1. O malalifetay a harateng miocoray to tamdaw midemak to manan hani?

 ANINI maharatengay no ˈalomanay tamdaw edengan malowid ko tao cowa ka pikihar to sasamaan ko tao. O misasingdiay tamdaw sapipadikaw to tao haratengay sanay ko demak, o miontoay sapilowidaw to tao padeteng sanay midokaˈ to tao, micudaday sakangaˈayaw no misikingan a taykak mitakaway minengneng to lalakaw. Mafanaˈay ko Krisciyang to mararaway ko mahaenay waywayan, o ‘midoedoay to ciraraway a waywayan.’ (Kalatiya 5:19-21) Kawra, itini cowa ko kafanaˈan a tatokian mikidatay kita to malalifetay i kasakopang han? O haharatengen koniya demak, samanen o malalifetay a harateng wa mipalak to kalacecay no salikaka.

2. Oniya lalakaw wa milengo to maanan?

² Oniya lalakaw wa milengo, masamanay a waywayan miocoray to tamdaw malalifet. Wa minengnengho kita to ngaˈayay taˈarawan i Fangcalay Cudad, oniya madimadiay midoko to Kawas a tamdaw cowa ka lalifet to itihiay a tamdaw. Nohatini, salakatho kita milengo sasamaan mitiyawca to araaw no falocoˈ no niyah.

3. O lalicayen ita ko niyah to maanan a salicay?

³ Wa micerid kita mitiyawca to araaw no falocoˈ no niyah.  Ngaˈayay licayen ita ko niyah: ‘Mikikakaay ko demak no niyah to tao ngaˈ lipahakay kako han? Adihayay ko mihadakan ako a ˈicel, sapisawacayaw to saidahiyay ko niyah, anca mikikakaay to cecay tamdaw han? Anca harateng ako sapatafangaw to sangaˈayay no niyah ci Yihofaan hokira?’ Hano mamilicay kita toniya pina salicay hani? Nengnengen samanay ko sowal no Fangcalay Cudad.

4. Pakayni Kalatiya 6:3, 4, hano caka ngaˈay kita palalini to tao hani?

⁴ Palimoˈotay ko Fangcalay Cudad kitanan aka palalini to tao. (ˈOsien ko Kalatiya 6:3, 4.) Misamanay hani? Samanen ano saidahiyay ko niyah mikikakaay to tao saan miharateng, o mamisatakaraw, kawra ano eca pakalini to tao ko niyah saan i, wa matoled. Ano o mananto a pakayraan, mitadtaday awaay ko matatodongay a harateng ita. (Loma 12:3) Itini Kirisiya fafahiyan salikaka ci Katelina, b sanay cingra: “Itini kasakopang o roma fafahiyan salikaka mikikakaay ko kakapah takowanan, mafanaˈay mitosil, adihayay ko widang. Miceriday kako palalini cangranan, telocto pasokiyaway ko niyah saan miharateng.” Haratengen, misolotan ni Yihofa kita tayra i tatihi Ningra, cowa ko pakayniay i makapahay a pising ita, mafanaˈ a caciyaw anca kaolahan no tao, ao pakayniay kaolah ita Cingranan, makahi mikotod to wawa Ningra.—Yohani 6:44; 1 Korinto 1:26-31.

5. Mikitini nalifetan no salikaka ci Posin mamananam iso ko manan?

⁵ Wa ngaˈayho kita milicay to niyah: “Itini pinengneng no tao o ngaˈayay kalacafayen a tamdaw kako han? Anca marariday malapoˈi to tao kako han?” Nengnengen ko tinakoan no itiniay Koriya a salikaka ci Posin. Minengneng cingra to iraay ko saaroˈan a salikaka i salakat o sakalalifet a tamdaw, sanay cingra: “Marariday kako milikaf toniya salikaka, cisasa to sowal nangra.” Telocto samanay? Sanay cingra: “Mihaen ko demak ako mikidatay to lacongis i kasakopang.” O pina widang ni Posin padamaay cingranan mihapinang to pasangaray no niyah. Orato misaˈicelay cingra misalof to waywayan no niyah. Nohatini o ngaˈayay a malohemay malitengay cingra. Ano mahapinang ita mikakidatay ko niyah to malalifetay eca ko micowatay to rihaday, tangsolen a mifalic.

6. Mikitini Kalatiya 5:26, o manan a waywayan miocoray to tamdaw misaidahidahi hani?

⁶ ˈOsien ko Kalatiya 5:26. O manan a waywayan miocoray to tamdaw misaidahidahi hani? O cecay i o malitaˈangay, o mahaenay a tamdaw misatakaraway misatekeday. O roma i o maˈinapay to tao, iraay ko maˈinapay a harateng a tamdaw cowa ko sapilifokaw aca to malecad no tao a dafong, mitokelayho malahdaw ko iraay a dafong no tao. Ihkalen ko sowal, maˈinap to tao o miˈintehay to tao. Oniya tosa a waywayan malecaday o lifong a midokaˈ to tamdaw, o laliyasen ita a mifalah!

7. Ngaˈay kita tano manan a sapatinako mitadtad to, mikidatan no malitaˈangay ato maˈinapay a pasangaray?

⁷ Malitaˈangay ato maˈinapay oniya tosa waywayan, malecaday o ponal no dawdaw no hikoki. Soˈlin ngaˈayay maefer ko hikoki, kawra oniya ponal mamisoet to rakat no dawdaw, mamapalak ko incing, cato kangaˈay patefo ko hikoki. Malecaday, o cecay Krisciyang ano malitaˈang, maˈinap to tao, soˈlin ngaˈay mitafo to pihakelongan to cecay liyad, ecato ko tatahacelem cingra. (Taneng 16:18) Ikorto o mamisawad cingra to pihakelongan, midokaˈ to niyah ato tao. Mihaenay, o sasamaan kita  miliyas to malitaˈangay ato maˈinapay a waywayan hani?

8. Ano caay ka ciharateng kita malitaˈang, wa samaan ko hademak hani?

⁸ Ano caay ka ciharateng kita malitaˈang, haratengen ko limoˈot no tarokos ci Pawlo to Filipiay a kasakopang. Sanay cingra: ‘Ano o mananto a demak aka malalifet, aka malitaˈang, ka pisapoener, minengneng to tao ikakaay to niyah.’ (Filipi 2:3) Ano ikakaay ko tao to niyah saan ko pinengneng ita, ano maˈaraw ko salikaka ikakaay ko inaneng kitaanan i, cowato ko malalifet cangranan. Ao papatado cangranan a mahemek, mangalef maˈaraw cangra tano niyah a inaneng matayal saki Yihofaan. Roma i, o iraay ko inaneng a salikaka ano midoedo to limoˈot ni Pawlo, o mamasemer cangra to kangaˈayan ita. Mihaen, o kahacecay tamdaw i kasakopang wa ngaˈay mararihaday, makelec a malacecay.

9. Ano caay ka ciharateng kita maˈinap to tao, wa samaan ko hademak hani?

⁹ Ano caay ka ciharateng kita maˈinap to tao, o mamisaˈicel palahad to misamimingay a capeling. Ano misamiming kita, wa mahapinang adihayay a demak cowa ka tada ngaˈay ko demak no niyah, cowa ko mamisawacay to ikakaay ko idahi no niyah to tao, ao maminanam to ikakaay ko inaneng kitaanan a salikaka. Tinakoen, o cecay faˈinayan salikaka ngaˈayay ko kimad, ngaˈayay licayen ita cingra samanay ko pisaday. Cecay fafahiyan salikaka mafanaˈay mitangtang to dateng, ngaˈay papipasifanaˈen ita cingra. O cecay kapah ano mafokilay micawmaˈ to widang, ngaˈayay cingra milicay to adihayay ko widang a salikaka, minanam cangranan. Mihaen ko demak ita, o mamaliyas ko maˈinapay to tao, wa ngaˈayho macakat ko niyah.

10. Wa misaysay ci Kitiyon to maanan pasangaray pakayraan?

¹⁰ Haratengen ko mifekaday a demak i kalalaˈed ni Kitiyon ato finacadan no Ifraim. O finacadan no Manasi ci Kitiyon, itini pipadama ni Yihofa, mikeriday cingra to 300 tamdaw mipadik to ˈada, tada kasemeran ko malaˈosiay a pilood. Kawra, cowa pakahemek ko Ifraim a finacadan ci Kitiyonan, malacongisay  cingranan, ano nengnengen i pakayniay eca ka tahidangen ni Kitiyon a milood hato mangodoay. Pakidemay ko pisamacay nangra to ˈdil no niyah, cowa pakahapinang to demak. Mapadikay ni Kitiyon ko ˈada, paira to ˈdil no fangcalay ngangan ni Yihofa, ato pidipot to finawlan no Kawas, dengan onini ko sakakaay kalimlaan.—Kakitaan 8:1.

11. Samanay ko caˈof ni Kitiyon to finacadan no Ifraim tamdaw hani?

¹¹ Tada misapoeneray ko falocoˈ ni Kitiyon, sanay pasowal to finacadan no Ifraim: ‘O midemakan ako manan pakafilo tamowanan hani?’ Dotoc mihadakay to cecay tinakoan, mitadtad to pipalemed ni Yihofa cangranan, telocto mafasaway ko keter nangra. (Kakitaan 8:2, 3) Pakayni sapiˈadingaw to rihadayay kalalaˈed no finawlan no Kawas, tada misapoeneray ko falocoˈ ni Kitiyon, cowa paifalocoˈen ko raraw nangra.

12. Mikitini i tireng ni Kitiyon ato finacadan no Ifraim mananam ita ko maanan?

¹² Mikitini toniya maˈoningay mananam ita ko maanan hani? Mikitini tatiihay a tinakoan no finacadan no Ifraim mananam ita, o sasaaretengen ita o paˈodingar ci Yihofaan, cowa ko niyah. O tawki no lomaˈ ato malohemay malitengay no kasakopang wa ngaˈay mikitini ci Kitiyonan minanam, ano cowa pakahemek ko demak ita to tao, o mamisarocod kita mikitini pinengneng no tao a minengneng to demak, ngaˈayho pakahemek to ngaˈayay a demak nangra. Misaaliay konini to misapoeneray, mangalef ano o tao ko mararaway. Haratengen, o rihadayay malacecay ikakaay to papisingan no tekedan a kalimlaan.

13. Misiˈayaway ci Hana to manan a pasangaray? Samaanay cingra miremo hani?

¹³ Dotoc, nengnengen ita ko taˈarawan ni Hana, o faˈinay ningra ci Ilkana o Lifi a tamdaw, tada maolahay cingranan, kawra ci Ilkana iraayho ko roma fafahi ci Pinina. Soˈlin ikakaay ko olah ni Ilkana ci Hanaan, kawra “ciwawaay ci Pinina, o caay ka ciwawa ci Hana,” mansa ci Pinina ‘padadotocay milikaf cingranan, pakasomad cingranan,’ telocto, tada marorayay cingra, ‘tatangic sanay, caka komaen.’ (1 Samuil 1:2, 6, 7) Cowa ka somowal ko Fangcalay Cudad to sapicoˈayaw ci Hana ci Pininaan. Pasayraay cingra ci Yihofaan pasowal, pakasoˈlin to papadama ci Yihofa cingranan. O waywayan ni Pinina mafalicay han? Cowa ka somowal ko Fangcalay Cudad. Kawra mafanaˈay kita o falocoˈ ni Hana patikolayto a rihaday, ‘cowato ka somad ko pising.’—1 Samuil 1:10, 18.

14. Mikitini taˈarawan ni Hana mananam ita ko maanan?

¹⁴ Nagˈay kita mikitini nalifetan ni Hana mananam ko manan hani? Ano ira ko tamdaw malalifet tisowanan, haratengen, ngaˈay misaˈosi kiso sasamaan pacaˈof, ngaˈay kiso eca ka malalifet cingranan. Hamaan tano tatiihay  patikol to tatiihay, ao misaˈicel mararihaday to tao. (Loma 12:17-21) Mihaen, ano cowa kakahi mifalic ko tao, wa kamayan ira ko rihadayay a falocoˈ iso.

15. Ci Apolos aci Pawlo iraay ko maanan kalecadan?

¹⁵ Saikor, nengnengen ita mikitini taˈarawan ni Apolos aci Pawlo ngaˈay mananam ita ko maanan. Iraay ko kadofahay a sifanaˈ nangra to Fangcalay Cudad, o idahiay a singsi, mikangodoan no tamdaw, ˈalomanay ko mapadamaay tamdaw malo Krisciyang. Kawra cowa ko sakalalifet saan cangra minengneng to tao.

16. Masamanay tamdaw ci Apolos hani?

¹⁶ O nalacolan ni Apolos itiniay Aliksantriya, o satenokan no picudadan. ‘Inanengay caciyaw, tada mafanaˈayto Fangcalay Cudad.’ (Dmak 18:24) Itini cingra i Korinto i, masemeray ko roma tamdaw i kasakopang cingranan, mikikakaay ci Pawloan ato roma salikaka saan miharateng. (1 Korinto 1:12, 13) Miowingay ci Apolos to misatekeday palicinowasay a waywayan han? Cowa. Soˈlinay i, miliyas ci Apolos to Korinto cecay liyad i, palimoˈotan ni Pawlo cingra kaliki a minokay. (1 Korinto 16:12) Ano miharatengay ci Pawlo to papaliwasak ci Apolos to kasakopang, maedeng cowa ko mamihaen ko demak. Mahapinangay, cowa ka malitaˈang ci Apolos to inaneng no niyah. Ao, misakadademakay to inaneng no niyah milasil to ngaˈayay lihaf ato patanektek to pakasoˈlin no salikaka. Roma i, tiya ‘matatodong ko pitadtad to kimad no Kawas’ ci Priskila aci Akuila cingranan i, cowa ka somowal ko Fangcalay Cudad to maketeray cingra, mahapinangay tada o misapoeneray a tamdaw cingra.—Dmak 18:24-28.

17. Samanay ci Pawlo micowat to rihadayay?

¹⁷ Mahapinangay ni Pawlo ko malaˈosiay ni Apolos a demak. Kawra cowa ka calemcem  cingra mikikaka ko tao to niyah. Mikitini sapalimoˈot ni Pawlo to Korinto a kasakopang mahapinang ita, tada misamimingay cingra, matatodongay ko pinengneng. Sowal no kasakopang tamdaw: “I ci Pawloan kako.” Cowa ka pakayni ko kalipahak ni Pawlo, ao mikayatay to harateng no tao pasayra ci Yihofaan aci Yisan a minengneng.—1 Korinto 3:3-6.

18. Mikitini 1 Korinto 4:6, 7, wa ngaˈay kita mikitini taˈarawan ni Apolos aci Pawloan minanam to maanan hani?

¹⁸ Wa ngaˈay kita mikitini ci Apolosan aci Pawloan minanam to maanan hani? Marorayay kita matayal saki Yihofaan alatek, padama to ˈalomanay tamdaw malo Krisciyang. Kawra cipinangay kita, ano hakowato ko malaˈosiay ita a demak, sahtoay o palemedan ni Yihofa. Wa ngaˈayho kita minanam to cecay demak, ano ngaˈayay ko saaroˈan a matayal, wa ngaˈay mimetmet to toki micowat to sakarihaday no kasakopang. Pakayni sapiˈadingaw to kalacecay no kasakopang, o mikeriday a salikaka no kasakopang misalalangiay to Fangcalay Cudad a mihadak to limoˈot, cowa pisatakaraw to niyah, ao pakalalokay to salikaka mikotod ci Yisan, tada miakoˈiday kita cangranan!—ˈOsien ko 1 Korinto 4:6, 7.

19. O kahacecay tamdaw wa ngaˈay kita samaan ko demak? (Nengnengen ko sapatongal lalakaw “ Aka Pikidat to Malalifetay.”)

¹⁹ Pafeliay ko Kawas kitaanan o kahacecay tamdaw to pina inaneng, sakadademaken ita koniya sapatelong, ‘misaˈicel a matayal saki tamdamdaw.’ (1 Pitiro 4:10) Miharateng kita cowa ka hakowa ko mademakay no niyah saan, kawra malecad o mitaˈisay to rikoˈ pakakiting to kala, ora miming a mihadakan a ˈicel wa ngaˈay micowat to rihaday no kasakopang. Ano ira ko miming malalifetay i falocoˈ ita, wa misaˈicel a mifalah, wa misetek kita to falocoˈ misaˈicel micowat to rihaday, makelec a malacecay.—Ifiso 4:3.