1. O finawlan ni Yihofa latekay hano matoˈolay ko harateng hani?

ˈALOMANAY tamdaw iraay ko katoˈolan a tatokian. Pakaynien i roma tamdaw, kahnayay malahdaw ko mahaenay harateng, kawra roma tamdaw, pasangaray mifalah to mahaenay harateng. Latekay soˈlin iraay ko tamdaw itatihi, matoˈolayho kita. Roma salikaka pasangaray macacawmaˈ to faelohay kasakopang, roma tamdaw maˈilolay to mapatayay salawina. Roma salikaka ngaˈayay ko kalalaˈed to paro no lomaˈ, malinah tayra i maraayay matoˈolayto ko harateng. Iraayho ko roma Krisciyang samanen micadaay to pisafelit ato sapalak a matoˈol ko harateng, pakaynien i faelohay micada to paputisem a salikaka mangalefay a mahaen.

2. Oniya lalakaw wa milengo to manan a salicay hani?

² Pakayni kihcod ita, cipinangay ci Yihofa. Hacowa matoˈolen kita, mafanaˈay Cingra, makalimay sapadamaaw kitaanan. Sasamaan ci Yihofa padama kitaanan miremo to mahaenay harateng hani? O ngangaˈay kita midemak to maanan? Roma i, sasamaan kita padama to matoˈolay ko harateng a salikaka hani? Dotoc, lengoen ita koniya salicay.

3. Samanay ci Yihofa paihkal to kaciharateng ci Iliyaan hani?

³ Tada ciharatengay ci Yihofa to kahacecay midokoay cingranan a tamdaw. Itatihiay no mita Cingra, ano matoled ko falocoˈ a masomad kita mafanaˈay Cingra. (ˈOlic 145:18, 19) Haratengen hena, tada damsayay ci Yihofa ci Iliyaan. Oniya  madimadiay a pairasolay itiniay ka sasifodan no Israil a tatokian a maˈorip. Itiya, midokoay ci Yihofaan a tamdaw tahalifaay to pakidemay a sapalak no mikowanay, hanaca ˈintehay cangra ci Iliyaan. (1 Hongti 19:1, 2) Roma i, o madimadiay ci Yihofaan a pairasolay edengan cecay aca cingra saan ci Iliya, tada pasomaday konini cingranan alatek. (1 Hongti 19:10) Tangsolay masinanot ni Yihofa misaaliay to maanan ci Iliya, orato micorcoray to coyoh pakalalok cingranan, pasifanaˈ cingranan caay ko matoˈolay cingra, ato pasowal cingranan, ˈalomanayho ko mikangodoay ci Yihofaan a tamdaw i Israil.—1 Hongti 19:5, 18.

4. Marko 10:29, 30 samanay paihkal, tada ciharatengay ci Yihofa to malahdaway ko sadama no salawina a salikaka?

⁴ Mafanaˈay ci Yihofa, o roma salikaka midoko Cingranan misaaliay to kakinafalah, tinakoen malahdaway ko sadama no salawina cangranan. Kinacecayay, milicayan ni Pitiro ci Yis: ‘Mifalahanto niyam ko kihecod a mihakelong tisowanan. Wa milifok kami to maanan hani?’ Itiya calemcemay ko pising ni Pitiro alatek. (Matay 19:27) Tada mihinomay ko caˈof ni Yis, sowal ningra o mamalifok no nisawawaan ko simoˈot tingloh a paro no lomaˈ. (ˈOsien ko Marko 10:29, 30.) O Wama noniya taˈangayay paro no lomaˈ ci Yihofa, mikiˈokay Cingra to mamidama to midokoay Cingranan a tamdaw. (ˈOlic 9:10) Nengnengen ita nohatini, sasamaan ko demak iso wa ngaˈay milifok to sapadama ni Yihofa, pakalowid to matoˈolay a harateng.

5. Hano haharatengen ko adihayay sapadama ni Yihofa tisowanan?

⁵Haratengen ko adihayay sapadama ni Yihofa tisowanan. (ˈOlic 55:22) Mihaen ko demak iso, wa matatodongto ko pinengneng iso to niyah. Iraay ko cecay awaay ko ramod a fafahiyan salikaka ci Kaloe *, cowa pidoko ci Yihofaan ko paro no lomaˈ ningra. Sanay cingra: “Misongilaˈay kako miharateng samanay ci Yihofa padotoc a padama takowanan milakowit to masakenaay a sapalifet, cowato ka matoˈol ko niyah saan ko harateng. Padamaay konini takowanan pakasoˈlin, ano ikor o aitini i tatihi ako ci Yihofa.”

6. O saka 1 Pitiro 5:9, 10 hano ngaˈay pakalalok to matoˈolay ko harateng a tamdaw?

 ⁶Songilaˈen miharateng samanay ci Yihofa padama to matoˈolay ko harateng a salikaka. (ˈOsien ko 1 Pitiro 5:9, 10.) Edengan ci Hawce ko midokoay ci Yihofaan i paro no lomaˈ. Sanay cingra: “Kahacecay tamdaw no kasakopang iraay ko raremoen no niyah a pasangaray, maˈaraw cangra misarocoday a midoko ci Yihofaan, mapakalalokay kami o awaay ko sadama no salawina a tamdaw.”

7. Pakayni tisowanan iraay ko maanan sapadama no satolon?

⁷Tafoen ko ngaˈayay nanaman a midoko. Tolonen ci Yihofa, pasowalen Cingra to nafalocoˈan. (1 Pitiro 5:7) Ci Masie o kaemangay fafahiyan salikaka, kawra cowa picada to soˈlinay kimad ko paro no lomaˈ ningra, mansa matoˈolen ko harateng ningra. Sanay cingra: “O taˈangayay sapadama takowanan miremo to matoˈolay i, fanekfek a mitolon ci Yihofaan. Soˈlinay o Wama ako Cingra, to romiˈamiˈad kinapinaay a mitolon kako Cingranan, mieminan ako ko nafalocoˈan a pasowal Cingranan.”

8. Micekiw ato midotim to Fangcalay Cudad iraay ko maanan sapadama tisowanan?

⁸ Ka picerid micekiw to Fangcalay Cudad. O roma maˈoningay ano mikiriwiˈay matinako iso ko olah ni Yihofa, songilaˈen a midotim. Fafahiyan salikaka ci Pianka mihadidiay to pilokes no paro no lomaˈ, sanay cingra: “Micekiw ato midotim to maˈoningay i Fangcalay Cudad, ato nalifetan no malecaday takowanan ko pakayraan a salikaka, taˈangayay ko sadama takowanan.” O roma salikaka miharatengay to mihinomay cangranan a sinael, tinakoen i ˈOlic 27:10 ato Isaya 41:10. Roma salikaka ano misaday to saˈopo anca micekiw to Fangcalay Cudad i, mitengilay to milokoingan a lalakaw, mihaen cowato ka matoˈol ko harateng nangra.

9. Mirienang to saˈopo iraay ko maanan a epoc tisowanan?

⁹ Misarocod micerid mirienang to saˈopo. Mihaen, wa ngaˈay kiso mikitini lalakaw no saˈopo milifok to sapakalalok, wa adihay ko toki mafanaˈ to romaroma salikaka. (Hipray 10:24, 25) O masowalay i fafekang ci Masie sanay: “Soˈlin o kalingodoay ko pinangan ako, kawra misetekay ko falocoˈ ako, mirienang to kahacecay saˈopo, awaawasa pacaˈof to kinacecay. Padamaay konini takowanan masalalomaˈay no kasakopang saan ko piharateng.”

10. Patireng to kalawidang to madimadiay a salikaka hano kalimlaan hani?

¹⁰Patireng to kalawidang to madimadiay a salikaka. Malawidang to ngaˈayay nanamen iso a salikaka i kasakopang, soˈlin cowa ka hecad to mihecaan iso ato lalengawan nangra, kamayan ngaˈay kiso malawidang cangranan.  Sowal no Fangcalay Cudad, o “matoˈasay a tamdaw” iraay ko taneng. (Yopu 12:12) Roma i, o matoˈasay a tamdaw wa ngaˈay mikitini i madimadiay ci Yihofaan a kaemangay Krisciyang minanam to adihayay. Ikakaay ko mihecaan ni Yonatan ci Tafitian, kawra kamayan mala ngaˈayay a widang cangra. (1 Samuil 18:1) Soˈlin tahalifa cangra to adihayay a pasangaray, kawra madadamaay cangra, malacafay midoko ci Yihofaan. (1 Samuil 23:16-18) Cecayay aca ci Ilina o Misawacayay Tamdaw ni Yihofa i paro no lomaˈ, sanay cingra: “O kasakopangay a tamdaw malecaday o wama wina ato salikaka ita, pakaynian ni Yihofa cangranan a midimokos kitaanan.”

11. Sasamaan ko hademak iso, ngaˈ patireng to tanektekay kalawidang to tao?

¹¹ Micawmaˈ to faelohay widang cowa ko madoloay no latek, mangalef ano kalingodoay ko pinangan ita. O hinangodoay ko pinangan fafahiyan salikaka ci Latena soˈlin micadaay to pisafelit, kamayanho micada to soˈlinay kimad. Sanay cingra: “Ikor mahapinangay ako ano awaay ko sapadama no salikaka cowa ko mamalaˈosi.” Pasowal to nafalocoˈan no niyah i tawanan cowa ko madoloay, kawra mikifalocoˈ a masasowal o taˈeneran no ngaˈayay kalawidang. Makalimay ko salikaka pakalalok ato padama tisowanan, kawra cacipinang cangra to saali iso ngaˈ ngaˈay cangra padama.

12. Misamaan ko demak ita, wa ngaˈayto micawmaˈ to ngaˈayay widang hani?

¹² Malacafay to salikaka mitosil o ngaˈayay pakayraan patireng to kalawidang. Masowalay i fafekang ci Kaloe sanay: “Malacafayay kako to ˈalomanay salikaka mitosil ato midokoay a demak, telocto malo ngaˈayayto a widang. Toniya pina miheca, padadotocay ci Yihofa pakayni i ngaˈayay widang padama takowanan.” Malacafay to madimadiay a widang tada ciepocay. Pakaynian ni Yihofa i ngaˈayay widang padama tisowanan miremo to mafasaway a harateng, tinakoen o matoˈolay a harateng.—Taneng 17:17.

13. Kita o kahacecay tamdaw iraay ko ˈinorong samaan ko hademak?

¹³ Kita o kahacecay tamdaw iraay ko ˈinorong micowat to makelecay masasiolahay no kasakopang, matinako no salikaka ko dihkoay, mihaen wa awato ko matoˈolay a tamdaw. (Yohani 13:35) O sowal ita, midemakan a demak wa ngaˈay pakalalok to tamdaw! Cecay fafahiyan salikaka sanay: “Misatapang kako minanam to Fangcalay Cudad ikor i, malecaday o paro no lomaˈ ko salikaka i kasakopang. Ano awaay ko sadama nangra, ecato ka malo Misawacayay Tamdaw ni Yihofa kako.” Ano cowaho picada to soˈlinay kimad ko paro no lomaˈ no salikaka, wa ngaˈay kita samaan ko demak, padama to salikaka mitinako to sano lomaˈay a dihko no kasakopang hani?

14. Sakalawidangaw to tao, wa ngaˈay kita samaan ko demak?

¹⁴Layapen ko kamay no widang. Sakinacecay tayni i kasakopang ita ko pacekiwan ato salikaka i, ngaˈay kita mikifalocoˈ lipahak a militemoh cangranan. (Loma 15:7) Kawra cowa ko pihamham aca, wa makalim kita malawidang cangranan, mihaen mikifalocoˈ a ciharateng cangranan. Roma i wa mikangodo kita to mahimeday a demak nangra, roma i cipinang to masiˈayaway nangra a pasangaray. Ano pasangaray cangra pasowal to nafalocoˈan no niyah, aka pacieci cangranan, damsayen mihadak to salicay, ato mihadidi mitengil to sowal nangra. Tinakoen, ngaˈayay licayen iso cangra samanay misatapang minanam to Fangcalay Cudad.

15. O matenesay a Krisciyang sasamaan padama to salikaka i kasakopang hani?

 ¹⁵ O matenesay a Krisciyang ato malohemay malitengay, ano talaˈayaw a ciharateng to salikaka, wa matongal ko tanektek no pakasoˈlin no kahacecay tamdaw i kasakopang. Ci Milisa mikikaemang mikotoday to wina midoko ci Yihofaan, sanay cingra: “Toniya pina miheca, o roma salikaka malecaday o wama a ciharateng takowanan, mipalak to toki kalacafay takowanan. Ano misaali kako to saka sasowal a tamdaw i, iraay ko pifowahan to harateng a tamdaw. O piakoˈid ako cangranan pasangaray a sowalen.” Ci Molisiaw o kapah salikaka, miliyas to soˈlinay kimad ko singsi ningra ikor i, malecaday o mifalahan no singsi ko niyah saan miharateng. Sanay cingra: “O kaciharateng no malohemay malitengay taˈangayay ko sadama takowanan, marariday cangra masasowal takowanan, malacafay mitosil, paladaˈ takowanan to kalimlaan no picekiw, malacafayho takowanan mionto.” Ci Milisa aci Molisiaw ikor misatapangay misakafah a matayal.

16-17. Ngaˈay kita mihadak to maanan ciepocay a sadama i tao hani?

¹⁶Mihadak to ciepocay a sapadama. (Kalatiya 6:10) Ci Liaw itiniay miraayay to nalacolan a pala malo mikiriwiˈay nilnilen a mitosilay, sanay cingra: “Itini pisaalian niyam a tatokian, soˈlin itini mimingay a demak patado ko tao a midemak, taˈangayay ko sapadama. Kinacecayay masasongtolay ko paliding ako, pasangaray tahalomaˈ, maeminayto ko ˈicel. Itiya, cecay mararamoday mitahidangay takowanan tayra i lomaˈ nangra komaen. Mapawanayto kako o manan ko mikaenan, kawra maharatengay ako siniˈadaay cangra takowanan, padotocay a mitengil to sowal ako, miliyas to lomaˈ nangra i, masayarayto ko falocoˈ ako!”

¹⁷ Maolahay kita mirienang to kasakilac anca kasapala a taykay, o cecay lalangian i ngaˈayay kalacafay to salikaka, ngaˈay paladaˈ to malifokay i taykay. Kawra, o masowalay i fafekang ci Kaloe sanay: “Mirienang to taykay i, tada matoˈolay kako.” Misamanay hani? Sanay cingra: “Soˈlin ˈalomanay ko salikaka i taliyok, kawra sahtoay o paro no lomaˈ ko cafay nangra. Toniya tatokian, mangalefay ko katoˈol ako.” O roma salikaka ikor no mapatay ko ramod sakinacecay mirienang to taykay, mahaenay ko harateng. Mafanaˈay kiso to misiˈayaway to mahaenay pasangaray a salikaka  han? Wa ngaˈay kiso mitahidang cingranan malacafay to paro no lomaˈ iso mirienang to noikor a taykay han?

18. Wa ngaˈay kita samaan misakadademak to safalod no saka 2 Korinto 6:11-13 hani?

¹⁸Mipalak to toki a malacafay. Wa micawmaˈ kita to kasasiroma a salikaka, mikiriwiˈay ko matoˈolay a salikaka o ‘mamifohat to falocoˈ’ micada cangranan. (ˈOsien ko 2 Korinto 6:11-13.) Masowalay i fafekang ci Milisa sanay: “Ano mitahidang ko widang takowanan tayra i lomaˈ nangra anca malacafay miliwko i, tada lipahakay kako.” Wa ngaˈay kiso mitahidang to cecay salikaka i kasakopang tayni i lomaˈ a micawmaˈ han?

19. Hacowa a tatokian kalacafay to salikaka, wa mikiriwiˈ a lipahak cangra alatek?

¹⁹ Itini cecay tatokian mipalak kita to toki kalacafay to salikaka, wa mikiriwiˈ ko lipahak nangra alatek. Tinakoen pisalisinan a tatokian, roma salikaka pasangaray malacafay to cowa pihakelong a palo no lomaˈ. Itini kapatayan a romiˈad no paro no lomaˈ, roma salikaka mikiriwiˈay a masomad alatek. Makahi kita itini toniya tatokian mipalak to toki a kalacafay cangranan, o ‘soˈliˈlinay a ciharateng’ cangranan.—Filipi 2:20.

20. Ano matoˈol kita i, o Matay 12:48-50 wa samaan pakalalok kitaanan hani?

²⁰ Pakayni masasiromaay a lalangian matoˈol kita alatek. Kawra aka mapawan, masongilaˈay ko kacipinang ni Yihofa to harateng ita. O mamidimokos Cingra kitaanan, tocerid pakaynian Ningra i salikaka mihaen ko demak. (ˈOsien ko Matay 12:48-50.) Roma i, sapaihkalaw to piakoˈid ci Yihofaan, wa misaˈicel kita padama to salikaka. Soˈlin matoˈolay kita nolatekay, kawra iraay ci Yihofa itatihi, caay ko mamatoˈol kita!