1-2. Sowal ni Yihofa itini Isaya 65:16, 17, hano ngaˈay pakalalok kitanan caay ka pisawad hani?

 “AKA A PISAWAD!” o lalangian no kasapala taykay i 2017 miheca, tada pakalalokay to falocoˈ koniya taykay! Mananamay ita sasamaan itini sapalifet padotoc a mihadidi. Sepatayto miheca, kamayan maˈorip kita toniya ciraraway a hekal, misaaliay to sapadadotocaw a mihadidi.

² Misiˈayaway kiso to maanan a pasangaray hani? Iraay ko salawina anca widang mapatayay han? Karetengay ko adada iso han? Samanen matoˈasayto kiso pasangarayto ko kaˈorip han? Tahalifaay kiso to pades, mariˈangay a demak anca sapalak han? O cecay adada, o lifong no 2019 anca roma adada taˈangayay ko pifiyor to kaˈorip iso han? Oniya kihcod o mamataˈlifto, tahadaˈoc cowato ko mamifekad, cowato ko mamaharateng no tamdaw. Tada makalimay kita kaliki ira koniya romiˈad! —ˈOsien ko Isaya 65:16, 17.

3. Sasamaan ko hademak ita anini? Misamanay?

³ O kaˈorip anini tada pasangarayto, wa tahalifaho kita to adihayay a sapalifet noikor alatek. (Matay 24:21) Hano papadadotoc kita palahad to mihadidiay hani? Samanen sowal ni Yis: ‘Ano mihadidi kamo, o mamadipot ko ˈorip.’ (Luka 21:19) Haratengen ko malecaday kitanan ko pakayraan a tamdaw samanay padadotoc mihadidi, wa ngaˈay padama kitaanan milifok to ˈicel, padadotoc mihadidi.

4. Hano o saˈakawangay a taˈarawan ci Yihofa i mihadidiay?

⁴ O cima ko saˈakawangay a taˈarawan ita hani? O Kawas ci Yihofa. Fahkaay kiso toniya caˈof han? Ano songilaˈen ita miharateng, wa mahapinang to soˈlinay konini a demak. Oniya hekal ci Akoma ko mikowanay, adihayay ko pades. Soˈlin iraay ko ˈicel ni Yihofa tangsol misaysay to kihcod a pasangaray, kawra misaˈosiay Cingra mitala. (Loma 9:22) Itini ˈayaw no kaira no misaˈosian a toki, padadotocay Cingra mihadidi. Nengnengen ita nohatini, itini maanan siwa a pakayraan padadotocay mihadidi ci Yihofa.

5. Samanay a mapakadit ko fangcalay ngangan ni Yihofa? Pakayni tonini samanay ko harateng iso?

⁵ Mapakaditay ko fangcalay ngangan. Misaaretengay ci Yihofa to fangcalay ngangan no Niyah, mitokelay mikangodo ko kahacecay tamdaw toniya ngangan. (Isaya 42:8) Kawra itini 6,000 mihecaan, padotocay mapakadit ko ngangan Ningra. (ˈOlic 74:10, 18, 23) Itini Itin, ci Akoma (tatodong i ‘mitonganganay’) somowalay cowa kakahi ko Kawas pafeli ci Ataman aci Ifaan to misaalian nangra a dafong, miˈafasay to lipahakay nangra. (Satapangan 3:1-5) Mikitiya misatapang, padotocay ci Akoma pakokot to Kawas, somowal to caay kakahi ko Kawas pafeli to tamdaw to misaalian a dafong. Maˈaraw ni Yis mapakadit ko fangcalay ngangan no kakarayan Wama, adadaay ko falocoˈ, mansa pasifanaˈ to nisawawaan mihaen mitolon, saan: ‘Itiniay kakarayan Wama niyam, nanay mapatalahkal ko fangcalay ngangan Iso.’—Matay 6:9.

6. Hano tano halafinay a toki ci Yihofa misaysay to lacongis no sapikowan a fadangalan hani?

⁶ Cisasaay to sapikowan a fadangalan. Iraay ko fadangalan ni Yihofa mikowan to pinaˈorip i kakarayan ato sera, hanaca o sangaˈayay ko pakayraan Ningra a mikowan. (Paˈarawan 4:11) Kawra, mihalakaay ci Akoma miolat to coyoh ato tamdaw, papiharateng cangranan to awaay ko fadangalan no Kawas mikowan cangranan. Pakayni sapikowan a dafangalan ni Yihofa a lacongis, misaaliay to toki ngaˈ masaysay. Tada citanengay ci Yihofa, pairaan Ningra ko adihayay toki no tamdaw oniyah ko mikowan to niyah, mihaen o mamahapinang nangra, ano eca pidofdof to misangaˈay a Tatapangan, o papasokiyaw cangra. (Yirimiya 10:23) Samanen iraay ko mihadidiay no Kawas, o mamasongilaˈ a masaysay konini a lacongis. Noikor o mamafanaˈ ko polong a tamdaw, o sangaˈayay ko pakayraan ni Yihofa a mikowan, hanaca edengan o Hongti Kitakit Ningra ko papaira to soˈlinay a dipayal.

7. (1) Nolitengan tahanini o cima ko mitowakangay ci Yihofaan hani? (2) Sasamanen ni Yihofa misawkit koniya mitowakangay?

⁷ Mitowakangay ko roma wawa. O misangaˈan ni Yihofa a tamdaw ato coyoh na sahtoay o malefotay. Ikor iraay ko cecay coyoh mitowakangay, malo Satangay (tatodong i “Misaˈadaay,”) mikayhidayho cingra ci Ataman aci Ifaan mitowakang ci Yihofaan. Ikor, roma a coyoh ato tamdaw mirienangay to kapot ni Satan. (Yuta 6) Ikor, mipiliˈan no Kawas ko Israil kitakit malo finawlan Ningra, kawra lalomaˈ nangra ˈalomanay tamdaw midokoay to makaniway kawas, miliyasay Cingranan. (Isaya 63:8, 10) Iraay ko lalangian ni Yihofa maketer ato masomad, kawra itini ˈayaw no palaˈafo Cingra to polong mitowakangay i, kamayan Cingra padadotoc mihadidi. Maraod ko toki, ci Yihofa ato polong madimadiay Cingranan a tamdaw wa mahepol ko karetengay ˈinorong, caayto ko mamihadidi to tatiihay a tamdaw tatiihay a demak noniya hekal!

8-9. (1) Patenakay ci Satan to maanan pakayniay ci Yihofaan a mangah? (2) Wa ngaˈay kita samaan ko hademak?

⁸ Padotocay ci Akoma patenak to mangah. Sanay ci Satan, madimadi ci Yihofaan ci Yopu edengan pakayniay misatekeday a araaw ko pidoko to Kawas, somowalayho cingra o polong midokoay ci Yihofaan a tamdaw mahaenay a maemin. (Yopu 1:8-11; 2:3-5) Tahanini, kamayan ci Akoma pakokot to finawlan no Kawas. (Paˈarawan 12:10) Ano padadotoc kita mihadidi itini sapalifet, pakayni ka olah ci Yihofaan padadotoc madimadi Cingranan, wa misawacay to sahtoay o mangah ko sowal ni Satan. Malecad ci Yopuan, padadotoc kita mihadidi, wa milifok to sapalifon ni Yihofa.—Yakop 5:11.

⁹ Ci Satan sakadademakay to ˈaˈideman no pihakelongan a paoraf ci Yihofaan, tada mariˈangay Cingra sanay, o pades no tamdaw sahtoay Cingra ko pairaay. O roma ˈaˈideman no pihakelongan sanay, ano mapatay ko wawa o misaaliay ko Kawas to ˈalomanay a coyoh itini  kakarayan, mansa miˈorong cangranan paliyas. Tada paorafay konini to Kawas! Mafanaˈay kita caay ko awaay ko olah no Kawas. Ano aratengay ko adada ita anca mapatay ko salawina, cowa ko mamiroroh kita Cingranan. Pakasoˈlinay Cingranan, pakasoˈlin to mamiadah Cingra to adadaay a tamdaw noikor, papatikol paˈorip to mapatayay a tamdaw. Wa misaˈicel kita misawacay, pasowal to tao tada ciolahay ci Yihofa, mihaen wa ngaˈay ci Yihofa pacaˈof to milikafay Cingranan a Akoma Satan.—Taneng 27:11.

10. Mikitini kita i ˈOlic 22:23, 24 mahapinangay, o masamaanay a Kawas ci Yihofa?

¹⁰ Micadaay to roray ko kaolahan Ningra a sikawdan. Ci Yihofa o matomesay to siniˈada a Kawas. Ano maˈaraw pakayni kita i sapalak, adada anca dangoc no niyah a maroray, o adadaay ko falocoˈ Ningra. (ˈOsien ko ˈOlic 22:23, 24.) Matinakoay ni Yihofa ko roray ita, makalimay sapadamaaw kitaanan, o mamihaen to demak. (Nengnengen ko Kasadakan 3:7, 8; Isaya 63:9.) Cato ka halafin, wa ‘sisiten Ningra ko kahacecay teraˈ a losaˈ ita, awato ko patay, awato ko adada, tangic, roray.’—Paˈarawan 21:4.

11. Ci Yihofa samanay ko nafalocoˈan toya mapatayay madimadiay a sikawdan Ningra hani?

¹¹ Malalicinowas to mapatayay a widang. Samanay ko nafalocoˈan ni Yihofa toya mapatayay madimadiay a sikawdan hani? Maolahay Cingra cangranan, makalimay sapiliyawaw maˈaraw cangra! (Yopu 14:15) Wa ngaˈay haratengen iso hakowaay ko kaˈilol ni Yihofa toya widang Ningra ci Aprahaman, ato ‘misiˈayaway’ masasowal Cingranan a Mosian han? (Kasadakan 33:11; Yakop 2:23) Maedeng makalimay ko Kawas mitengil to sapakahemek Cingranan a radiw ni Tafiti ato roma mitiliday to ˈOlic a tamdaw! (ˈOlic 104:33) Soˈlin mapatayayto koniya widang, kawra cowa ka pawan ci Yihofa cangranan. (Isaya 49:15) Pakayni kihcod nangra, ihkalay ko kafanaˈ ni Yihofa, ‘itini pinengneng Ningra, sahtoay o maˈoripay cangra.’ (Luka 20:38) O papatikolen Ningra paˈorip cangra, miliyaw mitengil to  mikifalocoˈay a satolon nangra, micada to pidoko nangra. Ano malahdaw ko kaolahan iso a widang, mafanaˈ to ciolahay ci Yihofa, maedeng o tataˈangay ko sahinom tisowanan.

12. Itini salikoray romiˈad, o maanan a demak mikiriwiˈay a pasomad ci Yihofaan?

¹² Micadaay to saroero ko tamdamdaw. Ikor no mifekad ko mitowakangay demak i Itin i, mafanaˈayto ci Yihofa, ˈayaw no mamidemak Cingra, o mamalingad ko tatiih no pakayraan noniya hekal. Tada ˈintehay ci Yihofa to mararaway a demak no hekal, caka sadafdaf, ato mariˈangay demak. Tocerid ciharatengay Cingra to malonayay a kapot, tinakoen o pakoyoc maponengay awaay ko ˈicel midipot to niyah a tamdaw. (Cikariya 7:9, 10) Maˈaraw ko madimadiay a sikawdan no Niyah micada to sapalak ato pipalit, mikiriwiˈay a masomad ci Yihofa. Aka calemcem, itini kita i pasangaray malacafay ci Yihofaan mihadidi, o mamaolah Cingra kitaanan.

13. Maˈaraway ni Yihofa i lekakawa no tamdaw ko maanan malafoay a waywayan? Wa samaan ko demak Ningra?

¹³ O lekakawa no tamdaw malafoay ko waywayan. Salakat palecadan no Kawas ko tireng Ningra misangaˈ to tamdaw, nao mamitodong to Kawas, kawra maolahay ci Satan mikayhid to tamdaw midemak to malafoay a demak. Itini lintad ni Nowa, ‘maˈaraw ni Yihofa tatiihay ko demak no tamdaw i fafekang no sera,’ ‘pakayni i misangaˈan Ningra a tamdaw i fafekang no sera, makesemay a mararom.’ (Satapangan 6:5, 6, 11) Mikitiya tahanini, o pakayraan no lekakawa no tamdaw masalofay han? Awaay ko kangaˈayan! O lekakawa nohatini matomesay ko tongsinlin ato malafoay a waywayan no tamdaw. (Ifiso 4:18, 19) Maˈaraw ni Satan malafo ko waywayan no tamdaw, maedeng mahemekay. Ano ngaˈay cingra mikayhid to midokoay to Kawas a tamdaw mararaw, maedeng wa mangalef ko hemek ningra. Tahini misaˈosian a toki, wa palaˈafoento ni Yihofa ko cowa kakahi pasasiyor a tamdaw, paihkal to tada ˈintehay Cingra to malafoay a waywayan.

14. O demak no tamdaw pairaay to masamanay pifiyor toniya cikiw ato pinaˈorip hani?

¹⁴ Mapalakayto koniya cikiw. Sowal no Fangcalay Cudad: ‘O tamdaw ko mikowan to tamdaw, pasemsemay to tamdaw.’ Soˈlinay i, o misemsemay cowa ko tamdaw aca, mahawpay ko patorodan no Kawas i tamdaw midimokos a cikiw ato pinaˈorip. (Patnakay 8:9; Satapangan 1:28) Roma mikakingkiway tamdaw sanay mirikec, noikor pina miheca, o demak no tamdaw papalaˈafo to 100 emang b kasasiroma no pinaloma. Mansa calemcem ko ˈalomanay tamdaw toniya cikiw! Kao ngaˈayay mikiˈokay ci Yihofa, papalakoingen Ningra ko polong a cikiw, oya ‘mipalakay to sera a tamdaw palaˈafoen maemin.’—Paˈarawan 11:18; Isaya 35:1.

15-16. Hano makahi kita malacafay ci Yihofaan a mihadidi? Tano tinakoen a mitadtad.

¹⁵ Haratengen hena, pina patek miheca matomesay to masakenaay a pasangaray itini hekal, kawra o kakarayan Wama ita padadotocay mihadidi. (Nengnengen ko sapatongal a lalakaw “ Itini Manan a Pakayraan Padadotocay ci Yihofa Mihadidi Hani?”) Na ngangaˈay ci Yihofa palaˈafo toniya ciraraway a hekal, kawra misetekay to falocoˈ Cingra mihadidi, pairaay to adihayay a haepoc no mita! Haratengen koniya sapatinako. Itini ˈayaw no hofocen ko wawa pasowalay ko ising to wama wina, oniya wawa iraay ko pakidemay a samoˈ, ikor no hofocen wa maroray ko kaˈorip, cowa ko kakoˈedaw ko ˈorip. Soˈlin wa mihadak to taˈangayay a ˈicel, kamayan cangra misaˈosi mihofoc tora wawa. Pakayni kaolah to wawa, makahiyay cangra miemem to pasangaray, pafeli to wawa to sangaˈayay a nokaˈorip.

¹⁶ Malecaday, hofochan ko teloteloc ni Atam aci Ifa, cidangocayto ko tireng ato falocoˈ. Kawra  kamayan a maolah ci Yihofa cangranan, misongilaˈ a midimokos cangranan. (1 Yohani 4:19) Kawra cowa kalecad to sapatinako a wama wina, iraay ko ˈicel ni Yihofa palahdaw to kihcod a roray no tamdaw, hanaca maharekayto Cingra misaˈosi to pidemakan a toki. (Matay 24:36) Mafanaˈ to tada maolahay ko Kawas kitaanan, coko mamakahi kita malacafay Cingranan a mihadidi han? Hai, ano hakowato ko halafin a mihadidi, wa makahi kita.

17. Pakayni mihadidiay, mikitini ci Yisan mamananam ita ko maanan? (Hipray 12:2, 3)

¹⁷ Patirengay ci Yihofa to saˈakawangay a taˈarawan no mihadidiay. Toniya demak, malefotay ko pitodong ni Yis to kakarayan Wama. Pakayni kitaanan, itiniho i fafekang no sera ci Yis miememay to pipakangodo ato tatiihay a sowal, itiniayho i pisemseman hecek mapasemsem. (ˈOsien ko Hipray 12:2, 3.) Ira ko ˈicel ni Yis miemem toniya kihcod, maedeng o pakayniay ngaˈayay taˈarawan ni Yihofa. Malecaday, o ngaˈayay taˈarawan ni Yihofa wa pakalalok kitaanan padadotoc a mihadidi.

18. Pakayni 2 Pitiro 3:9, o pihadidi ni Yihofa pairaay to maanan ngaˈayay minaroˈan?

¹⁸ ˈOsien ko 2 Pitiro 3:9. Mafanaˈay ci Yihofa to sangaˈayay toki palaˈafo toniya ciraraway a hekal. Padadotoc Cingra a mihadidi, mansa masaˈopo ko pinaay soˈot emang a taˈangayay ˈopo tamdaw, malacafay a pakahemek Cingranan. Miakoˈiday koniya tamdaw ira ko mihadidiay ni Yihofa, mansa ira ko toki nangra hofocen, mafanaˈ Cingranan, palahad to olah Cingranan, hanaca patafang to hakelong no ˈorip Cingranan. Noikor ano tahatolas ko pihadidi noniya taˈangayay ˈopo a tamdaw, saikor malidong i, wa mahapinang no tamdamdaw, misaˈosi ci Yihofa a mihadidi tada citanengayto!

19. Misetek kita to falocoˈ samaan ko demak? Mihaen ko demak wa milifok to maanan sapalemed?

¹⁹ Mikitini kita i taˈarawan ni Yihofa minanam to sasamaan lipahak padadotoc mihadidi. Soˈlin adihayay ko pairaan ni Satan a pasangaray ato roray, ci Yihofa kamayan o ‘lipahakay a Kawas.’ (1 Timoti 1:11) Malecaday, wa ngaˈay kita padadotoc a lipahak, mihadidi mitala ci Yihofaan paihkal to fangcalay ngangan Ningra, misawacay to matatodongay ko saˈakawangay sapikowan a fadangalan Ningra, palaˈafo to kihcod a tatiihay tamdaw tatiihay demak, misaysay to polong a pasangaray ita. Mafanaˈ to padadotocay mihadidi ko kakarayan Wama ita, pafeliay kitanan to taˈangayay a sahinom, wa misetek kita to falocoˈ mihadidi. Mihaen ko demak ita, wa milifok to misowalan no Yakop 1:12 a sapalemed, sanay ko sinael: ‘Malemed ko mihadidiay to pades a tamdaw. Nawhani ano micada cingra to pihayda i, o mamapafeli cingra to ˈorip, oya nano mikiˈokan ni Yihofa a sapafeli i maolahay Cingranan a tamdaw.’