1940 miheca 5 folad 19 romiˈad, itiniay kako i Aymoin no Lipanon a hofocen. Ikor no pina miheca, malinahay kami tayra i Ripoli. Itiniay kako i lipahakay ciolahay a paro no lomaˈ lomahad, maolahay ci Yihofaan ko paro no lomaˈ. O sasafaay kako i lomaˈ, tatoloay ko fafahiyan kaka ato cecay faˈinayan kaka. Pakaynien i wama wina, cowa ko kalimlaan ko mietan to payci. Micekiw to Fangcalay Cudad, mirienang to saˈopo no Krisciyang ato padama to tao mafanaˈ to Fangcalay Cudad ko sakakaay kalimlaan.

Itini kasakopang niyam iraay ko papina o tatayra i kakarayan ko tokel a Krisciyang, o cecay i salikaka ci Misie Apote, citatodongay misikay to kasakopang a picekiw. Itiniay i Niwyok cingra mafanaˈ to soˈlinay kimad, itini 1920 miheca salakatay milasil to soˈlinay kimad i Lipanon. Ikor manilnilay a tayni ko tatosaay fafahiyan salikaka micodiyapay i Kiliyat, ci Anni Pie aci Keon Pioe. Caay ka pawan ako i, salikaka ci Apote tada mikangodoay toniya tatosaay fafahiyan salikaka, marariday padama cangranan. Ikorto oniya tatosaay fafahiyan salikaka malo ngaˈayay a widang niyam. Ikor no pina miheca, itini Padaka miliyaway malitemoh ako ci Anni tada lipahakayto. Mataˈlif ko cecay liyad, malalitemohay kako ci  Keon, ciraramodayto cingra itiya, malacafayay to faˈinay ci Wiefolite Koci itiniay i Ikok Lonton a Pitil matayal.

Itini kaemangho kako i, o Misawacayay Tamdaw ni Yihofa i Lipanon cowa ka ˈaloman, kawra kamayan a fanekfek kami paladaˈ to tao to mananamay a sifanaˈ mikitini i Fangcalay Cudad. Itiya micadaay kami to pisafelit no ˈaˈideman no pihakelongan, tahanini kamayanho a maharateng ako ko pina demak.

To cecay romiˈad, kako ato fafahiyan kaka ci Sana mitosilay i cecay lomaˈ. Tiya malalengo kami to cilomaˈay i, tayniay ko cecay simpo. Madeng iraay ko tamdaw pasowalay cingranan itiraay kami. Tada mapoˈiyay ko simpo to kaka ako, mitefingay tano kamay, micikeloh cingranan i fihil, telocto madokaˈay ci Sana. Orato iraay ko patingwaay to dimeng. Taynito ko dimeng, milimasmasay midimokos ci Sanaan, dotoc miˈorongan koya simpo tayra padimengan. Itira, mahapinangay nangra iraay ko kowang i tireng ningra, milicayan no tapang no dimeng cingra: “O maanan ko demak iso? ˈArawhan o fafongohan no tatihay kapot koniya simpo no kiyokay?”

Iraayho ko cecay demak tahanini caay ka pawan ako. Micaliway to cecay faso ko kasakopang niyam tatayra i maraayay a niyaroˈ a mitosil, tada mahemekay kami. Kawra, itiraay cecay a simpo mafanaˈay to itiraay kami a mitosil, misaˈopoay to mariˈangay a tamdaw mikalisanga tamiyanan. Pasayniyay tamiyanan a mitekol to fakeloh cangra, misetiˈay a midokaˈ to wama ako. Maharatengay ako itiya o laway no wama maˈirangay, malacafayay to wina tayra i faso, mitooray kami tayra i faso, tada calemcemay kami. Kawra, tahanini kamayan maharateng ako, padamaay ko wina to wama milosimet to dokaˈ ato somowal sanay: “Yihofaaw, sododen koniya ˈalomanay tamdaw, cowa ka fanaˈ cangra to midemakay ko niyah to manan.”

Kinacecayay, milisoˈay kami to salawina i nalacolan. Tahira i lomaˈ no akong i, iraay ko cecay misasingsiay no kiyokay itira. Mafanaˈay cingra o Misawacayay Tamdaw ni Yihofa ko wama wina ako, 6 ko mihecaan ako itiya, sapilokesaw cingra takowanan, sanay milicay takowanan: “Kiso kaemingay a wawa hano caho picada to paputisem?” Pacaˈof kako: “Kaemangayho kako, wa minanamho to adihayay sifanaˈ no Fangcalay Cudad, ira ko tanektekay pakasoˈlin no falocoˈ ngaˈ, ngaˈay micada to paputisem.” Matengil ningra cowa ka hemek, pasowal to akong ako cowa pikangodo kako saan.

Kawra, cowa ka adihay ko tatiihay nalifetan, ˈalomanay a Lipanon a tamdaw kamayan a hinalafangay. Iraay ko adihayay a toki niyam paladaˈ to tao to soˈlinay kimad no Fangcalay Cudad, hanaca patireng to adihayay a pacekiwan.

Itini micudadho kako i, o cecay a kapah salikaka i Winirira tayniay Lipanon a miliwko. Mirienangay cingra to saˈopo no kasakopang niyam,  mafanaˈay to kaka ako ci Wafaan, misatapangay makakaolah cingranan. Ikor mararamoday cangra, minokayay tayra i Winirira maˈorip. Kinapinapinaay mitilid to tikami ko kaka, micangacangay to wama malinah ko paroˈ no lomaˈ tayra i Winirira, samanen tada maˈilolay cinga tamiyanan. Saikor malaˈosiay to cingra, o paro no lomaˈ niyam misaˈosiayto a malinah!

1953 miheca malinahay ko paro no lomaˈ niyam tayra i Winirira, itiniay i ngata no kitiraan no hongti i Ciyaraciyase. O wawaho kako itiya, maˈaraw ko mikalican no hongti makapahay a paliding tada mahemekay. Kawra pakaynien i wama wina, saka nanamaw i roma kitakit, sasowalen, serangawan, kakaenen ato romiˈad, cowa ko madoloay. Misatapang a mananam cangra i, mifekaday ko ka adayayan.

Fahal sanay adada ko wama, fahkaay kami, samanen talifakay ko tireng ningra, caayho ka ˈaraw adada cingra. Ikor makinsaay to iraay ko ekang ningra, misaaliay to tatokaden, kawra maharek mitokad cecay lipay mapatayayto cingra.

Pakaynien tamiyanan o fahal sanay mifekad a pades konini, pasangaray sowalen ko nafalocoˈan itiya. 13 ko mihecaan ako itiya, tada masomaday ko paro no lomaˈ niyam, hato mamapeleng ko kakarayan. Cecay liyad, pasangaray ko wina micada to mapatayayto ko wama. Kawra ikor mahapinangay niyam, wa padotocho ko kaˈorip. Pakayni pitadiˈec to sadama ni Yihofa, hato pakahadidiay kami. 16 ko mihecaan ako micudiyap i kawcong, makalimay mihadak to ˈicel padama to paro no lomaˈ.

Itiya, ciramoday ko kaka ako ci Sana to salikaka ci Loon Alawho, micudiyapay cingra i Kiliyat manilnilay tayni i Winirira. Ikor, malinahay cangra tayra i Niwyok maˈorip. Misaˈosiay ko paro no lomaˈ papicudad takowanan i taykak, orato tayraay kako i Niwyok malacafay to kakaan a maˈorip. Itini sapadama nangra, padotocay kako macakat i soˈlinay kimad. Itiya, itiniay Prokelin no Sipanya ko sowal a kasakopang ˈalomanay ko matenesay a salikaka, tada maolahay kako to tatosa a salikaka, ci Mileton Hansuel aci Fratelik Frans, itiniay cangra i Pitil no Prokelin a matayal.

Mamahererek ko saka cecay miheca no taykak i, misatapangay kako misimsim to patosokan no niyah maˈorip. O lalakaw no Mikecolay milengoay o papatireng ko Krisciyang to maanan ciepocay a patosokan, miasipan ako koniya lalakaw, misongilaˈay kako a miharateng. Roma i, maˈaraw ko misakafahay ato matayalay i Pitil a salikaka tada lipahakay, makalimay kako malecad cangranan. Kawra cowaho picada to paputisem kako itiya, maharatengay ako patafang toniyah ci Yihofaan tada o kalimlaan. Orato misetekay ko falocoˈ ako patafang to tireng, hanaca itini 1957 miheca 3 folad 30 romiˈad micada to paputisem. Pahawangay kako to kalimlaan a hawang i hakelong no kaˈorip.

Pahawang to micadaay to paputisem ikor i, makalimay kako talaˈayaw, mirienang to misakafahay  a tayal. Matongalay koniya kalim no harateng, kawra sapahawangaw tonini cowa ko madoloay. Wa ngaˈay kako micudad to taykak misakafahho han? Kinapinaay patikami kako to wina ato kaka, pasowal to mamisawad a micudad, minokay i Winirira malo misakafahay.

1957 miheca 6 folad, minokayay kako tayra Ciyaraciyase. Kawra mahapinangay ako cowa ka ngaˈay ko sakaˈorip no lomaˈ, misaaliay to mamietan to sakaˈorip. Wa ngaˈay kako midemak to maanan hani? Itini kingko mahelaay ako ko tayal, kawra soˈlinay ciharateng kako malo misakafahay, onini ko lalangian ako a minokay, orato misaˈosiay kako hatosa han a midemak. Pinaay a mihecaan, matayalay kako i kingko, misakafahayho. Tada ˈifowaay ko demak ako, kawra taˈangayay ko lipahak.

Iraayho ko cecay kalipahakan ako a demak, malitemohay ako ko cecay i Towicay fafahiyan salikaka ci Siewiya, makapahay cingra maolahayho ci Yihofaan. Malacafayay to wama wina malinah tayni Winirira cingra. Ikor mararamoday kami, tatosaay ko wawa, faˈinayan wawa ci Mayko, fafahiyan ci Samila. Malinahay ko wina kalacafay tamiyanan, mihaen ngaˈayto kako midimokos cingranan. Soˈlin sapaliliˈaw to paro no lomaˈ hato paselaˈay kako misakafah, kawra kamayan a fanekfek ko falocoˈ ako, ira ko toki itini pahanhanan malacafayay to fafahi malo padamaay misakafahay.

Tiya misimsim kako to satapangan no lalakaw a salicay i, micudadayho ko wawa. Soˈlinen ko sowal, sinowayay ko kaˈorip ako itiya, matayal i kingko mikangodoan no tao. Kawra tokel ako to niyah o pinengneng no tao o matayalay saki Yihofaan a tamdaw, oniya harateng cowa kafalic. Orato, malalengoay kako ato fafahi pakayni sakaˈorip a payci. Ano misawad kako matayal, wa pafeli ko kingko to adihayay a payci. Awaay ko tadah niyam, ano kantangen ko kaˈorip, wa halafin ira ko sakaˈorip.

Sapahawangaw to sakacecay hawang cowa ko madoloay, kawra oya kaolahan ako a fafahi ato wina misaˈicelay a midama takowanan. Orato mihalakaay kako miliyaw misakafah. Mahapinangay ako sasamaan ko rakat no niyah, tada lipahakay kako! Kawra caka halafin, macadaay niyam ko cecay sapatelong.

Cecay romiˈad, paisingay ci Siewiya, pasowalay ko ising mapoyapoyay cingra. Pakayni tamiyanan o kacekidan konini! Tada lipahakay kami, kawra maharateng ko mihalakaan i saˈayaw malo misakafahay, wa ngaˈayho malaˈosi koniya patosokan han? Kalikiay kami misalof to harateng, hinatala  to kaira no faelohay tamdaw no lomaˈ. Mihaenay, oya misongilaˈan mihalaka i saˈayaw wa malaˈosiho han?

Maharek a malalengo, saˈosi niyam cowa ko mamafalic ko mihalakaan. O wawa ako ci Ciyapolie itini 1985 miheca 4 folad hofocen. Toni miheca 6 folad, misawaday kako matayal i kingko, miliyaw a malo miceriday misakafahay. Ikor, iraay ko tatodong ako malo iing no Fenpo. Cecay lipay kinatosa anca kinatoloay kako tayra i Fenpo matayal, kawra cowa ka itini Ciyaraciyase, madeng 80 kongli ko raay to lomaˈ ako.

O katayalan no Fenpo itiniay La Witoliya, mansa misaˈosi kami malinah ko paro no lomaˈ tayra, mihaen wa mingata to Pitil. Pakaynien tamiyanan o taˈangayay kafalic konini. Tada midamaay ko paro no lomaˈ takowanan, ano adihayto ko sowal cowa ko mamaemin a paihkal to piakoˈid ako cangranan. O fafahiyan kaka ci Paha makahiay midimokos to wina. Tatoloay a wawa, ci Mayko ciraramodayto, kawra ci Samila aci Ciyapolie itiniayho i lomaˈ, tatodong no malinah wa miliyas to widang i Ciyaraciyase. Roma i, mananamayto ko fafahi ako itini taˈangayay niyaroˈ, nohatini wa minanam cingra i kaemingay niyaroˈ a maˈorip, kaemingayto ko lomaˈ nohatini, wa minanam kami maemin. Mikitini Ciyaraciyase malinah tayni La Witoliya tada taˈangayay ko kafalic.

Ikor, miliyaway mafalic ko pakayraan, ciraramodayto ci Ciyapolie, malinahay ci Samila. Iitini 2007 miheca, kako ato fafahi matahidangay malo matayalay i Pitil, tahaniniay a matayal. O taˈangayay wawa niyam ci Mayko o malohemay malitengay, malacafay to fafahi ci Monika misakafah. Sasafaay wawa ci Ciyapolie o malohemay malitengay, cingra ato fafahi itiniay Itali matayal, ci Samila o misakafahay, itiniay RTO no Pitil a matayal.

Itini hakelong no kaˈorip ako adihayay ko kalimlaan a misaˈosian, awaay ko kakeseman. Ano liyawen mitikol, wa malecad ko misaˈosian ako. Ngaˈay adihay ko toki matayal saki Yihofaan, matomesay ko piakoˈid no falocoˈ ako. Adihayay mihecaan, ihkalay mahapinang ako, mitafo to tangongolay kalawidang ci Yihofaan tada kalimlaanto. O sasaˈosien ita ano taˈangayayto kaemingayto, wa papafeli Cingra kitanan to ‘mataˈlifay to maharatengay no tamdaw a rihaday.’ (Filipi 4:6, 7) Kako aci Siewiya tada misalimlaay to katayal i Pitil. Padotocay matinako niyam ko sapalemed ni Yihofa, samanen itini hakelong no kaˈorip niyam mitadiˈecay Cingranan.