Sowal ni Pawlo: ‘Pakayni i rikec, mapatayayto kako, miliyasay to rikec, hato ngaˈay kako pakayni i Kawas a maˈorip.’—Kalatiya 2:19.

Oniya sowal ni Pawlo, milingatay to cecay kalimlaan a kimad to nano sowal ningra to Kalatiya a kasakopang. Itira o roma Krisciyang pakasoˈlinay to miowingan no makaniway singsi a kimad, o tamdaw wa midofdof to Rikec ni Mosi ngaˈ malidong saan miharateng, mangalef o mamicada to kerit. Kawra mafanaˈay ci Pawlo, cowato pisaali ko Kawas to finawlan Ningra micada to kerit. Ciˈicelay ci Pawlo pacoli toniya mararaway a sasowalen, padama to salikaka matongal ko pakasoˈlin to mihadakan ni Yis Kristo a sapatefoc.—Kalatiya 2:4; 5:2.

Ihkalay ko sowal no Fangcalay Cudad, mapatayay tamdaw cowato kafanaˈ to taliyokay a demak, cowa ko mamafiyor noniya demak. (Patnakay 9:5) Mihaenay, sowal ni Pawlo ‘mapatayayto kako, miliyasay to rikec,’ tatodong i cowato kaˈimer no Rikec ni Mosi. Mafanaˈay ci Pawlo, ano pakasoˈlin cingra to sapatefoc, wa ‘ngaˈay pakayni i Kawas a maˈorip.’

Hano haenen ko sowal, ‘pakayniay i rikec’ hato iraay ko mahaenay a kafalic ni Pawlo? Itini saka 16 sinael mitadtaday ci Pawlo, ‘malo moecelay ko tamdaw pakayniay i pihakelong ci Yis Kristoan, cowa ko pakayniay pidofdof to rikec a waywayan.’ (Kalatiya 2:16) Kawra, o Rikec soˈlinay iraay ko kalimlaan a sapadama. Pasowalay ci Pawlo to Kalatiya a Krisciyang sanay: ‘O sapahapinangaw to raraw saka, patooren no Kawas to rikec ko katatelekan. Tahira i kairaan noya mikiˈokan a teloc ko saˈosi no Kawas.’ (Kalatiya 3:19) Mihaenay, o Rikec pahapinangay to tamdaw, o cowa kalefot ciraraway a tamdaw cato ka malefot ko pidofdof to rikec, saikor misaaliay cangra to malefotay a sapatoˈaya ngaˈ ngaˈay masodod ko raraw. Mihaenay, o Rikec mikeriday to tamdamdaw tayra i mikiˈokan no Kawas a ‘teloc,’ i ci Kristoan. O cecay tamdaw midofdof ci Kristoan, wa ngaˈay panganganen no Kawas malo moecelay a tamdaw. (Kalatiya 3:24) Pakayniay i Rikec ko lalangian, micadaay ci Pawlo ato midofdofay ci Kristoan, hato panganganan no Kawas malo moecelay a tamdaw. Mihaenay, ‘mapatayayto, miliyasay to Rikec’ cingra, ‘ngaˈay pakayni i Kawas a maˈorip.’ Ikorto, caayto kaˈimer no Rikec cingra, kawra wa midofdof cingra to Kawas.

Itini Loma cudad paihkalay ci Pawlo to malecaday a harateng, sanay: ‘Salikaka ako, pakayni kinafalah ni Kristo to tireng ningra, malecaday kamo o mapatayay ecato kaˈimer no Rikec . . . nohatini miliyasayto kita to saˈimer no Rikec, samanen pakaynien i miˈimeray kitaanan i salakat a Rikec, mapatayayto kita.’ (Loma 7:4, 6) O sinael no Loma ato Kalatiya 2:19 paihkalay, o misowalan ni Pawlo a ‘patay’ cowa ko misawkitan no Rikec a raraw ko sakapatay, ao milifokay to pasalat. Cowato piˈimer ko Rikec ci Pawloan ato roma Krisciyang, pakayniay cangra i pakasoˈlin to sapatefoc ni Kristo a milifok to sakatedal.