Pasifanaˈ ci Yis to tamdaw padotoc mararihaday to tao, kawra kinacecayay pasowalay cingra to tarokos: ‘Aka piharateng tayni kako o papaira to dipayal i hekal; tayni kako cowa ko papaira to dipayal, ao papaira to fonos. Tayni kako mamikidat to sakaliwasak: Mitowakang ko wawa to wama, mitowakang ko fafahiyan a wawa to wina, mitowakang ko kadafo to wina no faˈinay.’ (Matay 10:34, 35) O sowal ni Yis o manan ko tatodong hani?

Cowa ko papalicinowas ci Yis to paro no lomaˈ, kawra mafanaˈay cingra o sapasifanaˈ ningra a kimad mamikidat to sakaliwasak no roma paro no lomaˈ. Mihaenay, mamicada to paputisem malo Krisciyang a tamdaw o cacipinang, mihaen ko demak nangra cowa ko mamahemek ko paro no lomaˈ alatek. O cowa pihakelong a raramod anca paro no lomaˈ ano misafelit cangranan, sapidofdofaw cangra to sapasifanaˈ ni Kristo cowa ko madoloay alatek.

Pakalalokay ko Fangcalay Cudad to Krisciyang ka ‘rarihaday to polong a tamdaw.’ (Loma 12:18) Kawra pakayni i roma paro no lomaˈ, o sapasifanaˈ ni Yis malecaday o ‘fonos.’ Hano mihaen ko sowal hani? Ano micada ko cecay tamdaw to sapasifanaˈ ni Yis a kimad, kawra mapiliˈ ko paro no lomaˈ ningra anca misafelit tonini a kimad, itini mahaenay a pakayraan, o ‘paro no lomaˈ no niyah’ pakayni pisaˈada cingranan malecadayto ‘ˈada’ ningra.—Matay 10:36.

O pihakelongan ita ano cowa ka lecad to paro no lomaˈ, latekay o olah ita ci Yihofaan aci Yisan mamicada to sapalifet. Tinakoen, o cowa pihakelong a paro no lomaˈ papacieci kitanan misalisin to lisin no kiyokay alatek. Tahalifa to mahaenay a sapalifet i, o cima ko papahemeken ita hani? Sanay ci Yis: ‘O cima maolah to wama wina ikaka ko kaolah takowanan, awaay ko tatodong malo nisawawaan ako.’ (Matay 10:37) Manaokaniw cowa ka pasowal ci Yis, mamalo nisawawaan ningra, lalowanen ita ko olah to wama wina. O misaˈicelan ningra i, o mamihapinang kita o manan a demakan ko mikikakaay kalimlaan. O cowa pihakelong a paro no lomaˈ ano misafelit kitaanan midoko ci Yihofaan, o kakamayan kita padotoc maolah cangranan. Hanaca oha mamafanaˈ kita o papaisalakaten ko kaolah to Kawas.

O pisafelit no paro no lomaˈ paadadaay to falocoˈ ita alatek, kawra o haharatengen ita ko nano sowal ni Yis, sanay cingra: ‘O cima cowa kakahi mitamorong to pisemseman a hecek no niyah mikotod takowanan, awaay ko tatodong malo nisawawaan ako.’ (Matay 10:38) Falicen ko sowal, o pinengneng ita to pisafelit no paro no lomaˈ o mihayian no Krisciyang a cacadaen a roray. Hanaca, makalimay kita mitemer to paro no lomaˈ ko ngaˈayay waywayan no niyah, ho mafalic ko harateng nangra, makahito cipinang to lihaf no Fangcalay Cudad.—1 Pitiro 3:1, 2.