1. Patadoay ci Yihofa tisowanan midemak to maanan?

 SAMANAY kiso malo Misawacayay Tamdaw ni Yihofa hani? Salakat, matengilay iso ko “ngaˈayay lihaf,” mikitiniay i wama wina, cafay matayal, cafay micudad a matengil alatek, anca iraay ko tamdaw tayra i lomaˈ iso pasowal tisowanan alatek. (Marko 13:10) Ikor, iraay ko tamdaw mipalakay to adihayay a toki ato ˈicel pasifanaˈ tisowanan to Fangcalay Cudad. Itini pinanaman a tatokian i, matongalay ko olah iso ci Yihofaan, mahapinangho maolahay ci Yihofa tisowanan. Ci Yihofa ko misolotay tisowanan mafanaˈ to soˈlinay kimad, mansa malo nisawawaan ni Kristo kiso, iraay ko tokel tahadaˈoc maˈorip. (Yohani 6:44) Papipadamaan ni Yihofa ko madimadiay a sikawdan Ningra tisowanan mafanaˈ to soˈlinay kimad, malo sikawdan Ningra, maedeng tada miakoˈiday kiso Cingranan.

2. Oniya lalakaw wa milengo to maanan?

² Nohatini, ano mafanaˈayto kita to soˈlinay kimad, wa irato ko tatodong padama to tao romakat i sakatayra i midaˈocay ˈorip a lalan. Mananamayto kita pakalomaˈ a mitosil alatek, kawra mitahidang to tao minanam to Fangcalay Cudad ato misikay to pacekiway, cowato ko madoloay saan miharateng. Mahaenay ko harateng iso han? Ano mahaenay i, o sapaini noniya lalakaw wa padama tisowanan. Wa milengo kita, o maanan ko papakalalok kitaanan mirienang to pala Krisciyangay a tayal. Wa minengnengho kita o maanan a pasangaray misawi kitanan eca sapisikayaw to pacekiway, ato sasamaan miremo toniya pasangaray. Dotoc minengneng kita, hano cowa ko pilasil aca to ngaˈayay lihaf, wa pasifanaˈho to tao minanam to Fangcalay Cudad.

3. Hano milasil kita to ngaˈayay lihaf no Hongti Kitakit hani?

³ Itiniho i fafekang no sera ci Yis pafeliay to nisawawaan to kalimlaan a ˈinorong, oniya ˈinorong tosaay masasiroma. Salakat, palimoˈotay cingra to nisawawaan milasil to ngaˈayay lihaf no Hongti Kitakit, pasowalayho cangranan to milingatay a sakayat. (Matay 10:7; Luka 8:1) Tinakoen, pasowalan ni Yis ko nisawawaan, ano maolah ko tamdaw samaan ko hademak, ano mapiliˈ sasamaan ko hademak. (Luka 9:2-5) Paˈayawayho ci Yis hakowa ko taˈangay no mitosilay a tayal, somowal to aitini paro no kakarayan a milasil to ngaˈayay lihaf ko nisawawaan, ‘matengil no polong kasafinacadan.’ (Matay 24:14; Dmak 1:8) Ano makahi anca eca kakahi ko tamdaw mitengil, wa padotoc cangra a milasil to Hongti Kitakit no Kawas, ato mamalaˈosi noniya Hongti Kitakit a demak.

4. Mikitini Matay 28:18-20, cowa ko pilasil aca to ngaˈayay lihaf no Hongti Kitakit, mamidemakho kita to manan?

⁴ O manan ko saka tosa a ˈinorong hani? Pasowalan ni Yis ko nisawawaan pasifanaˈ to tamdaw midofdof to kihcod a sapalimoˈot ningra. O roma tamdaw sanay, edengan saka 1 hahekalan a Krisciyang ko mamidemak to mitosilay pasifanaˈ to tamdaw a tayal, kawra cowa ko soˈlinay konini. Mitadtaday ci Yis, oniya kalimlaan a tayal wa padadotoc tahini i lintad no mita, “tangasa i paherekan no hekal.” (ˈOsien ko Matay 28:18-20.) Oniya sowal ni Yis pasayraay i 500 nisawawaan a sowalen alatek. (1 Korinto 15:6) Itini Paˈarawan ihkalay ko pitadtad ni Yis, polong nisawawaan ningra iraay ko ˈinorong padama to tamdaw mafanaˈ ci Yihofaan.—Paˈarawan 22:17.

5. Mikitini 1 Korinto 3:6-9, o mitosilay ato pasifanaˈ to tamdaw malecaday to maanan?

⁵ O tarokos ci Pawlo patinakoan ko padamaay to tamdaw malo Krisciyang a tayal to mawmahay to omah, mihaenay o pipaloma aca cangoˈotayho. Patalipaˈelalay cingra to Korintoay a Krisciyang sanay: ‘Kako ko palomaay, ci Apolos ko micefosay to nanom . . . o mikawmahan no Kawas a omah kamo.’ (ˈOsien ko 1 Korinto 3:6-9.) Matayal kita i omah no Kawas i, mitosil to tamdaw o palomaay, pasifanaˈ to tamdaw o micefosay to nanom. (Yohani 4:35) Mafanaˈay kita, o pacengoˈay palahad to sapaloma i, o Kawas, o Cingra ko misolotay to tamdaw tayra i tatihi Ningra.

6. Ano pasifanaˈ kita to tamdaw i padamaen cangra samaan ko hademak?

⁶ Mikilimay kita toya ‘iraay ko matatodongay waywayan ngaˈayay milifok to midaˈocay ˈorip a tamdaw.’ (Dmak 13:48) Sapadamaaw toniya tamdaw malo Krisciyang, o papadamaen ita cangra (1) cipinang, (2) micada, (3) misaka dademak to mananamay a kimad. (Yohani 17:3; Kolosay 2:6, 7; 1 Tisalonika 2:13) O polong a tamdaw no kasakopang wa ngaˈay paihkal to olah i pacekiwan, mirienang cangra to saˈopo i, mahemek militemoh cangranan, patireng to ngaˈayay taˈarawan nangra. (Yohani 13:35) Roma i, wa mihadak ko singsi to adihayay toki ato ˈicel padama to pacekiwan, mifalic to ‘cilamitay’ a harateng ato nanaman. (2 Korinto 10:4, 5) Sapikayataw to pacekiwan micada to paputisem, wa pina folad ko mamapalak a toki alatek. Kawra oniya pisaˈicel iraay ko epoc.

7. O maanan ko pakalalokay kitaanan mirienang to mitosilay pasifanaˈay to tamdaw a tayal?

⁷ Hano mirienang kita to mitosilay pasifanaˈay to tamdaw a tayal hani? Salakat, samanen maolahay kita ci Yihofaan. Misarocod kiso midofdof to limoˈot mitosil ato padama to tao malo Krisciyang, paihkalay konini to tada maolahay ko niyah to Kawas. (1 Yohani 5:3) Haratengen hena, pakayni kaolah ci Yihofaan pakalalokay tisowanan timolo a pakalomaˈ mitosil.  Mihaen to demak madoloay han? Cowa ka madolo alatek. Sakinacecay kiso tayra i lomaˈ no tao mikongkong to fawahan marawraway han? Hatiraayto. Kawra mafanaˈay kiso o saali ni Yis tisowanan a tatayalen konini, mansa midemak kiso. Mataˈlifto ko toki, miharateng kiso madoloayto koniya tayal alatek. Mihaenay i, samanay ko pisikay to pacekiway hani? Maharateng to mamihaen ko demak, marawraway kiso han? Mahaenay alatek. Kawra, ano cangacangen iso ci Yihofa padama tisowanan miremo to marawraway a harateng, timolo mitahidang to tamdaw minanam to Fangcalay Cudad, wa paˈicelen ni Yihofa ko kalim iso, ciharateng to sapadamaaw to tamdaw malo Krisciyang.

8. Mikitini Marko 6:34, makalim kita sapipasifanaˈaw to tamdaw to Fangcalay Cudad o manan ko sakatosa lalangian hani?

⁸ Sakatosa, o olah to tao pakalalokay kitaanan pasifanaˈ cangranan soˈlinay kimad. Kinacecayay, ci Yis ato nisawawaan ikor no mitosil to ˈalomanay tamdaw tada marotayayto, misaaliay to paselaˈan a kitiraan. ˈAlomanay tamdaw mafanaˈ to tatalacowa cangra, mikiˈayaway a tayra mitala. Maˈaraw ni Yis koniya ˈalomanay tamdaw siniˈadaay cangranan, ‘pasifanaˈ cangranan to adihayay a demak.’ (ˈOsien ko Marko 6:34.) Hano makahi ci Yis misawad to paselaˈan no niyah a toki hani? Samanen patadoay cingra toniya tamdaw a miharateng, mihapinang to tada marorayay cangra, awaay ko hatokel, mansa ciharateng padama cangranan. Anini mahaenay ko ˈalomanay tamdaw, ano nengnengen hato lipahakay ko kaˈorip nangra, kawra malecaday o moraraway a lopayˈay siri awaay ko padamaay, awaay ko mikayatay a pakaenay. Malecad o sowal no tarokos ci Pawlo, oniya tamdaw ‘awaay ko hatokel, cowa ka fanaˈ to Kawas.’ (Ifiso 2:12) Romakatay cangra i ‘sakalaˈafo’ a lalan! (Matay 7:13) Maharateng ita koniya tamdaw misaaliay sakafanaˈaw to Kawas, siniˈadaay cangranan, sapadamaaw cangranan. Padama kita to tao, o sangaˈayay pakayraan i pasifanaˈ cangranan minanam to Fangcalay Cudad.

9. Sowal i Filipi 2:13, wa samaan ci Yihofa padama tisowanan?

⁹ Calemcemay kiso caka ngaˈay adihay ko mihadakan a toki misikay to pacekiway alatek, mansa caka ciharateng kiso mitahidang to tamdaw minanam to Fangcalay Cudad. Ano mahaenay, pasowalen ci Yihofa to harateng iso, cangacangen Cingra padama tisowanan palahad to sapipacekiwaw a harateng. (ˈOsien ko Filipi 2:13.) Sowal no tarokos ci Yohani, ano tooren ita ko araaw no Kawas micangacang to maanan, ‘oha tatengilen Ningra kita.’ (1 Yohani 5:14, 15) Mihaenay i, ngaˈay kiso pakasoˈlin, wa padama ci Yihofa tisowanan, ira ko kalim mirienang to pasifanaˈay a tayal.

10-11. Misikay to pacekiway hano cowa ko madoloay saan ko harateng ita hani?

¹⁰ Misaaretengay kita to pasifanaˈay to tamdaw to Fangcalay Cudad a tayal, soˈlin cowa ko madoloay, kamayan kita misarocod a midemak. Dotoc wa milengo kita to pina pasangaray, ato ngaˈay samaan miremo.

¹¹ Caay pihai ko pakayraan no niyah saan miharateng. Tinakoen, o roma mitosilay matoˈasayto anca tatiihay ko tireng. Ano mahaenay ko pakayraan iso, ngaˈayay haratengen koniya lifong i 2019 miheca a tatokian mananamay ko faelohay pakayraan, ngaˈay kita tano tingwa anca tano tingnaw a lalosidan a pacekiw. Itini kiso i lomaˈ wa ngaˈay pasifanaˈ to tamdaw minanam to Fangcalay Cudad, tada madepocay konini! Mihaen to demak iraay ko kangaˈayan, o roma tamdaw sapinanamaw to Fangcalay Cudad, kawra cowa ka depoc ko toki no mitosilay. Tinakoen, itini kanikaran anca dadaya ngaˈ iraay ko toki nangra. Wa ngaˈay kiso misalof to toki, pasifanaˈ toniya tamdaw han? Haratengen ko taˈarawan ni Yis. Ci Nikotimus itiniay i  dadaya mikilim ci Yisan, mansa itiniay toniya tatokian pasifanaˈ ci Yis cingranan.—Yohani 3:1, 2.

12. Miharateng kita to manan tolo a demak, wa matongal ko pakasoˈlin a pasifanaˈ to tao to Fangcalay Cudad?

¹² Cangoˈotay ko pakasoˈlin to ˈicel no niyah. Miharateng kita misaaliay to adihayay sifanaˈ anca inaneng, ngaˈ ngaˈay pasifanaˈ to tao to Fangcalay Cudad. Ano mahaenay ko harateng iso, haratengen ko laenoay tolo a demak. Saka 1, miharateng ci Yihofa wa pakadangar kiso. (2 Korinto 3:5) Saka 2, iraay ko fadangalan no kakarayan ato sera a Yisan patoroday tisowanan. (Matay 28:18) Saka 3, ngaˈayay kiso micangacang to sapadama. Mitadiˈecay ci Yis to sapadama ni Yihofa, mansa mafanaˈ to o maanan ko hasowal. Micangacang kiso to sapadama ni Yihofa, wa ngaˈay pasifanaˈ to tao. (Yohani 8:28; 12:49) Roma i, ngaˈayay tahidangen iso ko kantok no kapot, misakafahay anca kadofahay ko nalifetan a mitosilay, padama tisowanan patireng ato misikay to pacekiway. Mirienang kiso to pisikay nangra to pacekiway, mikitini a minanam mitongal to pakasoˈlin to niyah.

13. Hano maminanam kita to faelohay a pakayraan pasifanaˈ to tao hani?

¹³ Caka madolo ko niyah mananam to faelohay pakayraan ato faelohay lalosidan. Nohatini, mafalicayto ko pakayraan ita misikay to pacekiway. O faelohay a sapasifanaˈ o Layapen ko Midaˈocay ˈOrip a cudad, mansa misaday ko singsi ato pakayraan a misikay cowa ka lecad to saˈayaway. Nohatini, o miˈosian ita a fatac cowa ka adihay, adihayay ko toki a malalengo to pacekiwan, wa mararid misaka dademak to kamotoˈay a ika, itini wangcan a lalakaw ato JW Library^®. Ano cowaho ka fanaˈ kiso misaka dademak toniya faelohay a lalosidan, ngaˈayay mitahidang to tao pasifanaˈ tisowanan. Manaokaniw, maolahay kita tano kananaman a pakayraan midemak, pasangaray a mifalic. Kawra ira ko sadama ni Yihofa ato salikaka, mahapinang iso cowa ka pasangar a mifalic, mahapinangho pasifanaˈ to tao minanam to Fangcalay Cudad ikakaay ko lipahak to saˈayaway. Sowal no cecay misakafahay, o faelohay pakayraan “pakahemekay to singsi ato pacekiwan.”

14. (1) Ano cowa ka olah ko kilacay a tamdaw, haharatengen ita ko maanan? (2) Itini 1 Korinto 3:6, 7 pafeliay kitaanan to maanan sahinom?

¹⁴ Pasangaray makilim ko pacekiwan. Itini kilacay a tamdaw cowa ka olah to lihaf ita, misafelitayho kitaanan, sasamaan kita mitafo to tawlikay a waywayan hani? Haratengen, masasifoday ko lekakawa anini, mafalicay ko pakayraan no ˈalomanay tamdaw. Salakat cowa ka olah to soˈlinay kimad a tamdaw, ikor mahapinangay to misaaliay ko niyah to nofalocoˈan alatek. (Matay 5:3) Roma tamdaw caay kakahi micada to cudad i salakat, kawra ikor makahiay malacafay kitaanan minanam to Fangcalay Cudad. Roma i mafanaˈay kita, o tawki no papanayen ci Yihofa. (Matay 9:38) O tokel Ningra kitaanan o papadotoc paloma ato micefos, o Cingra ko papalahad. (1 Korinto 3:6, 7) Awaayho ko pacekiwan ita alatek, kawra ci Yihofa wa pakayni mihadakan ita ˈicel, cowa ko hakowaay ko minaroˈan, a palifon kitaanan. b Mafanaˈ tonini, tada mihinomay kitaanan!

15. Maˈaraw ni Yihofa ko tamdaw minanam ato misaka dademak to soˈlinay kimad, wa samaan ko harateng?

¹⁵ Micada ko cecay tamdaw to soˈlinay kimad no Fangcalay Cudad, hanaca paladaˈ to tao to mananamay noniyah a kimad, wa pakahemek ci Yihofaan. (Taneng 23:15, 16) Anini, maˈaraw ni Yihofa fanekfekay ko finawlan Ningra mitosil pasifanaˈ to tamdaw, tada mahemekay! Tinakoen, itini 2020 miheca, soˈlin mifekad  ko lifong, kawra kamayan misikay kita to 770 emang 5,765 a pacekiwan, hanaca padama to 24 emang 1,994 tamdaw micada to paputisem, oniya faelohay nisawawaan misikayay to pacekiwan, padama to ˈalomanay tamdaw micada to paputisem. (Luka 6:40) Awaay ko hasasa, misaˈicel kita padama to tamdaw malo Krisciyang, maedeng o lalipahak ci Yihofa.

16. Wa ngaˈay patireng kita to maanan patosokan hani?

¹⁶ Pasifanaˈ to tao wa mihadak to adihayay ˈicel, kawra ira ko sadama ni Yihofa, wa ngaˈay kita mihadak to ˈicel padama to tamdaw palahad to olah to kakarayan Wama. Wa ngaˈay kita patireng to patosokan, misikay to cecay pacekiwan han? Ano mameten ita ko kahacecay toki, mitahidang to tamdaw malacafay kitanan minanam to Fangcalay Cudad, wa ira ko kafahkaan a minaroˈan alatek. Ano makahi kita mihadak to ˈicel, o papalemeden ni Yihofa kita.

17. Ano ngaˈay kita misikay to cecay pacekiwan, wa matinako ko maanan hani?

¹⁷ Ngaˈay milasil to ngaˈayay lihaf ato pasifanaˈ to tamdaw to soˈlinay kimad, o kalikoan konini! Mirienang toniya tayal matinakoay ko soˈlinay a lipahak. O tarokos ci Pawlo itini Tisalonika adihayay ko mapadamaay tamdaw malo Krisciyang, sanay ko sowal ningra: ‘Ano patikol ko tapang ita ci Yis kitaanan i, itini ˈaˈayaw ningra, o tokel ita, lipahak, o kalikoan a pohong o maanan hani? Coko kamo han? Soˈlinayto o ˈdil niyam kamo, o lipahak niyam.’ (1 Tisalonika 2:19, 20; Dmak 17:1-4) Ci Setefana ato faˈinay adihayay ko mapadamaay tamdaw micada to paputisem, sanay cingra: “Maˈaraw ko tao pakayni pipadama iso patafang to tireng ci Yihofaan, awaay ko mikikakaay tonini ko kahemekan.”