1-2. Mikitini ˈOlic 34:8, sasamaan ko demak ita ngaˈay malifet ko kangaˈay ni Yihofa?

ANO ira ko pakaenay tisowanan to cowaho tahakaen kiso a dateng, salakat wa ngaˈay nengnengenho iso, mihanek, cipinang to samanay mitangtang toniya dateng, anca licayen ko tahakaenayto a tamdaw. Kawra, ano sapisaˈosiaw kiso to maolahay ko niyah hokira, dengan a pakayraan i, o niyah ko mitanam a komaen.

² Micekiw kita to Fangcalay Cudad ato mitepangan a cudad, anca mitengil to sowal no salikaka malifokay nangra ko maanan sapalemed, wa ngaˈay mahapinang soˈlinay ko kangaˈay ni Yihofa. Kawra o ‘mamilifet’ a mihapinang kita, ngaˈ mafanaˈ to hakowaay ko kangaˈay ni Yihofa. (ˈOsien ko ˈOlic 34:8.) Sasamaan ko hademak ita hani? Tinakoen, makalimay kita mirienang to cecay mieminay to toki a tayal, sakalaˈosiaw noniya patosokan, o kakantangen ko kaˈorip ita. Mafanaˈay kita na somowalay ci Yis, ano salakat a micangacang to Hongti Kitakit, o papafeli ci Yihofa to misaalian ita a kihcod, kawra cowaho ka tahalifet kita tonini alatek. (Matay 6:33) Nikawrira, ano paihkal kita to pakasoˈlinay falocoˈ, milowan to tayal ato mapalakay payci, misamacay mitosil, telocto o mamatinako ko pidimokos ni Yihofa, itiya wa soˈliˈlinto a ‘malifet’ ita ko kangaˈay Ningra.

3. Itini ˈOlic 16:1, 2 pahapinangay kitaanan mikiriwiˈay ci Yihofa mikangaˈay to masamanay a tamdaw?

³ Ci Yihofa ‘mikangaˈayay to ˈalomanay tamdaw’ mahawpay ko cowa ka fanaˈ Cingranan a tamdaw. (ˈOlic 145:9; Matay 5:45) Kawra mikiriwiˈay ci Yihofa misaadihay a palemed toya maolahay, misarocoday matayal saki Cingranan a tamdaw. (ˈOsien ko ˈOlic 16:1, 2.) Nohatini nengnengen ita ko pina sapalemed.

4. Samanay ci Yihofa mikangaˈay to misaˈicelay miingid Cingranan a tamdaw?

 ⁴ Ano misaka dademak kita to mananamay i, mahapinangay o sapasifanaˈ ni Yihofa ngaˈayay misalof to kaˈorip ita. Tinakoen, i salakat o adihayay harateng ita ato waywayan cowa ko kaolahan ni Yihofa, kawra palidlid saan mafanaˈ kita Cingranan ato maolah Cingranan, padamaay kitaanan palidlid saan a mafalic. (Kolosay 1:21) Ikor no patafang to tireng ato micada to paputisem kita, pafeliay ci Yihofa kitaanan to makoracay a falocoˈ, ngaˈayto kita malo widang Ningra, macakatay ko pilifet a mahapinang ita to kangaˈay ni Yihofa.—1 Pitiro 3:21.

5. Ano mitosil i, samaan kita milifet a mihapinang to kangaˈay ni Yihofa?

⁵ Ano mirienang kita to mitosilay a tayal i, wa malifet a mahapinang ko kangaˈay ni Yihofa. O kalingodoay a tamdaw kiso han? Mahaenay ko ˈalomanay salikaka. Itini ˈayaw no malo Misawacayay Tamdaw ni Yihofa kiso, caay ka harateng to papakalomalomaˈ a mitosil ko niyah, pasowal to cowa ko kafanaˈan a tamdaw to cowa ko kaolahan no ˈalomanay tamdaw a lihaf. Kawra itini sapadama ni Yihofa, anini coko picerid aca mihaen to demak, maolahayho to mitosilay a tayal! Itini roma pakayraan padamaay ci Yihofa tisowanan: Ano tatiih ko waywayan no tao, padamaay Cingra rihaday ko falocoˈ iso, eca kakahi ko tao mitengil, padama tisowanan miharateng to matatodongay a sinael paladaˈ to tao, ano eca kakahi ko tao mitengil, pafeliay Cingra to ˈicel tisowanan padadotoc a tanektek.—Yirimiya 20:7-9.

6. Misamanay, o pipahatatanam ni Yihofa kitaanan to mitosilay tayal o paihkalay to kangaˈay Ningra?

⁶ Pahatatanamay ci Yihofa kitaanan mitosil i tamdaw, paihkalay konini to kangaˈay Ningra. (Yohani 6:45) Itini mitosilay ato kaˈorip a saˈopo, matengilay ita ko adihayay ngaˈayay sakasasowal a sapaini, pakalalokay ko likakawa kitaanan misaka dademak to mananamay. Salakat cowa ka timolo kita mitanam misaka dademak to faelohay pakayraan mitosil, kawra satimolo saan kita a mihaen to demak, mahapinangay tada ciepocay. O kamok no saˈopo ato taykay marariday pakalalok kitaanan mirienang to masakenaay a pakayraan misawacay, mangalef ko cowaho ka tanamen ita. Salakat marawraway kita alatek, kawra misaˈicel kita a midemak, pairaay to toki no niyah milifok to sapalemed ni Yihofa. Ano samaanto ko pakayraan, ano misaˈicel kita mikilim to faelohay pakayraan a matayal saki Yihofaan, patafang to sangaˈayay Cingranan, o papalemed Cingra. Dotoc milengo kita to pina sapalemed, ato iraay ko maanan pakayraan mitongal to tayal saki Yihofaan.

7. Misarocod kita matayal saki Yihofaan, wa milifok to maanan sapalemed?

⁷ Matongal ko piingid ci Yihofaan. Nengnengen ko nalifetan ni Samuil. * O malohemay malitengay cingra, malacafayay to fafahi matayal i Koronpiya. Na itiniay cangra i nalacolan a kasakopang lipahakay misakafah, kawra iraay ko cecay a patosokan nangra, malinah tayra i misaaliay to adihayay a mitosilay a kilac a matayal. Sapilaˈosiaw toniya patosokan, misaaliay cangra to kakinafalah. Sanay ci Samuil: “Mitooran niyam ko safalod no Matay 6:33 midemak, o cecay dademaken i, hamaanto miˈaca to cowa ko kalimlaan a dafong. Kawra, tangoˈolay kami miliyas to lomaˈ no niyah, samanen mitooray to kaolahan niyam a misafaco konini, hanaca awaay ko kiyam.” Malinah tayra i faelohay a kilac ikor, mahapinangay nangra edengan miming aca ko payci maedengto sakaˈorip. Sanay ci Samuil: “Maˈaraway niyam samanay ci Yihofa mikayat tamiyanan ato pacaˈof  to satolon niyam, na cowaho ka mahaen o aniniay tangongol ko pitinako niyam to olah ato pihayda ni Yihofa.” Ngaˈay kiso mitongal to tayal saki Yihofaan han? Ano mihaen ko demak iso, maedeng o mamatongal ko piingid ci Yihofaan. Ngaˈay kiso pakasoˈlin to mamidimokos Cingra tisowanan.—ˈOlic 18:25.

8. Mikitini nafalocoˈan ni Iwan aci Fitoliya mananam iso ko maanan?

⁸ Mikitini katayalan milifok to lipahak. Itiniay Kirekistan ko lomaˈ ci Iwan aci Fitoliya, malacafayay malo misakafahay mararamod. Kantangay ko kaˈorip nangra, mihaen ano ira ko mipatirengay ato roma saali no likakawa, wa ngaˈay cangra tangsolsa pangangan. Tengilen ko nafalocoˈan nangra hena, sanay ci Iwan: “Misarocoday kami dademak to kahacecay tayal, soˈlin mahererek ko tayal to cecay romiˈad tada malotayay, kawra mafanaˈ to misaˈicelay ko niyah a matayal to tayal no Hongti Kitakit, tada lipahakay ko falocoˈ, tada marenecay. Roma i, kalacafayay kami to ˈalomanay a faelohay widang, iraay ko adihayay a makapahay a nalifetan, mansa tada kahemekanto.”—Marko 10:29, 30.

9. Sapitongalaw to tayal saki Yihofaan, cowa ko madoloay ko pakayraan a fafahiyan salikaka samanay ko demak hani? Samanay ko minaroˈan aki?

⁹ Misaˈicel kita matayal saki Yihofaan, soˈlin cowa ko madoloay ko pakayraan, kamayanho a mahela ko lipahak. Itiniay i Kaetipan a Afrika ci Milon o mahaenay, matoˈasayto cingra, awaayto ko faˈinay. Salakat o ising cingra, misawad matayal misatapangay malo misakafahay. Samanen pakidemay ko adada no pokoh, ano pakalomalomaˈ mitosil cecayay aca tatokian, ano mirienang to pakaˈalomanay a pisawacay, koˈedaway ko toki to miming. Adihayay ko lalisoˈen ningra, misikayay to adihayay pacekiwan, o roma tamdaw pakayniay i tingwa a minanam to Fangcalay Cudad. Hano makalim ci Milon adihay ko tayal saki Yihofaan hani? Sanay cingra: “Tada maolahay kako ci Yihofaan aci Yisan, miceriday kako a micangacang ci Yihofaan padama takowanan misaadihay to tayal Cingranan.”—Matay 22:36, 37.

10. Mikitini 1 Pitiro 5:10, oya misarocoday mitongal to tayal saki Yihofaan a tamdaw wa milifok to maanan?

¹⁰ Milifok to sapatongal ni Yihofa a sapahatatanam. Ci Kenni itiniay Molisise malo misakafahay, mahaenay ko pakayraan ningra. Ikor no mafanaˈ cingra to soˈlinay kimad, misetekay to falocoˈ misawad to taykak. Micada cingra to paputisem, mirienangay to mieminay to toki a tayal. Sanay ci Kenni: “Sowal no pairasolay ci Isaya: ‘Ini kako, ocoren kako!’ Makalimay kita minanam to taˈarawan ningra.” (Isaya 6:8) Ikor, mirienangay ci Kenni to patirengay a tayal, padamaayho to mihongyakay a tayal, mihongyak to cudad malo sowal no wina. Sanay cingra: “Micadaay kako to ngaˈayay sapahatatanam, mananamay ko adihayay inaneng.” Kawra, o mananamay ningra cowa ko inaneng aca. Sanay cingra: “Mafanaˈay kako citolasay ko ˈicel no niyah, mahapinangayho papalahad ko niyah to maanan capeling, ngaˈ matongal ko ngaˈay no katayal saki Yihofaan.” (ˈOsien ko 1 Pitiro 5:10.) Samanay ko pakayraan iso hani? Wa ngaˈay kiso mikilim to toki mitongal to tayal saki Yihofaan, micada to sapatongal a sapahatatanam han?

11. Itiniay Koriya fafahiyan salikaka pakayni sapirienangaw to mitosilay tayal misaˈicelay midemak to maanan? Samanay ko minaroˈan? (Nengnengen ko potalay coka.)

¹¹ O kadofahay ko nalifetan a salikaka mirienang to faelohay pakayraan mitosil i, ngaˈayay milifok to sapatongal a sapahatatanam. 2019 miheca matenak ko lifong a tatokian, o cecay malohemay malitengay i kasakopang no Koriya sanay: “I salakat o roma salikaka tatiihay ko tireng no niyah, cowa ka ngaˈay masadak mitosil sanay, nohatini mananamay  nangra pakayni tingnaw malalengo a mirienang to mitosilay tayal. Tatoloay 80 ko mihecaan a fafahiyan salikaka mafanaˈay misaka dademak to tingnaw, to romiˈamiˈad mitosilay nohatini.” (ˈOlic 92:14, 15) Makalimay kiso mitongal to mitosilay tayal, mitongal ko pilifet a mihapinang to kangaˈay ni Yihofa han? Dotoc, nengnengen ita samaan ko demak ngaˈay malaˈosi koniya patosokan.

12. Mikiˈokay ci Yihofa to maanan i mitadiˈecay Cingranan a tamdaw?

¹² Minanam mitadiˈec ci Yihofaan. Mikiˈokay ci Yihofa, ano mitadiˈec kita Cingranan, patafang to sangaˈayay Cingranan, o tataktaken Ningra ko sapalemed kitaanan. (Malaki 3:10) Itiniay Koronpiya fafahiyan salikaka ci Fawiawla tahalifetay a mahapinang no niyah konini. Micada to paputisem cingra caka halafin, makalimay malo misakafahay, kawra o faˈinay ningra ato tatoloay wawa mitiˈeray cingranan to sakaˈorip. Tiya mamisawad matayal cingra i, mikifalocoˈay a mitolon, micangacang to sapadama ni Yihofa. Sanay cingra: “Kalo a tamdaw halafinay tatokian a mitala ngaˈay maalaay ko payci misawad matayal, kawra cecayay aca folad ko pitala ako maalaayto ko payci, tada kafahkaˈanto konini!” Ikor no tosa folad, misatapangay cingra malo misakafahay. Nohatini 70 ko mihecaan ningra, mataˈlifayto ko 20 miheca misakafah, toniya pina miheca mapadamaay ningra 8 tamdaw micada to paputisem. Sanay cingra: “Soˈlin latekay cangoˈotay ko ˈicel saan kako miharateng, kawra padamaay ci Yihofa takowanan to romiˈamiˈad, hato ngaˈayay matoor ako ko misaˈosian a toki no misakafahay.”

13-14. O manan a ngaˈayay taˈarawan pakalalokay kitanan mitadiˈec ci Yihofaan, mitongal to tayal saki Cingranan?

 ¹³ Pasayra i mitadiˈecay ci Yihofaan a ngaˈayay taˈarawan minanam. Itini Fangcalay Cudad maˈoningay ko adihayay ngaˈayay taˈarawan, misarocoday cangra matayal saki Yihofaan. Oniya sikawdan ni Yihofa salakatayho a pahawang, ngaˈ milifokay to sapalemed ni Yihofa. Tinakoen, cowa ka fanaˈ ci Apraham to tatalacowa, kawra kamayan a miliyas to nalacolan, itini ikor no miliyas cingra i, itiyaay milifok to sapalemed ni Yihofa. (Hipray 11:8) Malecaday ci Yakop, ikor no malalefo cingra to coyoh, ngaˈ pafelian ni Yihofa cingra to mikiriwiˈay sapalemed. (Satapangan 32:24-30) Tiya misaday ko Israil tamdaw micomod i Mikiˈokan no Kawas a Pala i, salakatay ko saysi paripaˈ to macedasay a Yortan ˈAlo, itiyaay tomerep ko nanom no ˈalo, hato ngaˈay ko finawlan a mitaˈlif to ˈalo.—Yosuwa 3:14-16.

¹⁴ Anini lintad ˈalomanay salikaka mitadiˈecay ci Yihofaan, mitongal to tayal saki Cingranan, mikitini kita ngaˈayay taˈarawan nangra milifok to sapakalalok. Salikaka ci Pyton ato fafahi ningra ci Tayanna tada maolahay miˈosi to nalifetan no salikaka, tinakoen “Makalimay Cangra Mikinafalah” madadoedoay lalakaw, * minengneng to samanay ko tao mitongal to tayal saki Yihofaan. Sanay ci Pyton: “Minengneng toniya nalifetan, malecaday minengnengay to tao komaen to ˈaredetay a kakaenen, padadotoc minengneng matongalay ko kalim ‘sapilifetaw a mihapinang to kangaˈay ni Yihofa.’” Ikor, ci Pyton aci Tayanna malinahay tayra i taˈangayay ko saali a kilac mitosil. Manengnengayto iso ko “Makalimay Cangra Mikinafalah” a madadoedoay lalakaw han? Roma i, manengnengay iso i jw.org wangcan Tayra i Maraayay Kilac Mitosil— Australia ato Tayra i Maraayay Kilac Mitosil— Aielan oniya tosa a ika han? Oniya lalakaw wa papadama tisowanan makilim ko ngaˈayay a pakayraan mitongal to tayal saki Yihofaan alatek.

15. Macacawmaˈ to fanekfekay a salikaka pakayni kitaanan iraay ko maanan sapadama?

¹⁵ Macacawmaˈ to fanekfekay a salikaka. Ano mararid ko micawmaˈan ita a widang milengo to cecay dateng, wa makalim kita sapitanamaw. Malecaday, mararid kita macacawmaˈ to fanekfekay a salikaka, wa matongal ko kalim sapitongalaw to tayal saki Yihofaan. Ci Kente ato fafahi ci Wilonika mahaenay ko pakayraan, sanay ko sowal ni Kente: “O widang ato paro no lomaˈ pakalalokay tamiyanan tano faelohay pakayraan matayal saki Yihofaan. Mahapinangay niyam malacafay to isalakatay micangacang to Hongti Kitakit a salikaka micawmaˈ, matongalay ko pakasoˈlin sapitanamaw to faelohay a demak.” Nohatini ci Kente aci Wilonika itiniay Saewiya malo mikiriwiˈay misakafahay.

16. O sapatinako i Luka 12:16-21 mitadtaday, hano mamakahi kita a kinafalah hani?

¹⁶ Makahi pakayni ci Yihofaan a kinafalah. Cowa ko mamifalah kita to kihcod kaolahan a dafong ngaˈ milifok to pihayda ni Yihofa. (Patnakay 5:19, 20) Kawra, ano pakayniay kanaˈay ita a kinafalah eca kakahi mitongal to tayal saki Cingranan, malecaday o patinakoan ni Yis a cihafayay mararaw ko demak. Oniya cihafayay o sinowayay aca a kaˈorip ko miharatengan, cowa piharateng to Kawas. (ˈOsien ko Luka 12:16-21.) Itini Frans cecay faˈinayan salikaka ci Kelisetian, sanay cingra: “Isalakat, cangoˈotay ko mihadakan ako pakayni ci Yihofaan ato paro no lomaˈ.” Ikor, misaˈosiay cingra ato fafahi malo misakafahay, o mamisawad to katayalan cangra ngaˈ malaˈosi  koniya patosokan. Pakayni sakaˈorip, patirengay cangra to mimingay a kosi, patadoay to tao miasik, minanamay to kantangay kaˈorip. Ciepocay koniya kinafalah han? Sanay ci Kelisetian: “Nohatini matongalay ko kaolah niyam to mitosilay a tayal. Maˈaraw ko milisoˈan ato pacekiwan matongal ko kafanaˈ ci Yihofaan, tada palipahakay tamiyanan.”

17. Mitanam to faelohay pakayraan a mitosil hano pasangaren ko harateng ita no latekay?

¹⁷ Makahi mitanam to faelohay a pakayraan mitosil. (Dmak 17:16, 17; 20:20, 21) Itiniay Padaka a fafahiyan salikaka ci Suri o misakafahay. Itini kalifongan a tatokian, misalofay cingra to pakayraan a mitosil. Salakat cowa kakahi cingra mitanam tano tingwa a misawacay, kawra itini pilisoˈ no kasakilac kantok a tatokian micadaay to pahatatanam ikor, misatapangay mararid tano hatiniay a pakayraan mitosil. Sanay cingra: “Isalakat tada marawraway ko falocoˈ ako, kawra maolahayto kako tano tingwa misawacay nohatini. Palalinien to pakalomalomaˈ a mitosil, nohatini matongalay ko ˈaloman no malitemohay a tamdaw!”

18. O maanan ko papadama kitaanan miremo to pasangaray, mitongal to tayal saki Yihofan?

¹⁸ Limasmasen ko halaka mitoor a midemak. Ano tahalifa kita to pasangaray i, ka pasayra i Kawas a mitolon, hanaca misarocod a mikilim to hapakayraan misaysay. (Taneng 3:21) Ci Sangniya o miceriday misakafah, itiniay Iwropa no Lomo ko sowal a kapot. Sanay cingra: “Maolahay kako mitilid i kalidopak to mihalakaan miteli i maˈaraway kitiraan. Itini eto ako mitelian ko cecay wito, makonisay i fafekang ko kacacipaˈan no lalan. Ano mamisaˈosi kako i, minengnengay toniya wito, miharateng o saˈosi ako wa mikerid takowanan talacowa patosokan a romakat.” Tawlikay ko pinengneng ni Sangniya to malifaay a pasangaray, sanay: “Ano mafalic ko pakayraan, o faelohay a pakayraan malecaday o cafeng, miˈeteng to lalan ako, ngaˈayay o kayakay, mikerid takowanan mihawang to saconged. O waywayan ako ko piˈarawan tonini.”

19. Wa misetek kita to falocoˈ samaan ko demak?

¹⁹ Pafeliay ci Yihofa kitanan to adihayay a sapalemed. Misarocod kita paˈodingar Cingranan, o paihkalay to tada miakoˈiday kita Cingranan. (Hipray 13:15) Wa ngaˈay kita mitanam to faelohay a pakayraan matayal saki Yihofaan, ho ngaˈay ko niyah milifok to adihayay sapalemed. Nanay kita to romiˈamiˈad mikilim to kasasiroma a pakayraan “milifet a mihapinang to kangaˈay ni Yihofa,” mihaen kita wa malecad ko harateng ci Yisan, sanay cingra: ‘O kakaenen ako o pidemak to araaw noya miocoray takowanan, milahci to tayal Ningra.’—Yohani 4:34.