1-2. Toniya lalakaw wa milengo kita to maanan?

HARATENGEN hena, ano mihaiay ko widang tisowanan pafeli to misaalian iso a dafong, ano eca ka itini misaˈosian a tatokian a ira, samaan ko harateng iso hani? Wa matoled kiso han? O nafalocoˈan iso wa malecad o sowal i Taneng 13:12 sanay: ‘Ano manayar ko mitalaan iso i, wa matoled ko falocoˈ.’ Kawra, ano mafanaˈay kiso iraay ko matatodongay a lalangian no widang eca pitoor to toki, o mamihadidi kiso a mitala.

² Oniya lalakaw wa milengo, o manan a safalod no Fangcalay Cudad pasifanaˈ kitanan paira to mihadidiay, ato pakayni manan tosa a pakayraan ‘mihadidi a mitala’ kita ci Yihofaan a midemak. (Mika 7:7) Saikor, wa minengneng kita mihadidiay mitala ci Yihofaan a tamdaw wa milifok to manan a sapalemed.

3. Mikitini i Taneng 13:11 mananam ita ko maanan?

³ Itini Taneng 13:11 pasowalay kitanan hano pairaen ko mihadidiay. Sanay ko sinael: ‘O ranikayay malifok a dafong, ranikayay a maˈesal, o palidlid sanay mahoped a dafong wa padotoc a matongal.’ Mikitini toniya sinael mananam ita ko manan hani? Mihadidi kita a dademak, ano palidlid han ko demak, mihaen wa ira ko sangaˈayay a minaroˈan.

4. Mikitini Taneng 4:18 ngaˈay mananam ita ko manan?

⁴ Itini Taneng 4:18 sanay: ‘O lalan no moecelay tamdaw malecaday o taengad to papacem, taengad taengaday a matedi tangasa i kalahokan.’ Ihkalay mitadtad koniya sinael, ci Yihofa wa palidlid saan a paihkal to araaw i finawlan no Niyah. Roma i, oniya sinael pahapinangay kitanan, ano sakacakataw ko cecay Krisciyang, matongal ko piingid ci Yihofaan, cowa ka ngaˈay macaloh. Misaaliay to toki. Ano misongilaˈ kita  micekiw, ato mitoor to sapasifanaˈ no Fangcalay Cudad ato likakawa no Kawas dademak, wa palidlid sato palahad to malecaday ni Kristo a capeling. Wa macakat ko kafanaˈ to Kawas. Nengnengen, samanay ci Yis mitadtad tonini.

5. Tano manan a sapatinako ci Yis a mitadtad, sakacakataw ko cecay tamdaw misaaliay to toki?

⁵ Tano tinakoan ni Yis a mitadtad, o sapaloma no lihaf no Hongti Kitakit samanay palidlid saan i falocoˈ no matatodongay ko waywayan a tamdaw cilamit a cicengoˈ. Sanay ci Yis: ‘Cicengoˈ a lomahad koya sapaloma, hano mahaen cowa ka fanaˈ cingra [mikosamay a tamdaw]. I fafekang no sera mahadak ko minaroˈan, palidlid sanay a lomahad, salakat o sapal, dotoc cipapah, saikor matomes to minaroˈan.’ (Marko 4:27, 28) Sapitadtadaw ci Yis to maanan hani? Malecad o pinaloma palidlid saan lomahad, o micadaay to lihaf no Hongti Kitakit a tamdaw mahaenay palidlid sanay a macakat. Tinakoen, o pacekiwan palidlid saan a miingid ci Yihofaan ikor, mahapinangayto ita taˈangayay ko kafalic ningra. (Ifiso 4:22-24) Kawra o haharatengen ita, ci Yihofa ko palahaday toniya sapaloma.—1 Korinto 3:7.

6-7. Mikitini pisangaˈ ni Yihofa toniya cikiw a pakayraan mananam ita ko maanan?

⁶ Ano o mananto ko demak ni Yihofa sahtoay o mihadidiay, ano hakowato ko mapalakay a toki makahiay Cingra. Mihaen ko demak Ningra pakayniay sapaˈdilaw to ngangan no Niyah, ato saka ciepoc no polong pinaˈorip. Tinakoen, nengnengen samanay ci Yihofa palidlid saan a misaday to hakitiraan no tamdaw a cikiw.

⁷ Pakayni samanay ci Yihofa misangaˈ to cikiw, sanay ko sowal no Fangcalay Cudad ‘mifakciwan’ koniya sera, ira ko ‘katomirengan no hecek,’ ‘paranaan a fakeloh.’ (Yopu 38:5, 6) Paselaˈayho ci Yihofa, mipalakay to toki miharateng to misangaˈan Ningra a maamaan. (Satapangan 1:10, 12) Ngaˈay haratengen iso maˈaraw no coyoh palidlid saan ko pisangaˈ ni Yihofa to kihcod, samanay ko nafalocoˈan nangra hani? Maedeng masemeray  ko harateng nangra! Sowal no Fangcalay Cudad misatapang cangra a ‘mawaho milekal.’ (Yopu 38:7) Soˈlin o pisangaˈ ni Yihofa halafinay ko mapalakay a toki, kawra tiya songilaˈen Ningra minengneng to misangaˈan no Niyah i, marenecay ko falocoˈ, saan ko sowal ‘tada ngaˈayayto.’—Satapangan 1:31.

8. Dotoc wa minengneng kita to maanan?

⁸ Mikitini i fafekangay tinakoan mahapinangay, itini Fangcalay Cudad adihayay ko safalod pasifanaˈay kitanan paira to mihadidiay. Dotoc minengneng kita, misaaliay kita itini tosa maanan pakayraan mihadidi a mitala ci Yihofaan.

9. Itini maanan a pakayraan, misaaliay kita to mihadidiay a mitala ci Yihofaan hani?

⁹ Mihadidi a mitala to caˈof ni Yihofa to satolon. Wa micangacang kita ci Yihofaan pafeli to ˈicel miremo to sapalifet, anca miremo to cecay dangoc, kawra latekay manayalay ko pipacaˈof Ningra. Hano eca ka tangsol ci Yihofa pacaˈof to polong a satolon ita hani?

10. Hano mamihadidi kita a mitala to sapacaˈof ni Yihofa to satolon no mita?

¹⁰ Misongilaˈay ci Yihofa mitengil to satolon ita. (ˈOlic 65:2) Mafanaˈay Cingra to mikifalocoˈay a picangacang ita Cingranan, o pakayniay pakasoˈlinay falocoˈ Cingranan. (Hipray 11:6) Kawra, ano micangacang kita ci Yihofaan padama kitaanan midemak to kaolahan Ningra a demak i, makalimay Cingra minengneng to hakowaay ko pisetek no falocoˈ ita. (1 Yohani 3:22) Mihaenay, ano micangacang kita to Kawas padama kitanan misawad to tatiihay nanaman anca miremo to cecay dangoc, misaaliay to mihadidiay, hanaca misaˈicel a mifalic. Paihkalay ci Yis, o roma a satolon ita cowa ko tatangsol milifok to caˈof alatek. Sanay cingra: ‘Ka padadotoc a mingitangit, ta mapafeli kamo. Ka padotoc a mikilim, ta pakatama kamo, ka padotoc mikongkong, ta fawahen ko fawahan, o mingitangitay a tamdaw o mamapafeli. O mikilimay a tamdaw, o papakatama, o mikongkongay tamdaw, mamafawah ko fawahan.’ (Matay 7:7, 8) Ano dofdofen ita koniya sapalimoˈot ni Yis, padadotoc a mitolon i, wa ngaˈay pakasoˈlin wa tengilen no kakarayan Wama ko satolon ita ato pacaˈof to satolon ita.—Kolosay 4:2.

11. Ano manayal ko caˈof no satolon ita i, haharatengen ita ko maanan? (Hipray 4:16)

¹¹ Soˈlin manayalay ko caˈof no satolon ita, kawra mikiˈokay ci Yihofa, wa ‘itini pisaalian ita to sapadama a tatokian’ o papacaˈof to satolon ita. (ˈOsien ko Hipray 4:16.) Mihaenay, ano cowa ka lecad to maharatengay ita a tatokian mifekad ko demak, cowa ko ngangaˈay kita miroroh ci Yihofaan. Tinakoen, pasifanaˈay ci Yis kitaanan micangacang to kaira no Hongti Kitakit no Kawas, palaˈafo toniya ciraraway a hekal, ˈalomanay salikaka midofdofay toniya limoˈot ningra, adihayay a mihecaan padotocay pakayni toniya demak a mitolon. (Matay 6:10) Kawra, ano ira ko tamdaw pakayni ka eca kaˈaraw ko mitalaan ningra a kahererekan noniya hekal a malahdaw ko pakasoˈlinay falocoˈ, tada o mafolaay a demak konini! (Hapakuk 2:3; Matay 24:44) O papadotoc kita a mitala ci Yihofaan, paira to pakasoˈlinay falocoˈ a mitolon Cingranan. O kahererekan wa itini matatodongay a tatokian mifekad, samanen maharekayto ci Yihofa misaˈosi to ‘romiˈad ato toki.’ Maraod ko toki wa mahapinang ita, itiya o tada matatodongay a tatokian!—Matay 24:36; 2 Pitiro 3:15.

12. Itini masamanay a pakayraan, wa mikiriwiˈ kita padotoc a mihadidi hani?

¹² Mihadidi a mitala ci Yihofaan masadafdaf ko pisawkit. ˈAlomanay tamdaw marariday  masamsam ko nika eca kalecad ko tatirengan, finacadan, ˈaˈirangan, niyaroˈ anca kitakit a tamdaw. Roma tamdaw pakayniay i tireng anca no haratengan a samoˈ a masamsam no tao. ˈAlomanay a finawlan ni Yihofa pakayniay i pihakelongan a micada to sapalak. Ano tahacada kita to adihayay cowa ka sadafdaf a picada, o haharatengen ita ko sowal ni Yis. Sowal ningra: ‘Tahatolasay ko piemem a tamdaw o mamalidong.’ (Matay 24:13) Kawra, ano mafanaˈ kiso pakidemay ko raraw no cecay tamdaw i kasakopang, wa samaan ko demak iso? Ano mafanaˈayto ko malohemay malitengay toniya demak i, wa mihadidi kiso a mitala, pakasoˈlin to mamitoor cangra to pakayraan ni Yihofa a misaysay toniya demak han? Sapisongilaˈaw a misaysay to pasangaray, sasamaan ko demak no malohemay malitenagay hani?

13. Itini kasakopang ano ira ko pakidemay ko raraw a tamdaw, misaaliay ci Yihofa to malohemay malitengay samaan ko pisaysay?

¹³ Ano mafanaˈ ko malohemay malitengay iraay ko pakidemay a raraw i kasakopang i, wa mikifalocoˈ a mitolon, micangacang cangra to ‘mikitiniay i Kawas a taneng,’ ho cipinang cangra to pinengneng ni Yihofa toniya demak. (Yakop 3:17) O patosokan nangra papadama to mararaway a tamdaw misarocod a ‘pasasiyor to raraw no niyahˈ, misongila’ midipot to kasakopang, mihinomho to madokaˈay a tamdaw. (Yakop 5:19, 20; 2 Korinto 1:3, 4) Ano misaysay to hatiniay a pasangaray ko malohemay malitengay i, sasalakat cipinang to kihcod a demak, o mamipalak to adihayay toki. Dotoc wa mikifalocoˈ cangra mitolon, mikilim to safalod no Fangcalay Cudad, hanaca misalalangian to Fangcalay Cudad ‘matatodong ko pisalof’ to mararaway a tamdaw. (Yirimiya 30:11 ato roma pihongyak) Soˈlin cowa ko maminayal ko malohemay malitengay, kawra cowa ko mamacaloh a misawkit. Ano mitoor cangra to sakayat ni Yihofa a misaysay to demak, o papaira to ngaˈayay a minaroˈan. Kawra, soˈlin ngaˈay ko pisaysay to demak, o madokaˈay a tamdaw o mamatoled ko falocoˈ alatek. Ano mahaenay ko malifaay iso a demak, sasamaan ko demak iso milowan to roray no niyah hani?

14. Ano pakidem ko pidokaˈ no roma Krisciyang tisowanan i, wa ngaˈay kiso minanam to ngaˈayay taˈarawan no nima?

¹⁴ Na pakidemay ko pidokaˈ no roma tamdaw tisowanan han? O midokaˈay tisowanan o  faˈinayan salikaka anca o fafahiyan salikaka han? Ano mahaenay, wa ngaˈay kiso mikitini i Fangcalay Cudad minanam to ngaˈayay a taˈarawan, mihadidi a mitala ci Yihofaan a misaysay to demak. Tinakoen, o kaka ni Yosif na pakidemay ko pidokaˈ cingranan, kawra cowa ka pakayni ko kaˈinteh no falocoˈ ningra. Padotocay ci Yosif misamacay matayal saki Yihofaan, ci Yihofa pakayni pihadidi ningra kadofahay ko pipalemed cingranan. (Satapangan 39:21) Saikor, masongilaˈay ko pisodod ni Yosif to kaka ningra, mahapinangay to samanay ci Yihofa a palemed cingranan. (Satapangan 45:5) Malecad ci Yosifan, ano miingid kita ci Yihofaan, pakasoˈlin to masadafdafay ko pisawkit Ningra, o mamilifok kita to sahinom.—ˈOlic 7:17; 73:28.

15. Madokaˈ ko cecay fafahiyan salikaka i hano ngaˈay mitafo to mihadidiay?

¹⁵ Manaokaniw, o malifaay ita a demak cowa ka lecad toni Yosif a pakidem alatek, kawra ano madokaˈ no tao cowa ka ngaˈay ko falocoˈ. Ano ira ko tamdaw caka ngaˈay tisowanan, soˈlin cowa ko salikaka kora tamdaw, mitoor kita to safalod no Fangcalay Cudad a midemak wa ira ko ngaˈayay minaroˈan. (Filipi 2:3, 4) Nengnengen ko cecay tinakoan. Mahapinang no cecay fafahiyan salikaka ko cafay matayal somowalay to tatiihay midokaˈ cingranan, tada masomaday cingra. Kawra cowa ka pakidem ko harateng ningra, misongilaˈay midotim to ngaˈayay a taˈarawan ni Yis. Matongangan no tamdaw ci Yis i, cowa ka tano tatiihay sowal a pacaˈof. (1 Pitiro 2:21, 23) Mihaenay, misaˈosiay ko salikaka eca pikilim tora tamdaw a malacongis. Ikor mafanaˈay cingra oniya cafay matayal misiˈayaway to pakidemay adada, taˈangayay ko saroero, cowa ko padetengay a midokaˈ cingranan. Tada mahemekay koniya salikaka mihadidi a miemem, hato rihadayayto ko falocoˈ nohatini.

16. Ano mihadidiay kiso to cowa ka sadafdaf a demak, o maanan ko mamihinom tisowanan hani? (1 Pitiro 3:12)

¹⁶ Ano micadaay kiso to cowa ka sadafdaf a demak, anca madokaˈ no roma demak, haratengen ‘miingidan ni Yihofa ko makesemay ko falocoˈ a tamdaw.’ (ˈOlic 34:18) Maˈaraw ni Yihofa ko pitafo iso to mihadidiay, mihepol to karetengay ˈinorong Cingranan, tada maolahay Cingra tisowanan. (ˈOlic 55:22) O misawkitay Cingra to polong no sera, mafanaˈay Cingra to kihcod a demak. (ˈOsien ko  1 Pitiro 3:12.) Ano misiˈayaw kiso to pasangaray a saysayen a demak i, wa makahi kiso mihadidi mitala ci Yihofaan han?

17. Sowal no Isaya 30:18, mikiˈokay ci Yihofa kitaanan to maanan hani?

¹⁷ Cato ka halafin, o kakarayan a Wama ita wa pakaynien Ningra i Hongti Kitakit a palemed kitaanan. Sowal i Isaya 30:18 sanay: ‘Mihadidiay ci Yihofa a mitala, papalemed tamowanan, o mamidemak Cingra, siniˈada tamowanan, samanen o moecelay a Kawas ci Yihofa. O mitalaay Cingranan a tamdaw, tada malemeday.’ Ano aninito anca noikor a faelohay hekal, o mitalaay ci Yihofaan a tamdaw o mamilifok to kadofahay a sapalemed.

18. O maanan a sapalemed ko mamalifok ita hani?

¹⁸ Itini faelohay hekal, o finawlan no Kawas cowato ko mamisiˈayaw to masakenaay a cariraw ato kasomadan. Itiya wa malahdawto ko cowa ka sadafdaf a demak, awato ko roray. (Paˈarawan 21:4) Cowato ko cacalemcem kita mitala to misaalian a dafong, samanen wa kadofah ko dafong itira. (ˈOlic 72:16; Isaya 54:13) O mahaenay a kaˈorip tada kasemeranto!

19. Anini padamaay ci Yihofa kitaanan pakayni i maanan a misaday hani?

¹⁹ Toniya tatokian, padamaay ci Yihofa kitaanan misawad to tatiihay nanaman, hanaca palahad to makapahay a capeling, sahtoay o patadoay kitanan misalof, padama kitanan misaday maˈorip itini faelohay hekal. Aka matoled, aka pisawad, o sangaˈayay a kaˈorip itiniay i kaˈayaw mitala kitaanan! Mitapal kita to hanoikor, nanay padotoc a mihadidi, lipahak ko falocoˈ a mitala ci Yihofaan palaˈosi to sakiˈok Ningra.