ˈALOMANAY tamdaw mananamay to cecay maˈoningay i Fangcalay Cudad, mafanaˈay to itiniay i hecek patayen ci Yis, itiya i tatihi ningra iraay ko tatosaay mararaway a tamdaw. (Matay 27:35-38) Sowal no Fangcalay Cudad, o tireng ni Yis ikor mitademan i patademan. Pakayni tonini, cisasaay ko roma tamdaw to maˈoningay no Fangcalay Cudad.—Marko 15:42-46.

Iraay ko roma milikafay to Ratoh cudad a tamdaw cisasaay to mipatayan a mararaway tamdaw mamilifok to ngaˈayay a pitadem hokira, tinakoen telien i patademan. O piharateng nangra to tireng nonini mapatayay a mararaway alatek tano roma a pakayraan milosimet. Itini Smisensiyhoy a pakafoladay lalakaw, mitatiliday ci Aliayle Sapae mitadtaday o romaroma tamdaw hano ira ko mahaenay a pinengneng, sanay cingra: “O mapacekay mapatay itini i ciwcika a tamdaw sahtoay o hadec hananay no siyakay, mihaenay o roma mikakingkiway tamdaw o piharateng to Loma tamdaw cowa ka pihayi to mamilifok to tatademen ko tireng no hatiniay tamdaw.” Ciharatengay ko Loma a tamdaw sapipasemsemaw a pakangodo to papatayen a mararaway tamdaw, mihaenay o tireng nangra terekan i hecek, sapakaen to pinaˈorip, ikor o ˈokak nangra alatek wa patelas hananay a milafong.

Kawra mikitini mahapinangay no mikakingkiway to nolitengan, o tireng no roma mipatayan a Yutaya tamdaw cowa ka haenen milosimet. 1968 miheca, o ˈokak no cecay mipatayan i saka 1 hahekalan a tamdaw makorkoray, o kitiraan i itiniay i ngata no patademan no ngasaw no Yutaya i Yirusalim. Onini a ˈokak mitelian i piparoan to ˈokak a hako, ilalomaˈ iraay ko cecay ˈokak (ˈokak no pakih) mapacekay no 11.5 kongfen a pacek i fafekang no sapad. Sanay ko sowal ni Sapae: “Itini i Ratoh a cudad pakayniay pitadem ci Yisan o soˈlinay hokira, padotocay ko tamdaw a malacoli. O ˈokak no pakih ni Yihohanan misaysayay tonini a lacongis. O ˈokak no pakih ni Yihohanan o ngaˈayay a tinakoan, mitadtaday itini lintad ni Yis, mapacek a mapatay ko cecay Yutaya tamdaw i ciwcika ikor, mihaiyay ko Loma tamdaw tano pakayraan no Yutaya ngaˈay ko pitadem to tireng ningra.”

Mikitini tonini a ˈokak no pakih minengneng, tano maanan a pakayraan ko picaˈit i hecek ci Yisan, o mikakingkiway iraay ko masakenakenaay a sasowalen. Kawra ihkalay a mahapinang, o romaroma mipatayan a mararaway tamdaw soˈlinay ngaˈay ko pitadem, cowa ka patelas hananay a milafong. Mahapinangay, ilalomaˈ no Fangcalay Cudad pakayni pisongilaˈ mitadem ci Yisan a maˈoningay i, ngaˈayay pakasoˈlinen, iraay ko wacay midamaay.

Kalimlaan i, na paˈayaway ci Yihofa wa itini patademan no cihafayay tamdaw a tademen ci Yis, ano cimato cowa ko papakaconged to kalaˈosi no sowal Ningra.—Isaya 53:9; 55:11.