Ngaˈay kita ‘mala cecay ˈopo, cecay ko pakaenay,’ makelec a midoko ci Yihofaan, tada o kalikoanto konini! (Yohani 10:16) Malikakawa Midofdof to Araaw ni Yihofa saka 165-166 fiedac sanay, ano masalalomaˈay no taˈangayay paro no lomaˈ ni Yihofa kiso, ‘iraay ko ˈinorong iso micowat to kakelec,’ mihaenay wa ‘minanam tano pinengneng ni Yihofa a minengneng to salikaka.’ Minengneng ci Yihofa, kita o ‘sasafaay a tamdaw’ o kalimlaan a maemin. Mahaenay ko pinengneng iso to salikaka han? O nano demak iso to salikaka, maˈaraway ni Yihofa, masemeray a minengneng.—Matay 10:42.

17. Misetek kita to falocoˈ samaan ko demak hani?

¹⁷ Maolahay kita to salikaka, mansa ‘misetek to falocoˈ kita, eca ka piteli to sapihafikod a fakeloh i ˈaˈayaw no salikaka.’ (Loma 14:13) Minengneng kita to salikaka mikikakaay ko ngaˈay to niyah, makahiho mikitini falocoˈ a misodod cangranan. Aka pakayni i tao a mapolin, ka ‘pisaˈicel micowat to rihaday, masasipakalalok.’—Loma 14:19.