1. Pakayni pisapoener ni Yihofa, mansanay ko sowal ni Tafiti hani?

O MASAMANAY a Kawas ci Yihofa hani? Na somowalay ci Tafiti sanay: ‘Pafelien Iso kako to salidong malo sapatada, o misapoeneray Iso palatadamaanay takowanan.’ (2 Samuil 22:36; ˈOlic 18:35) Maharatengay ni Tafiti i, na tayra ci Samuil i lomaˈ no wama minilnil to mamidotoc a faelohay a hongti, soˈlin o sasafaay no fafaloay a wawa cingra, kawra mipiliˈan ni Yihofa cingra mikotay to Hongti ci Sawloan.—1 Samuil 16:1, 10-13.

2. Oniya lalakaw wa milengo to maanan hani?

² Maedeng malecaday ko harateng ni Tafiti to roma mitiliday to ˈOlic a tamdaw, sanay koniya mitiliday: ‘Roho sa ko Kawas minengneng to kakarayan ato sera, palowad nai alafoh ko tadancaay a tamdaw, palowaden nai alafoh ko manikaway a tamdaw, papikapot cingranan to kangodoan a tamdaw a maroˈ.’ (ˈOlic 113:6-8) Salakat wa milengo koniya lalakaw, itini maanan a pakayraan misapoeneray ci Yihofa. Dotoc, mitadtad kita to misamimingay a capeling, mikitini i Hongti ci Sawloan, Taniil aci Yisan mananam ko maanan.

3. Samanay ci Yihofa micada to finawlan Ningra? Paihkalay konini to masamaanay a Kawas Cingra hani?

³ Mikitini pakayraan ni Yihofa micada to finawlan Ningra, ngaˈayay mahapinang ita to tada misapoeneray Cingra. Soˈlin cowa ko malefotay kita, kawra ngaˈayay kita midoko Cingraanan,  misawidangayho kitaanan. (ˈOlic 25:14) Pakayni saka ngaˈay ita malo widang Ningra, talaˈayaway ci Yihofa a kinafalah to foseniˈan a Wawa no Niyah, mihepol to raraw ita. Tada iraay ko siniˈadaay a falocoˈ ni Yihofa.

4. Pafeliay ci Yihofa kitanan to maanan a inaneng hani? Misamaanay?

⁴ Itini roma pakayraan paihkalay ci Yihofa to misapoeneray. Itini pisangaˈ kitaanan i, na ngangaˈay eca ka pafeli kitanan to sapipiliˈ a inaneng. Kawra palecadan Ningra ko tireng no Niyah a misangaˈ kitaanan, hanaca pafeli kitanan to pasalatay a harateng. Palinien Cingranan, o alafoh kita, kawra misaaretengay Cingra to mipiliˈan ita. Tokel Ningra kitanan pakayni ka olah Cingranan, samanen mahapinangay midofdof Cingranan o saka ciepoc no mita, mansa mikitini falocoˈ a midoko Cingranan. (Limoˈot 10:12; Isaya 48:17, 18) Mihaenay a misapoener ci Yihofa, tada miakoˈiday kita Cingraanan!

5. Itini misapoeneray pakayraan patirengay ci Yihofa to maanan taˈarawan hani? (Nengnengen ko potalay coka.)

⁵ Mikitini picada ni Yihofa kitaanan a pakayraan, wa ngaˈay mananam ita to o maanan ko misapoeneray. O sakakaay ko taneng ni Yihofa, kawra makahiyay mitengil to sapaini. Tinakoen, papipacafayan ni Yihofa ci Yis a misangaˈ to maamaan. (Taneng 8:27-30; Kolosay 1:15, 16) Roma i, soˈlin malefotay ko ˈicel ni Yihofa, kawra makahiyay Cingra paladaˈ to fadangalan. Tinakoen, minilnilan Ningra ci Yis malo Hongti no Hongti Kitakit, mihaiho to 144,000 a Krisciyang malacafay ci Yisan a mikowan i kakarayan. (Luka 12:32) Manaokaniw, pahatatanaman ni Yihofa ci Yis, ho ngaˈay ko demak mala Hongti ato Taˈangayay Saysi. (Hipray 5:8, 9) Oya hacafay ni Yis mikowan a tamdaw milifokay to sapahatatanam. Kawra, patoroden ni Yihofa ko tayal cangranan i, cowa pihacecay a micapid. Pakasoˈlinay  Cingra cangranan to mamidoedo to harateng Ningra a dademak.—Paˈarawan 5:10.

6-7. Pakayni paladaˈ to fadangalan, mikitini ci Yihofaan wa mananam ita ko maanan hani?

⁶ Cowa pisaali to papadamaen ko kakarayan Wama, kawra makahiyay paladaˈ to fadangalan. Patorod to tayal i roma tamdaw, wa mikikaka ko pihaen ita to demak! Ano o tawki no paro no lomaˈ kiso anca o malohemay malitengay, o maminanam ci Yihofaan. Ikor no patorod to tao to tayal, akato cacapid saan to demak. Ano mitodong kiso ci Yihofaan, cowa ko pilaheci aca to demak, wa ngaˈayho pahatatanam to tao, mitongal to pakasoˈlin nangra to Kawas. (Isaya 41:10) O iraay ko fadangalan a tamdaw wa ngaˈayho itini maanan a pakayraan minanam ci Yihofaan hani?

⁷ Mikitini Fangcalay Cudad ngaˈay mahapinag ita, makahiyay ci Yihofa mitengil to sapaini no coyoh. (1 Hongti 22:19-22) Malo wama winaay, wa samaan kamo minanam ci Yihofaan hani? Latekay, pakayni sasamaan a midemak, ngaˈayay tengilen ko harateng no wawa, ano ngangaˈay i, saka dademaken kora sapaini nangra.

8. Samanay ci Yihofa mihadidi a micada ci Aprahaman aci Saraan hani?

⁸ Mihadidiay ci Yihofa, paihkalay to misapoeneray Cingra. Latekay, mikangodoay ko waywayan no sikawdan no Kawas a mihadak to cisasaay salicay, mihadidiay ci Yihofa a micada cangraanan. Tinakoen, tiya misaˈosi ci Yihofa palaˈafo to Sotom ato Komora i, cariraway ci Apraham. Itiya, mihadidiay ci Yihofa a mitengil to nafalocoˈan ningra. (Satapangan 18:22-33) Wa ngaˈayay nengnengen ita samanay ci Yihofa micada ci Saraan. Matoˈasto ci Sara i, mikiˈokay ko Kawas to mamahofoc cingra. Itiya, matawaay ci Sara, kawra cowa ka maketer ko Kawas, misikolay to saka seneng ningra.—Satapangan 18:10-14.

9. O wama wina ato malohemay malitengay wa ngaˈay samaan mitodong ci Yihofaan hani?

⁹ Ano wama wina anca o malohemay malitengay, mikitini taˈarawan ni Yihofa mananamay ko maanan hani? O wawa anca i kasakopangay a tamdaw cisasa to saˈosi iso, wa samaan ko harateng iso hani? Wa tangsol kiso a mirikec cangranan han? Anca misaˈicel a cipinang to harateng nangra? Ano misaˈicel kiso a minanam ci Yihofaan, o lalipahak ko paro no lomaˈ iso, o rarihaday ko kasakopang. I fafekang milengoay kita sasamaan minanam to misapoeneray ni Yihofa, dotoc nengnengen ita, pakayni misamimingay a capeling, mikitini tinakoan no Fangcalay Cudad wa mananam ita ko maanan.

10. Hano tiliden ni Yihofa i Fangcalay Cudad ko adihayay tinakoan hani?

¹⁰ Ci Yihofa o ‘Kasapaan a Singsi,’ itini Fangcalay Cudad adihayay ko matiliday a tinakoan, ngaˈayay nanamen ita. (Isaya 30:20, 21) Roma tamdaw paihkalay to kaolahan no Kawas a capeling, dotimen ita ko taˈarawan nangra, wa adihay ko mananamay. Roma tamdaw cowa ka paihkal to mahaenay a capeling, haratengen ita samanay ko teloc nangra, o ngaˈayay a sapasifanaˈ.—ˈOlic 37:37; 1 Korinto 10:11.

11. Mikitini i tireng ni Sawlo mananam ita ko maanan sapasifanaˈ hani?

¹¹ Haratengen ko tinakoan ni Sawlo. Kaemang cingra i misamimingay, mafanaˈay to citolasay ko ˈicel noniyah, cowa ka timolo micada to sapatorod ni Yihofa cingranan a ˈinorong. (1 Samuil 9:21; 10:20-22) Kawra caka halafin ci Sawlo mala hongti misatakarawayto, midemakay to cowa ka ngaˈay demaken no niyah a demak. Kinacecayay, cowa pakasoˈlin cingra to dadipoten ni Yihofa ko finawlan no Niyah, awaayho ci Samuil, haratengay sanay  a patoˈaya i Kawas. Telocto, malahdaway ko pihayda no Kawas cingranan, salikor malahdaway ko saaroˈan no hongti. (1 Samuil 13:8-14) Mikitini ci Sawloan mananamay ita ko sapasifanaˈ, aka a pidemak to awaay ko fadangalan no niyah a demak.

12. Pakayni i misamimingay hano o ngaˈayay a taˈarawan ci Taniil hani?

¹² Pairasolay a Taniil taˈangayay ko kasasiroma ci Sawloan. Hakelong no kaˈorip ningra misamimingay ko harateng, pasayraay ci Yihofaan micangacang to sakayat. Kinacecayay, mitadtaday ci Taniil to mitiihan no hongti ci Nipukatnicar, cowa pasowal cingra to mitadiˈecay to ˈicel noniyah, panokayay to ˈdil ci Yihofaan. (Taniil 2:26-28) Wa ngaˈay mananam ita ko maanan hani? Ano maolahay ko salikaka mitengil to mihadakan ita a kimad, anca ngaˈayay ko minaroˈan ita i pitosilan, aka mapawan panokay to ˈdil ci Yihofaan. O mamihai kita, ano awaay ko sapadama ni Yihofa, wa awa ko mamadangal ita a demak. (Filipi 4:13) Tada misamimingay ci Yis, ngaˈayay todongen ita, dotoc nengnengen ita ko ngaˈayay taˈarawan ningra.

13. Pakayni Yohani 5:19, 30, itini misamimingay pakayraan patirengay ci Yis to maanan taˈarawan hani?

¹³ O Wawa no Kawas ci Yis, hanaca o malefotay cingra, kawra kihcod a demak mitadiˈecay cingra ci Yihofaan. (ˈOsien ko Yohani 5:19, 30.) Caay ka ciharateng cingra sapiˈafasaw to fadangalan. Itini Filipi 2:6 sanay: ‘Caay ka ciharateng cingra sapiˈafasaw to malecaday no Kawas a saaroˈan.’ O mitengilay to sowal a Wawa cingra, mikangodoay cingra to fadangalan no kakarayan Wama. Cipinangay to citolasay ko fadangalan no niyah.

14. Micangacang ko tamdaw ci Yisan midemak to awaay ko fadangalan no niyah a demak i, samaanay ko harateng ni Yis hani?

¹⁴ Kinacecayay, o wina no tarokos ci Yohani aci Yakop miˈaraway ci Yisan, micangacangay ci Yisan midemak to awaay ko fadangalan ningra a demak. Samanay ko harateng ni Yis hani? Tangsolay pasowal ci Yis, edengan ko kakarayan Wama ko cifadangalay misaˈosi, itini Hongti Kitakit cima ko mamaroˈ i kawanan ato kawili ningra. (Matay 20:20-23) Cipinangay ci Yis citolasay ko fadangalan no niyah. Tada misamimingay cingra, caay pidemak to cowa palimoˈotan ni Yihofa cingranan a demak. (Yohani 12:49) Wa ngaˈay kita samaan a mitodong to taˈarawan ni Yis hani?

15-16. Sasamaan kita mitoor to sowal i 1 Korinto 4:6 a midemak hani?

 ¹⁵ Ano minanam kita to taˈarawan ni Yis a misamiming, wa mitoor to sowal i 1 Korinto 4:6 a midemak, sanay ko sinael: ‘Aka taˈlifen ko sowal no Fangcalay Cudad.’ Mihaenay ano misaali ko tao kitaanan paini cangranan i, aka pacieci to tao micada to harateng ita, aka haratengay saan a somowal. Padamaen ita ko tao misinanot to samanay ko sowal no Fangcalay Cudad ato mitepangan a cudad. Mihaen ko demak ita, paihkalay to mihaiyay to citolasay ko ˈicel no niyah, mihai to ‘moecelay ko sarikec’ no Kawas, o pinengneng no Kawas mikikakaay kitaanan.—Paˈarawan 15:3, 4.

¹⁶ Misamiming ko waywayan ita, wa ngaˈay panokay to ˈdil ci Yihofaan, hanaca wa adihay ko mamalifok ita a sakangaˈay. Dotoc nengnengen ita, o misapoeneray ato misamimingay hano papatongal to lipahak ita, wa ngaˈayho malakangaˈay to tao.

17. Misapoeneray ato misamimingay hano papatongal to kalipahak ita hani?

¹⁷ Misapoener ato misamiming ko waywayan ita, wa matongal ko lipahak. Misamanay hani? Samanen mafanaˈay kita to citolasay ko ˈicel no niyah, ano micada to sapadama wa lipahak ko falocoˈ, wa miakoˈid to tao. Kinacecayay, miadahan ni Yis ko mamoetepay ci adadaay tono fanges a tamdaw, kawra cecayay aca ko patikolay a miakoˈid cingranan. Mafanaˈay koniya misamimingay tamdaw, ano cowa ko pipadama ni Yis, cowa ko mamaadah cingra, mansa miakoˈid to piadah ni Yis cingraanan, hanaca taˈangay ko ngiha a pakahemek to Kawas.—Luka 17:11-19.

18. Misapoeneray ato misamimingay tamdaw hano madoloay malacafay to tao hani? (Loma 12:10)

¹⁸ O misapoeneray ato misamimingay tamdaw madoloay malacafay to tao, madoloay  ira ko ngaˈayay a widang, samanen makahiay cangra mihai to kangaˈayan no tao, makahiyayho a pakasoˈlin to tao. Pakayni ngaˈayay minaroˈan no tayal no tao patadoay cangra mahemek, mikifalocoˈay a mikangodo to tao, talaˈayaway a pakahemek cangranan.—ˈOsien ko Loma 12:10.

19. Hano aka misatakaraw kita hani?

¹⁹ Kawraan, misatakaraway a tamdaw pasangaray pakahemek to tao, magalayay cangra pakahemek ko tao to niyah. Madoloay masasiay to tao ko mahaenay a tamdaw, sapilowidaw to tao ko maharatengay. Cowa ka makahi a pahatatanam to tao, paladaˈ to fadangalan i tao. Maolahay cangra mitoor to pakayraan no niyah a midemak, o harateng nangra: “Ano sakangaˈayaw no demak, oniyah ko midemak.” O misatakaraway a tamdaw madoloay ira ko maˈanofay harateng, maˈinapay to tao. (Kalatiya 5:26) O mahaenay tamdaw pasangaray padotoc to kalawidang. Ano mahapinang ita ko niyah madoloay misatakaraw, cangacangen ko Kawas padama kitaanan ‘misafaeloh to harateng,’ aka palamiten ko mahaenay a dangoc.—Loma 12:2.

20. Hano mamalo misapoeneray ato misamimingay a tamdaw hani?

²⁰ Tada miakoˈiday kita ci Yihofaan patirengay to hatiniay a ngaˈayay a taˈarawan. Ci Yihofa misapoeneray micada to midokoay Cingranan a tamdaw, maolahay kita mitodong Cingranan. Roma i, masowalay no Fangcalay Cudad ˈalomanay tamdaw misamiming ko harateng a kalacafay to Kawas, makalimay kita minanam cangranan. Paˈdil ato pakahemek kita ci Yihofaan. (Paˈarawan 4:11) Mihaen, wa ngaˈay padadotoc kita kalacafay to Kawas, samanen tangongolay ko olah Ningra to misapoeneray ato misamimingay ko harateng a tamdaw.