• “O harateng ako hato saliyaliyaw sanay ko faˈinay a maˈodang.”

• “O harateng ako awaay ko mimimiming aca misolotay no niyah, tada pakangodoayto, hato awaay ko kapo ako.”

• “Awaay ko pakayraan ako pasowal i tao tonini a demak, edeng emem han a misemsem.”

• “O harateng ako hato cowa pikihar ci Yihofa takowanan.”

O hatiraay a sowal paihkalay, ano minengneng ko faˈinay to maˈodangay lalakaw i, tada misemsemay ko fafahi. O faˈinay ano takaw sa a mihaen ko demak, latek pinaay a folad pinaay a miheca, mamasawito ko falocoˈ no fafahi caayto pakasoˈlin cingranan. Sanay ko cecay fafahi: “Hato cowa ko kafanaˈan a tao cingra i tatihi ako, iraayho ko manan a demak mihimedan takowanan han?”

Ano minengneng ko faˈinay to maˈodangay lalakaw i, ngaˈayay mikitini ko fafahi milifok to sapadama. a Mihadakay konini a lalakaw to pina safalod no Fangcalay Cudad, mihinom to iraay ko mahaenay a milifetan a fafahi, ho pakasoˈlin to papadamaen ni Yihofa cangra. Patikol to rihaday no falocoˈ, halo patanektek to kalalaˈed ci Yihofaan. b

Soˈliˈlin cowa ko mamaˈimer iso ko pakayraan no faˈinay, kawra ngangaˈay kiso midemak to pina a milowan to roray no falocoˈ, patikol a rihaday ko falocoˈ. Nengnengen ko ilaenoay a sapaini.

Aka piroroh to niyah. Minengneng ko faˈinay to maˈodangay lalakaw i, iraay ko ˈinorong no mako wa saan ko fafahi a miharateng alatek. Sanay ci Aylis c maedeng hato cowa ko fafahiyan kako saan, mararid a miharateng: “Hano maolah ko faˈinay minengneng to roma fafahiyan? Cowato kakapah kako sanay cingra han?” O romaroma fafahi mirorohay to niyah, o niyah ko mipalakay to demak saan miharateng. Mafanaˈ ci Tanie to minengnengay ko faˈinay to maˈodangay lalakaw tada maketeray, sanay cingra: “O halingaliwngiway a fafahiyan kako saan, pakihater sanay to mangolaway a harateng mipalak to raramod niyam.”

Ano mahaenay ko piharateng iso, cowa papitamorong ci Yihofa to nano demak no faˈinay iso tisowanan. Sowal no Yakop 1:14: ‘Mapalifet ko kahacecay tamdaw, o coos no niyah ko mikayhiday.’ (Loma 14:12; Filipi 2:12) Cowa ko mamiroroh ci Yihofa  tisowanan, o papakayni i kamadimadi iso i Cingranan a misalimla tisowanan.—2 Rayray 16:9.

O cacipinang ko fafahi, minengneng ko faˈinay to maˈodangay lalakaw cowa ko nika cangoˈot no fafahi. Mikakingkiway to mahaenay demak a matanengay somowalay, o maˈodangay lalakaw paenepay to falocoˈ no tamdaw haharateng sa to madadiˈiyay a demak, awaay ko cimacima fafahiyan to hamamirenec to mahaenay a coos no falocoˈ.

Aka pakinali a marawraw. Sowal ni Kayselin, haharateng hananay ako ko waywayan no faˈinay, awaayto ko falocoˈ sakadademakaw. Sanay ci Folansis: “Ano cowa ka fanaˈ kako to icowaay ko faˈinay i, marawrawayto ko falocoˈ ako. Saromiˈad sanay kako a macariraw.” O sowal no romaroma fafahi i, ano kalacafay cangra to mafanaˈay tonini demak a salikaka i, mangodoan nanay cangra. O sowal no roma fafahi, awaay ko cipinangay to pakayraan nangra sanay miharateng, mansa matoˈolan nanay cangra.

Ira ko mahaenay a harateng cowa ko mararaway. Kawra, ano haharateng han konini a demak i, mamatongal ko pisemsem no falocoˈ iso. Samacayen i noka lalaˈed iso ci Yihofaan ko falocoˈ, mihaen o caciˈicelto kiso.—ˈOlic 62:2; Ifiso 6:10.

Miˈoningan no Fangcalay Cudad, ano masomad ko romaroma fafahiyan, ikor no pitolon ci Yihofaan i, mahinomayto cangra. Maˈosi iso ko nalifetan nangra a midotim i, mamalifok iso ko sapadama. Soˈliˈlin cowa ka hacecay han ni Yihofa padama cangra mifalah to pasangaray, kawra pafelian Ningra to rihaday no falocoˈ. Tinakoen, ci Hana ‘misemsemay ko falocoˈ,’ kawra ‘halafinay cingra mitolon ci Yihofaan,’ ikor cowato ka masomad. Soˈliˈlin caho ka fanaˈ cingra to sasamaan mafalic ko demak, kawra patikolayto a rihaday ko falocoˈ.—1 Samuil 1:10, 12, 18; 2 Korinto 1:3, 4.

Ngaˈayay kiso pasayra i malohemay malitengay misaali to sapadama. Malecaday cangra o ‘pikiˈadingan to fali ato ˈorad a kitiraan.’ (Isaya 32:2) Alatek papasowal cangra tisowanan, ngaˈay kiso masasowal to cima fafahiyan salikaka, ho malifok iso ko sasayar.—Taneng 17:17.

Latek ngaˈay kiso padama to faˈinay misawad to minengnengay to maˈodangay lalakaw a nanaman han? Hayi, ngangaˈay. Sowal no Fangcalay Cudad, to sapiremoaw to pasangar anca sapisiˈayawaw to ciˈicelay a ˈada i, ‘tatosaay tamdaw mikikakaay ko nika ngaˈay to cecayay.’ (Patnakay 4:9-12) Iraay ko makingkiway no tamdaw, ano malacafay ko mararamoday a misaˈicel i, o mamaremo ko maenepay to minengnengay to maˈodangay lalakaw, ngangaˈayho miliyaw patireng to nika pakasoˈlin nangra tatosa.

Manaokaniw, o mamalaˈosi hokira, o kalim no faˈinay  iso ko piˈarawan. Micangacangay cingra to sapadama ni Yihofa halo misaali to pipadama no malohemay malitengay han? (2 Korinto 4:7; Yakop 5:14, 15) Paliˈayaway cingra midemak, to sapiliyasaw to sakayhid han? Tinakoen, ano misaka dademakay cingra to tingnaw, miˈimeray cingra hokira, miliyas to sakarefongaw i sakayhid han? (Taneng 27:12) Makahiay cingra mifohat to falocoˈ misiˈayaw tisowanan caka pikilif, halo micada to sapadama iso han? Ano mahaenay i, o ngangaˈay kiso padama to faˈinay alatek.

Samaanen padama hani? Nengnengen ko cecay tinakoan, faˈinay ni Felisia ci Isang mimingho i, maenepayto minengneng to maˈodangay lalakaw, nohatini iraayho ko kalim sapinengnengaw, pasowalan ni Felisia cingra sadak han somowal ko mahaenay a falocoˈ iso. Sanayto ci Isang: “Pasowalan ako ko fafahi to pasangar no niyah. Misarocoday cingra padama takowanan miliyas to sakayhid, marariday cingra misalalicay takowanan to samaanayto. Padamaayho cingra takowanan papiˈimer a misangwang.” Mafanaˈ to ciharatengayho ko faˈinay sapinengnengaw to maˈodangay lalakaw, manaokaniw tatiihayho ko harateng ni Felisia, kawra sanay cingra: “Ano maketer kako i, cowa ko papadama cingranan miconged to mararaway a coos. Malalengoay kami tora pasangar ningra, ikor makahiay cingra misaˈicel a miˈesal to pisemsem no mako.”

Mahaenay noka lalengo cowa aca pipadama to faˈinay micoˈay to sakayhid no maˈodangay lalakaw, papadamaho to fafahi miliyaw pakasoˈlin to faˈinay. O faˈinay ano makahi a mikifalocoˈ pasowal to fafahi to kalonayan no niyah, halo mararid pasowal to fafahi to icowaay ko niyah ato mimaanay, mamadoloto ko fafahi a pakasoˈlin cingranan.

Ngangaˈay kiso mihaen a padama to faˈinay han? Ano ngaˈayay i, mamaan malacafay kamo miˈosi toniya lalakaw, malalengo to kalimlaan ilalomaˈ. O patosokan ningra i, oha sapiliyasaw to maˈodangay lalakaw, tano waywayan ko faˈinay patalahkal to ngaˈayay pakasoˈlinen cingra. Ano mahaenay i, somowal kiso to nafalocoˈan i, cowa ko mamaketer cingra, o mamafanaˈ cingra tora pakayraan ningra samaanay ko pifiyor tisowanan. O patosokan iso i, papadama cingranan paˈicel to pisetek no falocoˈ, micoˈay to maˈodangay lalakaw, miliyawto a pakasoˈlinen no miso cingra. O mararamoday tamdaw oha cacipinang to misamaanay hano sapinengnengaw ko tamdaw to maˈodangay lalakaw, ato sasamaan a miremo tonini a pasangar. d

 Ano malalengo toniya demak, calemceman nanay to cowa ko ngangaˈay ko kasasowal namo i, ngaˈayay tahidangen ko cecay pakasoˈlinan namo a malohemay malitengay, malacafay a malalengo kamo. Soˈlinto, misawadayto ko faˈinay tora demak i, kawra hahalafinho kiso miliyaw pakasoˈlin cingranan. Aka pisawad, haratengen to samaanay palidlid sa masalof kora demak. Pairaen ko mihadidiay falocoˈ, mataˈlifto ko toki i, o mamaliyawto tanektek ko kalalaˈed namo.—Patnakay 7:8; 1 Korinto 13:4.

O faˈinay iso ano saliyaliyaw sa i, paihkalayto cowa ka pasasiyor cingra, cowa ko mamitolas a misawad tonini tatiihay nanaman han? Awaay ko pinang. Alatek oha mamilood cingra to mahaenay a coos to hakelong no ˈorip ningra. Ano maenepayto cingra i, o mamangalef ko pihaen to demak. Soˈlinto pinaayto a mihecaan a misawad, mamiliyawho cingra minengneng alatek. Toha sakaecaaw ka piliyaw, mamangalef cingra a minaˈon to demak. Ano nengnengen hato maremoayto kora demak, kawra cowa ko sasakahmawen. (Taneng 28:14; Matay 5:29; 1 Korinto 10:12) Oha mamipalahad cingra to faelohay noka ‘piharateng,’ minanam ‘mikaˈinteh to tatiihay demak,’ mahawpay ko kihcod cowa ka korac a waywayan, tinakoen minengneng to maˈodangay lalakaw ato mipohpoh a misalama to kamaysian. (Ifiso 4:23; ˈOlic 97:10; Loma 12:9) Mamakahi cingra misaˈicel a mifalic han? Ano makahiay i, oha ngangaˈayho cingra misawad to hatiniay tatiihay a nanaman. e

Kawrira, ano cowa ka sapifalicaw ko faˈinay iso i? Alatek saliyaliyawho kiso a matoleden, mangolawen, miharateng to misilikoran kiso. Ira ko mahaenay a piharateng o matatodongay. Patoroden ci Yihofa to cariraw, o papadama konini tisowanan milifok to rihaday no falocoˈ. (1 Pitiro 5:7) Ka padadotoc micekiw, mitolon ato miingid ci Yihofaan, pakasoˈlinen Cingra to hamamiingid tisowanan, samanen itini Isaya 57:15 sanay, Cingra i, ‘mamikalacafay to mararomay ko falocoˈ ato matoleday ko falocoˈ a tamdaw,’ sapipadamaaw cangranan a tanektek. Ka pisarocod madimadi midoko ci Yihofaan, cangacangen ko sapadama no malohemay malitengay. Aka pisawad to hatokel, aira ko cecay romiˈad alatek mikifalocoˈ a mafalic ko faˈinay iso.—Loma 2:4; 2 Pitiro 3:9.