1. Makalimay ko ˈalomanay tamdaw matayal saki Yihofaan, patirengay cangra to manan a patosokan hani?

 ITINI ˈayaw no hererekan romiˈad, adihayayho ko hatayal ita. (Matay 24:14; Luka 10:2; 1 Pitiro 5:2) Makalimay kita misarocod a matayal saki Yihofaan. ˈAlomanay tamdaw mitanamay tano caka lecad a pakayraan mitongal to tayal saki Yihofaan. Roma tamdaw misakafahay, roma itiniay Pitil matayal anca mirienang to patirengay a tayal. Roma i, misaˈicelay ko faˈinayan salikaka, malaˈosi ko patosokan malo dama sikawdan anca malohemay malitengay. (1 Timoti 3:1, 8) Maˈaraw ni Yihofa makahi a patafang to niyah ko finawlan Ningra, maedeng o mamahemek!—ˈOlic 110:3; Isaya 6:8.

2. Ano caho ka laˈosi ko patosokan no niyah, samaan ko harateng ita hani?

² Kawra, ano halafinayto kita a misaˈicel caho ka laˈosi ko patosokan, o mamatoled alatek. Roma i, ano maˈimeray no mihecaan anca roma pakayraan kita, eca ka ngaˈay mirienang to cecay tayal, o mamasomad alatek. (Taneng 13:12) Ci Milisa * mahaenay. Makalimay cingra matayal i Pitil anca mirienang to SKE, kawra sanay ko sowal ningra: “Mataˈlifayto ko mihecaan ako, pakaynien takowanan o mitiihan aca konini. Latekay, tada matoleday kako.”

3. O roma tamdaw mamisamaan ko demak, ngaˈ ira ko tatodong milifok to katayalan a toki?

³ Talifakay ko tireng a kaemangay salikaka o papalahad to pina capeling alatek, palidlid sato matenes, ngaˈ ira ko tatodong milifok to katayalan a toki. Inanengay cangra alatek,  mafanaˈay misaˈosi, fanekfekay ko falocoˈ, kawra o maminanam mihadidi, mikangodo to tao, misongilaˈ a dademak. Ano misaˈicel kiso palahad to kacangoˈotan no niyah a capeling, itini kafahalan a tatokian wa malifok ko katayalan a toki alatek. Nengnengen ko nalifetan no salikaka ci Nike, 20 ko mihecaan ningra eca ka nilnil malo dama sikawdan, tada matoleday cingra. Sanay cingra: “Maedeng iraay ko kacangoˈotan ako sanay miharateng.” Kawra cowa pisawad ci Nike, misaˈicelay cingra matayal i kasakopang, adihay ko mitosilay a tayal. Nohatini, ci Nike o Iing no Fenpo cingra.

4. Oniya lalakaw wa milengo to maanan?

⁴ Pakayniay kiso eca ka laˈosi ko patosokan a matoled han? Ano mahaenay i, itini satolon pasowalen ci Yihofa to nafalocoˈan iso. (ˈOlic 37:5-7) Ngaˈayay licayen iso ko matenesay a salikaka, minengneng o maanan ko sasalofen iso a macakat, dotoc misarocod a mitoor to sapaini a midemak. Mihaen, o mamalaˈosito ko patosokan iso alatek. Kawra ano malecaday kiso misowalan i fafekang ci Milisa awa ko pakayraan palaˈosi to nafalocoˈan, sasamaanto hani? Samaan ngaˈ padadotoc a lipahak hani? Oniya lalakaw wa milengo: (1) O maanan ko papaira to lipahak ita? (2) Samaan ngaˈ matongal ko lipahak matayal saki Yihofaan? (3) Patireng to maanan a patosokan wa ngaˈay patongal to lipahak ita?

5. Sapakahelaaw kita to lipahak, sasamacayen minengneng ko maanan hani? (Patnakay 6:9)

⁵ Itini Patnakay 6:9 pasowalay kitaanan o maanan ko papaira to lipahak ita. (ˈOsien.) O tamdaw ano ‘marenec to iraay nohatini,’ wa misalimla to iraay no niyah a kihcod, mahawpay ko pakayraan nohatini. Masafelitay, o tamdaw ano tangoˈol to awaay ko patolasan a ˈanof, wa haharateng saan to cowa ko mamalifok no niyah a dafong. Mananamay ita ko maanan hani? Sapakahelaaw to lipahak, samacayen ita minengneng ko iraay a dafong no niyah ato mamalaˈosi a patosokan.

6. Dotoc wa milengo to maanan sapatinako? Mikitini mamananam ita ko maanan?

⁶ Maolahay kita maemin mitanam to faelohay a demak, o pinangan no tamdaw konini. Ano mahaenay i, wa soˈlin kita ngaˈay ‘marenec to iraay nohatini’ han? Wa ngaˈayto. Wa ngaˈay kita marenec, cowa ko pacieciay to niyah. Sasamaan ko hademak hani? Somowalay ci Yis itini Matay 25:14-30 to cecay linkim a sapatinako, wa ngaˈay kita mikitini mikilim to caˈof, minanam to sasamaan mahela ko lipahak anini, hanaca matongal matongal ko lipahak.

7. Kantangen a misowal ko linkim a sapatinako.

⁷ Itini sapatinako ni Yis, ˈayaw no tayra roma kitakit ko cecay tamdaw mitahidangay to koli, mitoor to inaneng no kahacecay koli pafeli cangranan to payci misasingdi, o cecay 5 lofok a linkim, o cecay 2 lofok a linkim, o cecay 1 lofok a linkim. * Saˈayaway tatosaay koli malalokay matayal, kawra oya saka tolo koli cowa ka dademak, telocto milaplapan no tawki cingra.

8. O saka cecay koli i sapatinako hano lalipahak hani?

 ⁸ O saka cecay koli macadaay ko 5 lofok a linkim, maedeng lipahakay, hatiniay ko adihay a payci misawacayay to pakasoˈlinay ko tawki cingranan. O saka 2 koli samanay hani? O macadaay ningra a payci cowa ka lecad ko adihay to saka cecay a koli, na mamatoled ko harateng alatek. Mahaenay ko harateng ningra han?

9. Oya saka tosa a koli cowa ka samaan ko piharateng? (Matay 25:22, 23)

⁹ ˈOsien ko Matay 25:22, 23. Cowa pasowal ci Yis to saka tosa a koli tosaay aca lofok ko macadaay a payci ecato ka lipahak. Oniya koli cowa ka ngaliwngiw a somowal: “Hatiniay aca koniya payci? Coko malecaday kako tora koli a inaneng han? Ano misakahmaway ko tawki takowanan, tadem han ako koniya payci, midemak to kaolahan ako demak ko ngaˈay.”

10. O saka tosa a koli misaka dademakan ningra ko macadaay a linkim midemak to maanan?

¹⁰ Malecaday o saka cecay koli, o saka tosa koli misongilaˈay minengneng to sapatorod no tawki cingranan a tayal, misaˈicelay mietan to payci, telocto tosaay lofok a linkim ko maetanay ningra. Malalokay koniya koli matayal, tada idahiyayto. Tada masemeray ko tawki cingranan, cowa ko pakahemek aca cingranan, o ngaˈayay pakasoˈlinen cingra sanay, misaˈosi paiken cingranan to adihayay a tayal.

11. Samaan ko demak ita ngaˈ matongal ko lipahak a matayal saki Yihofaan hani?

¹¹ Malecaday, misarocod to falocoˈ kita midemak to sapatorod a tayal, wa matongal ko lipahak a matayal. Misamacay ko harateng mirienang to mitosilay, misaˈicelho matayal saki salikaka. (Dmak 18:5; Hipray 10:24, 25) Misaday kiso to lalakaw no saˈopo, wa ngaˈay mihadak to pakalalokay to tamdaw a sapacaˈof. Misarocod a misaday to kamok i pihatatanaman. Ano mitahidang ko malohemay malitengay papidemak tisowanan, tooren ko toki milahci, malo ngaˈayay tadiˈecen a tamdaw. Aka miharateng to cowa ko kalimlaan ko roma demak, cowa ka ngaˈay mipalak to toki  midemak, wa misaˈicel ko niyah pacakat to inaneng a matayal. (Taneng 22:29) Ano misamacay kiso matayal saki Yihofaan, wa matongal ko kacakat, wa matongal ko lipahak no niyah. (Kalatiya 6:4) Ano maˈaraw ko tao milifok to kaolahan iso a tayal i, patadoen cingra a mahemek.—Loma 12:15; Kalatiya 5:26.

12. Midemakay to maanan ci Milisa aci Nike, hato matongalay ko lipahak no niyah a matayal saki Yihofaan hani?

¹² Maharatengay ko masowalay i fafekang salikaka ci Milisa han? Makalimay cingra matayal i Pitil anca mirienang to SKE. Soˈlin cowa ka laˈosi koniya patosokan, kawra sanay cingra: “Misarocoday kako midemak to misakafahay a tayal, mitanam to kasasiroma no misawacayay a tayal, tada pakahemekay takowanan.” Ci Nike tiya caho nilnilen malo dama sikawdan i, samanay miremo to matoleday a falocoˈ hani? Sanay cingra: “Misamacay kako midemak to madangaray demaken a demak, tinakoen misaˈicel mitosil, itini saˈopo mikifalocoˈ a pacaˈof. Panganganho kako tayra i Pitil matayal, hanaca saka tosa miheca milifokay to pihayda.”

13. Misarocod ko falocoˈ iso to tayal nohatini papaira to maanan ngaˈayay minaroˈan? (Patnakay 2:24)

¹³ Misarocod ko falocoˈ iso to tayal nohatini, wa milifok to adihayay ˈinorong no ikor han? Hatira alatek, mahaenay ci Nike. Kawra soˈlin mahaen ci Milisaan eca ka ngaˈay itini kaolahan no niyah a matayal, wa kamayan a lipahak kiso, marenec ko falocoˈ. (ˈOsien ko Patnakay 2:24.) Cowa ka hatini aca, mafanaˈay kiso o mihadakan no niyah pakahemekay to tawki ita ci Yisan, madeng o mamarenec ko falocoˈ.

14. Patireng to patosokan i, haharatengen ko maanan?

¹⁴ Misamacay kita midemak to aniniay a tayal, o tatodong i cowa ko mamikilim kita to toki misaadihay to tayal saki Yihofaan han? Cowa ka hatira. Wa papatireng kita to patosokan, mihaen ngaˈ padadotoc macakat, malo sangaˈayay a mitosilay ato sangaˈayay a singsi no Fangcalay Cudad, patado to salikaka midemak to adihayay a demak. Haharatengen, misaˈicel padama to tao eca ka pisaareteng to niyah, mihaen o citanengay ato misamimingay a pakayraan. Mihaen ko demak ita, wa ngaˈay malaˈosi ko patosokan.—Taneng 11:2; Dmak 20:35.

15. Patireng to maanan patosokan wa ngaˈay patongal to lipahak iso a matayal?

¹⁵ Wa ngaˈay kiso patireng to manan a patosokan hani? Cangacangen ci Yihofa padama tisowanan mihapinang o maanan a demak ko mamadangar iso nohatini. (Taneng 16:3; Yakop 1:5)  Satapangan no lalakaw masowalay ko pina patosokan, mahawpay ko malo padamaay misakafahay anca miceriday misakafah, matayal i Pitil, mirienang to patirengay a tayal. Wa ngaˈay malaˈosi iso ko cecay han? Wa ngaˈay minanam tano roma sowal a mitosil, anca malinah tayra roma ko sowal a kilac matayal. Pakayni toniya patosokan, sakafanaˈaw kiso to adihayay lalakaw, ngaˈayay milomal to Malikakawa Midofdof to Araaw ni Yihofa saka 10 fedengan, ngaˈayay masasowal to malohemay malitengay. * Pasayra kiso i patosokan a misaˈicel, wa mahapinang ko kacakat, wa matongal ko lipahak.

16. Ano caka ngaˈay malaˈosi nohatini ko cecay patosokan, wa samaan ko hademak?

¹⁶ Oniya fafekangay masowalay a patosokan, ano cowa ko mamalaˈosi iso nohatini, sasamaan ko demak hani? Ngaˈayay miharateng kiso o maanan a patosokan ko ngangaˈay malaˈosi iso nohatini, iraay ko tinakoan i laeno.

17. Mikitini 1 Timoti 4:13, 15, o faˈinayan salikaka sasamaan pacakat to inaneng a pasifanaˈ hani?

 ¹⁷ ˈOsien ko 1 Timoti 4:13, 15. Ano micadaayto kiso to paputisem faˈinayan a salikaka, ngaˈayay misaˈicel pacakat to inaneng caciyaw ato pasifanaˈ. Hano o ngaˈayay a patosokan konini hani? Samanen itini piasip, caciyaw ato pipasifanaˈ padotoc a macakat kiso, wa taˈangay ko sapadama to tao. Wa ngaˈay kiso misarocod a minanam ato misaka dademak to Sarocoden Miasip ato Pasifanaˈ lalakaw noniya cudad, kinacecay cecayen fedengan ko nanamen, itini lomaˈ misongilaˈ mihatatanam, ikor itini pikimadan saka dademaken ko mananamay a kalimlaan. Ngaˈayay licayen iso ko mikiriwiˈay a singsi, ato mafanaˈay caciyaw ato pasifanaˈ a malohemay malitengay, mitengil to sapaini nangra. * (1 Timoti 5:17) Aka o pacakat aca to inaneng ko haratengen, haratengenho sasamaan mitongal to pakasoˈlin no mitengilay, pakalalok cangranan a midemak. Mihaen ko demak iso, o papatongal to lipahak no niyah ato tao.

18. Wa samaan kita malaˈosi ko saka inanengaw mitosil a patosokan?

¹⁸ Mitosil ato pasifanaˈ to tamdaw o kalimlaan a ˈinorong no Krisciyang. (Matay 28:19, 20; Loma 10:14) Makalimay kiso matongal ko kangaˈay noniya demak han? Ngaˈayay kiso misongilaˈ micekiw to Sarocoden Miasip ato Pasifanaˈ, hanaca patireng to patosokan misaka dademak to minanaman. Mitosilay ato Nikaˈorip Rayray no Saˈopo ato tenok no lipay a saˈopo sakasasowal a taˈarawan a ika, adihayay ko ciepocay a sapaini. Ngaˈayay tanamen iso a misaka dademak koniya sapaini, minengneng o manan ko sangaˈayay. Mihaen, o mamalo  ngaˈayayto a mitosilay ato singsi no Fangcalay Cudad kiso, wa ngaˈayho mikitini mitosilay a tayal milifok to taˈangayay a karenec.—2 Timoti 4:5.

19. Sasamaan kiso palahad to kaolahan no Kawas a capeling?

¹⁹ Aka mapawan, iraay ko cecay kalimlaan a patosokan o mamalaˈosi no kahacecay tamdaw, palahad to kaolahan no Kawas a capeling. (Kalatiya 5:22, 23; Kolosay 3:12; 2 Pitiro 1:5-8) Wa ngaˈay samaan ko demak iso hani? Tinakoen, ano sapitongalaw kiso to pakasoˈlinay falocoˈ, ngaˈayay minengneng to milingatay tonini a mitepangan lalakaw, i lalomaˈ adihayay ko ciepocay a sapaini. Itini JW Tilifi adihayay kamotoˈay ika iraay ko nalifetan no salikaka, itini masakenaay a sapalifet paihkalay cangra to mikiriwiˈay a pakasoˈlin, ngaˈayay haratengen iso sasamaan mitodong to ngaˈayay taˈarawan nangra.

20. Ano makalimay matongal ko lipahak, malowan ko matoleday a falocoˈ, sasamaan ko demak hani?

²⁰ Kita maemin makalimay sapitongalaw to demak ci Yihofaan, o roma patosokan cowa ko mamalaˈosi nohatini alatek, kawra itini faelohay hekal wa awato ko kihcod a saconged. Kawra, nohatini wa ngaˈay kita mimetmet to kahacecay a toki matayal saki Yihofaan, mihaen o ngangaˈay malowan ko matoleday a harateng, hanaca matongal matongal ko lipahak. O kalimlaan i, wa ngaˈay kita paˈdil to ‘lipahakay a Kawas’ ci Yihofaan. (1 Timoti 1:11) Nanay o kahacecay tamdaw wa ngaˈay kita mahela ko lipahak i katayalan nohatini.