Mikitini tonini lalakaw mananamay ita, pakaynien i polong a tamdaw ato coyoh ko sowal, o soˈlinay sasiˈayawen taˈangayay a demak cecayay aca, onini i, o papatalahkalen ko fangcalay ngangan ni Yihofa. O pakayniay saˈakawangay sapikowan a fadangalan a lacongis, o pakayraan a mikowan ni Yihofa o sangaˈayay hokira, o masalalomaˈay nonini a demak. Malecaday, o papadadotoc ko tamdaw madimadi sanay a lacongis masalalomaˈay nonini a demak.

Nohatini hano misakareteng kita to ngangan ni Yihofa, ato patalahkal tonini fangcalay ngangan hani? Nengnengen ko tolo lalangian ilaeno.

Saka cecay, itini i Itin, pakaditan ni Satan ko ngangan ni Yihofa, mipalakay to ngangan Ningra. Misaˈfitay ci Satan milicay ci Ifaan to salicay, pakilifay a somowal to maˈidiyay a Kawas ci Yihofa, samanen patirengay Cingra to cowa ka tatodong a sakeceng i finawlan no Niyah sanay. Dotocto, patodicek sanay ci Satan mitowakang to sowal ni Yihofa, mihaen ko demak ningra mahecaday to mirikecay to Kawas o misamangahay. Samanen mipalakan ni Satan ko ngangan ni Yihofa, malo ‘Akomaayto’ cingra, tatodong i, ‘mitonganganay.’ (Yohani 8:44) Pakasoˈlinay ci Ifa to mangah ni Satan, misafelitay to limoˈot no Kawas, paihkalay koni cowato ka ciharateng cingra micada to sakowan no Kawas. (Satapangan 3:1-6) Tahanini, kamayan ci Satan mipalak to ngangan ni Yihofa, miyakayak to pakayniay Cingranan a mangah. O pakasoˈlinay tonini a mangah a tamdaw pasangaray midofdof ci Yihofaan. Mansa, itini pinengneng no finawlan no Kawas, mapakadit ko fangcalay ngangan ni Yihofa, onini a demak o sataˈangayay cowa ka sadafdaf, o kasadakan no kihcod a pades ato tatiihay demak konini.

Saka tosa, sapairaaw to haepoc no tamdamdaw, misetekay ci Yihofa to falocoˈ mikorac to mapakaditay a fangcalay ngangan Ningra. Pakaynien ci Yihofaan o sakakaay kalimlaan konini, mansa mihaen ko sowal Ningra: ‘O papatalahkalen Ako ko fangcalay ngangan no Mako.’ (Icikil 36:23) Ihkalay ci Yis mitadtad o polong a madimadiay midoko ci Yihofaan a tamdaw, o papakayni i maanan a demak mitolon, sanay cingra: ‘Nanay mapatalahkal ko fangcalay ngangan Iso.’ (Matay 6:9) Misaliyaliyaway ko Fangcalay Cudad a somowal, mipaˈdil to fangcalay ngangan ni Yihofa o masakalimlaan a demak. Nengnengen ko ilaenoay a tinakoan: ‘O ˈdil no fangcalay ngangan ni Yihofa panokayen Cingranan.’ (1 Rayray 16:29; ˈOlic 96:8) ‘Ka romadiw pakahemek to ciˈdilay a fangcalay ngangan Ningra.’ (ˈOlic 66:2) ‘Tatahadaˈoc kako milosiyang to fangcalay ngangan Iso.’ (ˈOlic 86:12) Kinacecayay, itiniay i fangcalay sefi no Yirusalim a pasowal ci Yis: ‘Wamaaw, nanay paˈdilen Iso ko ngangan Iso.’ Pacaˈofan ni Yihofa nai kakarayan, sanay: ‘Maharekayto Kako paˈdil to ngangan Ako, o mamiliyawho mihaen to demak.’—Yohani 12:28. a

Saka tolo, o fangcalay ngangan ni Yihofa tatahadaˈoc makakadep to araaw Ningra. Haratengen  hena, mahererek ko Pikowan ni Yis to Comaˈol Miheca i, mamicada ko tamdaw to salikoray a sapalifet, dotoc samaan hani? Itiya o polong a coyoh ato tamdaw sasamaan minengneng to fangcalay ngangan ni Yihofa hani? Sapacaˈofaw tonini a salicay, nengnengen ita o madimadi no tamdaw ato saˈakawangay sapikowan a fadangalan, oniya tosa malalitingay a lacongis. Itiya, polong madimadiay a tamdaw cowato ko mamisawacay to madimadi no niyah, samanen malefotayto a tamdaw cangra, hanaca masongilaˈayto a mapalifet. Mamilayap cangra to midaˈocay a ˈorip. Itiya, pakayniay i saˈakawangay sapikowan a fadangalan a lacongis mamikidatho to sakaliwasak no coyoh ato tamdamdaw han? Cowato, samanen masawacayayto o matatodongay ko pikowan ni Yihofa, o sangaˈayay, onini a lacongis masahciayto a masaysay. Ano pakaynien i finawlan no Kawas, o fangcalay ngangan ni Yihofa kamayan o kalimlaan han?

Itiya, o macadaay no ngangan ni Yihofa a sapakadit masongilaˈayto malahdaw, o ngangan Ningra masongilaˈayto mapatalahkal to fangcalay. Nikawrira, pakaynien i polong madimadiay a sikawdan ni Yihofa ko sowal, ano itiniayto cangra i kakarayan anca i fafekang no sera, o fangcalay ngangan ni Yihofa kamayan o kalimlaan a demak. Misamaanay hani? Samanen o mamaˈaraw nangra padadotoc ci Yihofa palaˈosi to kasapaan a demak. Haratengen hena, itiya mamisapoener ci Yis patikol ci Yihofaan to kihcod a sapikowan a fadangalan, mihaenay ‘pakaynien i tamdamdaw ko sowal, o kihcodto ko Kawas.’ (1 Korinto 15:28) Ikor nonini, i fafekangay no sera polong a tamdaw o ‘ngangaˈayto milayap to ciˈdilay a pasalatay a wawa no Kawas.’ (Loma 8:21) Dotoc, mamisongilaˈ ci Yihofa palaˈosi to araaw Ningra, mikedec a palacecay to kakarayanay ato fafekang no sera a wawa, malo taˈangayay a paro no lomaˈ.—Ifiso 1:10.

Mifekad koniya kihcod a demak ikor, itiniay i kakarayan ato fafekangay no sera a wawa ni Yihofa, samaanay ko nafalocoˈan hani? Maedeng adihay ko lalangian ita, makalim pakahemek to saˈakawangay fangcalay ngangan ni Yihofa. Mitiliday to ˈOlic ci Tafiti itini sakayat no fangcalay saocor sanay ko sowal: ‘Nanay pakahemek ko tamdaw to Kawas ci Yihofaan . . . Nanay o ciˈdilay fangcalay ngangan Ningra tahadaˈoc a mapakahemek.’ (ˈOlic 72:18, 19) Tahira i daˈoc, padadotoc a mahela ita ko adihayay lalangian pakahemek ci Yihofaan.

O fangcalay ngangan ni Yihofa mitaypiyaway to kihcod Ningra. Ano masowalho ko ngangan Ningra i, maharatengayto ko olah Ningra. (1 Yohani 4:8) Padadotoc maharateng ita, maolahay ci Yihofa kitanan, mansa misangaˈ kitanan, samanen maolahay kitanan, mansa milimasmas to sapatefoc, pakayni noka olah kitanan, tano moecelay pakayraan mikowan Cingra kitanan. Papadadotocho kita mitinako to masakenakenaay a pakayraan ni Yihofa patalahkal to nika olah kitanan. Papadadotoc kita miingid to kakarayan Wama ita ci Yihofaan, pakahemek to ciˈdilay fangcalay ngangan Ningra, tahira i daˈoc.—ˈOlic 73:28.