1935 miheca itiniay kako i Kohetingay a Niyaroˈ no Ikok i Taleseton hofocen. Panganganen konini a niyaroˈ to kohetingay, samanen adihayay ko kosi itini pasadakay to kohetingay a ˈacefel. Maedeng 4 ko mihecaan ako, misatapangay ko wama wina malacafay to Misawacayay Tamdaw ni Yihofa minanam to Fangcalay Cudad. Tahinito 10 ira ko pina ko mihecaan, pakasoˈlinay to kako o soˈliˈlinay a kimad ko minanaman no niyah. Orato, itini 16 ko mihecaan ako micada to paputisem, itiya i o 1952 miheca.

Toniya tatokian, misatapangay kako itini i misangaˈay to tano kamayan dademak a lalosidan ato kikay no otofay a kosi. Micadaay kako to sapahatatanam malo mitatiliday no kosi, tada maolahay kako tonini a tayal.

Ikorto, mamidemak kako to cecay kalimlaan a sasaˈosien. Cecay milisoˈay to kasakopang a kantok mitahidangay takowanan itini kasakopang no Weylonhoe misikay to Kasakopang a Picekiw. Kawra pasangaran nanay kako, samanen itiya tosaay ko kasakopang mirienangan ako. O katayalan ako itiniay i Polomosekelofo, itira maedeng 32 kongli ko raay no lomaˈ no wama wina, mihaenay itini tenok no lipay tayraay kako mingataay to katayalan ako a kasakopang mirienang to saˈopo, itini pilipayan minokayay kako i lomaˈ no wama wina, itiniay i Weylonhoe a kasakopang mirienang to saˈopo.

Ano cadaen ko tahidang nonini a salikaka o mamisawad kako to kaolahan no niyah a tayal, kawra makalimay kako midama to likakawa ni Yihofa, mihaenay misaˈosiay kako papikayaten ci Yihofa to rarakaten ako a lalan. Onini a saˈosi padamaay takowanan awa ko kakeseman i hakelong no kaˈorip.

Itini i kasakopang no Polomosekelofo mirienang to saˈopo i, mafanaˈay kako toya makapahay a Annian. O misamacayay cingra matayal to Kawas a fafahiyan salikaka, 1957 miheca mararamoday kami. Ikorto, itiniay kami cowa ka lecad a saaroˈan a matayal, mahawpay ko miceriday misakafah, mikiriwiˈay misakafahay, milisoˈay a tayal ato i Pitil a matayal. Ira ci Anni kalacafay, tada lipahakay ko kaˈorip ako.

1966 miheca, mahemekay kami mirienang to saka 42 liyad Kiliyat a Picudadan. Micudiyap kami  ikor i, manilnilay tayra i Malawi. O itiraay a tamdaw ngaˈayay, hanaca halilafangay, mihaenay ora kitiraan panganganan no tamdaw to padihkoay to falocoˈ a Afrika. Kawra caka halafin kami tahira, mapacieciayto a miliyas.

1967 miheca 2 folad 1 romiˈad tahira kami i Malawi. Itini ka ˈifowa minanam to sowal no itiraay cecay folad ikor, misatapangay kami to kasakilacay a milisoˈay tayal. Parakatay kami to ciˈicelay paliding, harateng no roma tamdaw o hatiniay a paliding ano talacowato ngaˈayay malingad, ano mitaˈlif to ˈalo cowa ka pasangar. Kawra caay ka harateng i, ano tangongol to miming ko nanom cowato pakataˈlif. Nolatekay, itini sanay kami i matelangay taloˈan mikilomaˈ, o hatiniay lomaˈ tano ditaˈan patireng, tano eliˈan ko fadahong misangaˈ. Tahini i kaˈoradan, mitahepoan niyam to kopang ko fadahong. Soˈlin manilnil tayra i roma kitakit mitosil malifaayto ko adihayay pasangar, kawra kamayan a lipahak kami!

Tahira i kasepatan folad, mahapinangay niyam cowato kangaˈay ko pakayraan. Itini i laciyo matengilay niyam mifanaˈay ko hongti no Malawi ci Hisetinse Panta, sowal ningra o Misawacayay Tamdaw ni Yihofa cowa pasata, micapidayho to mirikecay sanay. Manaokaniw, onini sahtoay cowa ko soˈlinay a sapakokot. Mafanaˈay kami maemin, samanen itini i mirikecay mitafoay kami to misatenokay hato mihaenay cingra paoraf tamiyanan, mangalefay cowa picakay kami to kifincing no mirikecay.

Tahinito kasiwaan folad, maˈosiay niyam itini i sinpong, pakokotay ko hongti to salikaka mikakafoday to tatiihay demak icowacowa. Itini i saˈopo no mirikecay milasilay cingra, wa kaliki ko sifo misaˈosi to cecay demak, mamikeceng to polong a tayal no Misawacayay Tamdaw ni Yihofa. Itini 1967 miheca 10 folad 20 romiˈad, misatapangayto konini a sakeceng. Kalikiay, o dimeng ato tapang no mikowanay  miˈedefayto to fenpo, hanaca milaplap a pasadak to polong mikiriwiˈay manilnil a mitosilay.

Mapalitay kami to tolo romiˈad ikor, mapakalingadayto mapatayra i makowanay no Ikok a Mawliciwse. Kawra, mikowanay no Mawliciwse cowa kakahi tano mitosilay a saaroˈan paitira tamiyanan, mansa manilnilay kami tayra i Lotesiya (o Cinpapowi hananay anini). Tahira kami i malitemohay ko cecay mariˈangay a tapang, cowa kakahi cingra pacomod tamiyanan, malikafay pasowal tamiyanan: “Malaplapay kamo i Malawi, o Mawliciwse cowa kakahi miterek tamowanan itira, nohatini sa sangaˈay sa kamo a tayni tamiyanan.” Matengil ni Anni tangic sanayto, harateng niyam talacowato ko niyah cowa ka hamhamen. Itiya sapipedocaw sato kako milaliw, minokay sato tayra i Ikok. Ikor, o tapang no mikowanay mihayiyay tamiyanan milafin i fenpo, o saali i saka tosa romiˈad wa tayra kami i tapang no mikowanay pangangan. Tada marorayayto kami, kawra misaˈosiay kami patorod han ko demak i kamay ni Yihofa. Saka tosa romiˈad herek no lahok, caay ka harateng i, mihayiyan kami tano miliwkoay a saaroˈan materek i Cinpapowi. Cowa ko mamapawan kako to nafalocoˈan toya romiˈad! Pakasoˈlinay kako pasifanaˈay ci Yihofa to rarakaten niyam a lalan.

Itini fenpo no Cinpapowi, manilnilay kako itini i Kapot no Mitosilay, midama to mitosilay a tayal no Malawi ato Mosanpike, mahawpay ko mihongyak to safanaˈ no kasakilac kantok i Malawi. Itiya, pakidemay ko macadaay no salikaka a sapalak i Malawi. Cecay a romiˈad tahiraay i lafii matayal kako, maˈosi ko pakidemay a pipasemsem to salikaka i, caay to pakaemet a tomangic. a O paihkalan nangra a madimadi, pakasoˈlinay falocoˈ ato mihadidiay, tada mitemeray to falocoˈ ako.—2 Korinto 6:4, 5.

Misarocoday kami to ˈicel, mihadak to pahaleday to pakasoˈlinay falocoˈ a kakaenen pafeli toya materekayho i Malawi a salikaka, ato milaliway tayra Mosanpike a salikaka. O Ciciewa a sowal o sakakaay a sasowalen no Malawi, onini a mihongyakay tonini a sasowalen a kasakapot malinahay tayra i Cinpapowi, itiniay nociyo no cecay salikaka padadotoc to mihongyakay a tayal. Onini a salikaka tada hinapaladaˈay, patadoayho cangranan patireng to pilafinan ato katayalan, mihaen ngaˈayto cangra itira mihongyak to cudad no Fangcalay Cudad, ho ngaˈay padadotoc koniya masakalimlaan a tayal.

To mihecahecaan, milimasmasay kami, mitahidang to itiniay i Malawiay a kasakilac kantok tayni i Cinpapowi mirienang to Ciciewa ko sowal a kasapala taykay, mihaen wa ngaˈay cangra miala to sapikimad i taykay a lalakaw. Ano minokayto cangra i, mamisarocod paladaˈ to salikaka to lalakaw no taykay. Sapakalalokaw tonini a timoloay a kasakilac kantok, ira ko cecay miheca tayni cangra i Cinpapowi i, pakayra cangranan milimasmasay to cecay Sapahatatanam to Ciˈinorongay a Kantok a saˈopo.

1975 miheca 2 folad, tayraay kako minengneng to nai Malawiay milaliway to pades tayra i Mosanpike a salikaka. Itiraay a salikaka misaˈicelay malacecay to likakawa no Kawas, mahawpay mitoor to safaelohay a sakayat o kasacefang no malohemay malitengay no kasakopang ko mikayatay. O faelohayho manilnil a malohemay malitengay milimasmasay to adihayay a demak no pidoko, mahawpay ko pakapapotalay a kimad, milengo to pakaromiˈaday sinael ato Mikecolay, halo misikay to taykay. Milikakawaan nangra ko pilaliwan no tahapadesay malecad o pitaykayan, iraay ko masasiromaay a kapot ciˈinorong miasik, palilam to kakaenen ato miˈading to rihaked. Onini madimadiay salikaka itini pipalemed ni Yihofa malahciay ko adihayay a demak, taˈangayay ko macadaay ako a sapakalalok.

Tahinito 20 hahekalan 70 miheca a lintad, o fenpo no Campia misatapangay midimokos to tayal no Malawi. Kawra malecaday kako to romaroma tamdaw, padotocay ciharateng to itiniay Malawi a salikaka, miceriday patado cangranan mitolon. Iraay ko kinapina, malo Iing no Fenpo no Cinpapowi kako i, masasoˈaraway to salikaka taypiyaw no Congpo ato Malawi, Nanfi ato Campia. To kahacecay malecaday ko mihadakan niyam a salicay: “Wa ngaˈayho kami patado to salikaka i Malawi midemak to maanan hani?”

Mataˈlif ko toki, palidlid sanay malowan ko sapalak, o romaroma milaliway to Malawi a salikaka  dadotoc sanay minokay i nalacolan, o materekay itira a salikaka cowato ka pakidem ko macadaay a sapalak. I fiyaway a kitakit palahdawayto to sakeceng, mihayda to matatodongay a saaroˈan no Misawacayay Tamdaw ni Yihofa. O Mosanpike itini 1991 miheca mihaenay ko demak. Miharateng kami: “Itiniay i Malawi a Misawacayay Tamdaw ni Yihofa hacowa ngaˈ pasalat a midoko ci Yihofaan hani?”

Ikor mafalicayto ko pakayraan no mirikecay i Malawi, o sifo itini 1993 miheca mitedalay to sakeceng to Misawacayay Tamdaw ni Yihofa. Ikor caka halafin, o cecay mikiriwiˈay manilnil a mitosilay itini kasasowal milicayay takowanan: “Papatikol kiso tayra i Malawi han?” Itiya 59 ko mihecaan ako, mansa saan ko caˈof ako: “Cowato, samanen matoˈasayto kako.” Kawra toya romiˈad, iraay ko lihaf no Malohemay Malitengay i Congpo mitahidang tamiyanan minokay.

Tada maolahay kami to tayal no niyah i Cinpapowi, mansa pasangaray misaˈosi to mamiliyas. Mananamayto kami to kaˈorip itira, iraayto ko ngaˈayay a widang. Sidaˈitay ko Malohemay Malitengay i Congpo a pasowal tamiyanan, edengan makahi kami, ano eca i cowa ko fafalicen nangra ko katayalan niyam, mihaenay wa ngaˈay kami mipiliˈ to rarakaten no niyah a lalan, padadotoc materek itira. Kawra maharatengay ako ko ngaˈayay taˈarawan ni Apraham aci Sara, soˈlin matoˈasayto cangra, hanaca sinowayay ko kaˈorip, kawra pakayni sapidofdofaw to sakayat ni Yihofa, kamayan cangra misetek to falocoˈ miliyas to nalacolan.—Satapangan 12:1-5.

Misaˈosiay kami mamidofdof to sakayat no likakawa ni Yihofa. 1995 miheca 2 folad 1 romiˈad, patikolay kami tayra i Malawi, toya romiˈad ato saka cecay niyam tayra i Malawi mataˈlifayto ko 28 miheca. Kako ato roma tatosa faˈinayan salikaka mikapotay malo Iing no Fenpo. Ikor, kalikiay kami misatapang a miliyaw milikakawa to midokoay a demak itira.

Maˈaraw ko pipalahad ni Yihofa to mitosilay a tayal, tada paˈicelay to falocoˈ! Mitosilay a tamdaw i Malawi mikitini 1993 miheca madeng 30,000 tamdaw, kalikiay matongal tahini i 1998 miheca 42,000 ko kaˈaloman. b Pakayni sapidimokosaw to taˈangayay saali no kilac, o Malohemay Malitengay i Congpo mihaiay tamiyanan patireng to faelohay katayalan a fenpo. Orato, itiniay kami i Lilangwi miaca to 12 eka a sera, manilnilay kako malo iing no patirengay a matayal.

2001 miheca 5 folad, o Malohemay Malitengay i Congpo salikaka ci Kayi Piese mikimaday to  pipatafang to fenpo. 2000 ira ko pina ko mirienangay a salikaka tonini a saˈopo, ilalomaˈ nangra ˈalomanay ko micadaayto to paputisem mataˈlifayto ko 40 miheca. Onini a madimadiay salikaka itini halafinay kakeceng tahalifaay to pakidemay sapalak, soˈlin tada manikaway cangra, kawra tanektekay ko pakasoˈlin nangra, caay ko mamaketon ko kalalaˈed ci Yihofaan. Tada mahemekay cangra ngaˈay minengneng to faelohay a Pitil. Itiya, kahacecay tadimocokan no Pitil mahoniay ko tano mikiriwiˈay a ngiha no Afrika romadiw to sapakahemek ci Yihofaan a radiw, onini tada mitemeray to falocoˈ ako i hakelong no kaˈorip! O maˈoripay a wacay cangra, misawacayay to papalemeden ni Yihofa ko madimadiay mihadidi to sapalifet a tamdaw.

Maharek ko pipatireng to fenpo ikor, padotocay macada ako ko sanilnil itini caka lecad a Hongti Kitakit Kasaˈopoan mikimad to patafangay a kimad. Itiya, misatapangay ko likakawa to cecay limasmas, itini cangoˈotay ko payci a kilac kaliki ko pipatireng to Hongti Kitakit Kasaˈopoan. Mapalemeday ko adihayay kasakopang no Malawi. Iˈayaw, o roma kasakopang itini sanay i laeno no taˈangayay kilang pataloˈan sanay a masaˈopo, o fadahong tano sikalan a misangaˈ, o kamaroˈan tano ditaˈan a misangaˈ. Nohatini, fanekfekay ko salikaka misangaˈ to lingka, dotoc patirengay to makapahay kasaˈopoan. Kawra kamayan maolah cangra to koˈedaway a pahal, samanen o sowal no itiraay: “O koˈedaway pahal ngaˈayay matongal ko cecay tamdaw a maroˈ.”

Maˈaraw ko pipadama ni Yihofa to salikaka macakat i pihakelongan, tada paˈicelay to falocoˈ ako. Mikiriwiˈay masemer kako to kaemangay a salikaka i Afrika, hayi sanay cangra patafang to niyah matayal saki Kawas, hanaca micada to sapasifanaˈ ato sapahatatanam no likakawa ikor kalikiay a macakat, mansa ngaˈay itini Pitil ato kasakopang mitamorong to adihayay a ˈinorong. Roma i, o roma salikaka itira manilnil malo kasakilac kantok ikor, patanektekay to pakasoˈlin no kasakopang. ˈAlomanay nangra ciraramodayto, kawra sapitongalaw to tayal ni Yihofa mipiliˈay cangra toniya lekakawa caay ka ciwawa, pakayni tonini hayi sanay micada to saroero no pinangan no siyakay ato paro no lomaˈ.

Itini kako i Afrika 52 miheca ikor, malingaday ko tatiih no tireng ako. Mihayiay ko Malohemay Malitengay i Congpo to sapaini no Iing no Fenpo, manilnilay kami minokay i Ikok. Soˈlin tangoˈolay kami miliyas to kaolahan a katayalan, kawra o paro no lomaˈ no Pitil no Ikok tada ngaˈayay ko pidimokos to katoˈasanto niyam.

Pakasoˈlinay kako, papikayaten ci Yihofa to rarakaten ako a lalan o sainanengay a saˈosi ako i hakelong no kaˈorip. Ano mitadiˈecay kako to inaneng no niyah, mipiliˈ to no hekal a tayal, caay ka timolo kako miharateng to sasamaan ko kaˈorip no niyah nohatini. Tada cipinangay ci Yihofa to saali ako, mafanaˈay sasamaan misalof to lalan ako. (Taneng 3:5, 6) Kaemangho i, maolahay kako cipinang to samaanay ko demak no taˈangayay kosi, kawra ngaˈay itini i paro no kakarayan a likakawa ni Yihofa a matayal, o soˈliˈlinay parenec to falocoˈ ako. Pakaynien takowanan ko sowal, midoko ci Yihofaan padamaay takowanan tada ciepocay ko nokaˈorip. Mahaenay isalakat, ano ikorto cowa ko mamafalic.