SANAY ci Lisa *: “Sidaˈitay ko salikaka micada takowanan, tada mitemeray to falocoˈ ako konini.” Mitoroˈan i, o salakatay lalangian ningra minanam to Fangcalay Cudad. Mahecaday ko pakayraan ni Anni, sanay cingra: “Salakat o sidaˈitay ko misolotay takowanan, ao cowa ko sapasifanaˈ.” Nohatini ci Lisa aci Anni micadaayto to paputisem, maolahayho micalep a micekiw to Fangcalay Cudad, kawra satapang makahi cangra minanam to Fangcalay Cudad, sakakaay i pakayniay i noka sidaˈit no salikaka micada cangranan.

Sasamaan kita sidaˈit a micada to tatihiay a tamdaw, mitemer to falocoˈ nangra hani? Oniya lalakaw mamilengo to tosa a pakayraan: Saka cecay i, pakayni misowalan ita a sowal, saka tosa i, pakayni midemakan ita a demak. Onini a lalakaw mamilengo o cima ko sasidaˈiten ita a micada.

Itini Taneng saka 31 fedengan misowalan a citanengay a fafahi, o sema ningra iraay ko “sidaˈitay a capeling” sanay. (Taneng 31:26) O tatodong noniya sowal i, o misowalan ningra a lalakaw ato pakayraan a caciyaw paihkalay to sidaˈitay hatiniay a capeling. O malo faˈinayay ato malo wamaay wa mihaen a somowal. ˈAlomanay a wama wina mafanaˈay, ano awa ko olah a somowal mamidokaˈ to wawa. Ano mariˈang, milokes ko sowal no wama wina, mamapiliˈ ko wawa alatek. Ano makalim makahi ko wawa mitengil to sowal, mamisaˈicel ko wama wina tano sidaˈitay a pakayraan misacaciyaw to wawa.

O malo wama winaay kiso hokira, maminanam tano sidaˈitay a pakayraan a somowal. Samaan ko pidemak hani? Sowal no Taneng 31:26: ‘O citanengay ko sowal ningra.’ Tatodong nonini o mamipiliˈ kita to ngaˈayay a hasowal no niyah, mamisinanotho to pakayraan no niyah a caciyaw. Mihaenay, salakat ngaˈay kita miharateng: “O misowalan ako a sowal mamikidat to keter, anca ngaˈay misayar to marawraway a pakayraan han?” (Taneng 15:1) Haratengen, misaharateratengho ngaˈ somowal o citanengay a pakayraan.

Sanayho ko sowal no Taneng: “Ano caay pinaˈon to sowal i, matiya o mikotangay a midokaˈ to tamdaw.” (Taneng 12:18) Ano misaharateng kita to lalakaw no sasowalen ato pakayraan a caciyaw wa ira ko maanan a pifiyor to tamdaw, wa ngaˈayto miˈimer to sema no niyah. Mitoor kita to “sidaˈitay a capeling,” cowato ko mamilokes ko sowal, eca ka pikangodo to tao. (Ifiso 4:31, 32) Mamisaˈicel kita miliyas to masofaway a sowal, misaˈicel tano damsayay a pakayraan somowal to sidaˈitay a sowal. Itini tonini a pakayraan patirengay ci Yihofa to ngaˈayay a taˈarawan, tiya tada ciˈangiay ci Iliya i, miocoray ci Yihofa to coyoh tano “mihawhaway a ngiha” mitaypiyaw Cingranan a somowal mihinom ci Iliyaan. (1 Hongti 19:12) Kawra, paihkal to sidaˈitay a capeling, cowa ko somowal aca to sidaˈitay a sowal, pairaenho ko sidaˈitay a waywayan. Samaan ko pidemak hani?

Mitodong kita ci Yihofaan, cowa ko somowal aca to sidaˈitay a sowal, wa iraho ko sidaˈitay a waywayan. (Ifiso 4:32; 5:1, 2) Masowalay i fafekang a Lisa somowal to isaˈayaw samanay ko salikaka sidaˈit micada cingranan, sanay  cingra: “Kinacecayay, mapacieciay ko paro no lomaˈ niyam malinah. Matengilay no tosa mararamoday Misawacayay Tamdaw ni Yihofa, mihifangay padama tamiyanan misolimet. Itiya cowaho pinanam kako to Fangcalay Cudad.” O sidaˈitay a waywayan no salikaka tada mitemeray to falocoˈ ni Lisa, orato misatapangay cingra misamacay minanam to Fangcalay Cudad.

Masowalay i satapang no lalakaw ci Anni miakoˈiday to salikaka sidaˈit a micada cingranan. Sanay cingra: “Isalakat adihayay ko macadaay ako a sadokaˈ, mansa pasangaray pakasoˈlin to tao. Tiya malitemoh ako ko Misawacayay Tamdaw ni Yihofa i, cisasaay kako to araaw no falocoˈ nangra. Miharatengay kako: Hano ngaˈay cangra takowanan hani? Kawra o singsi no Fangcalay Cudad ako padotocay naifalocoˈ a ciharateng takowanan, padamaay koni takowanan mangalef ko pakasoˈlin cingraanan, ikorto misatapangay kako misamacay a minanam to Fangcalay Cudad.”

O sidaˈitay a waywayan no salikaka mitemeray to falocoˈ ni Lisa aci Anni, padama cangraanan makahi minanam to Fangcalay Cudad, hanaca pasayra ci Yihofaan ato salikaka mifohat to falocoˈ.

O roma tamdaw pakayni i serangawan ato lalengawan no niyah, mananamay masedi ko pising i tamdaw, damsay ko sowal. Pakayni kita to macadaay no niyah a sifanaˈ anca pinangan damsayay mihamham to tamdaw o ngaˈayay, kawra o kangaˈay ita to tao ano pakayniay tonini a lalangian, awaay ko pinangan to mitodongay to Kawas paihkal to soˈlinay a sidaˈit.—Nengnengen ko Dmak 28:2.

O soˈliˈlinay a sidaˈit o minaroˈan no fangcalay saocor no Kawas a capeling. (Kalatiya 5:22, 23) Sapipalahadaw toniya capeling, papikayaten ko fangcalay saocor to harateng ato waywayan ita. Mihaen ko demak ita, samanen makalimay kita mitodong ci Yihofaan aci Yisan. Roma i, malo nisawawaan ni Kristo, wa mikifalocoˈ kita ciharateng to tao. Mihaenay, sidaˈit kita micada to tamdaw samanen maolahay kita to Kawas ci Yihofaan, maolahayho to tao. O hatiniay a sidaˈit o mikifalocoˈay, o mihaydaanho no Kawas, ngaˈay mitemer to falocoˈ no tao.

Pakayni kafanaˈan a tamdaw anca mikangaˈayay kitaanan a tamdaw, madoloay kita tano sidaˈit micada cangranan alatek, hanaca marariday paihkal to piakoˈid ita. (2 Samuil 2:6; Kolosay 3:15) Kawra o roma a tamdaw cowa ka citatodong haenen ita ko demak saan ko harateng ita, sasamaan aki?

Haratengen, ci Yihofa o sangaˈayay a taˈarawan no sidaˈitay, o tamdaw ano citatodongay anca cowa ka citatodong tano sidaˈit micada cingranan, kamayan mihaen ko demak Ningra. O Kimad Ningra a Fangcalay Cudad pasifanaˈay kitaanan tano sidaˈitay micada to tamdaw. O Fangcalay Cudad Kirisiya a Cudad kinapinaay tano “mikiriwiˈay a sidaˈit” a sowal somowal to sidaˈit no Kawas, onini a sowal misaˈicelay somowal to sidaˈitay ko Kawas micada to tamdaw samanen hinapaladaˈay ko Niyah, cowa ko pakayniay i nano demak no tamdaw. Samanay ko Kawas patalahkal to hatiniay a sidaˈit hani?

Padadotocay ci Yihofa tano sidaˈit a micada to polong a tamdaw, midama to sakaˈorip nangra. (Matay 5:45) Soˈlinay i, itini ˈayaw no mafanaˈ kita Cingranan, maharekayto Cingra patalahkal to sidaˈit kitaanan. (Ifiso 2:4, 5, 8) Tinakoen, kinafalahan no Kawas ko kaolahan a wawa no Niyah, malo sapatefoc no polong a tamdaw. Mansa mihaen ko sowal no tarokos ci Pawlo: ‘O mikiriwiˈay a sidaˈit no Kawas tada kadofahayto!’ (Ifiso 1:7) Roma i, soˈlin mararaway ko demak ita, pakasomad ci Yihofaan, kawra kamayan Cingra padadotoc damsay a mikayat ato pasifanaˈ kitaanan, malecad o ‘tarepes a ˈorad’ damsay a patefo i fafekang no hana ato rengos. (Limoˈot 32:2) Hatini ko sidaˈit ni Yihofa kitaanan, awaay ko pakayraan ita a pacoˈay. Ano cowa ka pihaen Cingra micada kitaanan, awaay ko hatokel ita noikor.—Nengnengen ko 1 Pitiro 1:13.

O sidaˈit ni Yihofa soˈlinay misolot kitaanan, padama kitaanan makalim mitodong Cingranan. Mihaenay, o mamisaˈicel kita to romiˈamiˈad sidaˈit a micada to polong a tamdaw, ao cowa ko papina aca a tamdaw. (1 Tisalonika 5:15) Ano padadotoc kita mihaen ko demak, mamalecad to namal i kasinawan, wa ngaˈay paira to dihko ato sahinom i paro no lomaˈ, i salikaka, i cafay matayal, i cafay micudad ato fiyafiyaw.

Haratengen, itini i lomaˈ iso anca i kasakopang iraay ko cima misaaliay to papadamaen han? Ano sidaˈit kiso micada cangranan, maedeng o mamilifok cangra to haepoc. Itini kasakopang cecay faˈinayan salikaka anca fafahiyan salikaka mikiriwiˈay misaali to papadama a tamdaw midimokos to lomaˈ ato pahanaan, anca mararid misaali to papadama a tamdaw micakay anca misaysay to roma a demak. Roma i, itini pitosilan maˈaraw ko misaaliay a tamdaw, wa ngaˈay kiso pafeli to ciepocay a sapadama cingraanan han?

Nanay o mihadakan ita a sowal, midemakan a demak ira ko “sidaˈitay a capeling,” ano mihaen o mitodongayto kita ci Yihofaan.