1. Mikitini Hipray 12:1, sasamaan ko pidemak ita ngaˈ malahci comikay to midaˈocay ˈorip a cacikayen?

 SANAY ko sowal no Fangcalay Cudad, o Krisciyang malecaday o misiayay comikay. O tahiraay kahiceraan comikay a tamdaw mamilifok to sapalifon, o midaˈocay a ˈorip. (2 Timoti 4:7, 8) Mamisarocod kita padotoc comikay, samanen itiniayto i kaˈayaw ko kahiceraan. Tarokos ci Pawlo maherekayto comikay tonini a cacikayen, mihadakay cingra to pakayraan pakalowid tonini a cacikayen, sanay cingra, ‘falahen ita ko mikalisangaay a demak . . . , mihadidi comikay to i kaˈayaway a cacikayen.’—ˈOsien ko Hipray 12:1.

2. ‘Falahen ko mikalisangaay a demak,’ o maanan ko tatodong hani?

² Sowal ni Pawlo, kita i, ‘falahen ko masakenaay mikalisangaay a demak,’ sakoniya sowal ningra fafalahen ko kihcod a ˈinorong sanay han? Cowa. Tatodong ningra i, o fafalahen ita ko cowa ka limlaan a ˈinorong, samanen o hatiniay ˈinorong mamicona kitanan talaˈayaw comikay, pakaroray kitanan. Sakatahatolasaw mihadidi, o kakalikien ita mihapinang ko kihcod pakarorayay kitanan a demak, ikor falahen. Kawra toniya tatokian, o roma ˈinorong oha tatamorongen ita, cowa ka ngaˈay sawaden, ano eca i, mamalahdaw ko tatodong ita misiay. (2 Timoti 2:5) Mihaenay, o maanan a ˈinorong ko tatamorongen ita hani?

3. (1) Mikitini Kalatiya 6:5, mamitamorong kita to maanan ˈinorong? (2) Onini lalakaw mamilengo to maanan? Misamaanay hani?

³ ˈOsien ko Kalatiya 6:5. Misowalan ni Pawlo itini a ‘ˈinorong,’ o papitamorongan no Kawas i kahacecay tamdaw a ˈinorong ko mitoroˈan, onini a ˈinorong cowa ka ngaˈay paikenen ko tao. Oniya lalakaw mamilengo, o ‘ˈinorong no niyah’ mahawpay ko maanan, ato  sasamaan kita mitamorong to mahaenay a ˈinorong. Roma i, mamilengoho ko lalakaw, alatek mamitamorong kita to cowa ko kalimlaan a ˈinorong, ato sasamaan kita mifalah to hatiniay ˈinorong. Mitamorong kita to ˈinorong no niyah, ato mifalah to cowa ko kalimlaan a ˈinorong, o mamalaˈosito a comikay to midaˈocay ˈorip a cacikayen.

4. Midemak to miketonan patafang to tireng hano cowa ko pakarorayay a ˈinorong konini hani? (Nengnengen ko coka.)

⁴ O miketonan ita patafang to tireng. Itini pipatafang to tireng a satolon i, miketonay kita ci Yihofaan to mamidoko Cingranan ato midofdof to araaw Ningra. O misowalan ita o tatooren a midemak. Soˈlin midemak to miketonan patafang to tireng o taˈangayay a ˈinorong, kawra cowa ko pakarorayay a ˈinorong konini. Samanen o araaw misangaˈ kitanan, o mamidofdof to araaw ni Yihofa. (Paˈarawan 4:11) Pafeliay ci Yihofa kitanan to nafalocoˈan a saali, mitoorayho to papisingan no Niyah misangaˈ kitanan. Mansa, ngaˈayay kita miingid Cingranan, wa pakayniho pidoedo to araaw Ningra midemak a lipahaken. (ˈOlic 40:8) Roma i, midoedo kita to araaw no Kawas maˈorip, hanaca mikotod to kanonoˈan a  Wawa Ningra ci Yisan, oha ‘lalipahak ko falocoˈ.’—Matay 11:28-30.

5. Sapidemakaw to miketonan patafang to tireng, sasamaan ko pidemak iso hani? (1 Yohani 5:3)

⁵ Sasamaan kiso mitamorong tonini a ˈinorong? Tosaay ko hademak iso. Saka cecay, padotoc mitongal to olah iso ci Yihofaan. Ngaˈayay haratengen iso, kihcod nano demak ni Yihofa tisowanan, ato sapafeli Ningra tisowanan a sapalemed noikor. Ano matongal ko olah iso ci Yihofaan, mamadoloto midofdof Cingranan. (ˈOsien ko 1 Yohani 5:3.) Saka tosa, todongen ci Yis. Mitolonay cingra ci Yihofaan micangacang to sadama, misamacayayho to sapalifon i kaˈayaw, mansa malaˈosi cingra midofdof to araaw ni Yihofa. (Hipray 5:7; 12:2) Malecad ci Yisan, ka pitolon kiso micangacang ci Yihofaan pafeli to ˈicel tisowanan, aka mapawan to makapahay hatokel midaˈoc maˈorip. Padotoc kiso mitongal to olah ci Yihofaan, mitodongho to kanonoˈan a Wawa Ningra ci Yisan, oha ngangaˈayto midemak to miketonan patafang to tireng.

6. Hano midemak kita to ˈinorong no paro no lomaˈ? (Nengnengen ko coka.)

⁶ O ˈinorong ita to paro no lomaˈ. Sakangaˈayaw comikay midaˈocay ˈorip a cacikayen, o olah ita ci Yihofaan aci Yisan, o mamikikaka to kaolah to paro no lomaˈ. (Matay 10:37) Kawra cowa ka ngaˈay falahen ita ko ˈinorong no niyah to paro no lomaˈ, midemak tonini a ˈinorong hato miconaay kitanan midemak to kaolahan no Kawas aci Kristo a demak. Soˈlinay i, sapilifokaw to pihayda no Kawas aci Kristo, o mamidemak kita to ˈinorong no niyah i paro no lomaˈ. (1 Timoti 5:4, 8) Mihaen ko demak ita, mamatongal ko lipahak no niyah, samanen mitoor to araaw no Kawas, masasingodo masasiolah ko faˈinay ato fafahi, ciharateng a pasifanaˈ ko wama wina to wawa, midofdofho ko wawa to wama wina, paro no lomaˈ o rarahekerto a lipahak.—Ifiso 5:33; 6:1, 4.

7. Samaan kiso midemak to ˈinorong no niyah i paro no lomaˈ?

⁷ Sasamaan kiso mitamorong tonini a ˈinorong? Ano o mananto ko saaroˈan iso i lomaˈ, tatooren ko sakayat no Fangcalay Cudad, aka toor han ko harateng no niyah ato serangawan a midemak, aka pitengil to sowal no sao inanengay a tamdaw a midemak. (Taneng 24:3, 4) Sakadademaken ko mitepangan no likakawa a cudad. Onini a lalakaw mihadakay to adihayay ciepocay sapaini, padama kitanan mafanaˈ samaan misaka dademak to safalod no Fangcalay Cudad. Tinakoen, pakayni masiˈayaway no faˈinay fafahi, wama wina ato kaemangay a pasangaray, itini madadoedoay lalakaw no “Kaˈorip no Paro no Lomaˈ” adihayay ko ciepocay sapaini. b Ano samaanto ko demak no paro no lomaˈ iso, seteken iso ko falocoˈ misaka dademak to safalod no Fangcalay Cudad. Mihaen o caciepoc ko paro no lomaˈ namo, ano kisoto mamilifok to sapalemed ni Yihofa.—1 Pitiro 3:1, 2.

8. O misaˈosian ita pairaay to maanan pifiyor kitanan?

⁸ Misiˈayaw to misaˈosian no niyah. Pafeliay ci Yihofa kitanan to pasalatay harateng. Makalimay Cingra pakayni katatodong no misaˈosian ita milifok to haepoc, kawra ano mararaw ko misaˈosian ita, cowa ko tatalimaan sa Cingra kitanan, eca ka pitamorong kita to tatiihay a teloc. (Kalatiya 6:7, 8) Mihaenay, ano mararaw ko sowal ita, macaloh ko pidemak anca mararaw ko misaˈosian, o mamitamorong to teloc. Latekay, pakayniay kita i demak no niyah caka rihaday ko falocoˈ. Nikawrira, mafanaˈay kita o mamisiˈayaw to misaˈosian no niyah, o tatimolo a mihayi, ato misalof to kararaw no niyah, mamisaˈicelho eca ka piliyaw midemak to malecaday a raraw. O hatiniay waywayan papadama kitanan padadotoc comikay i midaˈocay ˈorip a cacikayen.

9. Ano mararaway ko saˈosi no miso, sasamaan a misiˈayaw? (Nengnengen ko coka.)

 ⁹ Sasamaan kiso mitamorong tonini a ˈinorong? Ano mararaway ko saˈosi no miso, cato ka ngaˈay patatikolen, o cacadaen konini a demak. Ka cipinang, awaay ko pakayraan iso mifalic to mifekaday a demak. Aka pipalak to toki ato ˈicel paˈading to niyah, anca miroroh to niyah ato tao. Ka pihayi to mararaway, misaˈicel midemak to ngaˈayay demaken a demak. Ano pakayniay kiso i kararaw no niyah makesem ko harateng, ka itini pitolon misapoener mihayi to raraw ci Yihofaan, hanaca micangacang to sasodod Ningra. (ˈOlic 25:11; 51:3, 4) Ano pairaay to dokaˈ no tao kiso, ka piliˈay cingranan, ano ngangaˈay i, cangacangen ko sapadama no malohemay malitengay. (Yakop 5:14, 15) Ka itini kararawan minanam to sapasifanaˈ, misaˈicel miliyas to sapiliyawaw midemak to malecaday a raraw. Mihaen ngangaˈayto pakasoˈlin kiso, sasiniˈada ci Yihofa tisowanan, hanaca pafeli to sapadama tisowanan.—ˈOlic 103:8-13.

10. O cowa ka tatodong a mihalamhaman hano o karetengay a ˈinorong hani? (Kalatiya 6:4)

¹⁰ Cowa ka tatodong a mihalamhaman. Ano mipalalini kita to tao, wa irato ko cowa ka tatodong pihalamham to niyah alatek, telocto papaira to taˈangayay saroero no niyah. (ˈOsien ko Kalatiya 6:4.) Misamaanay hani? Micerid kita palalini to tao to niyah, o mamikidat to maˈinapay ato masasiayay a harateng. (Kalatiya 5:26) Sakahecadaw to roma tamdaw, cowato ko mamisikol kita to pakayraan no niyah alatek, pacieci to niyah midemak to mitaˈlifay to ˈicel no niyah a demak. Haratengen hena, ‘ano manayar ko mitalaan iso i,’ wa ‘matoled ko falocoˈ’ no tamdaw, mangalef ora mihalamhaman iso a demak tahadaˈocto cowa ko aira. Maedeng o papakidem ko katoled no falocoˈ iso. (Taneng 13:12) Micangacang to cowa ka tatodong a patosokan o pakarorayay tisowanan, awato ko pakayraan padadotoc comikay i midaˈocay ˈorip a cacikayen.—Taneng 24:10.

11. Sasamaan ko pidemak iso ngaˈ, ecato ka patireng to cowa ka tatodong a patosokan hani?

¹¹ Sasamaan kiso mifalah to mikalisangaay a demak hani? O saali iso to niyah aka pakakaen to saali ni Yihofa tisowanan. Na cowa pisaali Cingra tisowanan patafang to kaawaan no miso. (2 Korinto 8:12) Aka calemcem, cowa ko papalalinien ni Yihofa kiso ato tao. (Matay 25:20-23) Padotoc kiso mihadidi, madimadi kiso matayal Cingranan, misarocod ko falocoˈ ato harateng iso midoko Cingranan, sasalimlaen Ningra maemin. Ano pakayniay kiso i mihecaan, tanoktok no tireng ato pakayraan nohatini caka pakaremo to pinapina a demak, ka pisamiming to falocoˈ micada tonini a demak. Malecad ci Parcilayan, o tanoktok no tireng iso ano cowa pihayi micada kiso to cecay katayalan, aka pacieci, wa ngaˈay kiso minaˈay. (2 Samuil 19:35, 36) Malecad ci Mosian, cadaen ko sapadama, ano matatodongay i, paladaˈen ko tao to tayal. (Kasadakan 18:21, 22) Paihkal kiso to misamimingay, cowato ko papatireng to cowa ka tatodong a patosokan, telocto awato ko ˈicel no niyah padadotoc comikay i midaˈocay ˈorip a cacikayen.

12. Papatado kita mitamorong to ˈinorong i mararaway misaˈosian no tao han? Tadtaden.

¹² Papatado ko niyah mitamorong to ˈinorong i mararaway saˈosi no tao saan ko harateng. Cowa ka ngaˈay kita patado to tao misaˈosi. Mararaw ko misaˈosian no tao, cowa ka ngaˈay kita mikiˈayaw cangranan, eca ka papitamorong cangranan to tatiihay a teloc. Tinakoen, ano misaˈosi ko wawa ecato ka pidoko ci Yihofaan, maedeng o papakasomad to wama wina konini. Nikawrira, ano padadotoc ko wama wina pakayni tonini a demak makesem mirikec to niyah, mitamorongayto to karetengay a ˈinorong. Caay ka ciharateng ci Yihofa to wama wina mitamorong to mahaenay a saroero.—Loma 14:12.

13. Ano mararaway ko misaˈosian no wawa, sasamaan a misiˈayaw ko wama wina hani?

 ¹³ Sasamaan kiso mifalah to mikalisangaay a demak hani? Ka cipinang, pafeliay ci Yihofa to kahacecay tamdaw to pasalatay harateng, o ngangaˈay kita o niyah sa ko mipiliˈ, mahawpay ko pipiliˈ to mamidoko Cingranan hokira. Mafanaˈay ci Yihofa, cowa ko ngangaˈay kiso malo malefotay a wama anca wina, edengan makalimay Cingra misarocod ko pidemak iso. O wawa ko mamitamorong to misaˈosian ningra a ˈinorong, cowa ko kiso. (Taneng 20:11) Nikawrira, caay ka pawan kiso to nano raraw isalakat pasifanaˈ to wawa alatek. Ano hatiraay i, eminen pasowal ko nafalocoˈan iso ci Yihofaan, micangacang Cingranan misodod tisowanan. Mafanaˈay Cingra cowa ko ngangaˈay kiso patikol tayra i saˈayaway, mifalic to na mifekadayto a demak. Roma i, caay pisaali Cingra tisowanan mikiˈayaw to wawa, eca ka papitamorong to wawa to tatiihay a teloc. Haratengen, ano ikor misaˈicel ko wawa iso patikol tayni tatihi ni Yihofa, o mamakahi ci Yihofa micada cingranan.—Luka 15:18-20.

14. Pakidem ko kakesem hano o fafalahen ita a mikalisangaay a demak hani?

¹⁴ Pakidem ko kakesem. Ano mararaw kita makesem ko falocoˈ o matatodongay, kawra cowa ka ciharateng ci Yihofa pakidem ko kakesem ita. O hatiniay mikalisangaay a demak o fafalahen ita. Ano maherekayto kita mihayi to raraw, pasasiyor, hanaca misaˈicel ko pidemak eca ka piliyaw a mararaw, wa ngaˈayto kita pakasoˈlin maherekayto ci Yihofa misodod kitanan. (Dmak 3:19) Toniya tatokian, cowato ka ciharateng ci Yihofa padadotoc kita a makesem ko falocoˈ. Mafanaˈay Cingra, ano padadotoc kita mirikec to niyah, o papaira to taˈangayay pidokaˈ to niyah. (ˈOlic 31:10) Ano pakidem ko kasomad ita, o mamisawadto to midaˈocay ˈorip a cacikayen alatek.—2 Korinto 2:7.

15. Ano pakidemay kiso a makesem ko falocoˈ, sasamaan ko pidemak hani? (1 Yohani 3:19, 20) (Nengnengen ko coka.)

¹⁵ Sasamaan kiso mifalah to mikalisangaay a demak hani? Ano pakidemay kiso a makesem ko falocoˈ, haratengen o ‘soˈliˈlinay misodod to tamdaw’ a Kawas ci Yihofa. (ˈOlic 130:4) Misododan  Ningra ko mikifalocoˈay pasasiyor a tamdaw, mikiˈokay ‘cowato ko mamiharateng to raraw nangra.’ (Yirimiya 31:34) Tatodong nonini, cowato ko mamitikol ci Yihofa miharateng to nano raraw iso. Mihaenay, aka pakayni noka pitamorong iso nohatini to teloc no kararaw, miharateng to cowaho ka sododen ni Yihofa kiso. Roma i, ano pakayniay kiso i raraw isalakat malahdaw ko katayalan, aka pakayni ko pirikec to niyah. Cowa ko haharateng sa ci Yihofa o maanan ko raraw iso, ano kisoto cowa ko ngangaˈay mihaen ko demak.—ˈOsien ko 1 Yohani 3:19, 20.

16. Sakalowidaw i midaˈocay ˈorip a cacikayen, mamihapinang kita to manan?

¹⁶ Itini midaˈocay ˈorip a cacikayen, ‘seteken ko falocoˈ pakalowid a comikay.’ (1 Korinto 9:24) Sapihaenaw to demak, o hahapinangen ita o manan ko tatamorongen a ˈinorong, o manan ko fafalahen mikalisangaay a demak. Onini a lalakaw mihadakay to pina tinakoan, mitadtad o manan ko ˈinorong, o manan ko mikalisangaay a demak. O mahaenay a tinakoan adihayayho, tinakoen sowal ni Yis ‘o mamaroero no halikaenay, haliepahay ato cariraw no kaˈorip’ kita. (Luka 21:34) Itini kacomikay iso to midaˈocay ˈorip a cacikayen i, o mahaenay a sinael papadama tisowanan mihapinang, alatek mamidemak ko niyah to manan sasalofen.

17. Hano wa ngaˈay kita pakasoˈlin, o mamalahci ita ko midaˈocay ˈorip a cacikayen?

¹⁷ Wa ngaˈay kita pakasoˈlin, o mamalahci ita ko midaˈocay ˈorip a cacikayen, samanen o papafeli ci Yihofa kitanan to haˈicel. (Isaya 40:29-31) Mihaenay, aka matayo! Todongen ko tarokos ci Pawlo, misaˈicel micangacang to halifon i kaˈayaw. (Filipi 3:13, 14) Awaay ko papatado tisowanan comikay tonini a cacikayen, ira ko sapadama ni Yihofa tisowanan, o mamalaˈosi kiso. Papadama ci Yihofa tisowanan mitamorong to ˈinorong no niyah, mifalah to mikalisangaay a demak. (ˈOlic 68:19) Ira ci Yihofa i tatihi midama tisowanan, o ngangaˈay kiso padadotoc a comikay, salikor milifok to pakalowid!