1. Pakayni i Hongti Kitakit no Kawas, papakasoˈlin kita to maanan? Hano pakasoˈlin kita tonini hani?

 MAˈARAW iso ko pakayraan no hekal anini i, awaayto ko hatokel noikor sanay miharateng han? Maliwasakay ko paro no lomaˈ, mangalefay ko kariˈang no tamdaw, misatekeday, mangolaway, ˈalomanay tamdaw cowa to pakasoˈlin to cifadangalay a tamdaw. Nikawrira, o hatiniay pakayraan o papaˈicel to pakasoˈlin iso. Misamaanay hani? Samanen sapairasol no Fangcalay Cudad, itini ‘salikoray a romiˈad’ o mamahaen ko tamdaw sanay. (2 Timoti 3:1-5) O soˈliˈlinay ko harateng a tamdaw o mamihayi to malaˈosiayto konini a sapairasol. Misawacayay ko demak, mala Hongtiayto no Hongti Kitakit no Kawas ci Yis Kristo. Pakayniay i Hongti Kitakit no Kawas a sapairasol adihayayho, o masalalomaˈay aca a cecay konini. Nengnengen ita o romaroma sapairasol samaanay malaˈosi anini a lintad, o papatongal to pakasoˈlinay falocoˈ.

2. (1) Onini a lalakaw mamilengo to maanan hani? (2) Hano mamilengo toniya lalakaw hani? (Lengoen ko papotalay a coka.)

² Onini a lalakaw mamilengo: (1) O manan a sapairasol ko patalahkalay to katomirengan no Hongti Kitakit no Kawas a toki? (2) O manan a sapairasol ko paihkalay to mala Hongtiayto no Hongti Kitakit no Kawas ci Yis i kakarayan? (3) O maanan a sapairasol ko patalahkalay to hateloc no ˈada no Hongti Kitakit no Kawas? Onini a sapairasol malecaday o mafolfolay a coka pakakitikitingen, hato maˈaraway ita ko masaheciay a coka, mafanaˈ to itiniay ko niyah i maanan a  tatokian no mihalakaan ni Yihofa a limasmas a maˈorip.

3. Pakayni i Hongti no Hongti Kitakit no Kawas, o Taniil 7:13, 14 padamaay kitaanan pakasoˈlin to maanan?

³ O sapairasol no Taniil 7:13, 14 padamaay kitanan pakasoˈlin, o mamala Hongti no Hongti Kitakit no Kawas ci Yis Kristo. O sangaˈayay a Mikowanay cingra, o kahacecay tamdaw no kasakitakit o mamikifalocoˈ makahi ‘midofdof cingraanan,’ cowa ko mamakotay no tamdaw cingra. O roma sapairasol no Taniil paˈayaway, itini koˈedaway a tatokian no ‘pito a laliyadan’ mahererek ikor, wa itini kakarayan a Hongti Kitakit misatapang mikowan ci Yis Kristo. Onini a kahemekan a demak wa ihacowa a tatokian mifekad hani? Oha ngangaˈay kita mafanaˈ han?

4. Taniil 4:10-17 samaanay padama kitanan misaˈosi to ihacowaay a miheca misatapang ci Kristo mikowan hani? (Nengnengen ko ilaenoay safanaˈ.)

⁴ ˈOsien ko Taniil 4:10-17. O ‘pito a laliyadan’ mitaypiyaway to 2520 miheca a tatokian, onini a tatokian itiniay i ˈayaw no Kongyen 607 miheca misatapang. Itiya, o mitaypiyaway to pikowan ni Yihofa i Yirusalim salikoray a hongti palasawadan no Papilon a tamdaw. O ‘pito a laliyadan’ itiniay 1914 miheca mahererek, itiya pafelian ni Yihofa ko ‘citatodongay to fadangalan a tamdaw,’ o ci Yis, malo Hongti no Hongti Kitakit no Kawas. b—Icikil 21:25-27.

5. Cipinang to pakayniay ‘pito a laliyadan’ a sapairasol, mamilifok to maanan a epoc?

⁵ Onini a sapairasol pakayni kitaanan iraay ko maanan a epoc? Cipinang to pakayniay ‘pito a laliyadan’ a sapairasol, padamaay kitanan pakasoˈlin to tatooren ni Yihofa ko toki palaˈosi to sakiˈok Ningra. Maherekayto ci Yihofa misaˈosi to toki pala Hongti ci Yisan, maraod ko toki palaˈosianto Ningra konini a demak. Ano mahaenay i, wa itini Cingra i misaˈosian no Niyah a tatokian palaˈosi to polong a sapairasol. Wa ngaˈay rihaday ko falocoˈ ita, o taˈangayay a romiˈad ni Yihofa ‘cowa ko mamanayar ko romiˈad!’—Hapakuk 2:3.

6. (1) Iraay ko maanan ihkalay a wacay paihkalay, mikowanayto ci Yis Kristo i kakarayan? (2) Paˈarawan 6:2-8 a sapairasol samaanay miliyaw mihadak to wacay nonini a demak hani?

⁶ ˈAyaw no mahererek ko mitosilay a tayal ni Yis i fafekang no sera i, paˈayaway to mamifekad a pina a demak, padama to nisawawaan mihapinang mikowanayto cingra i kakarayan. Masowalay ningra ko lalood, kedal ato ˈatoray. Paˈayawayho cingra ‘icowacowa’ wa ira ko lifong mifekad, miedefay i paro no kakarayan 2019 miheca midengaay adada o ngaˈayay a tinakoan. Onini a demak sahtoay o ‘tahapinangan,’ paihkalay tano Hongti no Hongti Kitakit no Kawas a saˈaroan patikol ci Yis tayni kitaanan. (Matay 24:3, 7; Luka 21:7, 10, 11) Patikol maˈorip ci Yis tayra i kakarayan 60 miheca ikor, miliyaway pasowal to tarokos ci Yohanian to mamifekad konini a demak. (ˈOsien ko Paˈarawan 6:2-8.) Mikitini 1914 miheca misatapang ci Yis mikowan i kakarayan i, soˈlinay mifekad maemin konini a demak.

7. Mala Hongti ci Yis ikor, hano matomes ko pades i fafekang no sera hani?

⁷ Mala Hongti ci Yis ikor, o pakayraan no hekal hano caloh saan a tatiih hani? Itini Paˈarawan 6:2 pasowalay kitaanan, o saka cecay  ˈinorong ni Yis mala Hongti i, mamifekad to lalood. O cima ko saka lalood ningra hani? Ci Akoma Satan ato tatiihay coyoh ningra. Mikitini Paˈarawan saka 12 fedengan, mapadikay ci Satan, cingra ato tatiihay coyoh mafahkolay tayni fafekang no sera. Mangolaway cingra, misadak to keter i tamdaw, mihaenay hato matomesay to pades konini a hekal.—Paˈarawan 12:7-12.

8. Maˈaraw ko katatodong no sapairasol pakayni Hongti Kitakit, ngaˈay malifok ita ko maanan a epoc hani?

⁸ Onini a sapairasol pakayni kitaanan iraay ko maanan a epoc? Maˈaraw ko mifekaday demak no hekal ato kalingad no tatiihay capeling no tamdaw, mafanaˈayto kita mala Hongtiayto ci Yis. Mihaenay, maˈaraw ita ko tao misateked, awa ko olah, cowa ko mamaketer. Haratengen ita, o waywayan nangra matatodongay ko sapairasol no Fangcalay Cudad. Tomirengayto ko Hongti Kitakit! (ˈOlic 37:1) Mafanaˈay kita, pakayni kangatato no Armakiton, o pakayraan no hekal o mamalingad ko tatiih. (Marko 13:8; 2 Timoti 3:13) O sidaˈitay a Wama i kakarayan ci Yihofa padamaay kitaanan cipinang hano sasifod saan konini a hekal, coko miakoˈiday kiso Cingranan han?

9. Mikitini Taniil 2:28, 31-35 a sapairasol tano maanan mitaypiyaw to salikoray ciˈicelay mikowanay no hekal? Onini a ciˈicelay kitakit ihacowaay a masadak?

⁹ ˈOsien ko Taniil 2:28, 31-35. Anini, maˈaraway ita konini a sapairasol malaˈosiay nohatini. O mitiihan ni Nipukatnicar patalahkalay ‘itini salikoray ˈawaled,’ itini ikor no misatapang ci Kristo a mikowan, wa mifekad ko maanan a demak. ‘O tano maradan ato ditaˈ sangaˈen a ooˈ no taˈangayay sasing’ mitaypiyaway to paˈayawan no Fangcalay Cudad a salikoray ciˈicelay kitakit, o masalalomaˈay a  ˈada ni Yis i fafekang no sera. Itini Saka Cecay Lalood no Hekal, makakadep ko Ikok ato Padaka i, masadakayto konini a ciˈicelay kitakit. O matiihay ni Nipukatnicar taˈangayay sasing patalahkalay to tosa a demak, padama kitaanan mafanaˈ onini a ciˈicelay kitakit cowa kalecad to salakatay.

10. (1) O sapairasol ni Taniil samaanay matatodong ko pitadtad to tahapinangan no Ikok ato Padaka ciˈicelay mikowanay no hekal? (2) O haharatengen ita ko manan katalawan? (Nengnengen ko sapatongal lalakaw “ Sinanoten ko Pifiyor no Ditaˈ!”)

¹⁰ Salakat, cowa ka lecad to romaroma no taˈangayay sasing, mitaypiyaway to Ikok ato Padaka Ciˈicelay Mikowanay no Hekal a ooˈ cowa ko tano ekiman ato linkim a sangaˈen, ao tano maradan ato ditaˈ palamlaman a misangaˈ. O ditaˈ mitaypiyaway to ‘teloteloc no tamdaw,’ o kalo a tamdaw. (Taniil 2:43 ato roma pihongyak.) Anini ihkalay mahapinang ita, pakayniay i pisingkiw no tamdaw, fadangalan no tamdaw, mitowakangay a demak ato kasakapot no maomahay taˈangayay ko pifiyor, soˈlinay milowan to ˈicel nonini ciˈicelay mikowanay no hekal, hato pasangaray konini a ciˈicelay mikowanay a midemak to mihalakaan no niyah.

11. O kasadak no Ikok ato Padaka Ciˈicelay Mikowanay no Hekal hano matongal ko pakasoˈlin ita, itiniay kita i salikoray a ˈawaled maˈorip nohatini?

¹¹ Dotoc, mitaypiyawan no ooˈ no taˈangayay sasing a Ikok ato Padaka Ciˈicelay Mikowanay no Hekal o salikorayto a pairasolan no Fangcalay Cudad, ikor awaayto ko roma ciˈicelay mikowanay no hekal. Tiya palaˈafoen no Hongti Kitakit no Kawas i Armakiton ko kihcod a sifo no hekal i, o mamalahdaw ko Ikok ato Padaka ciˈicelay mikowanay no hekal. c—Paˈarawan 16:13, 14, 16; 19:19, 20.

12. O sapairasol ni Taniil patalahkalay to o maanan a demakan, pairaay to sahinom ato hatokel no mita?

¹² Onini a sapairasol pakayni kitaanan iraay ko maanan a epoc? O sapairasol ni Taniil padamaay kitaanan pakasoˈlin, itiniayto kita i salikoray ˈawaled maˈorip nohatini. Itini ˈayaw no 2,500 miheca paˈayaway ci Taniil, itini ikor no Papilon wa iraho ko sepat ciˈicelay mikowanay no hekal taˈangayay ko pifiyor to finawlan no Kawas. Roma i, patalahkalayho cingra o salikorayto ko Ikok ato Padaka Ciˈicelay Mikowanay no Hekal. Pairaay to sahinom ato hatokel ita konini, samanen wa kalikito o papalaˈafoen no Hongti Kitakit no Kawas ko polong a sifo no hekal, hanaca misatapang a mikowan to polong no cikiw.—Taniil 2:44.

13. Masowalay no Paˈarawan 17:9-12 a ‘saka falo hongti’ ato ‘moetepay hongti’ mitaypiyaway to manan? Oniya sapairasol samaanay a matatodong hani?

¹³ ˈOsien ko Paˈarawan 17:9-12. Saka Cecay Lalood no Hekal pairaay to taˈangayay pipalak, dotoc mifekaday a demak matatodongay ko roma pakayniay salikoray romiˈad a sapairasol. O sifo no kalo a kitakit pakayni saka dipayalaw no hekal, itini 1920 miheca 1 folad patirengay to Koksay Lin-mong. Onini a lekakawa itini 1945 miheca 10 folad mikotayan no Makomoday Kitakit, oya paˈayawan no Fangcalay Cudad a ‘saka falo hongti.’ Kawra cowa ko ciˈicelay mikowanay no hekal cingra, samanen o fadangalan ato sapifiyor a ˈicel ningra o mikitiniay i midamaay cingranan a sifo no kalo kitakit. Panganganan no Fangcalay Cudad konini a sifo to ‘moetepay hongti.’

14-15. (1) Pakayni ‘Taˈangayay Papilon,’ patalahkalay ko Paˈarawan 17:3-5 to maanan? (2) O malifokay no mararaway a pihakelongan a sadama palalinien to salakatay iraay ko maanan a kafalic?

¹⁴ ˈOsien ko Paˈarawan 17:3-5. Itini sakayat no fangcalay saocor, maˈaraway no tarokos ci Yohani i mapolosi ko cecay tasalamaan  fafahiyan. O ngangan ningra o ‘Taˈangayay Papilon,’ mitaypiyaway to polong mararaway pihakelongan. Padadotocay midamaay ko mararaway pihakelongan to sifo no hekal, ngaˈayay ko kalalaˈed to sifo. Kawra kakaliki, o paparoen ni Yihofa ko ‘harateng no Niyah’ i falocoˈ no kalo kitakit, ‘papidemak’ cangranan. Telocto samanay? Oya ‘moetepay hongti’ mitaypiyaway to kalo kitakit mamifekad to saˈodis, palaˈafo to mararaway pihakelongan.—Paˈarawan 17:1, 2, 16, 17.

¹⁵ Hano mafanaˈ kita o ‘Taˈangayay Papilon’ wa kalikito mahererek hani? Itini nolitengan, o niyaroˈ no Papilon iraay ko ˈAlo no Iufratis midipotay. Malecaday, o Taˈangayay Papilon iraay ko ‘ˈalo’ midipotay, o sadama no masawalwalay a mihakelongay tamdaw. (Paˈarawan 17:15) Kawra somowalay ko Paˈarawan onini a ‘ˈalo’ o mamakerah, mitaypiyaway o mamalahdaw ko ˈalomanay mihakelongay a tamdaw no mararaway pihakelongan. (Paˈarawan 16:12) Matatodongayto konini a sapairasol anini, mifalahayto ko ˈalomanay tamdaw to mararaway a pihakelongan, pasayraay i roma kitiraan micangacang to sakayat.

16. Paliˈayaway ko Paˈarawan mamasadak ko Makomoday Kitakit, wa malaˈafo ko ‘Taˈangayay Papilon,’ cipinang tonini a sapairasol pakayni kitanan iraay ko manan a epoc?

 ¹⁶ Onini a sapairasol pakayni kitaanan iraay ko maanan a epoc? O kasadak no Makomoday Kitakit ato katefad no mararaway pihakelongan, padamaay kitaanan matongal ko pakasoˈlin itiniayto kita i salikoray ˈawaled maˈorip nohatini. Soˈlin o midipotay to ‘Taˈangayay Papilon’ a ‘ˈalo’ palidlid sanay makerah, kawra cowa ko mamahaen ko kalahdaw ningra. Malecad masowalay i fafekang, wa telien ni Yihofa ko ‘harateng no Niyah’ i falocoˈ no ‘moetepay hongti,’ misaali to midamaay to Makomoday Kitakit a kalo a kitakit midemak to harateng Ningra. Onini a kitakit wa fahal saan palaˈafo to mararaway pihakelongan, papacekid to hekal tamdaw. d (Paˈarawan 18:8-10) Mifekad konini mingerngeray to kakarayan ato sera a demak ikor, wa ira ko pasangaray a laliyadan alatek. Kawra o finawlan no Kawas iraay ko tosa lalangian a lipahak: (1) Onini a halafinay misaˈadaay to Kawas a ‘Taˈangayay Papilon’ tatahadaˈoc a malahdaw. (2) Wa kalikito kita malidong, miliyas tonini ciraraway a hekal!—Luka 21:28.

17-18. (1) Sasamaan kita padadotoc patanektek to pakasoˈlinay falocoˈ no niyah? (2) Dotoc a lalakaw mamilengo to maanan?

¹⁷ Paˈayaway ci Taniil ‘o soˈliˈlinay a sifanaˈ’ ‘wa kadofah,’ soˈlinay mahaen ko demak! Anini, padamaan no Kawas kita cipinang to adihayay milingatay to lintad ita a sapairasol. (Taniil 12:4, 9, 10) Matatodongay konini a sapairasol, patongalay to pikangodo ita ci Yihofaan, matongalay ko pikangodo to Fangcalay Cudad. (Isaya 46:10; 55:11) Mihaenay ka pisamacay micekiw to Fangcalay Cudad, padamaho to tamdaw miingid ci Yihofaan, milifok to pihayda Ningra, mihaen o ngangaˈayto kiso padadotoc patanektek to pakasoˈlin no niyah. O dadipoten ni Yihofa ko mitadiˈecay Cingranan a tamdaw, pafeli cangranan to ‘midaˈocay a rihaday.’—Isaya 26:3.

¹⁸ Dotoc a lalakaw mamilengo, o milingatay to itiniay i salikoray ˈawaled kasakopang no Krisciyang a sapairasol, onini a sapairasol wa ngaˈay misawacay itiniay kita i salikoray romiˈad a maˈorip. Mamananam ita, iraayho ko maanan a wacay ngaˈay padama kitaanan mihapinang to mikeriday ko Hongti ci Yis Kristo to madimadiay a nisawawaan ningra.