Cacekiwen Lalakaw 26
Malowiday no Olah ko Kaciˈangian
‘Ira i tatihi ako ci Yihofa, cowa ko caciˈangi kako.’—ˈOLIC 118:6.
RADIW 3 O Olah ko Kawas
KALIMLAAN NO LALAKAW *
1. O maanan a demakan mamadolo a paˈangi kitanan?
NENGNENGEN ko pakayraan no ilaenoay a salikaka. Ci Nistoe ato fafahi ci Mariya sakalinahaw tayra i misaaliay to adihayay a mitosilay a pala. * Sakalaˈosiaw nonini a patosokan, o kakantangento nangra ko kaˈorip no niyah. Kawra matalaway cangra mihaen to demak, wa ecato kalipahak ko kaˈorip no niyah alatek. Ci Pinien itiniay makecengay ko mitosilay tayal a kitakit, malo Misawacayay Tamdaw ni Yihofa cingra i, mafanaˈay to mamicada ko niyah to sapalak, tada paˈangiay konini cingranan. Kawra mangalefay kaciˈangian ningra i, ano mafanaˈ ko paro no lomaˈ to malo Misawacayay Tamdaw ni Yihofa cingra, papakidem ko pisafelit alatek. Ci Walayli makinsaay to iraay ko ekang, hanaca kalikiay tatiih ko adada ningra. Samanen pakayni pihakelongan cowa kakahi cingra pacomod to remes, kawra pasangaray mahela ningra ko makahiay palecad to saali ningra a ising. Ano haratengen i, madeng matalaway cingra mapatay.
2. Hano mamisaˈicel kita miremo to ciˈangiay a falocoˈ hani?
2 Iraay ko mahaenay a ˈangi iso han? Kita ˈalomanay a tamdaw na iraay. Ano caka pinanam kita miˈimer to ciˈangiay a falocoˈ no niyah, o mamidemak to cowa ka citaneng a saˈosi alatek, telocto mapalak ko kalalaˈed no niyah ci Yihofaan. Maolahay ci Satan maˈaraw ko hatiniay a demak. Misaka dademakayho cingra to ciˈangiay a falocoˈ ita ho eca ka pidofdof to rikec ni Yihofa, tinakoen ecato pasayra i tamdaw milasil to ngaˈayay lihaf. (Paˈarawan 12:17) Soˈlin ci Satan tada tatiihay a mariˈang, taˈangayayho ko ˈicel, kawra o ngangaˈay kiso midipot to niyah eca ka madokaˈ ningra. Sasamaan ko pidemak hani?
3. O manan ko papadama kitaanan miremo to ciˈangiay?
3 Ano pakasoˈlin kita to maolahay ci Yihofa kitanan, hanaca wa itini tatihi ita midama kitaanan, wa ngaˈayto kita mipadik to mihalakaan ni Satan. (ˈOlic 118:6) Tinakoen, mitiliday to ˈOlic 118 fedengan a tamdaw na misiˈayaway to pina pakidemay a sapalifet. I tatihi ningra adihayay ko ˈada, mahawpay ko cifadangalay iraay ko saaroˈan a tamdaw (saka 9, 10 sinael). Latekay, micadaay cingra to taˈangayay saroero (saka 13 sinael). Roma i, na micadaay cingra to pakidemay sapirikec ni Yihofa (saka 18 sinael). Kawra, mikifalocoˈay a somowal ko mitiliday to ˈOlic: ‘Cowa ko caciˈangi kako.’ Hano ira ko hatiniay rihadayay harateng ningra hani? Soˈlin na micadaay cingra to sapirikec, kawra mafanaˈay cingra tada maolahay ko kakarayan a Wama ci Yihofa cingranan. Pakasoˈlinay cingra ano o mananto ko masiˈayaway sapalifet, o sidaˈitay a Kawas o tatangsol a mihadak to sapadama.—ˈOlic 118:29.
4. Pakasoˈlin kita to maolahay ci Yihofa kitanan, o ngangaˈay miremo to maanan ciˈangiay a falocoˈ hani?
4 O papakasoˈlin kita to maolahay ci Yihofa kitanan, o papadama konini kitanan miremo to tolo marariday maˈaraw a ciˈangiay falocoˈ: (1) Calemcem cato ka ngaˈay ko niyah midimokos to sakaˈorip no paro no lomaˈ; (2) ciˈangiay to tamdaw; (3) ciˈangi mapatay. Satapangan no lalakaw masowalay a salikaka samanen pakasoˈlinay to maolahay ci Yihofa cangranan, mansa ngaˈay pakaremo to ciˈangiay.
CIˈANGI AWA KO PAKAYRAAN MIDIMOKOS TO SAKAˈORIP NO PARO NO LOMAˈ
O cecay faˈinayan salikaka tano mifotingay a tayal midimokos to paro no lomaˈ, o wawa ningra itatihiay a mipadama (Nengnengen ko saka 5 fatac)
5. O tawki no lomaˈ cacalemcem to maanan a demakan alatek? (Nengnengen ko papotalay coka.)
5 O malo tawkiay no lomaˈ a Krisciyang misaaretengay minengneng to paliliˈay to paro no lomaˈ a ˈinorong. (1 Timoti 5:8) Ano o tawki no lomaˈ kiso, itini kalifongan a tatokian calemcemay to malahdaw ko katayalan no niyah, cato ka ngaˈay paliliˈ to paro no lomaˈ, pateli to saesoy no lomaˈ anca patikol to taykowan no lomaˈ. Ciˈangiayho kiso alatek, ano malahdaw ko tayal awaayto ko pakayraan mikilim to faelohay a tayal. Anca malecaday kiso ci Nistoe aci Mariyaan, calemcem ano misalof to tayal, mamafiyorto ko sinowayay no kaˈorip. Misaka dademakan ni Satan ko mahaenay ciˈangiay falocoˈ, malaˈosiay miconged to ˈalomanay tamdaw eca to pisarocod to falocoˈ ato harateng midoko ci Yihofaan.
6. Ci Satan papipakasoˈlinay kitanan to maanan?
6 Mihalakaay ci Satan papipakasoˈlin kitanan to cowa ka ciharateng ci Yihofa kitanan, cowaho ko papadama kitanan midimokos to paro no lomaˈ. Ano malipalaw ningra kita, ano samaanto o tatereken no niyah ko tayal anini saan kita miharateng alatek, mamangalefto misakahemaw to pina a safalod no Fangcalay Cudad.
7. Mikiˈokay ci Yis kitanan to maanan hani?
7 Ikakaay ko kacipinang ni Yis to polong a tamdaw to kakarayan a Wama, mikiˈokay cingra kitanan: ‘Caho pilongoc kamo, o Wama namo mafanaˈayto o maanan ko misaalian namo.’ (Matay 6:8) Mafanaˈayho ci Yis makahiay ci Yihofa midimokos to saali no mita. O paro no lomaˈ no Kawas kita, o Kawas o Tawki no lomaˈ ita. Pakasoˈlinay kita o papatireng Cingra to taˈarawan, mitoor to safalod no saka 1 Timoti 5:8 a midimokos kitanan.
Mikiˈokay ci Yihofa o mamalifok ita ko sakaˈorip, alatek pakaynian Ningra i salikaka a padama kitaanan (Nengnengen ko saka 8 fatac) *
8. (1) Ano calemcemay kita caka ngaˈay ko niyah midimokos to sakaˈorip no paro no lomaˈ, ngaˈay kita samaan miremo to hatiniay a kaciˈangi hani? (Matay 6:31-33) (2) Ilalomaˈay no coka a mararamoday paladaˈay to kakaenen i cecay fafahiyan salikaka, ngaˈay kita samaan mitodong to taˈarawan nangra hani?
8 Ano pakasoˈlin kita to maolahay ci Yihofa kitaanan maolahayho to paro no lomaˈ no mita, wa rihadayto ko falocoˈ, pakasoˈlin to papafeli Cingra to misaalian ita. (ˈOsien ko Matay 6:31-33.) Matomesay ko olah ni Yihofa, o hinapaladaˈay a Kawas, makalimay Cingra Midimokos kitaanan. Misangaˈ Cingra to cikiw i, cowa ko pipafeli aca to sakaˈorip no tamdaw, ngaˈay kita maˈorip. Iraayho ko olah Ningra, misangaˈ to kasapaan a maamaan, ngaˈay kita kadofah a marenec ko kaˈorip. (Satapangan 2:9) Latekay soˈlin pasangaray ko kaˈorip ita, o mamisinanot to cecay a demak, o ngangaˈayho kita padadotoc maˈorip. Cowa pisamangah ci Yihofa, soˈlinay a midimokos kitaanan. (Matay 6:11) Haharatengen ita, o matomesay ko olah a Kawas papafeli kitanan to kadofahay a sapalemed anini ato noikor. Palalinien tonini sapalemed, o kihcod a kinafalahan ita itini nodafongan cowato ka samaan. Onini ko nafalocoˈan ni Nistoe aci Mariya.—Isaya 65:21, 22.
9. Mikitini taˈarawan ni Nistoe aci Mariyaan mananamay iso ko maanan?
9 Itiniay i Koronpiya ci Nistoe aci Mariya, isaˈayaw na sinowayay ko kaˈorip. Sanay ko sowal nangra: “Makalimay kami kantangen ko kaˈorip, mitongal to tayal saki Yihofaan, kawra calemcemay kami malowan ko lifon, cowato ko lalipahak ko kaˈorip niyam alatek.” O manan ko padamaay cangranan miremo to kaciˈangi hani? Misongilaˈay cangra miharateng samaanay ci Yihofa itini adihayay pakayraan paihkal to olah cangranan, pakasoˈlinayto cangra o papadadotoc ci Yihofa midimokos cangranan. Mihaenay, misawaday cangra to adihayay ko lifon a tayal, pacakayayho to lomaˈ, malinahay tayra i Koronpiya misaaliay to adihayay mitosilay a pala. Ikor iraay ko masamaanay a harateng nangra hani? Sowal ni Nistoe: “Soˈliˈlinay mahapinang niyam ko Matay 6:33 o soˈlinay kimad. Awaay ko kacangoˈotan niyam a dafong, tada matongalay ko lipahak no kaˈorip niyam.”
CIˈANGI TO TAMDAW
10. Hano caka pasangar kita cipinang o tamdaw ciˈangiay to roma tamdaw?
10 Mikitini nolitengan tahanini, marariday ko tamdaw madadokaˈ. (Patnakay 8:9) Tinakoen, o cifadangalay a tamdaw patelasay misaka dademak to fadangalan, o mararaway a tamdaw tano mariˈangay midokaˈ to tao, o romaroma micudaday misamsamay to roma a cafay micudad, iraayho ko roma tamdaw misafayaˈay to paro no lomaˈ no niyah. Mansa ciˈangiay ko tamdaw to tao! Sasamaan ci Satan misaka dademak to ciˈangiay to tamdaw a falocoˈ ita hani?
11-12. Sasamaan ci Satan misaka dademak to ciˈangiay to tamdaw a falocoˈ mifiyor kitaanan hani?
11 Ciharatengay ci Satan sapisaka dademakaw to ciˈangiay falocoˈ ita, pacieci kitaanan caayto ka pitosil anca midofdof to roma a sapalimoˈot no Kawas. Itini pifiyor ni Satan, o roma a sifo mikecengay to tayal ita, hanaca mipalakay kitaanan. (Luka 21:12; Paˈarawan 2:10) Itini toniya hekal ni Satan, ˈalomanay tamdaw patenakay to pakayniay kitanan to cowa ko soˈlinay lihaf, anca padeteng sanay midokaˈ kitaanan. O pakasoˈlinay tonini a mangah a tamdaw malikafay kitaanan alatek, tano mariˈangay a miˈodis kitaanan. (Matay 10:36) Wa pakayni kita toniya demak a fahkaen han? Cowa. Samanen itini saka 1 hahekalan misaka dademakanto ni Satan ko hatiniay a pakayraan.—Dmak 5:27, 28, 40.
Soˈlin misafelit ko paro no lomaˈ, wa ngaˈay pakasoˈlin kita to maolahay ci Yihofa kitaanan (Nengnengen ko saka 12-14 fatac) *
12 Cowa ko pipaˈangi aca kitanan to pisafelit no sifo, misaka dademakayho ci Satan to roma pakayraan. Palalinien to pikariˈang to tireng, o katalawan no roma tamdaw i, o paro no lomaˈ pakayni i soˈlinay kimad iraay ko tatiihay a harateng. Maolahay cangra to paro no lomaˈ, makalimay to paro no lomaˈ mafanaˈ ato maolah ci Yihofaan. Ano somowal ko paro no lomaˈ to tatiihay tengilen a sowal mitongangan to Kawas ato salikaka, maedeng masomaday cangra. O kahemekan i, o roma a paro no lomaˈ ikor mafalicayto, micadaayto to soˈlinay kimad. Kawra o paro no lomaˈ ita ano pakayniay mipiliˈan ita a pihakelongan miketon to kalalaˈed kitanan, sasamaanto hani?
13. Ano mapiliˈ ko paro no lomaˈ i, hano mamiharateng to maolahay ko Kawas kitaanan? (ˈOlic 27:10)
13 O sowal no ˈOlic 27:10. (ˈOsien.) Tada mitemeray to tamdaw, pafeliay kitaanan to taˈangayay a sahinom. Ano misiˈayaw to pisafelit no paro no lomaˈ i, haratengen ita tada maolahay ci Yihofa kitaanan, wa rihadayto ko falocoˈ. Pakasoˈlinay kita, wa pakaynien ni Yihofa i noka padadotoc ita mihadidi palifon kitaanan. Wa itini ci Yihofa i tireng, nofalocoˈan ato noˈadingoan pafeli to sangaˈayay a pidimokos kitaanan, awaay ko tamdaw pakafiloay Cingranan! Satapang no lalakaw masowalay ci Pinien iraay ko mahaenay a kafanaˈ.
14. Mikitini tinakoan ni Pinien mananamay iso ko maanan hani?
14 Mafanaˈay ci Pinien, malo Misawacayay Tamdaw ni Yihofa wa tahasiˈayaw to pakidemay a sapalak, kawra kamayan cingra micada to paputisem. Nengnengen hena, samaanay cingra pakayni i pakasoˈlin to maolahay ci Yihofa cingraanan hato maremoayto ko ciˈangiay to tamdaw a falocoˈ. Sanay cingra: “O pakidem no sapalak mataˈlifay ko miharatengan ako. Kawra palalinien to sapalak no sifo, o kaciˈangian ako o pisafelit no paro no lomaˈ. Ciˈangiay kako malo Misawacayay Tamdaw ni Yihofa papatoled to cowa pihakelong a wama, o pinengneng nangra takowanan malecad o hadec.” Nikawrira, pakasoˈlinay ci Pinien ci Yihofaan ano masamaanto wa dimokosen ko maolahay Cingraanan a tamdaw. Sowal ni Pinien: “Midotim kako ci Yihofaan na misamaanay padama to roma tamdaw misiˈayaw to cangoˈot ko sakaˈorip, cowa ka sadafdaf a picada ato piˈodis no mariˈangay. Mafanaˈay kako, ano madimadi kako ci Yihofaan, papalemeden Ningra kako. Kinapinaay kako malepel, tahacada to pikariˈang. Kawra matinakoay to ako, ano padadotoc kita madimadi, papafelien ni Yihofa kita itini pisaalian a tatokian to taˈangayay a sapadama.” Ci Yihofa soˈlinay malo soˈliˈlinayto a Wama ni Pinien, o finawlan Ningra malo soˈliˈlinayto a paro no lomaˈ ni Pinien.
CIˈANGI MAPATAY
15. Ciˈangi to patay hano o pinangan no tamdaw saan hani?
15 O sowal no Fangcalay Cudad o ˈada no tamdamdaw ko patay. (1 Korinto 15:25, 26) Maharateng ko patay i, alatek cowa ka rihadayen kita, mangalef pakidem ko adada no niyah anca o salawina i, tada matongalay ko cariraw. Hano ciˈangi kita to patay hani? Samanen isalakat misangaˈ ko Kawas kitanan i, pakaliman Ningra kita tahadaˈoc a maˈorip. (Patnakay 3:11) Pakayni to patay ira ko matatodongay a ˈangi papadama kitanan misalimla to ˈorip. Tinakoen, mihaen wa padadotoc kita to ngaˈayay a nanaman i kakaenen ato pionto, itini i pisaalian a tatokian i, tayra pipaisingan micada to pipaadah, caay ko mamisakahemaw to rihaked, mirienang to romaroma katalawan a demak.
16. Sasamaan ci Satan misaka dademak to pakayniay i kaciˈangi ita to patay a falocoˈ hani?
16 Mafanaˈay ci Satan misalimlaay kita to ˈorip no niyah. Sanay cingra pakayni sapidipotaw to ˈorip ita cowa ko mamisalimla to kihcod a dafong, hanaca makahi kinafalah to kalawidang no niyah aci Yihofaan. (Yopu 2:4, 5) Tada mararawayto ci Satan! Nikawrira, wa sakadademaken ni Satan ko kaciˈangi ita to patay pacieci kitaanan mitowakang ci Yihofaan, samanen cingra i, ‘iraay ko ˈicel pakapatay to tamdaw a Akoma.’ (Hipray 2:14, 15) Tinakoen, micadaay to pifiyor ni Satan a tamdaw alatek patalaw a somowal, ano caay pisawad kita to pihakelongan, o papatayen kita. Roma i, malitemoh ita ko kacalohan a sapaising a pakayraan i, sakadademaken ni Satan konini a toki mipacieci kitaanan misafelit to sarikec no Kawas. O ising anca cowa pihakelong a paro no lomaˈ wa miroero kitaanan alatek, papicada kitaanan pacomod to remes, o roma tamdaw palimoˈot kitanan alatek micada to roma misafelitay to safalod no Fangcalay Cudad a sapiadah a pakayraan.
17. Mikitini Loma 8:37-39, hano cowa ko caciˈangi kita to patay?
17 Soˈlin cowa ka ciharateng kita mapatay, kawra mafanaˈay kita, soˈlin tahirato i saikor ko ˈorip ita, o olah ni Yihofa kitaanan cowa ko mamahererek. (ˈOsien ko Loma 8:37-39.) Wa maharateng ni Yihofa ko mapatayayto a widang Ningra, itini pinengneng Ningra malecaday o maˈoripayho cangra. (Luka 20:37, 38) Makalimay Cingra miliyaw patikol paˈorip cangraanan. (Yopu 14:15) Soˈlinay haw i, pakayni ‘sapilifokaw ita to midaˈocay a ˈorip,’ maherekayto ci Yihofa mihadak to matekesay a sapiˈaca. (Yohani 3:16) Mafanaˈay kita, tangongolay ko olah ni Yihofa kitanan, ciharatengay kitanan. Mansa, ano macada ita ko pakidemay adada anca misiˈayaw to saroero no patay, cowa ko mamiliyas kita ci Yihofaan, ao papasayra Cingraanan micangacang to sahinom, taneng ato ˈicel. Ci Walayli ato faˈinay ningra o mahaenay ko demak.—ˈOlic 41:3.
18. Mikitini tinakoan ni Walayli mananamay iso ko maanan hani?
18 35 ko mihecaan ni Walayli i, makinsaay to ciadadaay to ekang, hanaca kalikiay a tatiih ko adada ningra. Nengnengen o olah ni Yihofa cingraanan samaanay padama cingraanan miremo to pakayni kaciˈangi to patay, sanay cingra: “Cecayay aca dadaya, o teloc no pikinsa mifalicay to kaˈorip no niyam. Wa taˈangay ko pitokad takowanan, orato milicayay to adihayay a ising, kawra o sowal nangra o hatiniay pitokad o papacomoden ko remes. Tada ciˈangiay kako, kawra sapidofdofaw kako to sapalimoˈot no Kawas, mansa cowa ko papacomod to remes kako. Padotocay a maolah ci Yihofa takowanan, nohatini o ngaˈayay a tatokian ako paihkalto maolahay ko niyah Cingranan. Ano pasowal ko ising takowanan to tatiihay a lihaf i, matongalay ko pisetek ako to falocoˈ pakayni takowanan a maliko ci Yihofa, ho eca ka laˈosi ko demak ni Satan. Salikor, micadaayto kako to cowa pacomod to remes a pitokad, hanaca malaˈosiay ko pitokad. Soˈlin nohatini cowaho kangaˈay ko tireng ako, kawra kamayan midimokos ci Yihofa takowanan. Tinakoen, itini ˈayaw no makinsa to iraay ko ekang ako a pilipayan, itini i kasakopang malalengoay to kami ‘Katimolo Misiˈayaw to i Kaˈayaway a Pades’ * a lalakaw. Onini a lalakaw soˈlinay a matatodong, pafeliay tamiyanan to taˈangayay a sapakalalok, saliyaliyawan niyam a miˈosi. Micekiw to hatiniay a lalakaw ato tawlik mirienang to masakenaay pidoko a demak pairaay to rihadayay a falocoˈ ako ato faˈinay, padamaayho tamiyanan padadotoc maroyaroy, citaneng ko pisaˈosi.”
MALOWIDAYTO KO KACIˈANGI
19. Cato ka halafin wa ira ko manan a demak a mifekad?
19 Itini i sapadama ni Yihofa, paro no kakarayan a salikaka maremoayto ko masakenakenaay a pasangar, malaˈosiay ko picoˈay ci Akomaan. (1 Pitiro 5:8, 9) Wa madangar iso! Caka halafin, wa ocoren ni Yihofa ci Yis ato cafay ni Yis mala hongti a tamdaw ‘palahdaw to kihcod a midemakan ni Satan.’ (1 Yohani 3:8) Ikor itiniay i fafekang no sera a finawlan no Kawas ‘cowato ko caciˈangi, cowa ko mamacekid.’ (Isaya 54:14; Mika 4:4) Kawra itini i ˈayaw norira, o kakamayan kita misaˈicel milowid to kaciˈangi.
20. Sasamaan kita a midemak ngaˈ malowid ko kaciˈangi?
20 O papadadotoc kita paˈicel to pakasoˈlinay falocoˈ, pakasoˈlin to maolahay ci Yihofa kitanan, o mamidipot kitaanan. Mamicerid kita midotim ato milengo to samaanay ci Yihofa midipot to iti:yaayho madimadiay sikawdan Ningra, mihaen o pakasoˈlinay falocoˈ ita wa matongal matongal ko katanektek. Haharatengen ita na samaanay ci Yihofa padama kitanan misiˈayaw to masakenakenaay a pasangaray. Tadiˈecen ko sapadama ni Yihofa, o ngangaˈay malowid ita ko kaciˈangi!—ˈOlic 34:4.
RADIW 154 Kiemelen Ita Mihadidi
^ O ciˈangiay o pinangan konini, ngaˈay midipot kitanan, padama kitanan miliyas to katalawan. Kawra nolatekay, o ciˈangiay falocoˈ awaay ko sakangaˈay no mita. Misamaanay hani? Samanen misaka dademakan ni Satan ko hatiniay a falocoˈ pakararaw to misaˈosian no mita. Mihaenay, oha mamihadak kita to ˈicel miˈimer to ciˈangiay a falocoˈ. O manan ko papadama kitanan hani? Onini lalakaw mamitadtad, ano pakasoˈlin kita to maolahay ci Yihofa kitanan, itiniay i tatihi ita midama kitanan, awaayto ko kaciˈangian ita.
^ Mifalican ko ngangan no tamdaw itini toni lalakaw.
^ Nengnengen ko Mikecolay Saka 10 Folad 15, 2012, saka 7-11 fiedac.
^ TATODONG NO COKA: Cecay fafahiyan salikaka marorayay matayal, cecay mararamoday no kasakopang miˈorongay to kakaenen pafeli cingraanan ato paro no lomaˈ ningra.
^ TATODONG NO COKA: Cecay kapah salikaka pakayni pihakelongan misafelitan no wama wina, kawra pakasoˈlinay cingra wa midama ci Yihofa cingraanan.