Cacekiwen Lalakaw 24
Itini Pisodod to Tamdaw a Demakan, o Saˈakawangay Taˈarawan ci Yihofa
‘Yihofaaw, o ngaˈayay Kiso, makahiyay misodod to tamdaw, pakayni milongocay Tisowanan a tamdaw matomesay ko madimadiay a olah.’—ˈOLIC 86:5.
RADIW 6 Satolon no Sikawdan no Kawas
KALIMLAAN NO LALAKAW *
1. Hongti ci Solomon itini Patnakay 7:20, somowalay to maanan soˈliˈlinay a demak?
SOWAL no Hongti ci Solomon: ‘Itini i hekal i, awaay ko marariday a mangaˈay ko demak a tamdaw, awaay ko cowa ka patelac a cowa ka ciraraw a tamdaw.’ (Patnakay 7:20) Soˈliˈlinay konini a sowal! Kita o polong a tamdaw sahtoay o ciraraway, mararaway ko demak. (1 Yohani 1:8) Mihaenay, misaaliay kita to sasodod no Kawas ato tao.
2. Ano sododen no ngaˈayay widang kiso i, samaanay ko harateng iso hani?
2 Na pakararaway kiso to ngaˈayay widang no niyah han? Itiya i, makalimay kiso sapisalofaw to kalalaˈed namo, orato mikifalocoˈay kiso pasayra cingranan a miliˈay. Ano sododen no widang kiso, ecato pisaˈosi to raraw iso i, samaanay ko harateng iso hani? Madeng masayaray ko harateng iso, lipahakayho ko falocoˈ.
3. Onini a lalakaw mamilengo to maanan?
3 Makalimay kita malo sangaˈayay a Widang ita ci Yihofa, kawra latekay mararaway ko sowal ita, mararaway ko demak, pakararaw Cingranan. Kawra, hano ngaˈay pakasoˈlin kita to makalimay ci Yihofa misodod kitaanan hani? Palalinien kitaanan, itini misododay a demakan, iraay ko manan mikiriwiˈay ni Yihofa hani? O cima ko mamilifok to sasodod Ningra hani? Onini a lalakaw mamilengo tonini a salicay.
MAKAHIAY CI YIHOFA MISODOD TO TAMDAW
4. Hano ngaˈay kita pakasoˈlin makahiay ci Yihofa misodod to tamdaw?
4 Mikiˈokay ko Fangcalay Cudad kitaanan, o makahiay ci Yihofa misodod to tamdaw. Itini Sinay Lotok, pakaynian ni Yihofa i cecay coyoh pasowal ci Mosi: ‘Yihofa, Yihofa, o siniˈadaay to tamdaw, patadoay miharateng to tamdaw a Kawas, o caay ka ranikay a maketer, iraay ko madimadiay a olah, tada soˈliˈlinay ngaˈay tiˈeren, midaˈocay ko madimadiay a olah to tamdaw, misododay to raraw.’ (Kasadakan 34:6, 7) Matomesay to damsayay ato siniˈadaay ci Yihofa, makahiay Cingra misodod to mikifalocoˈay pasasiyor a ciraraway tamdaw.—Nihimiya 9:17; ˈOlic 86:15.
Cipinangay ci Yihofa to kihcod no mita, mafanaˈay to hano malo aniniay a tamdaw kita (Nengnengen ko saka 5 fatac)
5. Mikitini ˈOlic 103:13, 14, tada masongilaˈay ko kacipinang ni Yihofa to tamdaw, mansa makahiay Cingra samaan ko pidemak?
5 Misangaˈan ni Yihofa kita, ihkalay ko kafanaˈ to kihcod no mita. Haratengen hena, ihkalay ko kafanaˈ Ningra to kahacecay a demak no tamdaw, tada kafahkaanto ita konini a demak! (ˈOlic 139:15-17) Ihkalay Cingra mafanaˈ, mikitini i wama wina mirocokan ita ko maanan cowa ka lefot a pinangan. Mafanaˈayho Cingra to salakatay a malifaay ita samaanay mifiyor kitaanan, hato o mahaenay a tamdaw kita nohatini. Tada masongilaˈay ko kacipinang Ningra kitaanan, mansa tada siniˈadaay Cingra kitaanan, makahi a sidaˈit micada kitaanan.—ˈOlic 78:39; ˈosien ko ˈOlic 103:13, 14.
6. Ci Yihofa samaanay pakayni i midemakan a paihkal makalimay Cingra misodod kitaanan hani?
6 Ci Yihofa pakaynian i midemakan a paihkal, makalimay Cingra misodod kitaanan. Mafanaˈay Cingra, samanen o sakacecay a tamdaw ci Atam mitowakangay, hato cirarawayto kita o kahacecay tamdaw, salikor o mamapatay maemin. (Loma 5:12) Awaay ko pakayraan ita paliyas to pasangaray a demak no niyah ato romaroma tamdaw. (ˈOlic 49:7-9) Kawra, o sidaˈitay a Kawas ita matomesay to siniˈadaay, milimasmasay Cingra, padama kitaanan milifok to pasalat. Midemakay Cingra to maanan hani? Yohani 3:16 sanay, miocoran ni Yihofa ko foseniˈan a wawa Ningra pakayni kitaanan kinafalah to ˈorip. (Matay 20:28; Loma 5:19) Patadoay ci Yis kitaanan mitanam to patay, padama to polong pakasoˈlinay cingranan a tamdaw milifok to sakatedal. (Hipray 2:9) Maˈaraw ni Yihofa ko kaolahan a wawa no Niyah tano misemsemay ato pakangodoan a pakayraan mapatay, madeng adadaay ko falocoˈ! Haratengen hena, ano awaay ko harateng Ningra misodod kitaanan, hano makahi kinafalah to kaolahan a wawa no Niyah hani?
7. Iraay ko maanan a tinakoan mitadtaday to makahiay ci Yihofa misodod to tamdaw?
7 Itini Fangcalay Cudad maasipay ita, na misododay ci Yihofa to ˈalomanay tamdaw. (Ifiso 4:32) Cima ko maharatengay iso hani? Maharatengay iso ko Hongti ci Manasi alatek. Onini a ciraraway a tamdaw adihayay ko tatiihay a demak, pakararaw ci Yihofaan. Miowingay cingra to mararaway a pidoko, mipatayay to wawa no niyah, patafang to makaniway kawas malo sapatoˈaya. Mangalefay satimolo sanay miteli to mitoˈtoˈan no niyah a samiyay i fangcalay sefi ni Yihofa. Sowal no Fangcalay Cudad: ‘Adihayay ko midemakan ningra a tatiihay demak i pinengneng ni Yihofa, pakararaw to Kawas.’ (2 Rayray 33:2-7) Kawra ikorto mikifalocoˈay a pasasiyor ci Manasi, makahiay ci Yihofa misodod cingranan, patikolanho ko saaroˈan no hongti ningra. (2 Rayray 33:12, 13) Maharatengayho iso ko Hongti ci Tafiti alatek. Midemakay cingra to maˈaˈodangay ato mipatayay to tamdaw a taˈangayay raraw, pakararaw ci Yihofaan. Kawra, tiya mikifalocoˈ a pasasiyor ci Tafiti, mihayi to raraw i, misododan ni Yihofa cingra. (2 Samuil 12:9, 10, 13, 14) I fafekangay a tinakoan pakasoˈlinay kita, makalimay ci Yihofa misodod kitaanan. Dotoc mamilengo, itini misododay a demakan samaanay ci Yihofa masasiroma to tamdaw.
ITINI MISODODAY A DEMAKAN, MIKIRIWIˈAY CI YIHOFA
8. Ci Yihofa hano o sangaˈayay a Misawkitay hani?
8 Ci Yihofa o ‘Misawkitay to polong no hekal a Tatapangan.’ (Satapangan 18:25) O cecay ngaˈayay a misawkitay kalimlaan ko tangongolay a kafanaˈ to rikec. O mahaenay ci Yihofa, samanen cowa ko Misawkitay aca Cingra kitaanan, o Patirengayho to Rikec no mita. (Isaya 33:22) Pakayni o manan ko matatodongay, o manan ko mararaway, awaay ko mikikakaay ci Yihofaan a tamdaw ihkal ko kafanaˈ. O cecay ngaˈayay misawkitay misaaliayho to manan a inaneng hani? ˈAyaw no misawkit i, oha ngangaˈay cingra misimsim to polong milingatay a demak. Itini tonini a pakayraan, o sangaˈayay a Misawkitay ci Yihofa.
9. Ano misaˈosi ci Yihofa hamamisodod to cecay tamdaw i, wa miharatengho to manan a demak?
9 Ci Yihofa cowa ka lecad tono tamdaw a misawkitay, to cerid cipinangay ci Yihofa to polong a demak. (Satapangan 18:20, 21; ˈOlic 90:8) Misawkit Cingra i caay ka lecad tono tamdaw, o maˈaraway aca anca o matengilay. Masaheciay ko kacipinang Ningra to pinangan no tamdaw, kalomahadan lalengawan ato kaˈoripan, ato harateng no nafalocoˈan ningra, mafanaˈayho onini a lalangian samanay ko pifiyor to waywayan nonini a tamdaw. Pafeselay ko pinengneng ni Yihofa to falocoˈ no tamdaw, mihapinangay Cingra to araaw no falocoˈ no tamdaw, harateng ato kalim. Itini ˈaˈayaw Ningra, awaay ko maamaan a demak to mahimeday. (Hipray 4:13) Mansa, misaˈosi ci Yihofa misodod to cecay tamdaw, o pisaˈosi Ningra pakayniay kacipinang to kihcod a demak.
Masadafdafay ci Yihofa, cowa pisakakinih, cowa picada to sapaˈalofo (Nengnengen ko saka 10 fatac)
10. Hano ngaˈay kita pakasoˈlin to pisawkit ni Yihofa sahtoay o masadafdafay? (Limoˈot 32:4)
10 Cowa pisakakinih ci Yihofa, o pisawkit Ningra sahtoay o masadafdafay. Cowa ka mikitini i papotal no cecay tamdaw, o hafay, saaroˈan ato taneng misaˈosi to sasododen konini a tamdaw hokira. (1 Samuil 16:7; Yakop 2:1-4) Awaay ko tamdaw to mamiroero Cingranan anca mipaˈalofo Cingranan. (2 Rayray 19:7) Cowa ka toor han Ningra ko miharatengan a midemak. (Kasadakan 34:7) Awaay ko malawaay ni Yihofa, mahapinangay ko kihcod, mihaenay o sangaˈayay a Misawkitay Cingra.—ˈOsien ko Limoˈot 32:4.
11. O pisodod ni Yihofa iraay ko maanan a mikiriwiˈay?
11 Mafanaˈay ko mitiliday to Hipray Sowal a Fangcalay Cudad, awaay ko pakaliniay to pisodod ni Yihofa to tamdaw. O cecay taˈarawan cudad sanay, “o misaka dademakan nonini mitiliday a cecay Hipray a sowal, onini a sowal sahtoay mitoroˈay to pisodod no Kawas to mararaway a tamdaw, ao cowa ko mitoroˈay to pisodod no cecay a tamdaw to roma tamdaw.” Ano mikifalocoˈ pasasiyor ko cecay mararaway a tamdaw i, dengan ci Yihofa ko iraay ko fadangalan misongilaˈ misodod to raraw ningra. Ano misaˈosiay ci Yihofa misodod kitaanan, pakaynien kitaanan o manan ko tatodong hani?
12-13. (1) O pisodod ni Yihofa wa pafeli to tamdaw to manan a epoc? (2) Onini a epoc wa hakowa ko kahalafin?
12 Ano pakasoˈlinay kita to misododanto ni Yihofa kita, wa milifok to ‘rihadayay a tatokian,’ tatodong i wa rihadayto ko falocoˈ ita, awa ko dangoc no makapahay falocoˈ. O mahaenay a nafalocoˈan dengan ci Yihofa ko pafeliay kitaanan. (Dmak 3:19) Ano misododanto ni Yihofa kita i, wa malecad to isalakatay ko kalangaˈay no mita, malecad to na cowaho ka raraw kita.
13 Ano misododanto ni Yihofa kita, caayto ko papakayni i kararaw ita a mapoˈi a miroroh anca misayfang kitaanan. (Isaya 43:25; Yirimiya 31:34) Sowal no Fangcalay Cudad: ‘Ano hakowaay ko kararaay no kawali ato kaetip i, hatiraay ko pipaliyas Ningra to raraw ita i titaanan.’ * (ˈOlic 103:12) Maharateng ita to masongilaˈay ko pisodod ni Yihofa to tamdaw, i falocoˈ wa matomes ko miakoˈiday ato mikangodoay a harateng. (ˈOlic 130:4) Nikawrira, cima ko ngangaˈay milifok to sasodod ni Yihofa hani?
CIMA KO MAMILIFOK TO SASODOD NI YIHOFA?
14. Mananamayto ita ko maanan hani?
14 Mananamayto ita, ci Yihofa itini pisaˈosi to sasododen ko cecay tamdaw i, cowa pinengneng to raraw nonini a tamdaw to pakidemay hokira. Mananamayho ita, malo Misangaˈay a Tatapangan ita, Patirengay to Rikec ato Misawkitay, ci Yihofa iraay ko masaheciay a sifanaˈ, misaka dademakan Ningra konini a sifanaˈ misaˈosi to sasododen ko cecay a tamdaw hokira. Wa misimsim ci Yihofa to manan a lalangian hani?
15. Mikitini Luka 12:47, 48, ano misaˈosi ci Yihofa to sasododen ko cecay tamdaw hokira, wa misimsim to maanan a lalangian?
15 Itini i Luka 12:47, 48. (ˈOsien.) Ihkalay ko sowal ni Yis, o misimsiman ni Yihofa a cecay lalangian o mararaway a tamdaw o padetengay a mararaw hokira. O cecay tamdaw ano mafanaˈayto cecay tatiihay a demak, cowa ko mihaydaan no Kawas a demak, kamayan mihalaka a midemak, o pakidemayto ko raraw ningra. O mahaenay a tamdaw cowa ko mamilifok to sasodod no Kawas alatek. (Marko 3:29; Yohani 9:41) Kawra, mamihayi kita, ano latekay mafanaˈay kita to cowa ka tatodong ko cecay demak, kamayanho a midemak. Tonini a tatokian, wa iraho ko hatokel ita milifok to sasodod no Kawas han? Iraay! Samanen mamiharateng ci Yihofa to roma a lalangian.
Ano mikifalocoˈ kita pasasiyor, wa ngaˈay pakasoˈlin o sasododen ni Yihofa kita (Nengnengen ko saka 16-17 fatac)
16. (1) O manan ko tatodong no pasasiyoray? (2) Sapilifokaw kita to sasodod ni Yihofa, hano papasasiyor hani?
16 O misimsiman ni Yihofa roma a lalangian i, o mararaway a tamdaw mikifalocoˈay pasasiyor hokira. O manan ko tatodong no pasasiyoray hani? Tatodong i mifalicay to harateng, waywayan anca o mihalakaan no cecay tamdaw, ngaˈayay mitoroˈ to cecay tamdaw pakayni kararaw no demak anca cowa pidemak to dademaken, makesem ato adada ko falocoˈ. Masomad ko harateng ningra, cowa ko pakayniay aca i raraw no niyah, pakayniayho kafanaˈ to cowa pitafo ko niyah to ngaˈayay kalalaˈed ci Yihofaan hato mararaway ko demak, onini tada pakasomaday Cingranan. Haratengen ko tinakoan ni Manasi aci Tafiti, pakidemay ko raraw nangra, kawra mikifalocoˈay a pasasiyor, mihaenay misododan ni Yihofa cangra. (1 Hongti 14:8) Mahapinangay, sapisododaw ci Yihofa kitaanan, wa isalakatho minengneng to pasasiyoray a wacay no mita. Kawra o kakesem aca cangoˈotayho, oha mamidemakho. * Samanen mamisimsimho ci Yihofa to roma lalangian.
17. (1) O maanan ko tatodong no ‘patatikolay’ hani? (2) Sasamaan ko demak ita ngaˈ eca to piliyaw midemak to mararaway a demak? (Isaya 55:7)
17 O misimsiman ni Yihofa roma kalimlaan a lalangian “patatikolay” ko mararaway tamdaw hokira, tatodong i, onini a tamdaw o mamifalic, ecato pidemak to tatiihay a demak, hanaca misatapang mitoor to pakayraan ni Yihofa a maˈorip. (ˈOsien ko Isaya 55:7.) Onini a tamdaw o mamifalic to harateng no niyah, minanam to malecaday ni Yihofa a piharateng. (Loma 12:2; Ifiso 4:23) O mamisetek cingra to falocoˈ, ecato ka lecad to salakatay ko pisimsim ato pidemak. (Kolosay 3:7-10) Manaokaniw, ano makalimay kita sododen ni Yihofa kita, hanaca mikorac to raraw ita, o papakasoˈlin to sapatefoc ni Yis Kristo. Kawra, edengan mihadak kita to ˈicel, misarocod a mifalic, mihaen ngaˈ pakayni ci Yihofa i sapatefoc a misodod kitaanan.—1 Yohani 1:7.
PAKASOˈLINEN CI YIHOFA MAMISODOD TISOWANAN
18. Milengoay ko lalakaw to maanan a kalimlaan?
18 Lomalen ita ko pina kalimlaan nonini a lalakaw. Itini pisodod to tamdaw a demakan o saˈakawangay a taˈarawan ci Yihofa. Hano mihaen ko sowal hani? Saka 1, makahiay Cingra misodod to tamdaw. Saka 2, masongilaˈay ko kacipinang Ningra kitaanan. Tada ihkalay ko kafanaˈ Ningra to pinangan no mita, iraay ko tatodong misawkit to soˈlinay kita pasasiyor hokira. Saka 3, ano misodod ci Yihofa kitaanan, o papalahdawento ko polong a raraw ita, malecaday to na cowa ka raraw kita. Mihaenay, wa ngaˈayto ira ko makoracay makapahay a falocoˈ ita, milifok to pihayda Ningra.
19. Cowa ko malefotay kita, padotocay mararaw, kawra hano ngaˈay kita kamayan a lipahak?
19 Manaokaniw, samanen cowa ko malefotay kita padadotocay mararaw, kawra ngaˈay kita mikitini i cecay sowal no Sapicalep Mafanaˈ to Fangcalay Cudad, Saka 1, saka 614 fiedac milifok to sahinom. Sanay konini a sowal: “Kawra, o madimadiay sikawdan no Kawas cowa ko papakayni masakenaay a dangoc no niyah saromiˈad sa makesem, samanen sidaˈitay ci Yihofa, mafanaˈay to nano sera cangra. (ˈOlic 103:8-14; 130:3) Ano misarocodayto kita midofdof to palinian no Kawas, o ngangaˈayto a lipahak ko falocoˈ. (Filipi 4:4-6; 1 Yohani 3:19-22).” Tada pakalalokay to falocoˈ konini a sowal!
20. Dotoc a lalakaw mamilengo to maanan?
20 Mikifalocoˈ kita pasasiyor to raraw no niyah, o mamakahi ci Yihofa misodod kitaanan. Tada miakoˈiday kita Cingranan! Mihaenay, itini pisodod to tamdaw a demakan, sasamaan kita mitodong ci Yihofaan hani? O pisodod ita to tamdaw ato pisodod ni Yihofa to tamdaw, iraay ko manan kalecadan, iraay ko manan kasasiromaan hani? Cipinang to kasasiromaan nonini hano masakalimlaan? Dotoc a lalakaw mamilengo tonini a salicay.
RADIW 57 Midotiman no Falocoˈ Ako
^ Pakaynian ni Yihofa i Fangcalay Cudad mikiˈok kitaanan, tada makahiay Cingra misodod to mikifalocoˈay pasasiyor a tamdaw. Kawra, latekay kita awaay ko tatodong no niyah milifok to sasodod Ningra saan miharateng. Onini a lalakaw mamilengo, hano ngaˈay pakasoˈlin kita, ano mikifalocoˈ kita pasasiyor to raraw no niyah o mamakahi ci Yihofa misodod kitaanan.
^ Nengnengen ko Miingid ci Yihofaan, saka 26 fedengan, saka 9 fatac.
^ SAPITADTAD A SOWAL: Mitoroˈan no ‘pasasiyor’ i, o cecay tamdaw pakayni isalakatay pakayraan no niyah a maˈorip, mararaway a demak anca cowa ka demaken a demak, mikifalocoˈ a pasasiyor hanaca mifalic to harateng no niyah. Ano mikifalocoˈ a pasasiyor ko tamdaw wa ira ko ngaˈayay minaroˈan, o hamamidemak cingra mifalic to waywayan no niyah.