1. Mararaw ci Atam aci Ifa ikor i, midemakay ci Yihofa to maanan? (Satapangan 3:15)

 MARARAW ci Atam aci Ifa ikor i, somowalay to ci Yihofa to saka cecay kalimlaan a sapairasol, ho ira ko hatokel no teloteloc nangra. Onini a sapairasol matiliday itini Satapangan 3:15.—ˈOsien.

2. Oniya sapairasol iraay ko maanan mikiriwiˈay a kalimlaan?

² Onini a sapairasol maˈoningay i Fangcalay Cudad saka cecay a cudad, o romaroma maloloday a cudad no Fangcalay Cudad sahtoay milingatay tonini a sapairasol. Mahecad o tatelecan no cudad palaliting to cecacecay fiedac malo cecayayto a cudad, o sapairasol no Satapangan 3:15 mihaenay a misolsol to lalakaw, patenak to malacecayay macacaˈof a lihaf, tatodong i: Wa corcoren no Kawas ko cecay mamilidong a Tapang palaˈafo ci Akomaan ato mikotoday ci Akomaan a mariˈangay a ciˈicelay. b O papairato to sakarihaday no maolahay ci Yihofaan a tamdaw tada makapahay a hatokel!

3. Onini a lalakaw mamilengo to manan?

³ Pakayni sapairasol no Satapangan 3:15, onini a lalakaw mamilengo to ilaenoay a salicay: Masowalay no sapairasol a saaroˈan o cimacima? Onini a sapairasol samaanay a matatodong? Ngaˈayay kita mikitini tonini sapairasol milifok to manan haepoc?

4. Cima ko mitoroˈan to “ˈoner” hani? Samaan kita mafanaˈ?

⁴ Satapangan 3:14, 15 a saaroˈan iraay ko ˈoner ato teloteloc no ˈoner, fafahiyan ato teloteloc no fafahiyan. Padamaay ko Fangcalay Cudad kitaanan mihapinang to cima ko  mitaypiyawan nangra. c Salakat lengoen ko “ˈoner.” Ano o “ˈoner” kora pairasolan o soˈlinay a ˈoner, cowa ko cacipinang cimira to misowalan ni Yihofa itini i Itin a sapisawkit. Mansa, o sakasasowal ni Yihofa a tatihi maedeng oya iraay ko citanengay a pinaˈorip. O cima cingra hani? Ihkalay mihadak ko Paˈarawan 12:9 ‘o salakatay a ˈoner’ oya ci Akoma Satan. Mihaen, o cima ko teloteloc no ˈoner hani?

5. Cima ko teloteloc no ˈoner hani?

⁵ O roma tamdaw itini i harateng ato waywayan no roma tamdaw tada Malecaday, nolatekay i o mahaenay tamdaw patinakoan no Fangcalay Cudad to teloteloc noya tamdaw. Mansa, o teloteloc no ˈoner oya mikihatiyaay ci Satanan mitowakang to Kawas, misaˈada to finawlan no Kawas noˈadingoan a tireng ato tamdaw. O teloteloc no ˈoner mahawpay ko itiniay i lintad ni Nowa a miliyasay to saaroˈan i kakarayan a coyoh, atoya malecaday ci Akomaan a mariˈangay ko waywayan a tamdaw.—Satapangan 6:1, 2; Yohani 8:44; 1 Yohani 5:19; Yuta 6.

6. Ora “fafahiyan” hano cowa ko ci Ifa hani?

⁶ Dotoc i, lengoen ita o cima kora “fafahiyan.” Cowa ko ci Ifa cingra. Misamaanay hani? Haratengen hena, o misowalan no sapairasol a teloteloc no fafahiyan wa ‘mipesiˈ’ to fongoh no ˈoner. I fafekangay lalakaw masowalayto, o mitoroˈan to ˈoner i ci Satan. O ˈadingo a tireng cingra, o cowa ka lefot a misofocan ni Ifa a tamdaw awaay ko papalaˈafo cingranan. Mihaenay, cima kora fafahiyan hani?

7. Paˈarawan 12:1, 2, 5, 10 papadama kitanan mihapinang, misowalan no Satapangan 3:15 a fafahiyan o cima hani?

⁷ O salikoray a maloloday no Fangcalay Cudad papadama kitanan pahapinang to misowalan no Satapangan 3:15 a fafahiyan o cima. (ˈOsien ko Paˈarawan 12:1, 2, 5, 10.) Onini a  fafahiyan tada mikiriwiˈay, ripaˈen ningra ko folad, citamohong to 12 a foˈis, mahofoc to cecay a mikiriwiˈay a wawa, oya Hongti Kitakit no Kawas. Onini a Hongti Kitakit itiniay i kakarayan, mansa madeng itiniay i kakarayan a fafahiyan. Mitaypiyawan ningra i oya i kakarayan a likakawa ni Yihofa, o madimadiay a coyoh ko palaˈosiay.—Kalatiya 4:26.

8. O sakakaay a teloc no fafahiyan o cima? Hacowa a tatokian malo sakakaay a teloc no fafahiyan cingra hani? (Satapangan 22:15-18)

⁸ Padamaay ko Fangcalay Cudad kitaanan pahapinang to sakakaay a teloteloc no fafahiyan o cima. Mikitini sapairasol no Fangcalay Cudad, onini a teloteloc mikitini i lalomaˈan ni Apraham a masadak. (ˈOsien ko Satapangan 22:15-18.) Mikitiniay ci Yis tonini a lalomaˈan masadak, o aˈirangan ni Apraham a teloc. (Luka 3:23, 34) Kawra o teloteloc no fafahiyan cowa ko kalo a tamdaw, samanen o mamasongilaˈ cingra palaˈafo ci Satanan. Hanaca, madeng 30 ko mihecaan ni Yis i, tano fangcalay saocor ko Kawas minilnil cingranan, pakaynian no Kawas i fangcalay saocor misofocan a Wawa cingra. Itiya, ci Yis malo sakakaayto a teloteloc no fafahiyan. (Kalatiya 3:16) Miliyaw ci Yis patikol maˈorip ikor, ‘pafelianho no Kawas cingra to ˈdil ato sakatadamaanay a tamohong,’ mapafeliay to cingra to ‘i kakarayan i seraay a fadangalan,’ sakaira no ˈicel ningra ‘palaˈafo to kihcod midemakan ni Akoma.’—Hipray 2:7; Matay 28:18; 1 Yohani 3:8.

9-10. (1) O roma teloteloc no fafahiyan a tamdaw o cima? Ihacowaay a tatokian malo teloteloc no fafahiyan ko roma a tamdaw? (2) Dotoc mamilengo to maanan hani?

⁹ O teloteloc no fafahiyan iraayho ko romaroma a tamdaw, mikitini i nisowalan no tarokos ci Pawlo ngaˈay mahapinang ita konini a tamdaw o cima. O nisowalan ni Pawlo oya micadaay to fangcalay saocor manilnilay a Krisciyang, ilalomaˈ nangra iraay ko Yutaya tamdaw, iraay ko ˈAlafang a tamdaw. Sowal ningra: ‘Ano ni Kristo to kamo i, o telocto ni Apraham, o miketonan to mamicada to hafay a tamdaw.’ (Kalatiya 3:28, 29) Tano fangcalay saocor a minilnil ci Yihofa to cecay Krisciyang, onini a Krisciyang malo telotelocayto no fafahiyan a tamdaw. Mihaenay, o teloteloc no fafahiyan mahawpay ci Yis Kristo ato kalacafayay cingraanan mala hongti a 144,000 a tamdaw. (Paˈarawan 14:1) Cangra itini i noharatengan ato waywayan a pakayraan tada malecaday to i kakarayan a Wama nangra ci Yihofaan.

¹⁰ Malengoay to ita ko Satapangan 3:15 masowalay a saaroˈan mitaypiyaway to cima. Dotoc nengnengen ita, sasamaan ci Yihofa palidlid palaˈosi tonini a sapairasol, ato mikitini mamilifok kita to manan haepoc.

11. Madokaˈay ko ‘satenok no waˈay’ no teloteloc no fafahiyan o maanan ko tatodong hani?

¹¹ Mikitini sapairasol no Satapangan 3:15, wa dokaˈen no ˈoner ko ‘satenok no waˈay’ no teloteloc no fafahiyan. Pakalalokay ci Satan to Yutaya tamdaw ato Loma a tamdaw mipatay to Wawa no Kawas, onini a sapairasol mamatatodongto. (Luka 23:13, 20-24) Malecad madokaˈ ko satenok no waˈay no cecay tamdaw i, caayto kangaˈay romakat to cecay a liyad, o patay ni Yis malecaday palahdaway to cecay a liyad awa ko ˈicel a dademak, hanaca itini i patademan madeng toloay a romiˈad.—Matay 16:21.

12. O fongoh no ˈoner sasamaan a mapesiˈ? Oniya demak wa ihacowa a tatokian mifekad?

¹² Mamatatodong ko sapairasol no Satapangan 3:15, cowa ko tatahadaˈoc ci Yis materek i patademan. Misamaanay hani? Mikitini tonini sapairasol, o teloteloc no fafahiyan mamipesiˈ to fongoh no ˈoner, tatodong nonini o dokaˈ nonini a teloteloc wa kaliki a maadah. Soˈlinayto a mahaen, mapatay ci Yis saka  tolo a romiˈad, mapatikolayto cingra maˈorip, malo caay to kapatay ˈadingo a tireng. Maraod ko misaˈosian no Kawas a tatokian, wa songilaˈen ni Yis palaˈafo ci Satan. (Hipray 2:14) Ora 144,000 tamdaw wa mikalacafay ci Yisan palaˈafo to teloteloc no ˈoner, oya kihcod a ˈada no Kawas, ho caayto kangaˈay cangra mipades to tamdaw.—Paˈarawan 17:14; 20:4, 10. d

13. Mikitini i matatodongayto a sapairasol milifokay kita to maanan a haepoc hani?

¹³ Ano micadaay to kiso to paputisem a Krisciyang, mikitiniay to kiso to katatodong nonini a sapairasol milifok to haepoc. Tayni ci Yis i fafekang no sera i, malefotay patalahkal to capeling no kakarayan a Wama. (Yohani 14:9) Pakayni pinanam to nano demak ni Yis, mafanaˈay to kita ci Yihofaan a Kawas halo palahad to olah Cingraanan. O sapasifanaˈ ni Yis ato anini sakayat ningra i kasakopang no Krisciyang adihayay ko malifokay ita a epoc, mafanaˈho kita to sasamaan mitoor to mihaydaan ni Yihofa a pakayraan dademak ato waywayan. O roma i, o macadaay a dokaˈ no teloteloc no fafahiyan, oya kapatay ni Yis Kristo, palemeday kitanan to polong a tamdaw. Misamaanay hani? Patikol maˈorip ci Yis ikor, cadaan ni Yihofa ko malefotay patafangan ni Yis a sapatoˈaya, onini sapatoˈaya ‘mikoracay to kihcod a raraw no mita.’—1 Yohani 1:7.

14. Samaan kita mafanaˈ to nisowalan ni Yihofa itini Satapangan 3:15 onini a sapairasol mamitaˈlif to cecay liyad tatokian ngaˈ matatodong a malaˈosi?

¹⁴ O nisowalan ni Yihofa itini Satapangan 3:15 mifanaˈay, onini a sapairasol mamitaˈlif to cecay liyad tatokian ngaˈ matatodong a malaˈosi. O mihofocan no fafahiyan a teloteloc, misaˈopoay ci Akoma to ilaenoay no kamay, onini a tosa a kapot masasiˈadaay, o kalingad nonini a demak misaaliay to toki. Wa mikitini kita tonini sapairasol micada to sapatalipaˈelal, o micadaay to mikowanan ni Satan a hekal wa misaˈada to midokoay ci Yihofaan a tamdaw. Na pafelian ni Yis ko nisawawaan ningra to malecaday a sapatalipaˈelal. (Marko 13:13; Yohani 17:14) Ihkalay mahapinang ita onini a sapairasol matatodongay to a malaˈosi, mangalef mataˈlifto ko 100 a miheca a tatokian, o katatodong no sapairasol ihkalay a mahapinang. Hano haenen ko sowal hani?

15. (1) Hano mangalefay ko keter no hekal a tamdaw to finawlan no Kawas hani? (2) Hano cowa ko mamatalaw kita ci Satanan hani?

¹⁵ Malo Misiya Hongti ci Yis i 1914 miheca ikor caka halafin, malaplapayto ci Satan nai kakarayan. Itiniayto cingra i ngata no cikiw nohatini, mitala to papatayen. (Paˈarawan 12:9, 12) Kawra kamayanho cingra misafilofilo caka kahi mapatay, tada mangolaway cingra, pasayra i finawlan no Kawas mihadak to keter ningra. (Paˈarawan 12:13, 17) Mihaenay tonini, o mikowanan ni Satan a hekal mangalefay ko ˈinteh to finawlan no Kawas. Kawra, cowa ko mamatalaw kita ci Satanan ato sikawdan ningra, ao mamalecad to tarokos ci Pawloan tanektek ko pakasoˈlin a somowal: ‘Ano midamaan no Kawas kita, o cima ko ngangaˈay misafelit kitanan hani?’ (Loma 8:31) Wa ngaˈay matomes ko pakasoˈlin ita ci Yihofaan, samanen maˈarawayto ita ko sapairasol no Satapangan 3:15 adihayay ko matatodongay.

16-18. Cipinang to sapairasol no Satapangan 3:15 ikor, ci Ketis, Oesula aci Cisika milifokay to maanan a epoc hani?

¹⁶ Itini Satapangan 3:15 mihadakan ni Yihofa a sakiˈok wa ngaˈay padama kitaanan misiˈayaw to masakenaay sapalifet. Itiniay i Kowantaw malo mikiriwiˈay manilnil a mitosilay faˈinayan salikaka ci Ketis sanay: “Latekay, o pasangar ato matoleday harateng pasangaran  nanay kako padotoc madimadi ci Yihofaan. Kawra midotim to sapairasol no Satapangan 3:15 padamaay takowanan padadotoc mitadiˈec to kakarayan Wama.” Fanekfekay ko harateng ni Ketis halamham to pipalahdawan ni Yihofa to kihcod pipalifetan a romiˈad.

¹⁷ Cecay fafahiyan salikaka ci Oesula itiniay i Pafaliya no Towic. Sowal ningra cipinang ko niyah to sapairasol no Satapangan 3:15 ikor, pakasoˈlinayto o mikayatan no Kawas ko tamdaw mitilid to Fangcalay Cudad. Mahapinangay ningra polong a sapairasol no Fangcalay Cudad milingatay tonini a sapairasol, matemerayto ko falocoˈ. Sanayho ko sowal ningra: “Tangsol ci Yihofa a midemak, pairaay to hatokel no tamdaw. Mananam konini tada mitemeray to falocoˈ ako.”

¹⁸ Itiniay i Mikeronisiya fafahiyan salikaka ci Cisika sanay: “O nafalocoˈan ako tiya mahela no niyah ko soˈlinay kimad isalakat i, caayho ka pawan ako nohatini. Matatodongay nohatini ko sapairasol no Satapangan 3:15, padamaay konini takowanan miharateng o malifaay ita nohatini a pades cowa ko araaw ni Yihofa. Onini a sapairasol matongalay ko pakasoˈlin ako, midoko ci Yihofaan padamaay takowanan ira ko sangaˈayay nokaˈorip nohatini, hanaca noikor wa iraho ko mikikakaay ko ngaˈay a kaˈorip mitalaay takowanan.”

19. Hano pakasoˈlin kita o saikoray nonini a sapairasol o mamatatodong maemin hani?

¹⁹ Matatodongay nohatini ko Satapangan 3:15. Ihkalay to mahapinang ita o cima ko teloteloc no fafahiyan ato teloteloc no ˈoner. O dokaˈ no satenok no waˈay no teloteloc no fafahiyan masongilaˈayto maadah. Malo kalimlaan no teloteloc, ci Yis nohatini malo kasapaanto ko ˈdil, tahadaˈoc cowa ko mamapatay a Hongti. Roma i, o romaroma a teloteloc no fafahiyan mangataayto a maherek mipiliˈ. Ano matatodongayto ko adihayay a sapairasol, oha ngangaˈayto kita pakasoˈlin, saikor o mamasongilaˈ a matatodong konini a sapairasol. O fongoh no ˈoner o mamapesiˈ, tatodong i o mamasongilaˈ malaˈafo ci Satan. Itiya i, o madimadiay midoko to Kawas a tamdaw wa hakowa ko kaacang a mahemek! Itini ˈayaw nonini, aka a pisawad. O soˈlinay ngaˈayay tadiˈecen ko Kawas ita, pakaynien i teloteloc no fafahiyan, wa pafeli Cingra to awaay ko tolas kadofahay a sapalemed i ‘kalo kitakit i fafekang no sera!’—Satapangan 22:18.