CACEKIWEN LALAKAW 32
Padadotoc Mitongal to Pakasoˈlinay Falocoˈ i Misangaˈay a Tatapangan
O pakasoˈlinay falocoˈ o ihkalay wacay no cowa kaˈaraw a demak.—HIPRAY 11:1.
RADIW 15 Maamaan Masangaˈay Paihkalay to ˈOdingar ni Yihofa
KALIMLAAN NO LALAKAW *
1. Pakayni Misangaˈay a Tatapangan, mananamay iso ko manan hani?
O PARO no lomaˈ iso ano iraay ko Misawacayay Tamdaw ni Yihofa, kaemangho kiso mafanaˈayto ci Yihofaan alatek, mafanaˈay to Cingra ko Misangaˈay to maamaan, iraay ko adihayay makapahay a capeling, noikor o papalakoing to polong a cikiw.—Satapangan 1:1; Dmak 17:24-27.
2. Harateng no roma tamdaw, samanay a tamdaw ko pakasoˈlinay to iraay ko Misangaˈay a Tatapangan?
2 Kawra, cowa pakasoˈlin ko ˈalomanay a tamdaw to iraay ko Kawas, cowaho pakasoˈlin to o Cingra ko Misangaˈay to maamaan. Harateng nangra fahal sanay ira ko ˈorip, dotocto palidlid sanay ko kantangay a pinaˈorip malo pasangaray a pinaˈorip. O mahaenay ko harateng a tamdaw micadaay to ˈakawangay picudadan, harateng nangra misawacayay ko kakak to mararaway ko Fangcalay Cudad, oyaan aca malonayay, awaay ko taneng poeneray ko picudadan a tamdaw, ngaˈ pakasoˈlinay to iraay ko Misangaˈay a Tatapangan.
3. Mitongal to pakasoˈlinay falocoˈ no niyah to Misangaˈay a Tatapangan hano masakalimlaan hani?
3 Wa pakayni kita i sowal no citanengay a tamdaw, cisasaay to cowa ko ci Yihofa ko Misangaˈay a Tatapangan han? Misalalangiay konini to hano pakasoˈlin kita to ci Yihofa ko Misangaˈay to maamaan. Pakasoˈlin kita samanen sanay ko sowal no tao, anca mikilimay ko niyah to wacay han? (1 Korinto 3:12-15) Ano hakowa to ko halafin ita malo Misawacayay Tamdaw ni Yihofa, wa padadotoc mitongal to pakasoˈlin no niyah, ngaˈ caay ka maorat no ‘pakatamdaway a harateng ato awaay ko epoc a sasowalen.’ (Kolosay 2:8; Hipray 11:6) Sapipadamaaw kitanan mihaen ko demak, oniya lalakaw wa milengo: (1) ˈAlomanay tamdaw hano caka pakasoˈlin to iraay ko Misangaˈay a Tatapangan hani? (2) Sasamaan kiso ngaˈ matongal ko pakasoˈlinay falocoˈ to Misangaˈay a Tatapangan? (3) Sasamaan kiso nagˈay padadotoc tanektek ko pakasoˈlinay a falocoˈ?
ˈALOMANAY TAMDAW HANO CAKA PAKASOˈLIN TO IRAAY KO MISANGAˈAY A TATAPANGAN
4. Mikitini Hipray 11:1 ato roma pihongyak, o pakasoˈlinay a falocoˈ misalalangiay to maanan?
4 Harateng no roma tamdaw, pakasoˈlin to Kawas o pakasoˈlinay to awaay ko wacay a demak. Kawra sanay ko sowal no Fangcalay Cudad, cowa ko soˈlinay a pakasoˈlinay falocoˈ konini. (ˈOsien ko Hipray 11:1 ato roma pihongyak.) Sowal no sinael, o pakasoˈlinay falocoˈ ‘o ihkalay wacay no cowa kaˈaraw a demak.’ Pakasoˈlin kita ci Yihofaan, ci Yisan ato Hongti Kitakit i kakarayan o cowa kaˈaraw, kawra o pakasoˈlin ita misalalangiay to mamalaˈosi a wacay. (Hipray 11:3) Cecay salikaka mikingkiway to pinaˈorip a kakakosiya, sanay cingra: “O pihakelongan no Misawacayay Tamdaw ni Yihofa cowa ko patelasay, matatodongay to kakakosiya.”
5. Harateng no ˈalomanay tamdaw hano awaay ko Misangaˈay a Tatapangan saan hani?
5 Saan kita miharateng alatek: Ano iraay ko mamalaˈosi a wacay misawacay to o Kawas ko Misangaˈay to maamaan, hano caka pakasoˈlin ko ˈalomanay tamdaw hani? Cecay lalangian i cowa pikilim cangra to wacay. Ci Ropote o Misawacayay Tamdaw ni Yihofa, sanay cingra: “Cowa pasifanaˈ ko picudadan to misangaˈan sanay a sowal, mansa awaay ko misangaˈay saan kako miharateng. 22 ko mihecaan ako i malitemohay ko Misawacayay Tamdaw ni Yihofa, itiyaay a mafanaˈ to matatodongay ko sowal no Fangcalay Cudad, iraay ko ciˈicelay a wacay, misawacay to o Kawas ko misangaˈay to maamaan.” *—Nengnengen ko sapatongal lalakaw “ Kalimlaan Sapatalipaˈelal to Wama Wina.”
6. Hano caka pakasoˈlin ko roma tamdaw to iraay ko Misangaˈay a Tatapangan?
6 Sowal no roma tamdaw o maˈaraway aca a dafong ko pakasoˈlinan nangra, mansa cowa ka pakasoˈlin to iraay ko Misangaˈay a Tatapangan. Kawra pakasoˈlinay cangra to cowa kaˈaraw a dafong. Tinakoen misolotay a ˈicel, samanen adihayay a wacay misawacayay to iraay ko misolotay a ˈicel. Mikitini Fangcalay Cudad, pakasoˈlin to ‘cowa kaˈaraw a dafong,’ o pakasoˈlinay to cowa kaˈaraw a dafong kawra soˈlinay a ira, misaaliay to wacay. (Hipray 11:1) Manaokaniw, mikilim to wacay misaaliay to toki ato ˈicel, kawra ˈalomanay tamdaw cowa ka kahi mihaen to demak. Cecay tamdaw ano caka pinengneng to wacay ko niyah, awaay ko Misangaˈay a Tatapangan wa saan miharateng alatek.
7. Polong ˈakawangay ko picudadan a tamdaw sahtoay o cowa pakasoˈlin to iraay ko Misangaˈay a Tatapangan han? Tadtaden.
7 Ikor no misongilaˈ mikilim to wacay, o roma kakakosiya pakasoˈlinay o Kawas ko misangaˈay toniya dohaw. * O roma tamdaw malecaday ci Ropotean, i saˈayaw cowa pakasoˈlin to iraay ko Misangaˈay a Tatapangan, samanen cowa pasifanaˈ ko taykak to misangaˈay a demak. Kawra ikorto mafanaˈay cangra ci Yihofaan, maolahayho Cingranan. Ano samanayto ko picudadan ita, o papalecaden toniya kakakosiya a mikilim to wacay, mitongal to pakasoˈlin to Kawas, o cowa ko ngangaˈay ko tao patado kitanan a midemak.
SASAMAAN MATONGAL KO PAKASOˈLINAY FALOCOˈ TO MISANGAˈAY A TATAPANGAN
8-9. (1) Nohatini wa milengo kita to maanan? (2) Mikingkiw to kasapaan a maamaan wa ira ko maanan sapadama kitaanan?
8 Sasamaan kiso ngaˈ matongal ko pakasoˈlinay falocoˈ no niyah to Misangaˈay a Tatapangan? Nengnengen ita ko sepat a pakayraan.
9 Mikingkiw to kasapaan a maamaan. Pakayni pisongilaˈ mihapinang to pinaˈorip, pinaloma ato foˈis, wa ngaˈay kiso mitongal to pakasoˈlin to Misangaˈay a Tatapangan. (ˈOlic 19:1; Isaya 40:26) Ano micalep kiso a mikingkiw, wa matongal ko pakasoˈlin oniya kihcod sahtoay o Misangaˈan ni Yihofa. O mitepangan ita a cudad adihayay lalakaw somowalay to kasapaan a maamaan noniya dohaw. Aka pakayni ka eca ka cipinang, hawad saan a minengneng. Sarocoden a minanam, wa ira ko mananamay. I ngata mihecaan a kasapala taykay, adihayay ko misangaˈan no likakawa misiwkayay to kasapaan a maamaan a ika, ngaˈayay kiso micerid tayra jw.org wangcan a minengneng.
10. Tinakoen mitadtad, o kasapaan a maamaan misawacayay to iraay ko Misangaˈay a Tatapangan. (Loma 1:20)
10 Ano mihapinang kiso to kasapaan a maamaan i, haratengen koniya wacay paihkal to masamanay ko Misangaˈay a Tatapangan ita. (ˈOsien ko Loma 1:20.) Tinakoen, mafanaˈay kiso alatek, o cidal cowa ko pihadak aca to misaalian no ˈorip a tedi ato faedet, mihadakayho to mamipalak to tireng no tamdaw a maloloay a tedi. Samanay kita a madipot hani? Itini papotal no cikiw iraay ko mitahpoay a sapidipot, o coyangcen hananay, ngaˈay misefsef to tatiihay a tedi. Ano taˈangay ko mihadakan no cidal a maloloay tedi, matongalay ko adihay no coyangcen. Haratengen iso koniya pisafaco coko iraay ko Misangaˈay a Tatapangan, hanaca iraay ko olah ato citanengay han?
11. Wa ngaˈay kiso icowa mikilim to adihayay wacay to pakayniay pisangaˈ no Kawas to maamaan? (Nengnengen ko sapatongal lalakaw “ O Paˈicelay to Pakasoˈlin no Falocoˈ a Lalakaw.”)
11 Wa ngaˈay kiso tano Pirorodan to Mitepangan Cudad no Mikecolay anca tayra i jw.org wangcan, mikilim to adihayay a wacay to pakayniay misangaˈan no Kawas a maamaan. Tinakoen, ngaˈayay nengnengen ko “Iraay ko Misangaˈay Han?” Madadoedoay lalakaw ato ika, oniya lalakaw kantangay ko pitadtad to kasapaan a pisangaˈ to pinaˈorip ato pinaloma. Somowalayho ko lalakaw, samanay ko kakakosiya mikitini serayan mitodong a misangaˈ to faelohay a dafong.
12. Ano micekiw kita to Fangcalay Cudad kiriwiˈen a misinanot ko maanan?
12 Micekiw to Fangcalay Cudad. O masowalay i fafekang mikingkiway to pinaˈorip a kakakosiya salakat cowa pakasoˈlin to iraay ko Misangaˈay a Tatapangan, kawra ikorto pakasoˈlinay, sanay cingra: “O pakasoˈlin ako to Kawas cowa ko pikingkiw aca to kakak, pakayniay pisongilaˈ micekiw to Fangcalay Cudad a mapatireng.” Soˈlin mafanaˈayto kiso to Fangcalay Cudad, o papadotocho a micekiw to kimad no Kawas, padotoc a mitongal to pakasoˈlin to Misangaˈay a Tatapangan. (Yosuwa 1:8; ˈOlic 119:97) Kiriwiˈen a misinanot, o Fangcalay Cudad pakayni maˈoningay i likisi a demak tada ngaˈayay tadiˈecen, o sapairasol no Fangcalay Cudad matatodongay a malaˈosi, o lalakaw no Fangcalay Cudad awaay ko mararaway. Mihaenay, wa ngaˈay kiso pakasoˈlin iraay ko ciolahay citanengay a Misangaˈay a Tatapangan misangaˈ kitaanan, o Fangcalay Cudad Cingra ko mikayatay to tamdaw a mitilid. *—2 Timoti 3:14; 2 Pitiro 1:21.
13. Hadaken ko tinakoan mitadtad citanengay ko safalod no Fangcalay Cudad.
13 Micekiw to Fangcalay Cudad i, ka kiriwiˈen misinanot ko ilalomaˈay a sapaini tada ciepocay. Tinakoen, iti:yaho palimoˈotayto ko Fangcalay Cudad, maˈanofay to payci tatiihay i tamdaw, pairaay to ‘adihayay roray.’ (1 Timoti 6:9, 10; Taneng 28:20; Matay 6:24) Oniya sarikec matatodongayho anini han? O cecay pakayniay waywayan nokaˈorip no aniniay a tamdaw a cudad sanay: “Micangacangay to dafong a tamdaw cowa ka lipahak, ao madoloay matoled ko falocoˈ. O cecay tamdaw ano haharateng saan sapietanaw to adihayay payci, mafiyorayto ko nafalocoˈan, o tireng ningra wa adihay ko adada.” Mansa, patalipaˈelal ko Fangcalay Cudad aka maˈanof to payci tada citanengay! Maharatengay iso ko roma safalod no Fangcalay Cudad ngaˈayay padama tisowanan han? Misongilaˈ kita misimsim to sapaini no Fangcalay Cudad tada ciepocay, wa matongal ko pakasoˈlin to Misangaˈay a Tatapangan, pakasoˈlin to taneng Ningra o papakaremo to sapalifet no halafinay a toki. (Yakop 1:5) Misaka dademak kita to sapaini no Fangcalay Cudad, o mamatongal ko lipahak no kaˈorip.—Isaya 48:17, 18.
14. Pakayni ci Yihofaan, mikitini Fangcalay Cudad ngaˈay mahapinang ita ko maanan?
14 O matatodongay a patosokan micekiw to Fangcalay Cudad, misarocod a mafanaˈ ci Yihofaan. (Yohani 17:3) Ano micekiw to Fangcalay Cudad i, wa mafanaˈ kiso to masakenaay a makapahay capeling ni Yihofa, oniya capeling malecaday o mahapinangay iso i misangaˈan a maamaan. Mafanaˈ to capeling ni Yihofa wa padama tisowanan pakasoˈlin to iraay materek Cingra, mafanaˈ to cowa ko miharatengan aca no tamdaw Cingra. (Kasadakan 34:6, 7; ˈOlic 145:8, 9) Matongal ko kafanaˈ iso ci Yihofaan, wa matongal ko pitadiˈec ato kaolah Cingranan, wa tanektek ko kalawidang Cingranan.
15. Pasowalen ko tao pakasoˈlinay kiso to iraay ko Kawas, pakayni tisowanan wa ira ko manan a epoc hani?
15 Pasowalen iso ko tao hano pakasoˈlin kiso to iraay ko Kawas. Mihaen ko demak iso, wa matongal ko tanektek no pakasoˈlin no niyah. Ano cisasa ko tao to iraay ko Kawas, kawra eca ka fanaˈ kiso samaan ko caˈof, sasamaan ko hademak hani? Wa ngaˈay kiso itini mitepangan mikilim to caˈof no Fangcalay Cudad, ikor pasowalen kora tamdaw. (1 Pitiro 3:15) Wa ngaˈay kiso mitahidang to iraay ko nalifetan a salikaka padama tisowanan. Misarocod kiso micekiw to lalakaw, soˈlin eca picada ko tao, wa matongal ko tanektek no pakasoˈlin no niyah. Ano samaanto ko sowal no sao citanengay a tamdaw, o pakasoˈlin iso to Misangaˈay a Tatapangan cowa ko mamangiyangi.
PADADOTOC TANEKTEK KO PAKASOˈLINAY A FALOCOˈ
16. Ano eca ka padadotoc mitongal to pakasoˈlin ci Yihofaan, wa ira ko manan pasangaray hani?
16 Ano hakowato ko halafin ita midoko ci Yihofaan, wa padadotoc mitongal to pakasoˈlin ci Yihofaan, misamanay? Samanen ano misakahmaw ko falocoˈ ita, wa malonay ko pakasoˈlinay a falocoˈ. Haharatengen, o pakasoˈlinan ita o cowa kaˈaraw a soˈlinay a demak. Samanen cowa kaˈaraw, mansa wa madolo a mapawan. Mansa mihaen ko sowal ni Pawlo, cangoˈotay ko pakasoˈlinay a falocoˈ o ‘mamifedfed kitanan a raraw.’ (Hipray 12:1) Mihaenay, sasamaan kita ngaˈ padadotoc tanektek ko pakasoˈlinay a falocoˈ hani?—2 Tisalonika 1:3.
17. O maanan ko papadama kitaanan padadotoc tanektek ko pakasoˈlinay falocoˈ?
17 Salakat, padadotoc micangacang ci Yihofaan pafeli to fangcalay saocor kitaanan. Misamanay hani? Samanen o pakasoˈlinay falocoˈ o minaroˈan no fangcalay saocor. (Kalatiya 5:22, 23) Ano awaay ko sadama no fangcalay saocor, ecato ka ngaˈay kita mitongal ato padotoc pakasoˈlin to Misangaˈay a Tatapangan. Ano padadotoc kita micangacang, o papafeli Cingra to fangcalay saocor kitaanan. (Luka 11:13) Itini satolon wa ngaˈay haenen ko sowal ita: ‘Nanay tongalen Iso a paˈicel ko pakasoˈlin no falocoˈ niyam.’—Luka 17:5.
18. Anini iraay ko maanan mikiriwiˈay a sapalemed kitaanan hani? (ˈOlic 1:2, 3)
18 Dotoc, micerid micekiw to Fangcalay Cudad. (ˈOsien ko ˈOlic 1:2, 3.) Maharek mitilid toniya ˈOlic i, cowa ka hakowa ko Israil tamdaw to iraay ko polong a Sarikec cudad ni Yihofa, tinakoen o hongti aca ato saysi. O roma tamdaw, milimasmasay ko Kawas to tamdaw pito miheca kinacecay miasip to Sarikec a cudad, ho ngaˈay mitengil ato minanam ko polong faˈinayan, fafahiyan, wawa ato ˈalafang tamdaw. (Limoˈot 31:10-12) Itini lintad ni Yis, ˈalomanay tamdaw awaay ko matiliday a Fangcalay Cudad, itini kasaˈopoan ngaˈ maasipay ko Fangcalay Cudad. Cowa kalecad ko pakayraan anini, ngaˈayay pakaˈosi ko ˈalomanay tamdaw to Fangcalay Cudad, tada kalipahakanto konini. Wa ngaˈay kita samaan ko demak, paihkal to misalimlaay kita toniya sapatelong hani?
19. Sapadadotocaw tanektek ko pakasoˈlinay falocoˈ, o sasamaan ko hademak ita?
19 Ano misalimlaay kita to Fangcalay Cudad, o mamicerid a micekiw. O papadeteng kita milimasmas to toki, cowa ko mamitala to kairaan no toki ngaˈ mihaen to demak. Palahad kita to nanaman micekiw to Fangcalay Cudad a tahatolas, o ngangaˈay padadotoc tanektek ko pakasoˈlinay falocoˈ.
20. Wa misetek kita to falocoˈ samaan ko demak hani?
20 Cowa kalecad to ‘citanengay, iraay ko sifanaˈ a tamdaw’ no hekal, tanektekay ko pakasoˈlin ita to Misangaˈay a Tatapangan, hanaca o pakasoˈlin ita misalalangiay to Fangcalay Cudad. (Matay 11:25, 26) Pakayni picekiw to Fangcalay Cudad, mafanaˈay kita to hano malingad ko tatiih ko pakayraan noniya hekal, mafanaˈayho sasamaan ko demak ni Yihofa. Mihaenay, nanay misetek kita to falocoˈ, padadotoc mitongal to pakasoˈlin no niyah, misarocodho a padama to ˈalomanay tamdaw pakasoˈlin to Kawas ci Yihofaan. (1 Timoti 2:3, 4) Nanay padadotoc kita fanekfek mitala to faelohay hekal, maraod ko toki polong no hekal a tamdaw wa taˈangay ko ngiha a pakahemek ci Yihofaan a pasowal: ‘Yihofa Kawas niyam, citatodongay kiso paˈdilen. . . samanen Kiso ko misangaˈay to kihcod.’—Paˈarawan 4:11.
RADIW 138 Ci Yihofa ko Ngangan Iso
^ 5段 Paihkalay ko Fangcalay Cudad ci Yihofa ko Misangaˈay to maamaan no kakarayan ato sera, kawra cowa ka pakasoˈlin ko ˈalomanay tamdaw tonini, harateng nangra fahal sanay ira ko ˈorip. O mamisaˈicel kita mitongal to pakasoˈlin no niyah to Kawas ato Fangcalay Cudad, hoeca ka mafiyor nangra. Oniya lalakaw wa milengo sasamaan kita mitongal to pakasoˈlinay falocoˈ.
^ 5段 O singsi no adihayay picudadan cowa pasifanaˈ to iraay ko misangaˈay, samanen harateng no roma singsi mihaen to demak o pacieciay to micudaday pakasoˈlin to kiyokay.
^ 7段 Wa ngaˈay kiso tano Pirorodan to Mitepangan Cudad no Mikecolay mahela ko caˈof no 60 kakakosiya, pakasoˈlinay cangra o Kawas ko misangaˈay to maamaan. Salakat kilimen ko “Kakak,” dotoc kilimen ko “pakasoˈlinay ko kakakosiya to misangaˈay.” O roma a caˈof ngaˈayay sakadademaken ko Pirorodan to Mitepangan Cudad no Misawacayay Tamdaw ni Yihofa mikilim, salakat kilimen “Kakak ato Tingnaw,” dotoc kilimen “Milicayay to Tamdaw (Katalipaˈelal!).”
^ 12段 Nengnengen ko Katalipaˈelal! 2011 miheca 2 folad “O maˈoningay no Fangcalay Cudad Matatodongay to Kakak Han?” ato Mikecolay 2008 miheca 1 folad 1 romiˈad “O Sapairasol ni Yihofa Malaˈosiay Maemin” oniya tosa lalakaw.
