1. Misamanay, ci Satan malecaday o miˈadopay han ko sowal hani?

O PATOSOKAN no miˈadopay o sapilepelaw anca mipatay to ˈaˈadopen. Mitelian ningra ko masakenaay a talakal, oniya talakal masowalay no Fangcalay Cudad. (Yopu 18:8-10) Samanay ko miˈadopay mikayhid to pinaˈorip makefeng i talakal hani? Misongilaˈay ko miˈadopay mihapinang, minengneng to tatalacowa ko ˈaˈadopen, o maanan ko kaolahan, samaan madolo a makefeng i talakal. Ci Satan malecaday o miˈadopay, misongilaˈay a mihapinang kitaanan, misinanot to tatalacowa kita, o maanan ko kaolahan, dotoc miteli to talakal, itini caka harateng ita a tatokian milepel kitaanan. Kawra mikiˈokay ko Fangcalay Cudad, soˈlin makefengto kita i talakal, wa ngaˈayho a masadak milaliw. Pasifanaˈayho ko Fangcalay Cudad kitaanan, sasamaan i satapang aca miliyasto toniya talakal.

2. O manan ko saciˈicelay a tosa talakal ni Satan hani?

² O saciˈicelay a tosa talakal ni Satan, o misatakaraway ato maˈanofay. * Pina caˈol mihecaan, ci Satan misakadademakay toniya tosa waywayan milepel to ˈalomanay a tamdaw. Ci Satan malecaday milepelay to ˈayam a tamdaw, mikayhid to pinaˈorip makefeng i talakal. (ˈOlic 91:3) Kawra, wa ngaˈay kita miliyas to talakal ni Satan. Misamanay? Samanen maharekayto pasowal ci Yihofa kitaanan, ci Satan wa tano manan a pakayraan misaˈfit.—2 Korinto 2:11.

3. Hano tiliden ni Yihofa koniya soˈlinay nalifetan no roma tamdaw i Fangcalay Cudad?

³ Pasowalay ci Yihofa kitaanan to soˈlinay nalifetan no roma tamdaw, pahapinang kitaanan to masakatalawan ko misatakaraway ato maˈanofay a waywayan. Mihaen, o ngangaˈay to kita  miliyas to malecaday a raraw. Dotoc lalengoen ita a tinakoan wa mitadtad, o halafinayto midoko ci Yihofaan a tamdaw o mamakefeng i talakal ni Satan alatek. Sakoniya sowal, cowa ko papakaliyas kita to kapal ni Satan han? Cowa. Tiliden ni Yihofa koniya tinakoan i Fangcalay Cudad, pakayniyay ‘sapirikecaw kitaanan,’ ho ngaˈay kita talipaˈelal. (1 Korinto 10:11) Mafanaˈay Cingra wa ngaˈay kita mikitini minanam to sapisifanaˈ, mihaen wa ngaˈayto kita miliyas to talakal ni Satan.

4. O misatakaraway wa mikayat to masamanay a teloc?

⁴ Mitokelay ci Satan lomahad i falocoˈ ita ko misatakaraway a waywayan. Mafanaˈay cingra ano malo malitaˈangay a tamdaw kita, o mamalecadto cingranan, hanaca mamalahdaw ko tahadaˈocay a ˈorip. (Taneng 16:18) Mihaenay sanay mirikecay ko tarokos ci Pawlo, o cecay tamdaw ‘misatakaraw a malitaˈang, papasangar miliyas to macadaay ni Akoma a sasawkit.’ (1 Timoti 3:6, 7) Ano faelohay micada to paputisem kita, anca halafinayto midoko ci Yihofaan, o mahaenay a demak o mamifekad i tireng ita alatek.

5. Mikitini Patnakay 7:16, 20, o misatakaraway a tamdaw paihkalay to masamanay a waywayan hani?

⁵ O misatakaraway a tamdaw oniyah aca ko maharatengay. Mitokelay ci Satan misateked ko harateng ita, mangalef ano tahalifa to pasangaray oniyah aca ko dimokosen, eca ka pisikor to samanay ci Yihofa a miharateng. Tinakoen, na mapaorafay kiso anca tahalifaay to cowa ka sadafdaf a pakayraan han? Makalimay ci Satan maˈaraw kiso miroroh ci Yihofaan ato salikaka. Tokel ningra kisowanan awaay ko kapo mihakelong to araaw ni Yihofa saan ko harateng, edeng tano niyah a pakayraan a misaysay to pasangaray.—ˈOsien ko Patnakay 7:16, 20.

6. Mikitini nalifetan no salikaka i Helan mananam iso ko manan?

⁶ Itini Helan fafahiyan a salikaka pakayni i dangoc no tao tada mangolaway, cowato ka ngaˈay mihadidi ko niyah saan. Sanay cingra: “Tada matoˈolay kako, kawra caay ka ngaˈay mifalic to pinengneng no niyah to tao, orato  pasowalay to faˈinay, wa malinah kita tayra i roma kasakopang.” Ikor, minengnengay cingra to 2016 miheca 3 folad a JW Tilifi a kamok. Milengoay ko lalakaw samaan matatodong ko pinengneng to dangoc no tao. Sanay cingra: “Mahapinangay ako wa misapoener kako, soˈliˈlin a mihapinang to dangoc no niyah, caay ko mamifalic to salikaka i kasakopang. Toniya kamok pacipinangay takowanan, o sakakaay haharatengen ako i ci Yihofa ato saˈakawangay sapikowan a fadangalan Ningra.” Mikitini nalifetan noniya salikaka mananam iso ko manan? Ano tahalifa kiso to sapalifet i, tongalen miharateng ko pinengneng ni Yihofa, cangacangen Cingra padama tisowanan mikitini pakayraan Ningra a minengneng to tao. O kakarayan Wama cipinangay to raraw no salikaka, kawra makahiay misodod cangranan, mitokelay Cingra tisowanan mihaen ko demak.—1 Yohani 4:20.

7. Pakayni pisatakaraw ni Uciya Hongti samanayto ko teloc?

⁷ O Hongti no Yutaya ci Uciya pakayniay pisatakaraw eca ka makahi mitengil to limoˈot, midemakay to awaay ko fadangalan ningra a demak. Ci Uciya na citanengay ko demak, ano sofitayto a demak, patirengay anca mawmahay a demak adihayay ko malaˈosiay, samanen ‘palemedan no Kawas cingra.’ (2 Rayray 26:3-7, 10) Kawra, ‘macakat a ciˈicel cingra, misatakaraway ko falocoˈ, mikafod to sakapatay.’ Saˈosi ni Yihofa edengan ko saysi ngaˈ ngaˈay patafang to exiw i fangcalay sefi, kawra patelas sanay ci Uciya micomod i fangcalay sefi, haratengay sa mitodoh to exiw. Tada maketeray ci Yihofa, padengaan cingra to lonoˈ a adada, tahiraay i patay cowa ka maadah.—2 Rayray 26:16-21.

8. Itini 1 Korito 4:6, 7 pafeliay kitanan to manan a sapatalipaˈelal, padama kitanan miliyas to misatakaraway hani?

⁸ Wa malecad kita ci Uciyaan makefeng i talakal no misatakaraway han? Nengnengen ko tinakoan ni Hesay. O malaˈosiay a misasingdiay cingra, itini kasakopang o kangodoan no tamdaw a malohemay malitengay. Mikimad cingra i pitaykayan, milicayanho no kasakilac kantok cingra. Sanay cingra: “Kawra, mitiˈeray kako to taneng ato nalifetan no niyah, cowa pitadiˈec ci Yihofaan. Tada idahiyay kako saan miharateng, mansa cowa pitengil to sapatalipaˈelal ato limoˈot ni Yihofa.” Ikor pakidemay ko raraw ni Hesay, mafalahay cingra. ˈAyaw no pina miheca, miliyaway  cadaen no kasakopang, sanay cingra: “Pacipinangan ni Yihofa kako, o kalimlaan i cowa ko saaroˈan, ao pitengil to limoˈot Ningra.” Haratengen, o kihcod a inaneng ato tayal i kasakopang ita, sahtoay o sapafeli ni Yihofa. (ˈOsien ko 1 Korinto 4:6, 7.) Ano misatakaraw a malitaˈang kita, cowato ko sasakadademaken ni Yihofa kita.

9. Pakayni kaˈanof, ci Satan aci Ifa midemakay to manan hani?

⁹ Masowal ko maˈanofay, wa maharateng ita ci Akoma Satan alatek. Na o coyoh ni Yihofa cingra, maedeng adihayay ko mikiriwiˈay a sapalemed, kawra sapialaawho to adihayay, sapilifokaw to edengan ni Yihofa a dadokoen. Mitokelay ci Satan malecad kita cingranan, mansa mihalaka cingra ira ko macangalay harateng ita. O sakacecay a patosokan ningra ci Ifa. Maolahay ci Yihofa ci Ifaan ato faˈinay ningra, ‘o masakenaay a heci no kilang i palosayan’ ngaˈayay kaenen nangra, tahira karenecan a komaen, dengan o heci no cecay kilang cowa ka ngaˈay kaenen. (Satapangan 2:16) Milipalawan ni Satan ci Ifa, pasowal cingranan oya cowa ka ngaˈay kaenen a heci saan ko Kawas o ngaˈayay kaenen ningra. Cowa pisalimla ci Ifa to iraayto no niyah, sapilifokawho to adihayay. Samanay ko teloc? Mararaway ci Ifa, saikor mapatayay.—Satapangan 3:6, 19.

10. Pakayni kaˈanof, midemakay ci Tafiti to manan hani?

¹⁰ Ci Tafiti na makefengay i talakal no maˈanofay. Pafelian ni Yihofa ci Tafiti to hafay, saaroˈan, padamaanho cingra pakalowid a milood. Na mikifalocoˈay a miakoˈid ci Tafiti a pasowal, o sapalemed no Kawas cingranan ‘caayto ka emin misaˈosi.’ (ˈOlic 40:5) Kawra kinacecayay, mapawanay cingra to adihayay ko sapafeli ni Yihofa cingranan. Cowato kasaloen, sapilifokawho to adihayay. Soˈlin adihayayto ko fafahi ni Tafiti itiya, iraayho ko kalim no falocoˈ to fafahi no tao, mihai lomahad i falocoˈ ko mararaway a coos. O kaolahan ningra a fafahiyan ci Patsipa, o faˈinay ni Patsipa o Hiti a tamdaw ci Uriya. Maˈaˈodangay ci Tafiti ci Patsipaan hato mapoyapoyay, misafacoayho mipatay ci Uriyaan. (2 Samuil 11:2-15) Samanay ko harateng ni Tafiti hani? Cowa pakaˈaraw ci Yihofa to midemakan ningra sanay miharateng han? Oniya madimadiay ci Yihofaan a tamdaw, pakayni kaˈanof to cecay riyad ka adayayan ko teloc. Kao ngaˈayay mihaiay cingra to raraw, soˈliˈlin a pasasiyor. Ngaˈay milifok to sasodod  ni Yihofa, tada mitemeray to falocoˈ ningra!—2 Samuil 12:7-13.

11. Pakayni i Ifiso 5:3, 4, o manan ko papadama kitanan pakalowid to maˈanofay hani?

¹¹ Mikitni tinakoan ni Tafiti mananam ita ko manan hani? Wa padadotoc kita a miakoˈid ci Yihofaan, mihaen ngaˈ pakalowid to maˈanofay. (ˈOsien ko Ifiso 5:3, 4.) Ano iraay ko maamaan ita nohatini, o mamarenec ko falocoˈ. Haratengen hena, pakalalok kita to pacekiwan to romiˈamiˈad miakoˈid ci Yihofaan to cecay a demak. Ano mihaen ko demak ningra, cecayto a lipay, maharekay ningra pakayni pito a demak miakoˈid to Kawas. (1 Tisalonika 5:18) Mihaenay ko demak iso han? Ano misongilaˈay kiso miharateng to kihecod a nano demak ni Yihofa tisowanan, wa miakoˈid ko falocoˈ. Mafanaˈ kiso miakoˈid wa ira ko marenecay falocoˈ, ano marenec ko falocoˈ cowa to ko mamaˈanof.

12. Pakayni i kaˈanof, o Iskariyot tamdaw ci Yuta midemakay to manan hani?

¹² O maˈanofay falocoˈ no Iskariyot tamdaw ci Yuta telocto malo kaacekan a mitowakangay a tamdaw, kawra cowa ko mahaenay a tamdaw cingra isalakat. (Luka 6:13, 16) Piliˈen ni Yis ci Yuta malo tarokos, minilnil cingranan mikowan to payci, paihkalay konini to tada inanengay ci Yuta, ngaˈayay pakasoˈlinen. Ci Yis ato tarokos misakadademakay to ihakoay a payci itini mitosilay a tayal, oniya payci malecaday o midamaay to mitosilay a tayal i paro no kakarayan a kiyaho. Kawra ikor misatapangay a mitakaw to payci ci Yuta, soˈlin kinapinaay matengil ningra ko pirikec ni Yis aka maˈanof, kamayen cowa ka pisikor cingra.—Marko 7:22, 23; Luka 11:39; 12:15.

13. Ci Yuta hacowaay paihkal to maˈanofay a falocoˈ?

¹³ ˈAyaw no kinafalah ci Yis caka halafin mifekaday a demak, mahapinangay ko maˈanofay a falocoˈ ni Yuta. Ci Yis aci Marta, Mariya ato pina nisawawaan malacafayay palafang i lomaˈ no malonoˈay a Simongan. Mitahka i, lomowaday ci Mariya, mitaktak i fongoh ni Yis to matekesay a dawdaw, maˈaraw ni Yuta ato roma nisawawaan tada maketeray. Harateng no roma nisawawaan sakadademaken koniya payci padama to manikaway wa ikaka ko kangaˈay saan, kawra o araaw no falocoˈ ni Yuta cowa kalecad. Sowal no Fangcalay Cudad ‘o tohoy cingra’ sanay, sapitakawaw to payci i hako. Ikor, o maˈanofay falocoˈ miocoray cingranan, pakayni i miming payci pacakay sanay ci Yisan.—Yohani 12:2-6; Matay 26:6-16; Luka 22:3-6.

14. Cecay mararamoday samanay misakadademak to safalod no Luka 16:13 hani?

¹⁴ Patalipaˈelalan ni Yis ko nisawawaan: ‘Caay kangaˈay kamo malo koli no Kawas, malo koliho no hafay.’ (ˈOsien ko Luka 16:13.) Tada matatodongay koniya sowal ni Yis. Nengnengen ko tinakoan no cecay mararamoday i Romaniya samanay misakadademak toniya safalod. Itiniay cangra i cihafayay kitakit matama ko caka halafin a tayal. Sanay cangra: “Adihayay ko kiyam niyam to papatikolen, mansa satapang aca o sapafeli ni Yihofa tamiyanan koniya tayal saan miharateng.” Kawra, iraay ko pasangaray noniya tayal, micaraay cangranan mirienang to midokoay a demak. Maharek cangra minengneng to lalakaw no Mikecolay mihaenay ko pisaˈosi, oniya lalakaw o 2008 miheca 8 folad 15 romiˈad a Mikecolay “Misarocod to Falocoˈ Madimadi to Kawas.” Sanay ko sowal nangra: “Ano pakayni sapietanaw to adihayay payci malinah tayra roma kitakit, cowato ko sakakaay kalimlaan ci Yihofa i falocoˈ niyam, o mamapalak ko kalalaˈed niyam Cingranan.” Mihaenay, misawadan nangra koniya tayal. Ikor samanayto hani? Oniya salikaka itini niyaroˈ matamaay ko matatodongay a tayal, sanay ko  fafahi ningra: “Midimokosan ni Yihofa ko sikawdan Ningra.” Lipahakay koniya mararamoday mipiliˈ ci Yihofaan malo tawki, eca ko hafay ko misatawkian.

15. Hano ngaˈay pakasoˈlin kita, makefengay i talakal ni Satan a tamdaw wa ngaˈayho a pakalaliw?

¹⁵ Ano makefeng kita i talakal no misatakaraway ato maˈanofay, sasamaanto aki? Aka calemcem, wa ngaˈay kita milaliw! Masowalay ni Pawlo, ‘malepelay ni Akoma’ a tamdaw wa ngaˈay miliyas to talakal ningra. (2 Timoti 2:26) O ngaˈayay a tinakoan ci Tafiti. Micadaay cingra to sarikec ni Natan, mikifalocoˈ a pasasiyor, ikor masalofay ko kalawidang aci Yihofaan. Aka mapawan, o ˈicel ni Yihofa ikakaay ci Satanan. Ano micada kita to sadama ni Yihofa, wa ngaˈayto miliyas to talakal ni Akoma.

16. Samaan ko demak ita wa ngaˈay maliyas ko talakal ni Satan?

¹⁶ Mihaenay haw i, sangaˈayay a pakayraan i satapang aca liyasento koniya talakal. Kawra dengan mitiˈer to sadama ni Yihofa, ngaˈ malaˈosi koniya demak. Aka pakidem kita pakasoˈlin to niyah! O roma halafinayto midoko ci Yihofaan a tamdaw ikor mafalicay a malo misatakaraway anca maˈanofay. Mansa, cangacangen ci Yihofa to romiˈamiˈad padama kitanan misalof to niyah, nengnengen ko harateng no niyah ato waywayan mafiyoray no tatiihay a waywayan hokira. (ˈOlic 139:23, 24) Aka palamiten i falocoˈ ko misatakaraway ato maˈanofay!

17. O adaˈ ita ci Satan caka halafin wa samaan ko hateloc?

¹⁷ Pina caˈol a mihecaan, padotocay ci Satan malo mangilosay misaˈefitay a miˈadopay. Kawra, cato ka halafin wa mapalitto cingra, saikor wa mapalaˈafo. (Paˈarawan 20:1-3, 10) Makalimay kita pakaˈaraw toniya romiˈad. Kawra wa ikaka ko talipaˈelal ita nohatini, sinanoten ko talakal ni Satan. Misarocod miliyas to talakal no misatakaraway ato maˈanofay. Wa misetek to falocoˈ ‘micoˈay ci Akomaan, mihaen wa miliyas ci Akoma kitanan a milaliw.’—Yakop 4:7.