O HIPRAY a tamdaw itini sapafeli no Kawas a Pala maˈorip i, kalo a tamdaw mikitiniay i pikangkang to ˈomah, mikosam to sapaloma a fafoladan misatapang misaˈosi to faelohay a cecay miheca, o hatiniay a pisaˈosi to romiˈad o koyomi no maomahay. O saka cecay folad no koyomi no maomahay madeng o Kasiwaan folad tangasa Kamoetepan folad no aniniay a lintad.

Ono folad a koyomi cecay miheca 12 folad, o romiˈad no cecay a folad mikitini i rakat no folad a toki ko sapisaˈosi, mihaenay to folafoladan alatek iraay ko 29 anca 30 romiˈad. Kawra, cecay miheca no folad a koyomi palinien to cidal a koyomi kamotoˈay, mansa mikilimay ko tamdaw to pakayraan misalof tonini a kacangoˈotan. O pakayraan i, to mihecahecaan patongalen to pina romiˈad, anca mataˈlif ko pina miheca patongalen to cecay folad, satapangan no cecay miheca mihaenay ko demak no tamdaw alatek. Ano mihaen, o hatiniay a pisaˈosi ngangaˈayto patatodong to pipalomaan ato pipanayan a tatokian.

Itini lintad ni Mosi, patirengay ko Kawas to fangcalay a koyomi, kacanglahan a Apip a folad, o Nisan folad, malo saka cecay folad no fangcalay a koyomi. (Kasadakan 12:2; 13:4) O cecay a lisin nonini a folad milingatay to pilitodan to emi.—Kasadakan 23:15, 16.

Itini Likisi no Yutaya i Lintad ni Yis Kristo (ˈAyaw no Kongyen 175 miheca–Kongyen 135 miheca) (no Padaka), o cecay ci Aymie Silie a mikakingkiway sanay ko sowal: “O saˈosi to tatongalen ko cecay folad kantangay.” Sanayho cingra: “Pitaˈlifan a Lisin itiniay i Nisan a folad kakimoloan no folad a romiˈad (Nisan folad 14 romiˈad), onini a romiˈad itiniay i ikor no kacanglahan. Mihaenay, itini kahererekan no cecay miheca ko Yutaya tamdaw, ano mahapinang ko dotoc a miheca isaˈayaway no Pitaˈlifan a Lisin no kacanglahan, wa itini cangra ˈayaw no Nisan folad patongal to cecay folad.”

Misaˈosi ko Misawacayay Tamdaw ni Yihofa to aicowa a romiˈad misikay to Lafi no Tapang i, misimsimay tonini a safalod. Misalalangian to koyomi no Yutaya tamdaw, o Lafi no Tapang itiniay i kacanglahan Nisan folad 14 romiˈad a misikay. I paro no kakarayan a kasakopang talaˈayaway a mafanaˈ tonini a romiˈad. *

Isalakatay a Hipray tamdaw hano mafanaˈ to icowaay a romiˈad mahererek ko cecey folad, o faelohay folad icowaay a romiˈad misatapang hani? Anini, o pinengneng aca ita to kalidopak anca no tingnaw a koyomi ngaˈayayto. Kawra itini lintad no Fangcalay Cudad, cowa ko kantangay ko demak.

Itini lintad ni Nowa, cecay folad 30 romiˈad. (Satapangan 7:11, 24; 8:3, 4) Ikor, cecay folad no Yutaya a koyomi caayto ko masaˈosiay a 30 romiˈad. Tooren ko pisaˈosi no Yutaya a koyomi, o faelohay cecay folad mikitiniay i maˈaraw no tamdaw ko faelohay folad tora romiˈad a misatapang. O laˈed nonini a romiˈad ato iˈayaway a folad saka cecay romiˈad mataˈlifay to 29 romiˈad, anca mataˈlifay ko 30 romiˈad.

Kinacecayay, ci Tafiti aci Yonatan somowalay to satapangan no faelohay sakacecay folad, sanay cangra: ‘Anocila o faelohayto a folad.’ (1 Samuil 20:5, 18) Mansa, ano nengnengen tayra i ˈayaw no Kongyen 11 hahekalan, o folad no koyomi no Yutaya sahto maherekayto talaˈayaw a masaˈosi. Mihaenay, o faelohay a folad mikitiraay tora romiˈad a misatapang, kalo a tamdaw hano mafanaˈ hani? Pitilidan no Yutaya a tamdaw to sarikec ato nanaman no Misina mihadakay to lihaf kitaanan. Onini a cudad patalahkalayto, o pinokay no Yutaya tamdaw mikitini i Papilon ikor, itini i ilalomaˈ no pilisinan to 7 a folad, Lomaocay (saˈakawangay i hoing no Yutaya tamdaw) wa itini i folafoladan saka 30 romiˈad malisopsop a malacafay, misaˈosi to faelohay a folad mamikicowa a romiˈad misatapang. Samanay ko pisaˈosi nangra hani?

O roma tamdaw wa malimasmas itini i taliyok no Yirusalim a pala i saˈakawangay a kitiraan mitapal to kakarayan to dadaya. Maˈaraw nangra ko faelohay folad masadak, tangsolay mifanaˈ to Lomaocay. Ano harateng no Lomaocay ano ira ko matatodongay a wacay misawacay to sadak no faelohay folad, wa milasil tonini a romiˈad o satapangan no faelohay a folad. Kawra o mikecolay a tamdaw ano  maˈateng no ˈoˈol ko piˈaraw, cowa ka ˈaraw ko faelohay folad, sasamaanto hani? Wa milasilto ko Lomaocay, onini a folad iraay ko 30 a romiˈad, anocila ngaˈ o satapangan no faelohay a cecay folad.

Sowal ni Misina, o tamdaw wa itini i ngata no Yirusalim a Olif a Lotok mitotom to namal mihadak to tahapinangan, patenak to misaˈosian no Lomaocay. O roma pala no Israil saˈakawangay kitiraan wa mitotom to namal malo tahapinangan. Ikor, wa mifalic ko Lomaocay miocor to tarokos patenak tonini a lihaf. Pakayni tonini a pakayraan, itini i Yirusalim ato roma kitiraan a Yutaya tamdaw wa mafanaˈ to satapangan no faelohay a folad. Mihaen, o polong a tamdaw ngaˈayto malecad ko toki maacang a misalisin.

O sapatongal tonini a lalakaw mihadakay to koyomi no Yutaya a folad, lisin ato kasasiroma no romiˈad, padamaay kitanan cipinang to kalaliting no laˈed namira.