1. O marariday sowalen ita a “soˈlinay kimad” o maanan ko tatodong hani?

“SAMANAY kiso mafanaˈ to soˈlinay kimad?” “Mikikaemangho mafanaˈayto kiso to soˈlinay kimad han?” “Hakowaayto ko halafin iso mafanaˈ to soˈlinay kimad?” Na pacaˈofay kiso to hatiniay salicay, anca na mihaenay milicay to tao. Misowalan itini a “soˈlinay kimad” o maanan ko tatodong hani? Tocerid, mitaypiyaway ko soˈlinay kimad to pihakelongan ita, o pidoko ato pakayraan a maˈorip. O mafanaˈay to soˈlinay kimad a tamdaw cipinangay to kimad no Fangcalay Cudad, hanaca midoedoay to safalod no Fangcalay Cudad a maˈorip. Mihaenay, ngaˈayay cangra mihepol to pifiyor no mararaway pihakelongan, itini cowa kalefot a hekal ira ko sangaˈayay a kaˈorip.—Yohani 8:32.

2. Mikitini Yohani 13:34, 35, misatapang ko tamdaw minanam to soˈlinay kimad, o maanan ko lalangian hani?

² Satapang o maanan ko misolotay tisowanan minanam to soˈlinay a kimad hani? O ngaˈayay a waywayan no Krisciyang alatek. (1 Pitiro 2:12) Anca o paihkalan no Krisciyang a olah alatek. Pakaynien ˈalomanay tamdaw, sakina cecay nangra mirienang to saˈopo i, cowa ko lalakaw no saˈopo ko maharatengay, ao paihkalan no salikaka a olah. O matatodongay konini, samanen na pasowalay ci Yis o tahapinang no Krisciyang o masasiolahay. (ˈOsien ko Yohani 13:34, 35.) Soˈlin o olah ngaˈayay padama kitaanan mihapinang o cima ko finawlan no Kawas, kawra sapadamaaw kitaanan a palahad to tanektekay a pakasoˈlin cowaho kaedeng konini.

3. Pakasoˈlin kita to Kawas hano cowa ko pakayniay aca i kasasiolah no Krisciyang?

³ Pakasoˈlin kita to Kawas, cowa ko pakayniay aca i kasasiolah no Krisciyang. Misamanay hani? Haratengen ko laenoay pakayraan: Itini kasakopang iraay ko tamdaw karetengay ko raraw, o mararaway a tamdaw o malohemay malitengay anca misakafahay.  Cecay tamdaw i kasakopang midokaˈay tisowanan. Irako misafelitay to kimad i kasakopang, pasowal to cowa ko soˈlinay kimad ko minanaman ita. Ano malifa ko hatiniay pakayraan i, o mamapolin kiso, ecato pidoko ci Yihofaan hokira? Ora taˈeneran iso ano o ngaˈayay aca waywayan no salikaka, eca ko tangongolay a kalawidang no niyah to Kawas, cowa ko tatanektek ko pakasoˈlin iso. Soˈlin o olah ci Yihofaan ato salikaka ngaˈayay padama tisowanan palahad to pakasoˈlinay falocoˈ, kawra mamisarocod kiso a micekiw to Fangcalay Cudad, cipinang to mananamay a lalakaw, halo pikilim to milingatay a lalakaw, mihaen ngaˈ pakasoˈlin to pakayniay ci Yihofaan a sowal i Fangcalay Cudad sahtoay o soˈlinay kimad.—Loma 12:2.

4. Mikitini Matay 13:3-6, 20, 21, tahalifa to sapalifet i, roma tamdaw samanay ko harateng hani?

⁴ Sowal ni Yis o roma tamdaw pakatengil to soˈlinay kimad, ‘tangsolay lipahak a micada,’ kawra tahalifa to sapalifet i, malahdawayto ko pakasoˈlinay falocoˈ. (ˈOsien ko Matay 13:3-6, 20, 21.) Cowa ka harateng nangra alatek malo nisawawaan ni Yis o tatahalifa to pasangaray ato sapalifet. (Matay 16:24) Anca, ano malo Krisciyang wa rihadayto, sinowayto ko kaˈorip sanay cangra miharateng. Kawra, itini toniya cowa ka lefot a hekal, o tatahalifa kita to pasangaray. Itini kaˈorip wa mifekad ko cowa kaharateng a kafalic alatek, hato pasangarayto kita mitafo to lipahakay.—ˈOlic 6:6; Patnakay 9:11.

5. O manan ko paihkalay o ˈalomanay salikaka pakasoˈlinay to iraay ko soˈlinay kimad no niyah?

⁵ ˈAlomanay salikaka pakasoˈlinay to iraay ko soˈlinay kimad no niyah. Hano mafanaˈ kita hani? Samanen soˈlin midokaˈ ko kasakopangay tamdaw cangranan anca midemak to mararaway a demak, cowa ka ngiyangi ko pakasoˈlinay falocoˈ nangra. (ˈOlic 119:165) Ano tahalifa to sapalifet, matongalay ko tanektek no pakasoˈlinay falocoˈ nangra. (Yakop 1:2-4) Sasamaan kiso palahad to mahaenay a pakasoˈlinay falocoˈ hani?

6. Saka 1 hahekalan a Krisciyang hano ira ko pakasoˈlinay falocoˈ to Kawas hani?

⁶ Saka 1 hahekalan a Krisciyang iraay ko pakasoˈlinay falocoˈ to Kawas, samanen mafanaˈay cangra to sifanaˈ no Fangcalay Cudad, ato sapasifanaˈ ni Kristo a kimad, oya ‘ngaˈayay lihaf a soˈlinay kimad.’ (Kalatiya 2:5) O ‘ngaˈayay lihaf a soˈlinay kimad’ mahawpay ko polong pakasoˈlinan no Krisciyang a kimad, mahawpay ko sapatefoc ni Yis ato patikol maˈorip. Pakasoˈlinay ko tarokos ci Pawlo toniya kimad sahtoay o matatodongay. Hano mafanaˈ kita hani? Samanen ngaˈayay cingra ‘misaka dademak to Fangcalay Cudad misawacay to tatahapades ci Kristo, hanaca o mamapatay ato patikol maˈorip .’ (Dmak 17:2, 3) O roma tamdaw micadaay toniya kimad, mitadiˈec to sapadama no fangcalay saocor a cipinang to Fangcalay Cudad, pakasoˈlin toniya kimad misalalangiay to Fangcalay Cudad. (Dmak 17:11, 12; Hipray 5:14) O pakasoˈlinay falocoˈ nangra cowa ko patirengan i nafalocoˈan. Midoko cangra to Kawas, cowa ko pakayniay ka lipahak a micawmaˈ to salikaka. Ira ko pakasoˈlinay falocoˈ nangra, o kafanaˈ to ‘pakayniay i Kawas a matatodongay a sifanaˈ.’—Kolosay 1:9, 10.

7. Pakasoˈlin to kimad no Fangcalay Cudad wa ira ko maanan sadama kitaanan hani?

⁷ O kimad no Fangcalay Cudad cowa ko mamafalic. (ˈOlic 119:160) Soˈlin pakararaw ko salikaka kitaanan anca pakidem ko raraw, anca tahalifa kita to pasangaray, kamayan o soˈlinay kimad ko sowal no Kawas, cowa ko mamafalic. Mihaenay, tatongalen ita ko kafanaˈ to Fangcalay Cudad, ato pakasoˈlin o sapasifanaˈ no Fangcalay Cudad kitaanan sahtoay o soˈlinay kimad. Malecad o ˈenor no tamina ano mafaliyos patanektekay to tamina, o soˈlinay kimad no Fangcalay Cudad ko taˈeneran no pakasoˈlinay falocoˈ, o papadama kitaanan padadotoc a tanektek itini  sapalifet. Mihaenay, sasamaan kita mihapinang to iraay ko soˈlinay kimad noniyah hani?

8. Mikitini 2 Timoti 3:14, 15, samanay ci Timoti mihapinang to mananamay no niyah sahtoay o soˈlinay kimad hani?

⁸ Pakasoˈlinay ci Timoti to mananamay noniyah sahtoay o soˈlinay kimad. Samanay cingra a mihapinang hani? (ˈOsien ko 2 Timoti 3:14, 15.) O wina ato fofo ni Timoti pasifanaˈay cingranan mafanaˈ to Fangcalay Cudad, mihadakay cingra to toki ato ˈicel micekiw to Fangcalay Cudad, mihaenay ‘micada to sapalimoˈot ngaˈ pakasoˈlin’ sahtoay o soˈlinay kimad ko minanaman no niyah. Ikor, ci Timoti, wina ato fofo ningra mirienangay to Kristokiyo. O paihkalan no Krisciyang a olah maedeng pakalalokay ci Timotian, ciharatengay to salikaka cingra, makahi mipalak to toki kalacafay cangraanan. (Filipi 2:19, 20) Kawra, pakasoˈlin cingra to Kawas, cowa ko pakayniay kaolah to salikaka, ao pakayniay pakasoˈlin to o soˈlinay kimad ko sowal no Fangcalay Cudad, oniya kimad miocoray cingranan malo widang ni Yihofa. Ano kitato o mamisongilaˈ a micekiw to Fangcalay Cudad, pakasoˈlin to milingatay ci Yihofaan a sifanaˈ no Fangcalay Cudad sahtoay o soˈlinay kimad.

9. O hahapinangen iso ko maanan tolo taˈeneran a soˈlinay kimad hani?

⁹ O hahapinangen iso ko tolo taˈeneran a soˈlinay kimad: Saka 1, o Misangaˈay a Tatapangan ci Yihofa. (Kasadakan 3:14, 15; Hipray 3:4; Paˈarawan 4:11) Saka 2, mikayatan no Kawas ko tamdaw mitilid to Fangcalay Cudad, sapafeli to polong tamdaw a cudad. (2 Timoti 3:16, 17) Saka 3, milikakawan ni Yihofa ko cecay ˈopo a tamdaw, itini sakayat ni Kristo midoko Cingraanan, oniya ˈopo o Misawacayay Tamdaw ni Yihofa. (Isaya 43:10-12; Yohani 14:6; Dmak 15:14) Mafanaˈ to polong a Fangcalay Cudad ngaˈ pakasoˈlin toniya taˈeneran no soˈlinay kimad cowa kasaan. O patosokan iso sakadademaken ko ‘taneng’ a mihapinang to o soˈlinay kimad ko minanaman iso.—Loma 12:1.

10. Ikor no mafanaˈ to soˈlinay kimad, wa samaanho ko hademak iso hani?

¹⁰ Ano pakasoˈlinayto kiso to Kawas, Fangcalay  Cudad, ato finawlan no Kawas oniya tolo taˈeneran a soˈlinay kimad ikor i, wa minanamho kiso misaka dademak to Fangcalay Cudad a mitadtad i tamdaw toniya soˈlinay kimad. Misamanay? Samanen o kahacecay Krisciyang iraay ko ˈinorong pasifanaˈ to makahiay mitengil a tamdaw, padama cangranan mafanaˈ to soˈlinay kimad. * (1 Timoti 4:16) Pasifanaˈ kita to tao pakasoˈlin to soˈlinay kimad no Fangcalay Cudad, wa matongal ko tanektek no pakasoˈlin no niyah.

11. Itini pasifanaˈ a pakayraan, o tarokos ci Pawlo patirengay to maanan taˈarawan hani? Sasamaan kita minanam cingranan hani?

¹¹ Pasifanaˈ ko tarokos ci Pawlo to tamdaw i, ‘misaka dademakay to Rikec ni Mosi ato cudad no pairasolay, misaˈicel a palimoˈot cangranan pakasoˈlin ci Yisan.’ (Dmak 28:23) Sasamaan kita minanam ci Pawloan hani? Ano pasifanaˈ kita to pacekiwan i, cowa ko pipasowal aca to manan sanay ko sowal no Fangcalay Cudad, o papakalaloken cangra misongilaˈ micekiw ato midotim to mananamay a lalakaw. Cowa pitokel kita pakayni kasemer no pacekiwan kitanan a micada to soˈlinay kimad, tokel ita ngaˈay pakasoˈlin cangra sahtoay o matatodongay ko minanaman no niyah.

12-13. Sasamaan ko wama wina padama to wawa minaˈeng i falocoˈ to soˈlinay kimad?

¹² O wama wina, maedeng mitokelay kamo naˈengen no wawa i falocoˈ ko soˈlinay kimad. Harateng iso alatek, ano micawmaˈ to ngaˈayay widang ko wawa i kasakopang, wa ngaˈayto palahad to tanektekay pakasoˈlinay falocoˈ. Kawra, ano papakasoˈlin ko wawa to iraay ko soˈlinay kimad no niyah, o ngaˈayay aca a widang cangoˈotayho. Oha papatirengho cangra to kalawidang ato Kawas, wa oniyah ko mamihapinang to matatodongay ko sowal no Fangcalay Cudad.

¹³ Pakayni sapasifanaˈaw to wawa mafanaˈ to kimad no Kawas, papatireng ko wama wina to taˈarawan, misongilaˈ minanam to Fangcalay Cudad. O mamipalak ko wama wina to toki midotim to mananamay a lalakaw, mihaen ngaˈ pakalalok to wawa mitodong a midemak. Pasifanaˈenho no wama wina ko wawa misaka dademak to lalosidan a micekiw to Fangcalay Cudad, malecad o pipasifanaˈ to pacekiwan. Mihaen ko demak no wama wina, wa matongal ko olah no wawa ci Yihofaan, pakasoˈlin to pakaynian ni Yihofa i madimadiay citanengay a koli padama kitaanan a cipinang to Fangcalay Cudad. (Matay 24:45-47) O wama wina, cowa ko pasifanaˈ aca to wawa to taˈeneran a kimad no Fangcalay Cudad. O kalomahad nangra matongal ko saka cipinang a inaneng, pasifanaˈen cangra to ‘tangongolay a demak no Kawas,’ mihaen wa ngaˈayto padama cangranan palahad to tanektekay pakasoˈlinay falocoˈ.—1 Korinto 2:10.

14. Hano mamicekiw kita to sapairasol no Fangcalay Cudad hani? (Nengnengen sapatongal lalakaw “ Wa ngaˈay kiso mitadtad toniya sapairasol han?”)

¹⁴ Sapatongalaw to pakasoˈlin ci Yihofaan, cecay kalimlaan a pakayraan i, micekiw to sapairasol no Fangcalay Cudad. O maanan a sapairasol ko patongalay to pakasoˈlinay falocoˈ iso hani? Maharatengay iso ko pakayniay ‘salikoray romiˈad’ a sapairasol alatek. (2  Timoti 3:1-5; Matay 24:3, 7) Kawra, micekiw to roma matatodongayto a sapairasol wa patongal to pakasoˈlin iso. Tinakoen, wa ngaˈay kiso mitatad to sapairasol no Taniil 2 ato 11 fedengan samanay i salakat ato anini a matatodong hani? * O pakasoˈlinay falocoˈ iso ano misalalangiay to Fangcalay Cudad, o mahaenay a pakasoˈlin cowa ko mamangiyangi. Tinakoen, itini Saka Tosa Lalood no Hekal, pakidemay ko macadaay no salikaka a sapalak, soˈlin cowaho ka tada cipinang cangra to pakayniay ‘salikoray romiˈad’ a sapairasol, kawra kamayan a paihkal cangra to tanektekay a pakasoˈlin to sowal no Kawas.

15-17. Micekiw to Fangcalay Cudad samanay padama to maroeroay no fadangalan no Naci a salikaka?

¹⁵ Pikowanan no Naci no Towic i, pinaay patek ko mapalitay a salikaka. Ci Sitele ato ˈaˈideman no sofitay no Naci ci Himoray tada ˈintehay to Misawacayay Tamdaw. Sanay milomal ko cecay fafahiyan salikaka, pasowalay ci Himoray to fafahiyan salikaka i kapalitan: “O mikowanay namo i kakarayan ci Yihofa alatek, kawra itini fafekang no sera, tatengilen ko sowal niyam! Paˈarawen ako kamo cima ko papadotoc a matawa, o kamo anca kami?” Ano mapalifet, o maanan ko padamaay to finawlan ni Yihofa mitafo to madimadiay hani?

¹⁶ Itiya, mafanaˈayto ko salikaka tomirengayto ko Hongti Kitakit no Kawas i 1914 miheca. Misiˈayaw cangra to pakidemay sapalak i, cowa ka matalaw. Tanektekay ko pakasoˈlin no finawlan ni Yihofa cowa ko papakaconged ko mikowanay no hekal palaˈosi ko Kawas to araaw Ningra. Cowa ko ngangaˈay ci Sitele palaˈafo to matatodongay pihakelongan, awaay ko pakayraan patireng  to mikikakaay ko ˈicel to Hongti Kitakit no Kawas a mikowanay. Pakasoˈlinay ko salikaka, salikor o papasokiyaw ci Sitele.

¹⁷ Irako hatiniay pakasoˈlin no salikaka, cowa ka patoleden ni Yihofa cangra. Cowa ka halafin, maperarayto ko fadangalan no Naci, na pasowalay to “oniyam a sowal ko tengilen” sanay a Himoray mapacieciay a milaliw. Itini pilaliw ningra, malitemohay ko namapalitay a salikaka ci Lipoke. Tada matoleday ci Himoray itiya, milicayay to salikaka: “Micekiway to Fangcalay Cudad a tamdaw, dotocto mamifekad ko maanan a demak?” Pasowalan no salikaka ci Lipoke cingra, mafanaˈay ko salikaka to mamaperar ko fadangalan no Naci, o mamalidong ko Misawacayay Tamdaw. Na somowalay ci Himoray to adihayay miˈodisay a sowal to Misawacayay Tamdaw, toniya tatokian awaayto ko hasowal ningra. Caka halafin, kinasoˈotayto cingra. Mananamay ita ko maanan hani? Misongilaˈ kita micekiw to Fangcalay Cudad, mahaop ko picekiw to sapairasol no Fangcalay Cudad, wa padama kitaanan ira ko tanektekay pakasoˈlin to Kawas, tahatolas ko madimadi i sapalifet.—2 Pitiro 1:19-21.

18. Misaaliay kita to matatodongay a sifanaˈ, masongilaˈ ko kacipinang to demak, tinakoan no Yohani 6:67, 68 samanay mitadtad tonini hani?

¹⁸ O papaihkal kita maemin to olah, misawacay to o soˈlinay a Krisciyang ko niyah. Kawra kalimlaan ita ko ‘matatodongay a sifanaˈ, masongilaˈ ko kacipinang to demak.’ (Filipi 1:9) Ano eca i, ‘mamadolo a masaˈfit no tamdaw, mafiyor no tatiihay ato misawiay a sasowalen’ kita, tinakoen pakasoˈlin to sowal no misafelitay to kimad a tamdaw. (Ifiso 4:14) Itini saka 1 hahekalan, ˈalomanay nisawawaan cowato pikotod ci Yisan, kawra cowa ka mafiyor ko tarokos ci Pitiro, pakasoˈlinay cingra ‘iraay ko saka tahadaˈoc no ˈorip a sowal’ ni Yis. (ˈOsien ko Yohani 6:67, 68.) Soˈlin cowa ka marocek ko kacipinang ni Pitiro to kihcod a sowal ni Yis, kamayanho a madimadi mikotod ci Yisan, samanen pakasoˈlinay cingra to ci Kristo ci Yis. Wa ngaˈay kiso patanektek to pakasoˈlin, malecad ci Pitiroan pakasoˈlin sahtoay o soˈlinay kimad ko Fangcalay Cudad. Mihaen, ano tahalifa to sapalifet ko pakasoˈlinay falocoˈ iso cowa ko mamangiyangi, wa ngaˈay kiso padama to tao palahad to tanektekay a pakasoˈlin.—2 Yohani 1, 2.