1. Ngaˈay kita pasayra ci Yihofaan mitolon, sasamaan ko pinengneng ita toniya demak hani?

 MISANGAˈAY to kakarayan ato sera a saˈakawangay Tatapangan pafeliay kitanan to toki pakayni i satolon miingid Cingranan, tada o kalimlaanto a sapalemed konini. Haratengen hena, cowa ko tatalaˈayaw kita mitingki, wa ngaˈay i kalo a toki, tano masakenaay a sowal pasayra ci Yihofaan mifowah to nafalocoˈan. Ano itinito kaadadaan a takar, anca itini kapalitan, wa ngaˈay kita pasayra Cingranan mitolon, hanaca pakasoˈlin to papacaˈof Cingra kitanan. Tada miakoˈiday kita to sidaˈitay a Wama i kakarayan pafeli kitanan tonini kalimlaan a sapalemed!

2. Samaanay ci Tafiti paihkal to misaaretengay ko niyah to mitolonay?

² Hongti ci Tafiti misaaretengay to mitolonay, itini i cecay ˈOlic pasowalay cingra ci Yihofaan sanay: “Nanay matiya o ˈacefel no exiw a macakat i kaˈayaw Iso ko pitolon ako.” (ˈOlic 141:1, 2) Itini i lintad ni Tafiti, o sapatafang no saysi i fangcalay sefi a exiw ci Yihofaan o misongilaˈan a misangaˈ. (Kasadakan 30:34, 35) Mihaen ko sowal ni Tafiti, paihkalay makalimay cingra o satolon no niyah o misongilaˈan a misimsim. Malecaday tonini ko kalim ita, samanen makalimay kita maolah ci Yihofa to satolon no mita.

3. Pasayra kita ci Yihofaan mitolon i, papairaen ko masamaanay a waywayan? Misamanay?

³ Ano pasayra kita ci Yihofaan mitolon i cowa kangaˈay kasimaan sa, ao pairaen ko tangongolay a pikangodo. Haratengen ko maˈaraway ni Isaya, Icikil, Taniil aci Yohani a kasapaan mapolosi. Onini a mapolosi soˈlin cowa ka lecalecad, kawra iraay ko cecay kalecadan: Milengo cangra ci Yihofaan i, o kakangodoen kasapaan a Hongti sanay. Maˈaraway ni Isaya ‘maroˈay ci Yihofa i tadamaanay a kamaroˈan.’ (Isaya 6:1-3) Maˈaraway ni  Icikil maroˈay ci Yihofa i sapilood a paliding Ningra, ‘iraay ko tomeliˈay a tediˈ itini taliyok Ningra,’ malecaday o talakal ni idek. (Icikil 1:26-28) Maˈaraway ni Taniil ko ‘Midaˈocay ko ˈOrip a Kawas’ micaˈedongay to makoracay a rikoˈ, iraay ko namal mikitira i kamaroˈan Ningra masadak. (Taniil 7:9, 10) Maˈaraway ni Yohani maroˈay ci Yihofa i tadamaanay kamaroˈan, ‘taliyok no tadamaanay kamaroˈan iraay ko talakal ni idek, malecaday o kandaway a odoˈ nengnengen.’ (Paˈarawan 4:2-4) Songilaˈen ita miharateng tada kasapaan ko ˈdil ni Yihofa, o mamaharatengto, ngaˈay ko niyah pakayni i satolon miingid Cingraanan tada o kalimlaan a sapalemed, hanaca mitolon i pairaen ko mangodoay falocoˈ. Mihaenay, o sasamaan a mitolon hani?

4. Mikitini kita i Matay 6:9, 10 satapangan a sowal no taˈarawan a satolon mananamay ko manan?

⁴ ˈOsien ko Matay 6:9, 10. Itini Pasifanaˈ i Lotok, pasifanaˈan ni Yis ko nisawawaan sasamaan tano kaolahan no Kawas a pakayraan mitolon. Maherek cingra somowal to ‘ka pihaen kamo a mitolon’ ikor, salakatay masowalay ko pina milingatay to araaw ni Yihofa kalimlaan a demak: (1) Patalahkalen ko fangcalay ngangan no Kawas. (2) Ira ko Hongti Kitakit no Kawas. Onini a Hongti Kitakit papalaˈafo to polong a ˈada no Kawas. (3) Masongilaˈ malaˈosi ko araaw no Kawas to cikiw ato tamdamdaw. Mararid kita itini satolon milengo tonini a demak, paihkalay to misaaretengay kita to araaw no Kawas.

5. Pakayni kita i demak no niyah mitolon to Kawas o matatodongay han? Misamanay?

⁵ Dotoc sowal ni Yis paihkalay, pakayni kita i demak no niyah mitolon to Kawas o matatodongay. Ngaˈayay cangacangen ita ci Yihofa pafeli kitaanan to kakaenen toya romiˈad, misodod to raraw ita, midipot kitaanan eca ka marefong i sakayhid, milidong kitaanan paliyas toya mariˈangay. (Matay 6:11-13) Itini satolon micangacang kita ci Yihofaan tonini a demak, paihkalay to mafanaˈay kita misaaliay ko niyah mitadiˈec Cingranan, hanaca makalimay milifok to pihayda Ningra.

6. O masowalay aca no taˈarawan satolon a demak ko ngaˈay cangacangen ita han? Tadtaden.

⁶ Ano mitolon hacecayen a mihadak ko taˈarawan a satolon cowa ka saan ko saali ni Yis  to nisawawaan. Itini roma a pitolon ningra, masowalay ni Yis ko kaciharatengan ningra pina a demak. (Matay 26:39, 42; Yohani 17:1-26) Malecaday, ano o mananto ko kacalemceman ita a demak, ngaˈayay tolonen ko Kawas. Ano mamisaˈosi kita to cecay demak i, ngaˈayay cangacangen ko Kawas pafeli kitaanan to taneng ato saka cipinang to demak. (ˈOlic 119:33, 34) Ano patorod ko likakawa no Kawas kitaanan to cecay pasangaray a tayal, ngaˈayay cangacangen ita ko Kawas padama kitaanan mihapinang to demak, mafanaˈ to sasamaan malaˈosi ko pidemak. (Taneng 2:6) O wama wina ngaˈayay patado to wawa mitolon, ano o wawato ngaˈayay patado to wama wina mitolon. Kita o polong a tamdaw ngaˈayay patado to pacekiwan ato mitosilan a tamdaw a mitolon, o mamihaen to demak. Manaokaniw, cowa ko picangacang aca ita, itini satolon ngaˈayay somowal to romaroma demak.

7. Itini satolon hano papakahemeken ita ci Yihofa?

⁷ O haharatengen ita itini satolon pakahemeken ci Yihofa. Awaay ko cima mikikakaay Cingranan to citatodongay pakahemeken ita, ‘o ngaˈayay, makahiay a misodod to tamdaw’ Cingra, Cingra i ‘o siniˈadaay to tamdaw, patadoay miharateng to tamdaw a Kawas, caay ka ranikay maketer, iraay ko madimadiay a olah, o soˈliˈlinay ngaˈay tadiˈecen.’ (ˈOlic 86:5, 15) O makapahay capeling ni Yihofa awaay ko pakaliniay, o midemakan Ningra a makapahay demak caay kaemin misaˈosi, mihaenay iraay ko adihayay lalangian ita pakahemek Cingranan.

8. Iraay ko maanan lalangian ita miakoˈid ci Yihofaan? (ˈOlic 104:12-15, 24)

⁸ Itini satolon, cowa ko pakahemek aca ita ci Yihofaan, mikifalocoˈho a miakoˈid Cingranan, samanen kadofahay ko sapafeli Ningra kitaanan a sapalemed. Tinakoen, ngaˈayay kita masemer a minengneng to masakenaay ko kodong a hana, mitanam to masakenaay ˈaredetay a kakaenen, lipahak a macacawmaˈ to ngaˈayay a widang. O matomesay to olah a Wama i kakarayan pafeli kitaanan tonini kadofahay a sapalemed, pakayniay saka lipahakaw ita a maˈorip. (ˈOsien ko ˈOlic 104:12-15, 24.) Sakakaay kalimlaan i, pafeliay ci Yihofa to kadofahay sapahaled to pakasoˈlin no falocoˈ a kakaenen, pairaay to  hatokel ita noikor konini, tada miakoˈiday kita Cingranan.

9. Pakayni sapiharatengaw a miakoˈid ci Yihofaan, ngaˈay kita misamaan ko pidemak hani? (1 Tisalonika 5:17, 18)

⁹ Patadoay ci Yihofa kitaanan midemak to adihayay a demak, kawra madoloay kita a mapawan miakoˈid Cingranan. Pakayni sapiharatengaw a miakoˈid ci Yihofaan, ngaˈay kita misamaan ko pidemak hani? Tanamen a mitilid ko cacangacangen iso i Kawas a demak, hanaca rariden mihadak a minengneng, haratengen samaanay Cingra pacaˈof kitaanan, dotoc mitolon miakoˈid Cingranan. (ˈOsien ko 1 Tisalonika 5:17, 18.) Haratengen hena, miakoˈid ko tao to pipadama ita cingranan, maedeng o lalipahak kita, misaaretengan minengneng wa saan miharateng. Malecaday, miharateng kita miakoˈid to pipacaˈof ni Yihofa to satolon ita, o dadihko ko falocoˈ Ningra. (Kolosay 3:15) Iraayho ko maanan kalimlaan a lalangian, aakoˈiden ita ci Yihofa hani?

10. Mikitini 1 Pitiro 2:21, hano aakoˈiden ita ci Yihofa miocor ci Yisan tayni i fafekang no sera?

¹⁰ ˈOsien ko 1 Pitiro 2:21. O aakoˈiden ita ci Yihofa pafeli to kaolahan a wawa Ningra pasifanaˈ kitaanan. Minanam kita to nano demak ni Yis, mamatongal ko kafanaˈ ci Yihofaan, mafanaˈho sasamaan ko pidemak ngaˈ milifok to pihayda Ningra. Ano pakasoˈlin kita to sapatefoc ni Yis, wa ngaˈay patireng to tangongolay kalawidang ci Yihofaan, ira ko rihadayay kalalaˈed Cingranan.—Loma 5:1.

11. Hano papakayni kita i ngangan ni Yis a mitolon ci Yihofaan?

¹¹ Miakoˈid kita ci Yihofaan, samanen padamaay Cingra kitaanan ngaˈay pakayni i ngangan ni Yis mitolon Cingranan. Ano mihaen kita to demak i, cowa ko pitengil aca ni Yihofa, pacaˈofayho to satolon. Wa pakaynien Ningra ci Yisan pacaˈof ko saali ita. Sanay ci Yis: ‘Pakayni kamo i ngangan ako, ano o mananto ko micangacangan, papalaˈosien ako, mihaen o Wama ako papakayni i wawa Ningra milifok to ˈdil.’—Yohani 14:13, 14.

12. O roma a lalangian ita miakoˈid ci Yihofaan pafeli to kaolahan a wawa Ningra o maanan hani?

¹² Samanen patafangan ni Yis ko sapatefoc, o raraw ita ngaˈayay milifok to sasodod ni Yihofa. Sowal no Fangcalay Cudad ci Yis o ‘taˈangayay saysi no mita, itiniayto cingra i kakarayan, maroˈay i kawanan no Tadamaanay kamaroˈan no Kawas.’ (Hipray 8:1) Sanayho ko sowal no Fangcalay Cudad, ‘itini i kakarayan Wama iraay ko padamaay kitaanan,’ o ci Yis Kristo. (1 Yohani 2:1) O milimasmasan ni Yihofa a Taˈangayay Saysi i ngaˈayay patado miharateng to kalonay no mita, ‘patadoay kitaanan a micangacang,’ tada miakoˈiday kita ci Yihofaan! (Loma 8:34; Hipray 4:15) Sahtoay cowa ka lefot kita, ano awa ko sapatefoc ni Yis, awaay ko pakayraan ita pakayni satolon a miingid ci Yihofaan. O kaolahan ni Yihofa a wawa makahiay pafeli kitaanan, ano samaanto ko adihay no sowal ita, awaay ko pakayraan paihkal to piakoˈid ita Cingranan.

13. Itini ˈayaw no kinafalah to ˈorip ci Yis a dadaya, samaanay paihkal to tangongolay ko olah ningra to nisawawaan?

¹³ Itini ˈayaw no kinafalah to ˈorip ci Yis a dadaya, adihayay ko mipalakan a toki patado to nisawawaan a mitolon, micangacang to kakarayan Wama ‘midipot cangranan, hoeca ka laˈosi koya mariˈangay.’ (Yohani 17:15) Tada maolahay ci Yis to nisawawaan ningra! Kakalikito cingra misiˈayaw to pakidemay a sapalifet, kawra kamayan ciharateng cingra cangranan.

14. Sasamaan kita paihkal to maolahay ko niyah to salikaka?

 ¹⁴ Mitodong kita ci Yisan, cowa ko saali aca no niyah ko miharatengan, ao mamicerid patado to salikaka mitolon. Mihaen ko demak ita, paihkalay to midofdofay ko niyah to limoˈot ni Yis masasiolah, pasowalayho ci Yihofaan, tada maolahay kita to salikaka. (Yohani 13:34) Patado to salikaka mitolon cowa ko coriyaˈay to toki, samanen sanay ko sowal no Fangcalay Cudad: ‘O picangacang no moecelay tamdaw taˈangayay ko ˈicel.’—Yakop 5:16.

15. O salikaka hano misaaliay kitaanan patado cangranan a mitolon hani?

¹⁵ Misaaliay ko salikaka patado kita cangranan mitolon, samanen adihayay ko masiˈayaway nangra a sapalifet. Ngaˈayay cangacangen ita ci Yihofa padama cangranan mihadidi to adada, pades, lalood, sapalak ato romaroma pasangaray. O roma salikaka patafangay to niyah, mirienang to padamaay to tahapadesay a tayal, wa ngaˈay kita patado cangranan a mitolon. O kafanaˈan ita a salikaka tahasiˈayaway to mahaenay a pasangaray alatek, itini no tekedan pitolon ita ngaˈayay hadaken ko ngangan nangra. Cangacangen ita ci Yihofa padama cangranan itini pasangaray pakayraan padotoc a mihadidi, mihaen o paihkalay to soˈliˈlinay a olah to salikaka.

16. Hano papatado kita to mikeriday faˈinayan salikaka a mitolon hani?

¹⁶ O mikeriday i kasakopang faˈinayan a salikaka miakoˈiday to tao patado cangranan a mitolon, mikitini tonini a satolon milifok to taˈangayay a sapadama, mahaenay ko tarokos ci Pawlo. Pasowalan ni Pawlo ko salikaka: ‘Patadoen kako a micangacang, ho matatodong ko mihadakan ako a sowal, timolo milasil to ngaˈayay a lihaf.’ (Ifiso 6:19) Anini, itini kasakopang adihayay a mikeriday faˈinayan salikaka malalokay a patado to salikaka a matayal. Micangacang kita ci Yihofaan palemed cangranan, o paihkalay to maolahay kita cangranan.

17-18. Itini maanan tatokian o mamitaypiyaw kita to tao mitolon alatek? O mamisinanot kita to maanan hani?

¹⁷ Latekay patadoay kita to tao a mitolon. Tinakoen, cecay fafahiyan salikaka mirienang to pacekiway i, misikayay a salikaka mitahidang cingranan a mitolon alatek. Ano cowa ka tada mafanaˈ cingra tonini a pacekiwan,  ngaˈay cingra mipiliˈ itini kahererek no picekiw a mitolon, mihaen o pitolon ningra mamatatodong to saali no pacekiwan a tamdaw.

¹⁸ O cecay faˈinayan salikaka manilnilay itini ˈayaw no mitosilay a saˈopo anca itini saˈopo no kasakopang a mitolon, toniya tatokian, haratengen no faˈinayan salikaka o araaw no saˈopo, miharatengho o satolon cowa ko sapisalofaw to salikaka anca milasil to demak. Itini adihayay saˈopo no kasakopang, romadiw ato mitolon 5 aca ehon. Mihaenay, citatodongay mitolon a faˈinayan salikaka cowa ka ngaˈay adihay ko sowal. Mangalef itini satapang no saˈopo, o mamisinanot ko faˈinayan salikaka tonini.—Matay 6:7.

19. Samaan ko pidemak ita, wa ngaˈayto itini ˈayaw no ira ko taˈangayay romiˈad ni Yihofa maharek a misaday?

¹⁹ Pakayni kangatato no pisawkitan ni Yihofa a romiˈad, tatongalen ita ko pisaareteng to mitolonay. Sanay ci Yis: ‘Kararid kamo a talipaˈelal, kararid mikifalocoˈ a micangacang, ho ngaˈay kamo miliyas to kihcod mamifekad a demak.’ (Luka 21:36) Mararid mitolon papadama kitaanan padadotoc tanektek ko pakasoˈlin. Ano mihaen, ano ira ko taˈangayay romiˈad no Kawas i, ecato ka rawraw ko falocoˈ.

20. Samaan ko pidemak ita, o mamalecad o exiw a fangsis ko satolon hani?

²⁰ Mananamay ita ko maanan hani? O sasalimlaen ita ko mitolonay a sapalemed. Itini satolon ita sakakaay kaciharatengan ita o milingatay to araaw ni Yihofa a demak. Wa itiniho kita i satolon miakoˈid ci Yihofaan pafeli to kaolahan Ningra a Wawa, pala Hongti cingranan palemed kitaanan. Wa ngaˈayho kita patado to salikaka a mitolon. Manaokaniw, wa ngaˈay kita micangacang ci Yihofaan midimokos to sakaˈorip ita ato patanektek to pakasoˈlin ita. Misongilaˈ kita misimsim to hasowal i satolon, o paihkalay to misaaretengay kita to mitolonay. Mihaen, o sowal ita o mamalecad o fangsisay a exiw ‘pakahemek to Kawas.’—Taneng 15:8.