1. Iraay ko manan kalikoan ita hani?

MASALALOMAˈ no kasakopang ni Yihofa tada kalikoanto! Malecaday o itiniay kita i Lakoing, ˈalomanay ko lipahakay a salikaka i tatihi, rihadayay a malacafay. Mihaenay, wa ngaˈay kiso mihadak to maanan sadama to kasakopang hani?

2. Itini mitilidan ni Pawlo a tikami sakadademakay to maanan a sapatinako hani?

² Pakayni toniya salicay, ngaˈay kita mikitini sapatinako ni Pawlo minanam. Itini sakayat no Kawas mitiliday cingra to pina tikami, patinakoan ningra ko kasakopang to tireng, patinako to tamdaw i kasakopang to caˈang no tireng.—Loma 12:4-8; 1 Korinto 12:12-27; Ifiso 4:16.

3. Oniya lalakaw wa milengo to maanan toloay kalimlaan hani?

³ Itini kasakopang, sahtoay o ciepocay ko kahacecay tamdaw. Ano o mananto a finacadan kita, samanay ko kaˈorip, picodadan, paro no lomaˈ anca lalengawan, wa ngaˈay kita pakalalok to tao, ira ko sadama to kasakopang. Oniya lalakaw wa milengo, mikitini sapatinako ni Pawlo ngaˈay mananam ita ko tolo kalimlaan. Saka 1, kita o kahacecay tamdaw itini kasakopang ni Yihofa iraay ko epoc. Saka 2, ano pasangar a mahapinang ita ko epoc no niyah i kasakopang, sasamaan ko demak? Saka 3, o papadotoc kita a misaˈicel, itini kasakopang milaheci to patorodan ni Yihofa kitanan a demak.

4. Mikitini Loma 12:4, 5 mamananam ita ko maanan?

⁴ Mikitini sapatinako ni Pawlo mamananam ita saka 1 a kalimlaan i: Itini kasakopang ni Yihofa, kalimlaan ko kahacecay tamdaw. Itini satapangan no sapatinako ni Pawlo sanay: ‘Adihay ko caˈang no tireng, caay ka lecad ko tayal noya caˈang a maemin. Soˈlin ˈalomanay kita, nikawrira, kamayan o cecayay ko tireng, pakayni i nika lacecay ci Kristoan, malacecayto ko tatirengan ita.’ (Loma 12:4, 5) O maanan ko tatodong ni Pawlo hani? Soˈlin o demak no kahacecay tamdaw i kasakopang cowa kalecad, kawra sahtoay o iraay ko epoc no kahacecay tamdaw.

5. Pafeliay ci Yihofa to kasakopang to maanan a “sapatelong” hani?

⁵ Masowal ko iraay ko saaroˈan i kasakopang a tamdaw, salakat maharatengay iso oya mikayatay a tamdaw alatek. (1 Tisalonika 5:12; Hipray 13:17) Hatiraayto, pakaynian ni Yihofa ci Kristoan pafeli to kasakopang cangranan ‘malo sapatelong.’ (Ifiso 4:8) Oniya tamdaw mahawpay ko Malohemay Malitengay i Congpo, o dama nangra, o ling no Fenpo, kasakilac kantok, papotalay a singsi, malohemay malitengay ato dama sikawdan. Pakaynian no Kawas i fangcalay saocor a minilnil toniya salikaka pakalalok to kasakopang, midimokos to kalimlaan a lopayˈay a siri Ningra.—1 Pitiro 5:2, 3.

6. Pakayni 1 Tisalonika 2:6-8, pakaynian ni Yihofa i fangcalay saocor minilnil a salikaka misaˈicelay midemak to maanan?

⁶ O tireng iraay ko cowa ka lecad caˈang, tinakoen o kamay anca o waˈay, kahacecay a caˈang iraay ko hademak, wa paepoc to tatirengan. Malecaday, ci Yihofa tano fangcalay saocor minilnil to salikaka ira ko cowa ka lecad a ˈinorong, misaˈicelay matayal cangra, palemed to polong no kasakopang. Mihaen ko demak nangra cowa ko sapilifokaw to sapakahemek, pakayniay sapakalalokaw to salikaka. (ˈOsien ko 1 Tisalonika 2:6-8.) Oniya matenesay salikaka cowa pisateked a matayal saki kitaanan, tada o aakoˈiden ita ci Yihofa!

7. Mirienang to mieminay to toki mitosil a salikaka malifokay ko maanan sapalemed?

⁷ Itini kasakopang, manilnilay ko roma salikaka malo milakowitay to riyar a mitosilay, mikiriwiˈay misakafahay ato miceriday misakafahay. Itini i cowacowa pala, oniya salikaka mieminay to toki mirienang to mitosilay, telocto ˈalomanay ko mapadamaay a tamdaw malo Krisciyang. Soˈlin cowa ka cihafay ko kaˈorip nangra, kawra adihayay ko sapalemed ni Yihofa cangranan. (Marko 10:29, 30) Tangongolay ko olah ita toniya salikaka, ira cangra i kasakopang, tada aakoˈiden ita ci Yihofa!

8. O kahacecay mitosilay pakayni ci Yihofaan hano o kalimlaan hani?

⁸ Edengan ko mikayatay a salikaka ato mieminay to toki a mitosilay ko iraay ko saaroˈan i kasakopang han? Cowa ka hatira! O kahacecay milasilay to ngaˈayay lihaf a mitosilay o kalimlaan ni Yihofa ato kasakopang. (Loma 10:15; 1 Korinto 3:6-9) Samanen iraay ko kalimlaan a tayal no kasakopang no Krisciyang, padama to tamdaw malo nisawawaan ni Kristo. (Matay 28:19,20; 1 Timoti 2:4) Polong mirienangay mitosil a salikaka i kasakopang, ano micadaayto paputisem anca cowaho picada to paputisem a mitosilay, misaˈicelay paisalakat to mitosilay a tayal i nokaˈorip.—Matay 24:14.

9. O fafahiyan a Krisciyang hano o kalimlaan hani?

⁹ Mihaydaan ni Yihofa ko fafahiyan salikaka, kalimlaan ko tayal nangra i kasakopang. Ano o fafahito, o winato, anca malahdaway ko faˈinay anca cowaho cifaˈinay a salikaka,  madimadiay cangra midoko to Kawas. Itini pinengneng ni Yihofa, oniya fafahiyan salikaka sahtoay o kalimlaan cangra. Masowalay no Fangcalay Cudad ko ˈalomanay madimadiay fafahiyan, masemeray ko Kawas cangranan. Paihkalay cangra to taneng, pakasoˈlinay, fanekfekay, ato hinapaladaˈay, makapahay ko demak, patirengay to ngaˈayay taˈarawan ita. (Luka 8:2, 3; Dmak 16:14, 15; Loma 16:3, 6; Filipi 4:3; Hipray 11:11, 31, 35) I kasakopangay fafahiyan salikaka iraay ko mahaenay makapahay capeling, tada miakoˈiday kita ci Yihofaan!

10. O matoˈasay a salikaka hano tada kalimlaan hani?

¹⁰ Itini kasakopang ni Yihofa ˈalomanay ko matoˈasay salikaka, pakahemekay koni kitaanan. O roma tamdaw hakelong no ˈorip nangra madimadiay matayal saki Yihofaan, o roma manaˈonay ko pinanam to Fangcalay Cudad. Ano samaanto, o matoˈasay salikaka pakayni ka matoˈas matoˈasto wa adihayay ko adada no tireng, mifiyoray to katayal nangra i kasakopang ato mitosilay a tayal. Kawra, oniya matoˈasay Krisciyang misarocoday a mirienang to mitosilay tayal, hanaca pakalalok ato pahatatanam to tao. Mikitini nalifetan nangra adihayay ko mamananam ita, itini pinengneng ni Yihofa ato kita tada kalimlaan cangra!—Taneng 16:31.

11-12. O kaemangay no kasakopang pakalalokay kisowanan to maanan hani?

¹¹ Itini kasakopang ˈalomanay ko kalimlaan a kaemangay. Makowanay ni Satan koniya hekal, matomesay ko tatiihay a harateng, itini ko kaemangay i mahaenay pakayraan a lomahad, cowa ko madoloay. (1 Yohani 5:19) Kawra kamayan cangra tawlik a pacaˈof i kasaˈopoan, fanekfek a mitosil, timolo a miˈading to pihakelongan no niyah, tada pakalalokay kitaanan. Kanonoˈan a kaemangay, o sadama namo i kasakopang tada kalimlaanto!—ˈOlic 8:2.

¹² O roma salikaka miharateng to niyah awaay ko sadama to kasakopang sanay. Mihaenay, o sasamaan kita a mihapinang to epoc no niyah i kasakopang hani? Dotoc wa milengo toniya salicay.

13-14. O roma tamdaw hano awaay ko sapadama no niyah i kasakopang saan miharateng hani?

¹³ Dotoc, nengnengen ita ko saka 2 kalimlaan no sapatinako ni Pawlo. Masowalay ningra ko masiˈayaway no ˈalomanay tamdaw a pasangaray, pasangaray pakasoˈlin to ngangaˈay ko niyah padama to kasakopang. Sanay ci Pawlo: ‘Caay ko kamay kako saka, “caay ko misiketay kako i tatirengan,” ano saasaan ko waˈay i, maedeng a mimaan a caay pisiket i tatirengan. “Caay ko mata kako saka, caay ko misiketay kako i tatirengan,” ano saasaan ko tangila i, maedeng a mimaan a caay pisiket i tatirengan.’ (1 Korinto 12:15, 16) O maanan ko tatodong no sowal ni Pawlo hani?

¹⁴ Ano mararid kita palalini to kasakopangay a tamdaw, wa pasangar mihapinang to epoc no niyah. O roma tamdaw i kasakopang mafanaˈay pasifanaˈ alatek, anca inanengay milikakawa, o roma mafanaˈay mihinom ato pakalalok to tao. Cato ka hatira cangranan ko kangaˈay no niyah saan miharateng, mihaen ko harateng iso, o paihkalay to misapoeneray ko falocoˈ iso. (Filipi 2:3) Kawra, mamisinanot kita, ano oya inanengay tamdaw ko palinien ita, wa matoled ko niyah, alatek wa malecad o misowalan ni Pawlo, awaay ko saaroˈan no niyah i kasakopang saan miharateng. O maanan ko papadama kitaanan miremo to hatiniay masofaway harateng hani?

15. Pakayni inaneng no kahacecay tamdaw, mikitini 1 Korinto 12:4-11 mamananam ita ko maanan?

¹⁵ Haratengen hena, itini saka 1 hahekalan pakaynian ni Yihofa i fangcalay saocor pafeli to roma Krisciyang midemak to kafahkaan a demak, kawra cowa ka sahto saan milifok ko kahacecay a tamdaw to malecaday a ˈicel. (ˈOsien ko 1 Korinto 12:4-11.) Soˈlin cowa kalecad ko ˈicel, kawra kalimlaan maemin ko kahacecay a Krisciyang. Anini, cowato pafeli ci Yihofa kitaanan to kafahkaan a ˈicel, kawra malecaday ko pinengneng ningra. Soˈlin cowa kalecad ko inaneng no kahacecay tamdaw, kawra o pinengneng ni Yihofa o kalimlaan a maemin.

16. Tatengilen ita ko maanan a limoˈot ni Pawlo hani?

 ¹⁶ Aka malalini kita to salikaka, tengilen ko limoˈot ni Pawlo, sanay: ‘O kahacecay tamdaw kinsaen ko demak no niyah. Mihaen, o kahemekan ningra o nano demak no niyah, cowa ko palalini to tao.’—Kalatiya 6:4.

17. Ano tooren ita ko sapaini ni Pawlo a midemak wa ira ko maanan a epoc hani?

¹⁷ Ano tooren ita ko sapaini ni Pawlo misongilaˈ a miharateng to nano demak no niyah, wa mahapinang to iraay ko inaneng no niyah. Tinakoen, o roma malohemay malitengay soˈlin cowa ka tada mafanaˈ a mikimad, kawra mafanaˈay a mitosil ato pasifanaˈ to tao minanam to Fangcalay Cudad. O roma malohemay malitengay soˈlin cowa ka lecad to roma malohemay malitengay mafanaˈ a milikakawa, kawra tada ciolahay ko falocoˈ, tahalifa ko salikaka to pasangaray maolahay pasowal cingraanan, ngaˈayay cangra mikitini Fangcalay Cudad mihadak to ngaˈayay a sapaini. O roma malohemay malitengay hinalafangay, marariday pakaen to salikaka. (Hipray 13:2, 16) Ano mahapinang ita iraay ko kangaˈayan ato inaneng no niyah, wa pakayni pipadama to kasakopang a lipahak, cowato ko mamaˈinap to inaneng no tao.

18. Sasamaan kita pacakat to inaneng mitosil ato pasifanaˈ hani?

¹⁸ Ano o mananto ko sadama ita to kasakopang, oha papadadotoc kita maemin a misaˈicel misalof to inaneng mitosil ato pasifanaˈ, pacakat to inaneng no niyah. Sapadamaaw kitaanan a macakat, pakaynian ni Yihofa i likakawa Ningra a pahatatanam kitaanan. Tinakoen, itini tenok no lipay a saˈopo mananamay ita, samaan mitongal to epoc a mitosil. Misaˈicelay kiso misaka dademak to mananamay i kasaˈopoan han?

19. Sasamaan kiso mitoor to patosokan mirienang to SKE hani?

¹⁹ O cecay kalimlaan a sapahatatanam i, mirienangay to mieminay to toki matayal a salikaka, o 23 tangasa 65 ko mihecaan, iraay ko toki mirienang toniya pihatatanaman. Pasangaran nanay kiso mitoor toniya patosokan alatek, kawra aka haharateng saan to hano caka ngaˈay mirienang, tiliden ko lalangian to hano ciharateng kiso mirienang. Dotoc, saˈosien ko halaka iso, ho palidlid saan a matoor ko palinian. Ira ko sapadama ni Yihofa, ato pisaˈicel iso, o mamadangalto iso koniya patosokan.

20. Mikitini Loma12:6-8 mananam ita ko maanan hani?

²⁰ Dotoc, nengnengen ita ko saka 3 kalimlaan no sapatinako ni Pawlo. (ˈOsien ko Loma 12:6-8.) Miliyaway ci Pawlo itini mitadtad, kahacecay tamdaw i kasakopng cowa kalecad ko inaneng, kawra misaˈicelay cingra, oha sakadademaken ita ko inaneng no niyah a pakalalok to tao, padama to kasakopang.

21-22. Mikitini nalifetan ni Lopote aci Filis mamananam ita ko maanan hani?

²¹ Nengnengen ko tinakoan ni Lopote. Matayalay cingra i roma kitakit to cecay liyad, manilnilay i niyaroˈay a Pitil matayal. Soˈlin pasowalen no salikaka cingra, o kafalic no katayalan cowa ko tatiihay ko demak ningra, kawra sanay cingra: “Pinaay a folad, cowa ka lipahak kako, tada pasokiyaway ko niyah sanay miharateng. Kinapinaay, sapiliyasaw sanay kako to Pitil.” Samanay ci Lopote miliyaw a talifak hani? Patalipaˈelalan no cecay malohemay malitengay cingra, pahatatanaman ni Yihofa kita i salakatay a katayalan, mihaen o mamatongal ko kangaˈay no demak ita i katayalan anini. Mafanaˈayto ci Lopote, cowa ko ngangaˈay haharateng han ko mataˈlifayto a demak, o mamisamacay to hademak anini.

²² Salikaka ci Filis Aypiskepo tahalifaay to  malecaday pasangaray. Cingra ato fafahi micodiyap i Kiliyat i 1956 miheca i, manilnilay tayra i Polifia milisoˈay to kasakopang a tayal. 1964 miheca, ciwawaay cangra. Sanay cingra: “Tada tangoˈolay kami to katayalan i salakat. Soˈlinen ko sowal, maedeng cecayay miheca, tada matoleday kako. Kawra itini pipadama ni Yihofa, mifalican ako ko waywayan, misaˈosi to falocoˈ misamacay a malo ngaˈayay wama.” Malecaday ko harateng iso ci Lopotean aci Filisan han? Pakayni piliyas iso to salakatay katayalan matoleday ko falocoˈ han? Ano mahaenay i, samacayen ko mamadangal iso a demak nohatini, padadotoc misongilaˈ matayal saki Yihofaan ato salikaka. Songilaˈen misaka demak ko inaneng iso, micerid padama to tao, pakalalok to kasakopang, mihaen o mamalifok iso ko soˈliˈlinay a lipahak.

23. O manan ko haratengen ita hani? Dotoc a lalakaw wa milengo to manan hani?

²³ Pakaynien ci Yihofaan ko sowal, o kalimlaan kita maemin, o masalalomaˈay no taˈangayay paro no lomaˈ Ningra. Ano songilaˈen ita miharateng to ngangaˈay ko niyah midemak to maanan pakalalok to salikaka, hanaca misaˈicel mihaen to demak, wa madoloto mahapinang ko epoc no niyah i kasakopang. Mihaenay, o sasamaan ko pinengneng ita to roma tamdaw i kasakopang hani? Sasamaan kita paihkal to olah ato pikangodo cangranan hani? Dotoc a lalakaw wa milengo toniya salicay.