1954 miheca, itiniay kako i Minisota a Senpawlo no Padaka a hofocen. O Tingsokiw ko pihakelongan niyam, cowa ka samaan ko kaˈorip, lalimaay ko wawa, o saka tosa kako. Ono Tingsokiw ko picudadan ako. Ano misikay ko simpo to lisin i, malo damaay ningra kako. Kawra, cowa ka cipinang kako to lalakaw no Fangcalay Cudad. Soˈlin pakasoˈlinay kako to iraay ko misangaˈay a Kawas, kawra cowa pakasoˈlin kako to sapasifanaˈ no kiyokay a kimad.

Itini kako ino holic a picudadan no Wilinmicie saka cecay miheca, iraay ko cecay mararamoday Misawacayay Tamdaw ni Yihofa milisoˈay takowanan. ˈIfowaay kako mifacaˈ itiya, miliyaw kami tayni sanay cangra. Tiya miliyaw cangra a tayni i, milicayan ako cangra to tosa salicay: O ngaˈayay tamdaw toniya hekal hano caka ˈakawang ko saaroˈan hani? Sasamaan ko demak ngaˈ milifok to soˈlinay lipahak hani? Pafeliay cangra takowanan to Mikayat to Saka Tahadaˈoc no ˈOrip a Soˈlinay Kimad a cudad, iraayho ko kandaway ko katol  a Faelohay Hekal Mihongyakan a Fangcalay Cudad, mihayay kako malacafay cangranan minanam to Fangcalay Cudad. Minanam to Fangcalay Cudad macowatay ko kafanaˈan ako. Mananamay ako o sangaˈayay a mikowanay ko Hongti Kitakit no Kawas, oha mamikowan to polong a cikiw, tada mahemekay kako. Mahapinangay ako tada tatiihay ko pikowan no tamdaw, pairaay to cowa ka sadafdaf ato ka adayayan a demak.

Itini 1982 miheca patafang kako to tireng ci Yihofaan, itiniay i “Soˈlinay Kimad no Hongti Kitakit” a Kasapala Taykay a micada to paputisem. Oniya taykay itiniay i satenokan no Senpawlo a misikay. Dotoc a lipay, patikolay kako toniya pala mirienag to pisiking tono holic. Satapang ko saka 10 folad matamaay ako ko pisiking, ngaˈayayto malo fingkosi.

Itini “Soˈlinay Kimad no Hongti Kitakit” a Kasapala Taykay, malitemohay ako ko matayalay i Prokelin a Pitil ci Mayko Ricase, pasowalay cingra takowanan tomirengay kono holic a kapot i congpo. Itiya, maharatengay ako ko sowal noya tapang no Iciyopiya i Dmak 8:36, milicayan ako koniyah: Iraay ko lalangian ako eca pisinsi tayra a matayal hokira? Ikor, misinsiayto kako tayra i Pitil matayal.

Mafanaˈ ko wama wina to malo Misawacayay Tamdaw ni Yihofa kako tada maketeray. Milicayay ko wama takowanan, matayal kako i Mikecolay iraay ko sadama to tawlo ako han? Pasowlan ako cingra, o niyah a kalim matayal, cecay folad 75 no Padaka payci ko sapafeli no Pitil takowanan.

Na mihaiyanto ako ko tayal i hoing, mansa caka ngaˈay tangsol tayra i Pitil matayal. Ikor i 1984 miheca, tayraayto kako i Niwyok Prokelin a Pitil, manilnil ino holic a kapot. Tada matatodongay koya tatokian!

1983 miheca 11 folad, micakayan no likakawa ko Stanli pisacohian. Mihalakaay ko salikaka mitomadaw tono tinki ato nanom noniya pisacohiyan, misinsiay to pihayda no mikowanay. Mitadtad ko salikaka to tapang, o mamalo pitaykayan no Misawacayay Tamdaw ni Yihofa koniya pisacohiyan. Mifekaday ko cecay pasangaray. O saˈosi no holic toniya pala, edengan itiniay pikilomaˈan a kilac ko ngangaˈay pisikayan tono pihakelongan a demak, kawra oniya pisacohiyan itiniay pisasingdian a kilac, cowa kakahi ko tapang pafeli to pihayda a minkiyo. Mihadakay ko salikaka to sapisinsi, kawra cowa ka cadaen.

Saka cecay lipay tayra kako i Pitil, o likakawa  pakayniay ka eca pafeli no sifo to pihayda a minkiyo, pasayra i hoing mihadak to rikec. Samanen mahererekayto ko tayal ako to tosa miheca i hoing, mananamay kako to hatiniay a holic. O cecay fingkosi niyam pasowalay to hankang, oniya pisacohiyan ano na misikayay to kaˈalomanay a demak, mahawp ko ika ato romadiway a demak, hano caka ngaˈay misikay tono pihakelongan a demak hani? Ikor, misawkitay ko hoing, o Cesi a sifo miˈafasay to pasalat no pihakelongan ita, mirikec to sifo pafeli to pihayda a minkiyo. Mikitini toniya demak mahapinangay ako, soˈlinayto mikayat ci Yihofa to finawlan ningra tano holic a miˈading to fadangalan no likakawa, micowat to tayal Ningra. Tada mahemekay kako ira ko toki mihadak to miming a ˈicel.

Orato misatapang ko salikaka a mitomadaw to pisacohiyan, cecay miheca, o Cesi a pitaykayan malaheciayto, hanaca itini 1985 miheca 9 folad 8 romiˈad misikay to saka 79 liyad micodiyapay i Kiliyat picudadan. Mahemekay kako ngaˈay mirienang to milingatay to holic a tayal, mihadak to miming a ˈicel saki Hongti Kitakit. Soˈlin ˈayaw no tayra Pitil dademakay kako tono holic a tayal, kawra o malaˈosiyay no hatini a demak mikikakaay ko epoc to salakatay. Cowa ka harateng ako itiya, wa sakadademaken ni Yihofa kako midemak to adihayay no holic a tayal.

ˈAyaw no 30 miheca, o cowaho ka toˈas a Misawacayay Tamdaw ni Yihofa ano manaˈay pacomod to ˈirang, cowa pikangodo ko ising to harateng ningra. Harateng no hankang, awaay ko fadangalan no mapoyapoyay manaˈay pacomod to ˈirang, samanen ano mapatay cingra i, awaayto ko ha wina no wawa.

Itini 1988 miheca 12 folad 29 romaˈad. O salikaka ci Danis Nikoray ikor no mahofoc, mahadakay ko adihayay a ˈirang, cangoˈotayto ko ˈirang, misaaliay ko ising cingranan pacomd to ˈirang. Cowa pihai ko salikaka ci Danis Nikoray. Saka tosa romiˈad a papacem, o paisingan mihadakay to saali to hoing, ngaˈay pacieci cangra pacomod to ˈirang i salikaka, samanen pacomod to ˈirang o kalimlaan saan ko harateng no ising. Cowa pafelien no hoing ci Nikoray salikaka ato faˈinayan ningra to toki a mitadtad, hanaca cowa pifanaˈ cangranan, pafeli to fadangalan to ising pacieci pacomod to ˈirang cingranan.

12 folad 30 romiˈad pilimaan, cowa pisikol ko ising to pisafelit no faˈinay ni Nikoray ato roma salawina, pacieci sanay pacomod to ˈirang cingranan. Toya dadaya, papina salawina no salikaka ato pina malohemay malitengay marepetay, o lalangian i misarayray cangra i tihi no takar,  miconged to ising a pacomod to ˈirang i salikaka. 12 folad 31 romiˈad pieneman a papacem, o sinpon no Niwyok mihadakay toniya demak.

Picecayan a papacem, miˈaraway kako to sakakaay a hankang ci Mieton Molon. Misongilaˈan ako a mitadtad koniya demak, pasowal cingranan cowa pafeli ko hankang to hatoki no adadaay mitadtad, hai sanay pacieci a pacomod to ˈirang. Sowal no hankang ci Molon ikor noya romiˈad tayra sato i katayalan ningra, padotoc a malalengo to milingatay toniya demak a holic. Toya dadaya, o kantok ako salikaka ci Filipo Polonli pacafayay takowanan tayra katayalan no hankang. Mitahidangan no hankang ko fingkosi no ising mirienang toniya kalalengo. Cowa ka ngaˈay ko kalalengo. Fahal sanay, mahadakay ko pina tilid i ciwmin no salikaka ci Polonli, patalipaˈelal takowanan ‘rihaday ko harateng.’ Ikor ngaˈ cipinangay kako to matatodongay koniya sapaini, samanen itiya o sapisawacayaw kako to mararaway cangra, telocto marawraway ko kasomowal.

Ikor no cecay toki, pasowalay ko hankang ci Molon tamiyanan, saka tosa romiˈad aisalakat misaysay toniya demak niyam. Miliyas kami i, pasowalay ko hankang ci Molon, wa adada ko fongoh to fingkosi no paisingan, tatodong i papasangar cangra paˈading to paisingan. Harateng ako itiya hato pasowalay ci Yihofa takowanan, taˈangayay ko sapakalowid niyam. Maharateng to saka dademaken ni Yihofa ko kaemingay a tamdaw palaˈosi to araaw Ningra, mikifalocoˈay mifekad ko pikangodo ako.

Salafii sanay kami misaday to saki hoing. Saka tosa romiˈad, kapot no holic romakatay tayra i hoing, samanen cowa piraay to Pitil. Maharek mitengil ko sasepatay hankang to mihadakan a sowal i, misawkitay to mararaway ko pisaˈosi no hoing a pacieci pacomod to ˈirang i adadaay tamdaw. O sasawkit no hoing pakalowiday ko salikaka ci Nikoray, misaˈosiay, ecaho pitengil to harateng no adadaay pacieci saan pacomod to ˈirang i adadaay tamdaw o mararaway, o misafelitay to fadangalan no tamdaw.

O saˈakawangay a hoing no Niwyok misaˈosiay, iraay ko fadangalan no salikaka ci Nikoray tano cowa pacomod to ˈirang a pakayraan miadah to adada. Iraay ko tatodong ako mirienang to kina sepat pakayniay pacomoday to  ˈirang a holic i saˈakawangay hoing, halo pakaˈaraw to pakalowid ita. O sakina cecay koniya tinakoan no salikaka ci Nikoray. (Nengnengen ko sapatongal lalakaw “ itini saˈakawangay hoing milifok to pakalowid”) Roma i, malacafayayho kako to pina fingkosi no Pitil misaysay to pakayniay wawa, malalikongay, ato sera ato pakayniay kadademak to lomaˈ a demak.

Sakina cecay malitemoh ako ko fafahi ci Tangen i, milikongayto cingra, miˈorongay to tatolo a wawa. Itiya, mawmahay cingra paririˈ to lomaˈ, misakafahayho. Soˈlin pasangaray ko kaˈorip, misaˈosiay cingra midoko ci Yihofaan. Tada mitemeray to falocoˈ ako. 1992 miheca, mirienangay kako to “Milasilay to Likat a Tamdaw” a Kasapala Taykay i Niwyok. Paihkalan ako to olah cingra itiya, ikor no cecay miheca mararamodayto kami. Paisalakatan ni Tangen ko demak ni Yihofa i nokaˈorip, hanaca tada mamenacay, soˈlinay o sapatelong ni Yihofa takowanan cingra. Itini kaˈorip no raramod, o sangaˈayay a dama ako cingra.—Taneng 31:12.

Mararamod kako aci Tangen i, o wawa ningra 11, 13 ato 16 ko mihecaan nangra. Makalimay kako malo ngaˈayay a wama, mikilimay kako i mitepangan to adihayay pakayniay miliyaway ci raramod a lalakaw, hanaca misaˈicel misaka dademak to mananamay. Manaokaniw malifaay niyam ko pasangaray, kawra salikor mihaydaay ko wawa takowanan, malo ngaˈayay widang, ngaˈayay wama, tada mahemekay kako. Kako aci Tangen mihamhamay to widang no wawa tayni i lomaˈ misalama, lipahakay ko paro no lomaˈ niyam, lipahakay kami.

2013 miheca, malinahay kako aci Tangen tayra i Wiskang midimokos to matoˈasayto a wama wina. Kawra, mitahidangay ko likakawa takowanan padotoc misaysay to pina no holic a demak, ngaˈayayho kako padotoc matayal i Pitil.

2018 miheca 9 folad i, mahapinangay ako ˈayaw no somowal kako mikoracayho to takoraw. Panengnengan ako ko ising, cowa ka hela ko lalangian. Ikor, painiay ko roma ising takowanan ngaˈayay tayra i no sinki a ising paˈaraw. 2019 miheca 1 folad, mahelaay no ising ono sinki a adada konini sanay. Ono talaˈayaway mapaeray a adada konini (PSP).

Ikor no tolo romiˈad, mipaseday kako i soeda i mapetekay ko kamay. Maolahay kako mipaseday i soeda, mafanaˈay a paseday. Itiya, o sakatatemik a inaneng ako iraayto ko pasangaray. Kawra o maharatengay ako i, kalikiay tatiih ko adada, mifiyoray to saka somowal, dademak ato sapiˈenoc a ˈicel ako.

Mahemekay kako ngaˈay misaka dademak to mananamay no niyah no holic a sifanaˈ, mihadak to miming a ˈicel saki Hongti Kiatkit, malikoayho itini i sipon mihadak to lalakaw, itini i cowacowa mikimad to pakayniay no ising ato no holic a demak, miˈading to fadangalan no Misawacayay Tamdaw ni Yihofa minaˈay pacomod to ˈirang. Saka dademaken ako ko Luka 17:10 paihkal to nafalocoˈan ako: ‘O awaay ko kapo a koli’ kako, o midemakan ako ‘sahtoay o hadademaken.’