ITIYAHO, satapangay to ko Israil tamdaw pasata midama to matatodongay a pidoko. Kawra tahira i lintad ni Yis, o finawlan wa pasorot to masakenaay a sata, tada marorayay ko falocoˈ.

Sapidamaaw to katayal no pakopangan ato fangcalay sefi, polong matoˈasay a Yutaya tamdaw papateli to tosaay a romiˈad a lifon. Itini saka 1 hahekalan, oniya sata sapitomadaw to misangaˈan ni Hiroti a fangcalay sefi, ato sapatoˈaya a payci. O roma Yutaya a tamdaw milicayay ci Pitiroan, samanay ko pinengneng ni Yis to sata no fangcalay sefi. Cowa pisafelit ci Yis pasorot to sata no fangcalay sefi, papialaay ci Pitiroan to cecay tangloy no ekim a pasata.—Matay 17:24-27.

Itiya, wa pateli ko Yutaya tamdaw to kalicecay no moetep a sapatoˈaya, sakoniya sowal wa patoˈaya cangra to kalicecay no moetep no mietanan ato mipanayan. (Lifi 27:30-32; Saˈosi 18:26-28) Pakinaliay ko saali no ˈaˈideman no pihakelongan to finawlan pateli to kahacecay no dateng to kalicecay no moetep, mahawpay ko ‘hakka, inon, ato komin.’ Cowa pasowal ci Yis to mararaway ko patoˈaya to kalicecay no moetep, mirikecay cingra to makaniway a waywayan no pasifanaˈay to rikec a tamdaw ato Farisay tamdaw.—Matay 23:23.

Roma i, o sifo no Loma pasayraay i Yutaya tamdaw misorot to masakenaay a sata. O cecay i pasayraay i iraay ko omah a tamdaw misorot to sata no sera, o hatiniay a sata ngaˈayay tano paycien ato dafong a pateli. Ano saˈosien i, o sata no sera tahiraay i 20 tangasa 25 pasinto. Misaaliayho ko sifo to kahacecay Yutaya a tamdaw pasata to payci. Milicayay ko Farisay a tamdaw ci Yisan wa ngaˈay pasorot toniya sata hokira. O caˈof ni Yis mitadtaday to samaan kita minengneng toniya pasataay a demak, sanay cingra: “Ono mikomoday a hongti a maamaan i, pafelien i mikomoday a hongti. Ono Kawas a maamaan i, pafelien i Kawas.”—Matay 22:15-22.

Ano pacomod ato pasadak to dafong misaaliay to sata, tinakoen itini minato, kayakay, kacacipaˈan no lalan, ato niyaroˈ anca picomodan to icifa, misorotay ko sifo to mahaenay a sata.

Itini pikowan no Loma, mapaekelay ko finawlan pasangarayto a saselaˈ. O mikingkiway to likisi no Loma ci Tasito sanay, itini pikowan no hongti no Loma ci Tipirius, kaitinian ni Yis i fafekang no sera a tatokian i, “cato ka tomeseng ko Siriya ato Yutiya to karetengay ˈinorong, micangacangay to hongti milowan to sata nangra.”

O pakayraan misorot to sata mitongalay to ˈinorong no finawlan. O fadangalan misorot to sata ngaˈayay pacakayen, saˈakawangay ko sapicakay a tamdaw milifok to fadangalan ikor, miciyaay to roma tamdaw patado cingranan misorot to sata, oniya tamdaw ngaˈayay mikitini mietan to payci. Ano nengnengen iraay ko patadoay ci Cakayan a misorot to sata. (Luka 19:1, 2) Mihaenay i, hatiniay a pakayraan tada mapiliˈay ko finawlan, anca tada misakahmaway to miciyaan a misorotay to sata a tamdaw.