1. Samaan ko pidemak ita mamatongal ko kaolah mikingkiw to sapairasol no Fangcalay Cudad hani?

 CECAY ci Panen salikaka sanay: “Maolahay kako mikingkiw to sapairasol no Fangcalay Cudad.” Mahaenay ko harateng iso han? Anca pasangaray a cipinang to sapairasol no Fangcalay Cudad saan kiso miharateng han? Anca mikingkiw to sapairasol no Fangcalay Cudad awaay ko kahemekan a demak han? Kawra, ano cipinang kiso to hano tiliden ni Yihofa ko sapairasol i Fangcalay Cudad, mamafalic ko harateng alatek.

2. Onini lalakaw mamilengo to maanan?

² Onini lalakaw cowa ko pilengo aca to hano maminanam kita to sapairasol no Fangcalay Cudad, mamitadtadho sasamaan kita a minanam. Onini lalakaw mamitadtad to tosa sapairasol no Taniil, hanaca mamilengo cipinang tonini a tosa sapairasol wa ira ko maanan haepoc no mita.

3. Ano sakacipinangaw kita to sapairasol no Fangcalay Cudad, mamisamaan ko pidemak?

³ Ano sakacipinangaw kita to sapairasol no Fangcalay Cudad, mamicangacang to sapadama. Tinakoen, ano tayra kiso i kafahalan a pala miliwko, o kalacafayay tisowanan a widang mananamay tonini a pala, cowa ko kafanaˈ aca to kitiraan namo, mafanaˈayho to tatalacowa ko kahacecay a lalan, maedeng o mamahemek kiso kalacafay tonini a widang miliwko. Malecaday ci Yihofa tonini a widang, cowa ko kafanaˈ aca Ningra to itiniay kita i maanan a lintad nohatini, mafanaˈayho mamifekad ko maanan a demak noikor. Sakacipinangaw kita to sapairasol no Fangcalay Cudad, o mamisapoener pasayra ci Yihofaan micangacang to sapadama.—Taniil 2:28; 2 Pitiro 1:19, 20.

4. Hano kayaten ni Yihofa ko tamdaw itini Fangcalay Cudad mitilid to sapairasol? (Yirimiya 29:11) (Nengnengen ko coka.)

 ⁴ Makalimay ko wama wina ira ko makapahay hanoikor no wawa, ano kakarayanto Wama ci Yihofa mahecaday. (ˈOsien ko Yirimiya 29:11.) Kawra cowa ka lecad to no tamdaw a wama wina, matatodongay ko pipaˈayaw ni Yihofa to hanoikoran. Mikayatan Ningra ko tamdaw itini Fangcalay Cudad mitilid to sapairasol, padama kitanan talaˈayaw mafanaˈ to mamifekad ko maanan a demak noikor. (Isaya 46:10) O sapairasol no Fangcalay Cudad o mikitiniay i olah no kakarayan Wama a sapatelong kitanan. Kawra, sasamaan kiso pakasoˈlin to mamalaˈosi ko sapairasol no Fangcalay Cudad hani?

5. O kapah ngaˈay mikitini nalifetan ni Makes mananam ko maanan?

⁵ Itini picudadan, cowa pikangodo ko ˈalomanay tamdaw to Fangcalay Cudad, o sasowalen ato waywayan nangra pairaay to kacisasa no kaemangay Krisciyang to pihakelongan no niyah. Nengnengen ko nalifetan no salikaka ci Makes. Sanay cingra: “Moetep ira ko pina ko mihecaan ako misatapangay cisasa: O sapasifanaˈ no wama wina a kimad takowanan o matatodongay han? O Fangcalay Cudad soˈlinay o Kawas ko mikayatay to tamdaw a tiliden han?” Samaanay ko harateng no wama wina ni Makes hani? Sanay ci Makes: “Damsayay cangra, cowa ka keter. Mafanaˈay kako to calemcemay cangra.” O wama wina ni Makes misalalangiay to Fangcalay Cudad pacaˈof to salicay ningra, ci Makes pahecaday a midemak. Sanay cingra: “Misongilaˈay kako mikingkiw to sapairasol no Fangcalay Cudad, hanaca malacafay to romaroma kapah i kasakopang milengo to mananamay ako.” Samaanayto ko teloc? Sanay ci Makes: “Ikorto pakasoˈlinay kako, o Fangcalay Cudad o Kawas ko mikayatay to tamdaw a tiliden!”

6. Ano cisasaay kiso, sasamaan ko pidemak hani? Misamaanay?

⁶ Ano malecaday kiso ci Makesan misatapang cisasa to soˈlinay a kimad ko Fangcalay Cudad hokira, aka makesem ko falocoˈ. Kawra o sasaaretengen iso minengneng konini a demak. Tinakoen, o cecay matekesay ko ˈaca a dafong ano citaˈi i, eca ka kiskisen kora taˈi, o mamapalak konini a dafong. O cisasaay malecaday o citaˈiay a marad mamipalak to pakasoˈlin ita. Ano “sapalahdawaw kiso to taˈi” no pakasoˈlin, licayen ko niyah: “Pakasoˈlinay kako to sapairasol no Fangcalay Cudad to noikoran han?” Ano awaay ko pinang, ka pikingkiw to malaˈosiayto a sapairasol no Fangcalay Cudad. Sasamaan ko pidemak hani?

7. Itini pikingkiw to sapairasol a pakayraan, patirengay ci Taniil to maanan a taˈarawan? (Taniil 12:10) (Nengnengen ko coka.)

⁷ Itini pinanam to sapairasol no Fangcalay Cudad, patirengay ci Taniil to ngaˈayay taˈarawan. Iraay ko matatodongay a araaw no falocoˈ ningra mikingkiw to sapairasol. Makalimay cingra cipinang to soˈlinay kimad. Tada misapoeneray ci Taniil, mafanaˈay cingra ano padadotoc ko tamdaw miingid ato midofdof ci Yihofaan, o papadamaen ni Yihofa konini a tamdaw cipinang to sapairasol. (Taniil 2:27, 28; ˈosien ko Taniil 12:10.) Mitadiˈecay ci Taniil to sapadama ni Yihofa, paihkalay koni to misapoeneray cingra.  (Taniil 2:18) Misongilaˈay ci Taniil mikingkiw to Fangcalay Cudad, minengnengan ningra ko polong mamaˈosi a lalakaw itiya. (Yirimiya 25:11, 12; Taniil 9:2) Sasamaan kiso mitodong ci Taniilan hani?

8. (1) O roma tamdaw samaanay ko araaw no falocoˈ a mikingkiw to sapairasol no Fangcalay Cudad? (2) Sasamaan ko pidemak ita?

⁸ Kinsaen ko araaw no falocoˈ iso. Minanam kiso to sapairasol no Fangcalay Cudad pakayniay sakacipinangaw to soˈlinay kimad han? Ano mahaenay i, o papadamaen ni Yihofa kiso. (Yohani 4:23, 24; 14:16, 17) Kawra o roma tamdaw mikingkiw to sapairasol no Fangcalay Cudad mikitiniay i roma a lalangian. Sapikilimaw cangra to wacay alatek, misawacay to cowa ko mikitiniay i Kawas ira ko Fangcalay Cudad. Ano ngangaˈay misawacay tonini, wa irato ko lalangian nangra haratengay sa midemak. Mihaenay, o cacipinang kita o pikingkiw no niyah to sapairasol mikitiniay i matatodongay araaw no falocoˈ. Roma i, sakacipinangaw to sapairasol no Fangcalay Cudad, misaaliay kita to cecay kalimlaan a capeling.

9. Sakacipinangaw to sapairasol no Fangcalay Cudad, misaaliay kita to maanan a capeling hani? Tadtaden hena.

⁹ Ka pisapoener. Mikiˈokay ci Yihofa papadama to misapoeneray tamdaw. (Yakop 4:6) Mihaenay, o mamitolon kita micangacang ci Yihofaan padama kitanan cipinang to sapairasol no Fangcalay Cudad. O mamihayiho kita, misaaliay kita to sapadama no madimadiay citanengay a koli, samanen misaka dademakan no Kawas konini a koli, itini matatodongay a tatokian pafeli to sapahaled to pakasoˈlin a kakaenen. (Luka 12:42) Cowa ko masasifoday a Kawas ci Yihofa, mihaenay cecayay aca ko misaka dademakan Ningra a koli, padama kitanan cipinang to soˈlinay kimad no Fangcalay Cudad, o matatodongay konini.—1 Korinto 14:33; Ifiso 4:4-6.

10. Mikitini nalifetan ni Ayste mananamay iso ko maanan?

¹⁰ Ka pisongilaˈ mikingkiw. Ngaˈayay piliˈen iso ko kaolahan no niyah a sapairasol, dotoc misongilaˈ a mikingkiw. Fafahiyan salikaka ci Ayste mihaenay ko pidemak, sakacipinangaw cingra to milingatay ci Misiyaan a sapairasol. Sanay cingra: “15 ko mihecaan ako misatapangay mikilim to wacay, misawacay toniya sapairasol soˈlinay itini ˈayaw no hofocen ci Yis mitilidanto.” Mikilimay cingra to milingatay to Mapatayay Riyar a Cudad ikor, pakasoˈlinayto tonini. Sanay cingra: “O Mapatayay Riyar a Cudad itiniay i ˈayaw no hofocen ci Yis matilidayto, mihaenay o sapairasol nonini a cudad o mikitiniay i Kawas aira.” Sanayho ci Ayste: “O roma lalakaw misaliyaliyaway kako a miˈosi ngaˈ cipinangay.” Mihaen to demak tada ciepocay sanay cingra. Itini pisongilaˈ mikingkiw to pina sapairasol no Fangcalay Cudad ikor, sanay cingra: “Mahapinangayto ako o soˈlinay kimad ko misowalan no Fangcalay Cudad!”

11. Pakasoˈlin kita o soˈlinay a kimad ko sowal no Fangcalay Cudad, wa ira ko maanan a epoc kitanan hani?

¹¹ Maˈaraw ita matatodong ko sapairasol no Fangcalay Cudad, mamatongal ko pakasoˈlin ci Yihofaan ato sakayat Ningra. Roma i, ano o mananto ko masiˈayaway ita a sapalifet anini, o sapairasol no Fangcalay Cudad papadama kitanan padadotoc a tawlik, aira ko hatokel noikor. Nengnengen ita nohatini, o tosa sapairasol no  Taniil samaanay malaˈosi nohatini. Cipinang tonini tosa sapairasol papadama kitanan citaneng ko misaˈosian.

12. ‘Macacamolay ko marad ato ditaˈ’ a waˈay mitaypiyaway to maanan? (Taniil 2:41-43)

¹² ˈOsien ko Taniil 2:41-43. Na patadoan ni Taniil ci Nipukatnicar mitadtad to mitiihan. Itini nitiihan, maˈaraway ni Nipukatnicar ko taˈangayay faco, waˈay no taˈangayay faco o ‘macacamolay ko marad ato ditaˈ.’ Tanonini a sapairasol palalinien ita ko Taniil ato romaroma sapairasol no Paˈarawan, wa mahapinang o mitaypiyawan no waˈay no taˈangayay faco o Ikok ato Padaka Ciˈicelay Mikowanay to Hekal anini. Sowal ni Taniil onini a ciˈicelay mikowanay to hekal ‘o kalitosa ciˈicelay, o kalitosa malonayay.’ Hano haenen ko sowal aki? Samanen o mitaypiyaway to ditaˈ a finawlan milowanay to ˈicel nonini a ciˈicelay mikowan, cowato ka ngaˈay malecad o marad a ciˈicel. b

13. Cipinangto kita to sapairasol no taˈangayay faco ikor, mahapinangayto ko maanan masakalimlaan a demak?

¹³ Mikitini misowalan ni Taniil taˈangayay faco, adihayay ko mananamay ita, mangalef mikitini waˈay no taˈangayay faco mahapinangay ita ko pina kalimlaan a demak. Saka cecay, o mitaypiyawan no waˈay a Ikok ato Padaka soˈlinay a ciˈicel. Tinakoen, itini Saka Cecay ato Saka Tosa Lalood no Hekal, o pakalowiday ko Ikok ato Padaka, hanaca taˈangayay ko sadama to pakalowid milood. Nikawrira, ilalomaˈ nonini a ciˈicelay mikowan, adihayay ko kasasongtol no finawlan, marariday mitowakang to sifo. Mansa, malonayay ko ˈicel nonini a ciˈicelay mikowan, o mahaenay a pakayraan o papadadotoc. Saka tosa, o Ikok ato Padaka Ciˈicelay Mikowan to Hekal o salikorayto a ciˈicelay mikowan. Itini noka pikowan nonini a ciˈicelay to paro no kakarayan i, o papalaˈafoento no Hongti Kitakit no Kawas ko polong a sifo no hekal. Soˈliˈlin o roma kitakit milengatay to saaroˈan no Ikok ato Padaka, kawra cowa ko mamakotay namira cimira. Mafanaˈay kita tonini, samanen mitaypiyaway to Hongti Kitakit no Kawas a fakeloh o mamipesiˈ to waˈay no taˈangayay faco, oya Ikok ato Padaka Ciˈicelay Mikowanay to Hekal.—Taniil 2:34, 35, 44, 45.

14. Cipinang to pakayniay i waˈay no taˈangayay faco a sapairasol, hano ngaˈay padama kitanan citaneng ko misaˈosian?

¹⁴ Pakayniay i waˈay no taˈangayay faco a sapairasol, pakasoˈlinay kiso han? Ano pakasoˈlinay i, wa taˈangay ko pifiyor to pakayraan iso i nokaˈorip. Cowato ko mamicangacang kiso to sadipot no payci ato dafong, samanen mafanaˈay kiso mamalaˈafoto konini a hekal. (Luka 12:16-21; 1 Yohani 2:15-17) Roma i, cipinang kiso toniya sapairasol, wa mahapinang tada kalimlaan ko mitosilay pasifanaˈay to tamdaw a tayal. (Matay 6:33; 28:18-20) Misongilaˈ kiso mikingkiw toniya sapairasol ikor, ngaˈayay licayen ko niyah: “O masakenakenaay a misaˈosian ako paihkalay to pakasoˈlinay kako, kakalikito palaˈafoen no Hongti Kitakit no Kawas ko polong a sifo no hekal hokira?”

15. Cima ko aniniay a ‘kaˈamisay a hongti’ ato ‘katimolay a hongti’ hani? (Taniil 11:40)

¹⁵ ˈOsien ko Taniil 11:40. Saka 11 fedengan no Taniil somowalay to tosa hongti, malaˈafasay cangra to saaroˈan toniya hekal a tosa mikowanay ˈicel. Palalinien ita toniya sapairasol ato roma sapairasol no Fangcalay Cudad, o mamahapinang o ‘kaˈamisay a hongti’ o Rowasiya ato kapot ningra ko mitoroˈan, o ‘katimolay a hongti’ o Ikok ato Padaka Ciˈicelay Mikowanay to Hekal ko mitoroˈan. c

16. Itiniay i mikowanan no ‘kaˈamisay hongti’ a pala a salikaka mamisiˈayaw to maanan sapalifet hani?

¹⁶ Itini mikowanan no ‘kaˈamisay hongti’ a  pala, mamihadidi ko salikaka to sapalak. Pakayni pihakelongan o romaroma salikaka mapekpekay ato mapalitay, kawra o hatiniay a demak cowa ka pakapolin to salikaka, ao paˈicelay to pakasoˈlin nangra. Misamaanay hani? Samanen mafanaˈay cangra, tahacada ko finawlan no Kawas to sapalak matatodongay ko sapairasol ni Taniil. d (Taniil 11:41) Mafanaˈ tonini, papadama kitanan matongal ko ˈicel madimadi to Kawas, hanaca matongal ko pakasoˈlin ita to hatokel noikor o mamalaˈosi maemin.

17. Itiniay i mikowanan no ‘katimolay hongti’ a pala a salikaka micadaay to maanan a sapalifet?

¹⁷ Isaˈayaw na miroeroay ko ‘katimolay hongti’ to finawlan no Kawas. Tinakoen, itini satapangan no 20 hahekalan, ˈalomanay faˈinayan salikaka pakayni pitafo to misatenokay saaroˈan mipalitan, o wawa no romaroma salikaka pakayni malecaday a lalangian mifalahan no picudadan. Kawra i ngata no pina poloˈ miheca, o madimadi no salikaka micadaay to cowa ka lecad a sapalifet, oniya sapalifet cowa ka hapinang. Tinakoen, itini pisingkiwan a tatokian, soˈlin o cecay Krisciyang cowa ko mamitopa midama to cecay tamdaw, kawra harateng  ningra o cecay a yofayof anca cecay a tamdaw ikakaay to tao ko kangaˈay, hanaca makalim maritos koniya tamdaw. Kawra o haharatengen ita, cowa ka itini aca i midemakan, wa itiniho i noharatengan ato nofalocoˈan mitafo kita to misatenokay saaroˈan!—Yohani 15:18, 19; 18:36.

18. Sasamaan ko pinengneng ita to kasasongtol no ‘katimolay hongti’ ato ‘kaˈamisay hongti?’ (Nengnengen ko coka.)

¹⁸ Cowa pakasoˈlin to sapairasol no Fangcalay Cudad a tamdaw, maˈaraw ko ‘kasasongtol’ no ‘katimolay hongti’ ato ‘kaˈamisay hongti,’ maedeng o cacariraw alatek. (Taniil 11:40 ato roma pihongyak.) O fakotang nangra maedengay palaˈafo to polong a pinaˈorip i cikiw, kawra mafanaˈay kita cowa ko mamihayi ci Yihofa mifekad ko mahaenay a demak. (Isaya 45:18) Mihaenay, maˈaraw ita ko kasasongtol no ‘katimolay hongti’ ato ‘kaˈamisay hongti,’ cowa ko mamarawraw ko harateng, ao mamatongal ko pakasoˈlin, misawacayay konini a demak mangataayto malaˈafo ko tatiihay hekal ni Satan.

19. Pakayni i sapairasol no Fangcalay Cudad, pairaen ita ko maanan matatodongay a pinengneng hani?

¹⁹ Cowa ka fanaˈ kita to sasamaan matatodong ko cecay sapairasol. Hatiraayto, ano pairasolayto a Taniilan cowa ka cipinang cingra to tatodong no mitilidan ningra a sowal. (Taniil 12:8, 9) Nikawrira caka songilaˈ ko kacipinang ita to cecay sapairasol sasamaan matatodong i, o cowato ko mamalaˈosi konini a sapairasol cowa ka saan. Pakasoˈlinay kita malecaday ci Yihofa to isalakatay, itini matatodongay a tatokian patalahkal to hakafanaˈan ita a demak.—Amos 3:7.

20. (1) O maanan kahemekan a sapairasol no Fangcalay Cudad kakalikito malaˈosi hani? (2) Padadotoc kita samaan ko pidemak hani?

²⁰ Cato ka halafin, mamilasil ko tamdaw ‘dipayalay rihakedayto.’ (1 Tisalonika 5:3) Ikor, mamiˈodis ko kalo kitakit to mararaway a pihakelongan, palahdaw to polong mararaway a pihakelongan. (Paˈarawan 17:16, 17) Dotoc, mamiˈodis ko kalo kitakit to finawlan no Kawas. (Icikil 38:18, 19) Onini a demak mamikidat to Armakiton a lalood. (Paˈarawan 16:14, 16) Wa ngaˈay pakasoˈlin kita, kakalikito mifekad konini a demak. ˈAyaw nonini, nanay padadotoc kita misinanot to sapairasol no Fangcalay Cudad, hanaca padama to tao mihaen to demak, pakayni ko pipatalahkal to piakoˈid ita to kakarayan Wama.