1. Anini o maanan ko araaw ni Yihofa hani?

 ANINI, o araaw no Kawas papatenaken ko ngaˈayay lihaf no Hongti Kitakit i paro no kakarayan. (Marko 13:10; 1 Timoti 2:3, 4) Misaaretengay ci Yihofa tonini a tayal Ningra, mansa pafelian Ningra ko kaolahan a wawa mikayat tonini a tayal. Ngaˈay pakasoˈlin kita, itini inanengay a sakayat ni Yis, o mitosilay a tayal wa itini ˈayaw no salikoray romiˈad a malahci, tahira karenecan ni Yihofa ko pidemak.—Matay 24:14.

2. Onini lalakaw mamilengo to manan?

² Onini lalakaw mamilengo, samaanay ci Yis misaka dademak to ‘madimadiay citanengay a koli’ mihadak to pahaleday to pakasoˈlin a kakaenen, ato pakayni toniya koli milikakawa to nisawawaan ningra, milahci to sataˈangayay mitosilay a tayal i likisi. (Matay 24:45) Milengoho ko lalakaw, kita o kahacecay tamdaw sasamaan ko demak a midama ci Yisan ato madimadiay a koli.

3. Milifokay ci Yis to maanan a fadangalan?

³ Mikayatay ci Yis to mitosilay a tayal nohatini, samaan kita a mafanaˈ tonini hani? Itini ˈayaw no patikol ci Yis tayra i kakarayan caka halafin, itini Kalili cecay lotok masasoˈaraway to madimadiay a nisawawaan, hanaca pasowalay cangranan: ‘O fadangalan no kakarayan ato sera mapafeliayto takowanan.’ Sinanoten, sanay ko dotoc a sowal ningra: ‘Mihaenay kalingad kamo, pala nisawawaan ako ko polong kasafinawlan a tamdaw.’ (Matay 28:18, 19) Mahapinangay, o malifokay ni Yis a fadangalan mahawpay ko pikayat to mitosilay a tayal.

4. Hano ngaˈay kita pakasoˈlin, anini kamayan ci Yis mikayat to mitosilay a tayal?

⁴ Sanay ci Yis, o mitosilay pasifanaˈ to tamdaw a tayal mamacowat i polong no kakarayan, o ‘polong no kasafinawlan’ mamatengil ko ngaˈayay lihaf. Sanayho ci Yis, ‘toniya kihcod  a romiˈad, tahira ka hererekan noniya lekakawa,’ mamikapot cingra to nisawawaan. (Matay 28:20) Paihkalay ko sowal ni Yis, o mitosilay a tayal wa itini sakayat ningra padadotoc tahini i lintad ita anini.

5. Ngaˈay kita samaan mihadak to ˈicel patatodong to sapairasol no ˈOlic 110:3?

⁵ Cowa ka calemcem ci Yis i salikoray ˈawaled cangoˈot ko tamdaw mirienang to mitosilay a tayal. Mafanaˈay cingra mamatatodong ko sapairasol no ˈOlic, sanay ko sinael: ‘Itini piloodan no sofitay iso a romiˈad, o finawlan Iso o mamakahi a patafang to niyah.’ (ˈOlic 110:3) Ano mirienangay kiso to mitosilay a tayal, o midamaay kiso ci Yisan ato madimadiay a koli, hanaca mihadak to ˈicel patatodong to sapairasol. Onini a demak talaˈayaway ko pidemak nohatini, kawra cowa ka sarihaday saan ko pidemak.

6. O mamalifa ita cecay a sacara mitosil i, o maanan hani?

⁶ O mamalifa ita cecay a sacara mitosil i, o pisafelit no tao. Mitowakangay to kimad a tamdaw, ˈaˈideman no pihakelongan ato mirikecay a tamdaw papaoraf kitaanan alatek, miorat to pinengneng no tao to tayal ita. O salawina ita, kananaman a tamdaw ato cafay matayal ano maorat nonini mararaway a lihaf, o papaira to saroero kitaanan alatek, ho ecato pidoko kita ci Yihofaan, misawad mitosil. Itini roma kitakit, macadaay ita pisafelit mahawpay ko piroero, paˈangi, milepel, anca mipalit. Mihaen ko tamdaw micada kitanan, cowa ko fafahka kita, samanen paˈayawayto ci Yis: ‘Pakayni kamo i ngangan ako, o kakaˈintehen no polong a kasafinawlan.’ (Matay 24:9) Makaˈinteh no tamdaw kita misawacayay, o mihakelongay kita ci Kristoan, hanaca o mihaydaan ni Yihofa kita. (Matay 5:11, 12) Oniya kihcod misafelitay ci Akoma ko miocoray, kawra cowa ko papakadangar cingra ci Yisan. Ira ko sadama ni Yis, o ngangaˈay kita patengil to ngaˈayay a lihaf i polong a kasafinawlan. Nengnengen ko ilaenoay a wacay.

7. Maˈaraway iso ko maanan a wacay paihkal to matatodongay ko sapairasol no Paˈarawan 14:6, 7 nohatini?

⁷ Milasil kita to ngaˈayay a lihaf no Hongti Kitakit, o mamalifaho ko sacara no sasowalen. Itini Paˈarawan, patalahkalan ni Yis ko tarokos ci Yohani, itini romiˈad ita onini a sacara mamaremoto. (ˈOsien ko Paˈarawan 14:6, 7.) Samaanay a matatodong ko sowal ni Yis hani? Misarocoday kita to ˈicel patenak to lihaf no Hongti Kitakit i kasasiroma ko sasowalen a tamdaw, paira to toki no ˈalomanay tamdaw micada to soˈlinay kimad. Anini, icowacowaay a tamdaw no hekal ngaˈayay pakayni jw.org a wangcan miˈosi to lalakaw no Fangcalay Cudad, samanen onini a wangcan mataˈlifay ko 1,000 a sowal. Roma i, nohatini misaka dademakan ita to Layapen ko Midaˈocay ˈOrip! a cudad padama to tamdaw malo Krisciyang, o Malohemay Malitengay i Congpo mihaiyay mihongyak tonini a cudad to 700 kasasiroma no sowal. Itini mitepangan ita a lalakaw, iraay ko na nengnengen no madoˈengay a ika, ato no mapohaway tano kamayan mikama a cudad. Soˈlinayto maˈaraw ita ko katatodong no sapairasol no Fangcalay Cudad, ‘kalo kitakit cowa ka lecad ko sowal a tamdaw’ minanamay to soˈlinay kimad nohatini, somowalay to ‘makoracay a sowal.’ (Cikariya 8:23; Cifaniya 3:9) Onini a kihcod sahtoay itiniay i inanengay a sakayat ni Yis Kristo a malaˈosi.

8. O mitosilay a tayal ita tahanini iraay ko maanan minaroˈan hani?

⁸ O likakawa ni Yihofa anini mataˈlifay ko 800 emang a tamdaw, itiniay i 240 kasakitakit kasakilac, to mihecahecaan mataˈlifay ko 10 emang a tamdaw micadaay to paputisem! Kawra mikikakaay to kaˈaloman i, o waywayan. Onini a faelohay nisawawaan palahaday to makapahay ‘faelohay capeling.’ (Kolosay 3:8-10) Ilalomaˈ nangra, ˈalomanay tamdaw isalakat malafoay ko kaˈorip, misakakinihay to tamdaw, maolahay to mariˈangay ato pakakitakitay a  harateng, kawra mafalicayto cangra nohatini. ‘Cowato pinanam to malalooday’ cangra, malecaday konini to sapairasol no Isaya 2:4. Misaˈicel kita micaˈedong to ‘faelohay capeling,’ o ngangaˈay misolot to tamdaw mirienang to likakawa no Kawas, ngaˈayho misawacay to mikotoday kita to kantok ci Yis Kristoan. (Yohani 13:35; 1 Pitiro 2:12) Ngaˈay madangar ita konini a kihcod cowa ko fahal sanay, ao iraay ko sapadama ni Yis.

9. Matay 24:45-47 paˈayaway itini salikoray romiˈad mamifekad ko maanan a demak?

⁹ ˈOsien ko Matay 24:45-47. Paˈayaway ci Yis, itini salikoray romiˈad, wa nilnilen ningra ko cecay ‘madimadiay citanengay a koli’ mihadak to sapahaled to pakasoˈlin a kakaenen. Mikitini sowal ni Yis mahapinangay ita, onini a koli itini lintad ita wa malalok a matayal. Soˈlinay mahaen ko demak! Anini mimingay ˈopo iraay ko tokel tayra i kakarayan faˈinayan a salikaka misaka dademakan ni Yis, ‘itini matatodongay a tatokian’ mihadak to ‘kakaenen’ pafeli to finawlan no Kawas, ato maolahay to soˈlinay kimad a tamdaw. Onini a faˈinayan salikaka o mamala tawki ko niyah, mionting to pakasoˈlin no salikaka cowa ka saan miharateng. (2 Korinto 1:24) Masafelitay, mihaiay cangra edengan ci Yis Kristo ko ‘ˈaˈideman ato kakeridan.’—Isaya 55:4.

10. I cokaay o manan a cudad ko padamaay tisowanan romakat to midaˈocay ˈorip a lalan?

¹⁰ Mikitini 1919 miheca, mitepangay to masakenakenaay a cudad ko madimadiay a koli, padama to maolahay to Fangcalay Cudad a tamdaw minanam to soˈlinay kimad, ho misatapang cangra mitanam to sapahaled to pakasoˈlin no falocoˈ a kakaenen. 1921 miheca, o madimadiay a koli mitepangay to Onkak no Kawas a cudad (Padaka), onini a cudad padamaay to ˈalomanay tamdaw mafanaˈ to taˈeneran a kimad no Fangcalay Cudad. Ikor mitooray to lintad a macakat ko madimadiay a koli, mitepangay to  romaroma a cudad. O maanan a cudad ko padamaay kisowanan mafanaˈ ato maolah to kakarayan a Wama hani? “O Kawas o Soˈlinay,” Mikayat to Saka Tahadaˈoc no ˈOrip a Soˈlinay Kimad, Wa Ngaˈay Kiso Tahadaˈoc Maˈorip i Lakoing, Saka Tahadaˈoc no ˈOrip a Sifanaˈ, Hapinangen ko Soˈlinay a Kimad no Fangcalay Cudad, Mikitini Fangcalay Cudad Wa Mananam Ita ko Maanan?, anca o safaelohay Layapen ko Midaˈocay ˈOrip! a cudad hokira? Onini a mitepangan lalakaw sahtoay papadama kitaanan pasifanaˈ to tamdaw to Fangcalay Cudad a ngaˈayay lalosidan. Mitepang tonini a cudad i, tada matatodongay ko kaira namira sanay ko harateng ita.

11. Kita o polong a tamdaw hano kakomaen to sapahaled to pakasoˈlin no falocoˈ a kakaenen?

¹¹ Cowa ko faelohay aca minanam to Fangcalay Cudad a tamdaw ko papatongal to kafanaˈ ci Yihofaan ato Fangcalay Cudad, kita polong a tamdaw mamihaen to demak. Sowal no tarokos ci Pawlo: ‘O matenesay a tamdaw ko ngangaˈay komaen to ˈatekakay kakaenen.’ Somowalayho ci Pawlo, sakadademaken ita ko mananamay a sifanaˈ, wa ngaˈay ‘pafafidaˈ to ngaˈayay ato tatiihay.’ (Hipray 5:14) Itini tonini pasangaray a lintad, o waywayan ato pinangan mikikakaay ko tatiih to salakatay a lintad, mihaenay sapidofdofaw to ˈakawangay palinian ni Yihofa cowa ko madoloay, kawra mikiˈokay ci Yis o ngangaˈay kita mikitini ˈaredetay ‘kakaenen’ padotoc milifok to ˈicel. Onini a ‘kakaenen’ sahtoay mikitiniay i Kimad no Kawas Fangcalay Cudad a sadaken, o madimadiay a koli itini sakayat ni Yis misangaˈay ato palilamay.

12. Samaan kita mitodong ci Yisan, mikangodo to ngangan no Kawas?

¹² Malecad kita ci Yisan mikangodo to ngangan no Kawas. (Yohani 17:6, 26) Tinakoen itini 1931 miheca, misalalangiay kita to Fangcalay Cudad misaka dademak to “Misawacayay Tamdaw ni Yihofa” a ngangan. Paihkalay konini to misaaretengay kita to ngangan no Kawas, hanaca ciharateng pakafanaˈ to tao ilaenoay  no ngangan no Kawas a finawlan kita. (Isaya 43:10-12) Mikitini toniya mihecaan 10 folad misatapang, papotal no Mikecolay padotocay ira ko ngangan no Kawas. Roma i, itini telang a cudad iraay ko ngangan no Kawas a kitiraan i, mieminan no Faelohay Hekal Mihongyakan Fangcalay Cudad a mihongyak. Cowa ka lecad to demak no kalo a kiyokay! Mipadengan nangra ko ngangan no Kawas i adihayay mihongyakan a Fangcalay Cudad.

13. Hano pakasoˈlin kiso misaka dademakan ni Yis ko ‘madimadiay citanengay a koli’ anini? (Yohani 6:68)

¹³ Sapicowataw to matatodongay a pidoko, pakaynian ni Yis i ‘madimadiay citanengay a koli’ itini fafekang no sera patireng ko tadamaanay a likakawa. Samaanay ko pinengneng iso tonini a likakawa hani? Alatek malecaday ko harateng iso to tarokos ci Pitiroan, na pasowalan ningra ci Yis: ‘O cimaho ko tadiˈecen niyam hani? Iraay ko saka tahadaˈoc no ˈorip a kimad iso.’ (Yohani 6:68) Haratengen hena, ano eca kafanaˈ kita to likakawa ni Yihofa, wa samaan ko kaˈorip ita nohatini hani? Pakayni tonini a likakawa, mikiˈokay ci Kristo mamalifok ita ko kihcod a sakaˈorip, ngaˈay padotoc madimadi to Kawas, pahatatanamayho kitaanan, ngaˈay ciepoc ko mitosilay a tayal. Roma i, padamaayho cingra kitaanan micaˈedong to ‘faelohay capeling,’ padama kitaanan milifok to pihayda ni Yihofa.—Ifiso 4:24.

14. Itini kalifongan a tatokian, mikitini likakawa no Kawas malifokay iso ko maanan a sapadama?

¹⁴ Ci Yis itini ka pasangaran no kaˈorip ita a tatokian mihadakay to ciepocay a sakayat. 2019 miheca kalifongan a tatokian, mikitira mihadakan ningra a sakayat malifokay ita ko adihayay a epoc. ˈAlomanay tamdaw no hekal cowaho ka fanaˈ sasamaan i, maharekayto ci Yis mihadak to ihkalay a sakayat  midipot kitaanan. Pakalalokay ko likakawa no Kawas kitaanan itini kaˈalomanan a kitiraan ira ko tangoyosan, malaliyas to roma tamdaw. Patalipaˈelalayho ko likakawa to malohemay malitengay micerid mirinnak to salikaka, misinanot to saali nangra, padama cangranan mitafo to tanektek no tireng, patanektek to kalalaˈed ci Yihofaan. (Isaya 32:1, 2) Roma i, mikitini safanaˈ no Malohemay Malitengay i Congpo malifokay ita ko adihayay sakayat ato sapakalalok.

15. Pakayni pisikay to saˈopo ato mitosilay a tayal i kalifongan a tatokian, macadaay ita ko maanan sakayat? Iraay ko maanan ngaˈayay minaroˈan?

¹⁵ Itini kalifongan a tatokian, pakayni sasamaan misikay to saˈopo ato mirienang to mitosilay tayal, macadaay ita ko ihkalay a sakayat. Kalikiay kita mifalic itini tingnaw mirienang to saˈopo ato taykay, misatapangayho kita tano tikami ato tingwa malo kalimlaan sapitosil a pakayraan. O mihadakan ita a ˈicel, milifokay to sapalemed ni Yihofa. Adihayay a fenpo mihadakay to safanaˈ, matongalay ko kacakat no mitosilay tamdaw. Soˈlinayto, ˈalomanay salikaka itini kalifongan a tatokian iraay ko pakalalokay to tamdaw a nalifetan.—Nengnengen ko sapatongal lalakaw “ Misaˈicel Kita Mitosil, Milifokay to Sapalemed ni Yihofa.”

16. Wa ngaˈay pakasoˈlin kita to maanan hani?

¹⁶ Harateng no roma tamdaw, itini kalifongan a tatokian pakidemay ko pirikec no likakawa no Kawas sanay, kawra misaliyaliyaway misawacay ko mifekaday a demak, o macadaay ita a sakayat sahtoay o ciepocay. (Matay 11:19) Songilaˈen ita miharateng samaanay ci Yis tano olah a mikayat to aniniay a Krisciyang, o papakasoˈlin, ano o mananto ko mifekaday a demak i kaˈayaw, ci Yihofa ato kaolahan a wawa Ningra papadotoc a mikapot kitaanan.—ˈOsien ko Hipray 13:5, 6.

17. Ngaˈay itini sakayat ni Yis a matayal, samanay ko harateng iso?

¹⁷ Ngaˈay kita itini laeno no sakayat ni Yis a matayal, tada kalikoanto! Masalalomaˈ nonini a likakawa kita mihawangay to sacara no serangawan, kasakitakit ato sasiroma no sowal. Itini noˈadingoan malifokay ita ko sapahaled, micadaayho kita to ngaˈayay sapahatatanam midemak to mitosilay tayal. Padamaayho ci Yis kitaanan micaˈedong to ‘faelohay capeling,’ mafanaˈ masasiolah. Soˈlinay ira ko lalangian ita pakayni i kantok ita ci Yisan a maliko!