1. Pasowalan ni Pitiro ko ˈalomanay tamdaw sasamaan ko hademak hani?

TOYA romiˈad, masaˈopoay ko ˈalomanay tamdaw i Yirusalim misalisin, iraay ko faˈinayan fafahiyan, mikitiniay caka lecad a kitakit, caka lecad a sasowalen a ira. Maˈaraway nangra ko cecay kafahkaan a demak: O kalo a Yutaya tamdaw mafanaˈay somowal tono nalacolan nangra a sowal! Kafahkaan nangra o sowal noniya Yutaya tamdaw, ato mifanaˈan no tarokos ci Pitiro cangranan a demak. Matengilay nangra, ano pakasoˈlin a mihakelong ci Yis Kristoan o mamalidong. Oniya lihaf tangongolay ko pitemer to falocoˈ nangra, sanay a milicay: “Maanen niyam ko demak ta ngaˈay saw?” Pacaˈof ci Pitiro: ‘Kamo kahacecay tamdaw ka picada to paputisem.’—Dmak 2:37, 38.

2. Oniya lalakaw wa milengo to manan? (Nengnengen ko papotalay coka.)

² Dotoc mifekaday a demak, tada mikowaday to tamdaw. Toya romiˈad, madeng 3000 ko micadaay to paputisem a tamdaw malo nisawawaan ni Kristo. Mihaenay, o padamaay to tamdaw malo Krisciyang a tayal misatapangayto, hanaca tahaniniay a padadotoc, onini ko patorodan ni Yis to nisawawaan a kalimlaan a ˈinorong. Manaokaniw, cowa ko pina tatokian, ngaˈayto padama to tamdaw malo Krisciyang. Alatek pina folad, cecay miheca, anca halafinay tatokian ngaˈ macakat ko pacekiwan micada to paputisem. Soˈlinayto padama to tamdaw malo Krisciyang adihayay ko mapalakay a toki, ano misikayay kiso nohatini to pacekiway, wa mihai tonini. Oniya lalakaw wa milengo, sasamaan ko demak iso, padama to pacekiwan micada to paputisem malo Krisciyang.

3. Mikitini Matay 28:19, 20, sasamaan ko demak no pacekiwan wa malaˈosi ko patosokan micada to paputisem hani?

³ Sapicadaaw to paputisem ko pacekiwan, wa misakadademak to mananamay a sifanaˈ ngaˈ ngaˈay micada to paputisem.  (ˈOsien ko Matay 28:19, 20.) Na masowalay ni Yis i sapatinako ko cecay ‘citanengay tamdaw’ tangongol ko mikorkoran a sera, itini fafekang no ˈongcoy patireng to lomaˈ. Misakadademak ko pacekiwan to mananamay, malecaday oniya ‘citanengay tamdaw.’ (Matay 7:24, 25; Luka 6:47, 48) Mihaenay, sasamaan kita padama to pacekiwan misakadademak to mananamay hani? Dotoc, nengnengen ita ngaˈay midemak to tolo a demak.

4. Sasamaan padama to pacekiwan padadotoc a macakat, malaˈosi ko patosokan micada to paputisem? (Nengnengen ko sapatongal lalakaw “ Padama to Pacekiwan Patireng ato Malaˈosi ko Patosokan.”)

⁴Padama to pacekiwan patireng to patosokan. Hano mihaen to demak hani? Haratengen ko laenoay sapatinako. Ano paparakat kiso to paliding tayra i maraayay pala, itini fatad no lalan wa mikilim to paselaˈan a kitiraan, mihaen cato pakayni karaay no lalan a marorayen miharateng. Malecaday, ano patireng ko pacekiwan to kaemingay patosokan, wa mahapinang o patosokan micada to paputisem cowa ko pasangaray. Wa ngaˈay sakadademaken iso i lalomaˈ no Layapen ko Midaˈocay ˈOrip a cudad “Kaemingay a Patosokan” sapatongal lalakaw padama ko pacekiwan misakadademak to mananamay, padadotoc a macakat. Mahererek ko cecay fedengan, pakalaloken ko pacekiwan milahci toniya kaemingay patosokan. Ano ciharatengay kiso patireng ko pacekiwan to roma patosokan, papitiliden cingra i laeno no “Roma” sanay a kitiraan. Ngaˈayay sakadademaken koni sapatongal lalakaw, malalengo cingranan ngaˈay malaˈosi ko mingataay a patosokan ato iraayay a patosokan.

5. Mikitini i Marko 10:17-22, pasowalan ni Yis ko cecay cihafayay a tamdaw sasamaan ko demak? Misamanay?

⁵Padama to pacekiwan makahi mifalic. (ˈOsien ko Marko 10:17-22.) Mafanaˈay ci Yis, pasangaray ko cihafayay tamdaw mifalah to kihcod a dafong. (Marko 10:23) Kawra, kamayan papipacakayen ni Yis ko cecay cihafayay  a tamdaw to kihcod dafong, mifalic to pakayraan a maˈorip. Misamanay hani? Samanen maolahay ci Yis cingranan. Latekay, cowaho ka harek ko pacekiwan a misaday saan kita miharateng, hato eca ka kaliki pakalalok cingranan a mifalic. O cecay tamdaw sapisawadaw to tatihay a nanaman, micaˈedong to faelohay capeling, misaaliay to toki. (Kolosay 3:9, 10) Kawra, ano kahenay kiso milengo toniya demak, wa kahenay ko pacekiwan a talaˈayaw mihawang. Mihaen ko demak iso, o paihkalay to kaciharateng cingranan.—ˈOlic 141:5; Taneng 27:17.

6. Hano pakayni kita i pisadak to salicay, cipinang to pinengneng no pacekiwan to cecay demak hani?

⁶ O mamihadak kita to salicay, cipinang to samanay ko pinengneng no pacekiwan to cecay demak. Kalimlaan ko pihaen to demak, o papadama konini kitaanan mihapinang hakowaay ko kacipinang no pacekiwan, o manan ko pakasoˈlinan ningra. Ano micerid kita mihaen to demak, ano milengo kita to pasangaray cadaen ningra a demak noikor wa madoloto. Ngaˈayay sakadademaken ita ko mihadakan no Layapen ko Midaˈocay ˈOrip cudad a salicay, cipinang to pinengneng no pacekiwan. Tinakoen i saka 4 fedengan mihadakan a salicay: “Ano misakadademak kiso to Yihofa a ngangan pangangan to Kawas i, sasamaan ko harateng Ningra hani?” Itini saka 9 fedengan iraay ko salicay: “Wa pakayni maanan a demak a mitolon kiso?” Salakat, cowa ka fanaˈ ko pacekiwan to sasamaan pacaˈof to mahaenay salicay. Ngaˈayay sakadademaken iso ko milingatay sinael ato coka padama cingranan a misimsim.

7. Wa ngaˈay kita samaan misakadademak to soˈlinay nalifetan a pakalalok to pacekiwan?

⁷ Ano mafanaˈto ko pacekiwan to sasamaan ko demak no niyah i, ngaˈayay sakadademaken iso ko soˈlinay nalifetan, pakalalok cingranan misakadademak to mananamay. Tinakoen, ano pasangaran ko pacekiwan micerid mirienang to saˈopo, ngaˈayay paˈarawan cingra to saka 14 fedengan “Malalitingay a Lalakaw” misiwkayan a ika no sapatongal lalakaw Ciharatengay ci Yihofa Takowanan. Sapikilimaw to adihayay nalifetan, ngaˈayay nengnengen ko faelohay cudad “Calepen Mikadkad” ato “Malalitingay a Lalakaw” toniya tosa sapatongal lalakaw. * Kawra aka palalinien ita ko pacekiwan to tao, somowal: “Ano madangaray no tao, o mamadangar iso.” Pahapinangen ko pacekiwan tonini. Ngaˈayay tadtaden iso, o maanan ko padamaay to itiniay ika a tamdaw misakadademak to safalod no Fangcalay Cudad. Ngaˈayay hadaken iso ko cecay kalimlaan a sinael, anca o ngaˈayay pakayraan. Roma i, adihayen mitadtad samanay ci Yihofa padama toniya tamdaw.

8. Sasamaan padama to pacekiwan palahad to olah ci Yihofaan?

⁸Padama to pacekiwan palahad to olah ci Yihofaan. Sasamaan ko demak? Kilimen ko toki misaadihay mitadtad to capeling ni Yihofa. Padamaen ko pacekiwan mihapinang to lipahakay a Kawas ci Yihofa, makalimay Cingra padama to maolahay Cingranan a tamdaw. (1 Timoti 1:11; Hipray 11:6) Pacipinangen ko pacekiwan, misakadademak to minanaman wa adihay ko epoc, hanaca mitokelay ci Yihofa cingranan milifok to epoc pakayniay kaolah Cingranan. (Isaya 48:17, 18) Ano matongal ko olah no pacekiwan ci Yihofaan, wa ira to ko ˈicel a mifalic.—1 Yohani 5:3.

9. Mikitini Marko 10:29, 30, o manan ko papadama to tamdaw makahi kinafalah, micada to paputisem malo Krisciyang?

⁹ Saka laˈosiaw ko patosokan micada to paputisem, misaaliay to kakinafalah ko pacekiwan.  Malecad o masowalay i fafekang cihafayay a kapah, o roma pacekiwan o mamifalah to pina dafong. O tayal nangra ano cowa ka tatodong to safalod no Fangcalay Cudad, o mamifalic to katayalan alatek. ˈAlomanay pacekiwan wa misawad to cowa kaolah ci Yihofaan a widang, ecato picawmaˈ cangranan. O roma pacekiwan mapacieciay miliyas to paro no lomaˈ, samanen cowa kaolah cangra to Misawacayay Tamdaw ni Yihofa. Mafanaˈay ci Yis, mihaen a kinafalah cowa ko madoloay, kawra mikiˈokay cingra, o mihakelongay cingranan a tamdaw cowa ko mamatoled. Wa milifok cangra to kadofahay a sapalifon, pafeli cangranan to dihkoay a paro no lomaˈ no Krisciyang. (ˈOsien ko Marko 10:29, 30.) Sasamaan kiso padama to pacekiwan, ho ngaˈay malifok ningra koniya kalimlaan a sapatelong hani?

10. Mikitini i nalifetan ni Manoaye mananam iso ko manan hani?

¹⁰Malawidang to pacekiwan. Ciharateng kiso to pacekiwan tada kalimlaan. Misamanay hani? Itini Mesiko a salikaka ci Manoaye, mitikol miharateng cingra to pinanam to Fangcalay Cudad i, samanay ko singsi padama cingranan. Sanay cingra: “Tocerid ˈayaw no misatapang minanam, licayay ko singsi takowanan ngaˈayho han, mansa sinowayay ko harateng ako, makahi pasowal cingranan to maamaan. Matinakoay ako tada ciharatengay cingra takowanan.”

11. Macacawmaˈ ko pacekiwan to singsi wa ira ko manan sapadama cingranan hani?

¹¹ Makahiay ci Yis mipalak to toki kalacafay to nisawawaan, o mamihadak kita to toki micawmaˈ to pacekiwan. (Yohani 3:22) Ano padadotoc macakat ko pacekiwan, ano ngangaˈay kiso, ngaˈayay tahidangen cingra tayni i lomaˈ iso minanom to ociya, mitahka, anca malacafay minengneng to kamok no JW Tilifi to folafoladan. O salawina no pacekiwan ano misalisin i, matoˈolay alatek. Toniya tatokian ano tahidangen iso cingra, wa mahemek cingra. Itiniay Okanta ci Kacipowi sanay: “Harateng ako o mananamay i singsi macacawmaˈ i, malecaday ko adihay i pinanam to Fangcalay Cudad. Mahapinangay ako tada ciharatengay  ci Yihofa to finawlan Ningra, mahapinangayho to lipahakay cangra, makalimay kako malecad cangranan.”

12. Hano mitahidang kita to kasasiroma a salikaka mirienang to pipacekiw hani?

¹²Mitahidang to kasasiroma a salikaka mirienang to pipacekiw. Latekay, cecay aca ko niyah misikay to pacekiway, anca tahidang to cecay mitosilay malacafay ngaˈayay saan ko harateng no mita alatek. Soˈlin mahaen, mitahidang to kasasiroma a salikaka mirienang to pinanam, wa matongal ko sadama to pacekiwan. Itiniay Moltowa ci Temiteli sanay: “Kahacecay mirienangay to pipacekiw a mitosilay cowa ka lecad ko pitadtad, padamaay konini takowanan tano caka lecad a pakayraan misimsim. Roma i, samanen mafanaˈayto kako to ˈalomanay a salikaka, mansa sakinacecay masaˈopo i cowato ka marawraw.”

13. Hano papakalaloken ko pacekiwan mirienang to saˈopo?

¹³Pakalalok to pacekiwan mirienang to saˈopo. Hano mihaen to demak hani? Samanen o saˈopo o kalimlaan no midokoay a demak, palimoˈotay ci Yihofa kitaanan masaˈopo a midoko Cingranan. (Hipray 10:24, 25) Roma i, o paro no lomaˈ ita ko salikaka, malacafay kita cangranan masaˈopo, malecaday o paro no lomaˈ malacafayay mitahka to ˈaredetay kakaenen. Pakalalok kiso to pacekiwan mirienang to saˈopo, o padamaay cingranan pahawang to kalimlaan a hawang, pasayra i picada to paputisem a patosokan talaˈayaw. Pakaynien i pacekiwan, mirienang to saˈopo cowa ko madoloay alatek. O Layapen ko Midaˈocay ˈOrip a cudad wa mihadak to maanan a sapadama hani?

14. Wa ngaˈay kita samaan pakalalok to pacekiwan mirienang to saˈopo?

¹⁴ Ngaˈayay sakadademaken iso ko Layapen ko Midaˈocay ˈOrip a cudad saka 10 fedengan a pakalalok to pacekiwan. ˈAyaw no tepangen koniya cudad, mitahidangan no likakawa ko adihayay ko nalifetan a mitosilay tanoniya fedengan a mitanam, mitahidang to pacekiwan mirienang to saˈopo, tada ngaˈayay ko minaroˈan. Manaokaniw, cowa ko tahini saka 10 fedengan ngaˈ mitahidang kita to pacekiwan mirienang to saˈopo. Kahnayen a mihaen to demak, saliyaliyawen a pakalalok cingra. O raremoen no kahacecay pacekiwan a pasangaray cowa ka lecalecad, mihaenay o sasinanoten ita ko pakayraan no pacekiwan. Tooren ko saali ningra a mihadak to ciepocay a sapadama. Ano eca ka tangsol ko pacekiwan a midemak aka matoled, pairaen ko mihadidiay, padotocen a mitahidang cingranan.

15. Wa matalaw ko pacekiwan to maanan alatek?

¹⁵ Maharatengayho iso ˈayaw no micada ko niyah to paputisem, o nafalocoˈan to mamalo Misawacayay Tamdaw ni Yihofa han? Matalaway kiso itiya han? Harateng iso cato ka ngaˈay pakalomalomaˈan ko niyah mitosil, anca matalaw to pisafelit no paro no lomaˈ widang tisowanan. Ano mahaenay, o mamafanaˈ kiso to nafalocoˈan no pacekiwan. Na somowalay ci Yis wa calemcem ko roma tamdaw toniya demak, kawra kamayan palimoˈoten ningra ko nisawawaan aka pakayni kakokiˈ a misawad midoko ci Yihofaan. (Matay 10:16, 17, 27, 28) Samanan ni Yis padama ko nisawawaan miremo to makokiˈay? Wa ngaˈay kita samaan mitodong cingranan hani?

16. Samaan pahatatanam to pacekiwan pasayra i tamdaw a mitosil?

¹⁶Palidlid han pahatatanam ko pacekiwan pasayra i tamdaw mitosil. Tiya corcoren ni Yis ko nisawawaan malingad mitosil i, marawraway cangra alatek. Kawra pasowalan ni Yis cangra pasayra cimaanan a mitosil, o maanan ko hasowal, padamaay cangranan miremo to makokiˈay. (Matay 10:5-7) Wa ngaˈay kiso samaan a minanam ci Yisan hani? Padamaen  ko pacekiwan mihapinang o cima ko tatosilen ningra. Tinakoen, papiharatengen ko pacekiwan, o cecay kimad no Fangcalay Cudad itini kafanaˈan ningra cima ko matatodongay padamaen, dotoc pasifanaˈan ko pacekiwan tano kantangay a pakayraan paladaˈ toniya soˈlinay kimad. Itini Layapen ko Midaˈocay ˈOrip a cudad iraay ko “Ano Mihaen ko Sowal no Tamdaw” ato “Ano Milicay ko Tamdaw” sanay a lalakaw. Ano ngangaˈay i, sakadademaken iso koniya lalakaw malacafay to pacekiwan mihatatanam. Ano mihatatanam i, padamaen ko pacekiwan misakadademak to sinael, tano kantangay damsayay a pakayraan pacaˈof to salicay no tao.

17. Wa ngaˈay kita samaan misakadademak to Matay 10:19, 20, 29-31, padama to pacekiwan mitadiˈec ci Yihofaan?

¹⁷Padama to pacekiwan mafanaˈ a mitadiˈec ci Yihofaan. Pasowalan ni Yis ko nisawawaan, tada maolahay ci Yihofa cangranan, o papadama cangranan. (ˈOsien ko Matay 10:19, 20, 29-31.) Pacipinangen ita ko pacekiwan, wa mihaen a midama ci Yihofa cingranan. Malacafay kiso cingranan mitolon i sowalen ko patosokan ningra, wa ngaˈay padama cingranan mitadiˈec ci Yihofaan. Itiniay i Polan ci Folangcisike sanay: “O singsi ako marariday i satolon somowal to patosokan ako. Tiya maˈaraw ako pipacaˈof ni Yihofa to satolon no singsi, misatapangay kako pasayra i Kawas mitolon. Mifalic kako to faelohay katayalan caka halafin, wa mihifang matayal mirienang to taykay ato saˈopo. Toya tatokian, soˈlinay matinako ako ko sapadama ni Yihofa takowanan.”

18. Pakayni mihadakan no pacekiway singsi a ˈicel, samanay ko harateng ni Yihofa?

¹⁸ Tada ciharatengay ci Yihofa to pacekiwan ita. Mafanaˈay Cingra hakowaay ko mihadakan no singsi a ˈicel padama to tamdaw miingid Cingranan, mansa tada maolahay cingra cangranan. (Isaya 52:7) Soˈlin awaay ko pacekiwan iso nohatini, ngaˈayayho mirienang to pipacekiw no tao, padama to pacekiwan nangra padadotoc a macakat, malaˈosi ko patosokan micada to paputisem.