1-2. Patnakay 11:6 ato milasil to ngaˈayay lihaf no Hongti Kitakit iraay ko manan kalalitng hani?

ITINI i roma kilac, mitosil kita i, makalimay ko tamdaw saka cipinangaw to ngaˈayay lihaf. I roma kilac, cowa ka olah ko tamdaw to Kawas ato Fangcalay Cudad. O kitiraan iso a pala, samanay ko harateng no tamdaw hani? Ano samaanto, misaaliay ci Yihofa kitaanan padadotoc a mitosil, tahira pipasowal ni Yihofa to malaˈosiayto koniya tayal.

² Tahira misaˈosian ni Yihofa a toki, mahererekto ko mitosilay a tayal, ‘maraod ko toki irato ko salikoray romiˈad.’ (Matay 24:14, 36) ˈAyaw nonini, tatengilen ita ko limoˈot no Fangcalay Cudad, ‘aka paselaˈen ko kamay.’ * Sasamaan ko hademak hani?—ˈOsien ko Patnakay 11:6.

3. Oniya lalakaw wa milego to manan?

³ O fafekangay a lalakaw milegoay, malo ‘milifokay to tamdaw a mifotingay,’ wa midemak kita to manan sepat a demak. (Matay 4:19) Oniya lalakaw wa milengo, iraay ko tolo pakayraan ngaˈay paˈicel kitaanan misetek to falocoˈ, ano masamaanto ko paykaraan wa paˈicel to pisetek ita to falocoˈ, padama kitaanan padadotoc a mitosil (1) padotoc a misarocod, (2) ira ko mihadidiay, (3) ira ko tanoktokay a pakasoˈlinay falocoˈ. Wa minengnengho kita mihaen to demak hano masakalimlaan.

4. Hano misarocod kita misongilaˈ midemak to patorodan ni Yihofa kitaanan a tayal hani?

⁴ Pairasolay ci Yis itini saikoray romiˈad wa ira ko masamanay  pinangan no hekal, ato mamifekad ko manan a demak. Mafanaˈay cingra to oniya demak wa mifiyor to nisawawaan eca to pisarocod a mitosil, mansa pasowalen ningra ko nisawawaan: ‘Ka padotoc a mikecol.’ (Matay 24:42) Itini lintad ni Nowa, adihayay ko mikalisangaay to tamdaw a demak, mansa cowa pisinanot ko ˈalomanay tamdaw to sarikec ni Nowa. Anini adihayayho ko mikalisangaay to tamdaw a demak, mansa wa padadotoc a misarocod kita, ngaˈ masongilaˈ midemak to patorodan ni Yihofa kitaanan a tayal.—Matay 24:37-39; 2 Pitiro 2:5.

5. Sowal i Dmak 1:6-8 wa hakowa ko kataˈangay no mitosilay a tayal?

⁵ Anini, mangalefay ko pisaali ita misamacay to falocoꞌ a mitosil. Na pairasolay ci Yis, ikor no mapatay cingra o papadotoc a mitosil ko nisawawaan ningra, hanaca wa mikikaka ko taˈangay no mitosilay a demak. (Yohani 14:12) Ikor no patikol maˈorip ci Yis i, kina cecayay, mifotingay aca ko nisawawaan ningra. Midemakay ci Yis to kafahkaan a demak, padama cangranan milepel to adihayay a foting. Toya tatokian, paihkalay ci Yis, o mitosilay a demak ikakaay ko kalimlaan to romaroma a demak. (Yohani 21:15-17) ˈAyaw no patikol tayra i kakarayan ci Yis pasowalay to nisawawaan, mitosilay a tayal wa mikitini Israil a macowat i polong no cikiw. (ˈOsien ko Dmak 1:6-8.) Ikor no pina miheca, paˈarawan ni Yis ko tarokos ci Yohani i mapolosi to “romiˈad no Tapang” wa iraay ko manan mafekaday a demak. * Maˈaraway ni Yohani ko cecay a coyoh pasayra i ‘kasakitakit kasafinacadan kasasiroma no sowal ato kasafinawlan a tamdaw milasil to midaˈocay a ngaˈayay lihaf.’ (Paˈarawan 1:10; 14:6) Mihaenay, mitokelay ci Yihofa kitaanan misarocod mirienang to mitosilay i polong no hekal, tahira pipasowal Ningra to malaˈosiayto ko tolas.

6. O maanan ko papadama kitaanan misarocod a midemak to mitosilay?

 ⁶ Songilaˈen miharateng hakowaay ko pidama ni Yihofa kitaanan, wa ngaˈay padama kitaanan misarocod a midemak to mitosilay. Tinakoen, misadayan ni Yihofa ko masakenaay sapahaled to pakasoˈlin no falocoˈ a ‘kakaenen,’ mahawpay ko cudad, no tingnaw a mitepangan, ika, milokoingan ato tilifi a kamok. Haratengen hena, itini wangcan ita mataˈlifay ko 1000 sasowalen a lalakaw! (Matay 24:45-47) Oniya hekal pakayni mikowanay, kicay ato pihakelongan maliwasakay, kawra o Misawacayay Tamdaw ni Yihofa makelecay a malacecay midoko to Kawas. Tinakoen, itini 2019 miheca 4 folad 19 romiˈad, Pilimaan, i cowacowaay a Misawacayay Tamdaw ni Yihofa milengoay to pakaromiˈaday sinael a ika. Toya dadaya, komoden 2091 efan 9041 ko mirienangay tamdaw to Piharatengan to Kapatay ni Yis a Saˈopo. Oniya fafekangay a demak o midemakan ni Yihofa a kafahkaan a demak anini, ira ko tatodong ita misawacay ato masalalomaˈ, tada kasemeranto! Miharateng toniya demak, wa ngaˈayto kita padotoc a misarocod midemak to mitosilay.

7. Miharateng to taˈarawan ni Yis hano ngaˈay padama kitaanan misarocod a mitosil?

⁷ Minanam to taˈarawan ni Yis wa ngaˈay padama kitaanan misarocod to mitosilay. Itiniho i hekal ci Yis padotocay misawacay to soˈlinay kimad, caay ka tosa ko falocoˈ. (Yohani 18:37) Ci Satan tano ‘polong no kitakit ato hafay no hekal’ a mikayhid ci Yisan, tangsolay cingra minaˈay. Sapatirengaw ko ˈalomanay pala hongti ci Yisan, caay kakahi cingra micada. (Matay 4:8, 9; Yohani 6:15) Cowa picangacang cingra to pakadafongay a hafay, misiˈayaw to pisafelit cowa ka talalikor. (Luka 9:58; Yohani 8:59) Pakalalokay ko tarokos to Krisciyang pasayra ci Yisan a minanam, ‘hoeca ka malonay a misawad.’ (Hipray 12:3) Ano mapalifet ko pakasoˈlin ita i, haratengen ko limoˈot ni Pawlo papadama kitanan padadotoc misarocod a mitosil.

8. Iraay ko mihadidiay a tamdaw o masamaanay hani? Hano mikiriwiˈay ko pisaali ita to mihadidiay hani?

⁸ Iraay ko mihadidiay a tamdaw itini pitala to kafalic cowa ka marawraw. O pihamham ita to kafalic no pakayraan anca malaˈosi ko mitokelan, misaaliay to mihadidiay. Tokel ni Hapakuk nanay awato ko mariˈangay demak i Yutaya kitakit. (Hapakuk 1:2) Saka 1 hahekalan a nisawawaan mihamhamay ‘tangsol’ a masadak ko Hongti Kitakit no Kawas, ho ecato ka roero no Loma tamdaw cangra. (Luka 19:11) Kita anini mitokelay kahnay palaˈafoen no Hongti Kitakit no Kawas ko tatiihay tamdaw ato tatiihay a demak, patireng to moecelay faelohay a hekal. (2 Pitiro 3:13) Kawra iraayho ko mihadidiay ita, mitala to kaira no misaˈosian ni Yihofa a toki. Dotoc nengnengen ita samaan ci Yihofa padama kitaanan palahad to mihadidiay.

9. O maanan a tinakoan paihkalay to iraay ko mihadidiay ni Yihofa hani?

⁹ Itini mihadidiay patirengay ci Yihofa to malefotay a taˈarawan. Pafelian Ningra ci Nowa to maedengay a toki misangaˈ to tamina halo ‘milasil to moecelay.’ (2 Pitiro 2:5; 1 Pitiro 3:20) Misaˈosi ci Yihofa palaˈafo to Sotom ato Komora a tamdaw i, mihadakay ci Apraham to adihayay salicay, padotocay ci Yihofa mihadidi mitengil. (Satapangan 18:20-33) Adihayay mihecaan, cowa ka madimadi ko Israil tamdaw ci Yihofaan, padotocay a misodod ci Yihofa cangranan, tada mihadidiay cangranan. (Nihimiya 9:30, 31) Anini, kamayan mihadidi ci Yihofa to tamdaw, misolot to tamdaw miingid Cingranan, hanaca paira to toki nangra ‘pasasiyor a maemin.’ (2 Pitiro 3:9; Yohani 6:44; 1 Timoti 2:3, 4) O taˈarawan ni Yihofa pakalalokay kitaanan itini pipasifanaˈ to tamdaw  i, padotoc a paihkal to mihadidiay. Roma i, mikayatan ni Yihofa ko tamdaw mitilid i Fangcalay Cudad to cecay sapatinako, pasifanaˈ kitaanan palahad to mihadidiay.

10. Pakayni Yakop 5:7, 8, papasayra kita i mawmahay minanam to maanan?

¹⁰ ˈOsien ko Yakop 5:7, 8. O sapatinako to mawmahay wa ngaˈay padama kitaanan palahad to mihadidiay. O roma pinaloma kalikiay a lomahad, kawra o adihayay pinaloma, mangalef ko ciheciay a pinaloma, misaaliay to koˈedaway a toki ngaˈ malohemay. Itini Israil, o panay misaaliay to 6 folad ngaˈ malohemay, o mawmahay itini ‘kafarawfawan’ a mikosam to sapaloma, itini ‘kacanglahan’ a mipanay. (Marko 4:28) Malecad kita o mawmahay mihadidi a mitala, o citanengay a tamdaw, kawra mihaen to demak cowa ko madoloay.

11. O mihadidiay sasamaan padama kitaanan misarocod to mitosilay a tayal?

¹¹ Tocerid tangsol maˈaraw ko minaroˈan no niyah sanay ko cowa kalefot a tamdaw, kawra ano mitokelay kita ngaˈay ko milidongan a pinaloma, mamihadak to toki ato ˈicel mifelih to sera, mikosam to sapaloma, mikolas to semot, micefos to nanom. Malecaday, sapadamaaw to tamdaw malo nisawawaan ni Kristo, oha papadotoc kita a misaˈicel. Tinakoen, padama to pacekiwan mifalah to misakakinihay ato mafanaˈ ciharateng to tao, misaaliay to toki. Ano manaˈay ko tao mitengil to ngaˈayay lihaf i, ano ira ko mihadidiay ita, cowa ko lalanikay a matoled. Soˈlin makahi ko tao minanam to Fangcalay Cudad, papaihkal kita to mihadidiay, samanen cowa ka ngaˈay kita pacieci to pacekiwan a pakasoˈlin to soˈlinay kimad. Mahaenay, o nisawawaan ni Yis cowa ka tangsol cipinang to pasifanaˈan ni Yis a kimad. (Yohani 14:9) Haratengen, o pikosam aca ato picefos aca ita, edengan ko Kawas ko ngangaˈay palomahad.—1 Korinto 3:6.

12. Ano misawacay to cowa pihakelong a paro no lomaˈ i, sasamaan kita paihkal to mihadidiay hani?

¹² Ano misawacay kita to cowa pihakelong a  paro no lomaˈ i, paihkal to mihadidiay cowa ka dolo alatek. Ano hatiraay i, papadama ko Patnakay 3:7 kitaanan, sanay ko sinael: “Ira ko katomerepan, ira ko kacaciyawan a romiˈad.” Latekay caka caciyaw kita ngaˈayay tano makapahay waywayan a misawacay to paro no lomaˈ, latekay mameten ita ko toki pasowal to soˈlinay kimad i paro no lomaˈ. (1 Pitiro 3:1, 2) O fafanekfek kita a mitosil pasifanaˈ to tamdaw, kawra papaihkal to mihadidiay i polong a tamdaw, mahaop ko paro no lomaˈ.

13-14. O cima ko ngaˈayay taˈarawan i paihkalay to mihadidiay hani?

¹³ Ngaˈay kita minanam to pihadidi nolitengan ato aniniay madimadiay a sikawdan. Tinakoen, cowato sapinengnengaw ci Hapakuk to tatiihay demak a mifekad, kawra kamayan a mihadidi, sanay: ‘Padadotoc kako tomireng i pikacawan.’ (Hapakuk 2:1) Soˈlin sakahnayaw ci Pawlo milahci to ˈinorong, milifok to kakarayan a sapalifon, kawra kamayan a paihkal to mihadidiay, padotoc ‘misongilaˈ misawacay to ngaˈayay lihaf.’—Dmak 20:24.

¹⁴ Dotoc nengnengen ita ko aniniay lintad a tinakoan. Cecay mararamoday micodiyap i Kiliyat Picudadan, manilnilay i cowa ka adihay ko Misawacayay Tamdaw ni Yihofa a kitakit, ˈalomanay tamdaw itira cowa ko Krisciyang, cowa ka ˈaloman ko maolahay to Fangcalay Cudad. Roma i, matengil nangra manilnilay tayra roma kitakit a cafay micudad adihayay ko pacekiwan, padamaayho to ˈalomanay micada to paputisem. O pitosilan noniya mararamoday a kilac manaˈonay ko kacakat, mihadidiay cangra padotoc a mitosil to tamdaw. Itini toniya kietecay ko harateng kilac padotocay to 8 miheca, iraayto ko cecay pacekiwan micada to paputisem. Tada palipahakay koni cangranan! Mikitini ngaˈayay taˈarawan nolitengan ato aniniyay lintad mananamay ita ko maanan hani? Itini pasangaray pakayraan cowa ‘paselaˈ ko kamay’ nangra, ao padotoc a fanekfek ato mihadidi, salikor milifokay to sapalifon ni Yihofa. Nanay todongen ita koniya ‘pakayniay pakasoˈlin mihadidi a milifokay to sakiˈok a tamdaw.’—Hipray 6:10-12.

15. Papakasoˈlin kita to maanan, ngaˈ padadotoc a mitosil hani?

¹⁵ Ano pakasoˈlin kita to milasilan no niyah a lihaf, wa fanekfek a mitenak i tamdaw. Pakasoˈlin kita to mamalaˈosi ko sakiˈok no Fangcalay Cudad. (ˈOlic 119:42; Isaya 40:8) Maˈaraway ita ko adihayay sapairasol malaˈosiay i lintad no mita, maˈarawayho, ikor no mitoor ko ˈalomanay tamdaw to safalod no Fangcalay Cudad a maˈorip i, makapahayto ko kaˈorip nangra. Oniya demak mitongalay to pakasoˈlin ita, misaaliay ko tamdaw sapakatengilaw to ngaˈayay lihaf no Hongti Kitakit.

16. Mikitini ˈOlic 46:1-3, o pakasoˈlin ci Yihofaan hano papadama kitanan padadotoc a mitosil hani? O pakasoˈlin ci Yisan hano papadama kitaanan mihaen to demak?

¹⁶ O papakasoˈlinen ita ci Yihofa aci Yis. (Yohani 14:1) O mitenakan ita a lihaf mikitiniay ci Yihofaan. Mafanaˈay kita, ano samaanto ko masiˈayaway ita a pakayraan, o pikiˈadingan ita ci Yihofa, o ˈicel no mita. (ˈOsien ko ˈOlic 46:1-3.) O Hongti no Hongti Kitakit no Kawas ci Yis, pafelianto ni Yihofa cingra to polong a fadangalan. O mitosilay a tayal itiniay sakayat ni Yis a midemak, mansa ngaˈay kita matomes ko pakasoˈlin.—Matay 28:18-20.

17. Patinakoen mitadtad, hano papadadotoc kita a mitosil.

¹⁷ Ano ira ko pakasoˈlinay falocoˈ ita, wa matongal ko pakasoˈlin to papalemeden ni Yihofa ko pisaˈicel no mita. Latekay, tano cowa ka harateng ita a pakayraan Cingra mihaen to demak. (Patnakay 11:6) Tinakoen, to romiˈamiˈad ˈalomanay ko mitaˈlifay i sapisawacay a paliding  ita, o mahaenay a pakayraan mitosil soˈlinay ira ko epoc han? Ciepocay! 2014 miheca 11 folad Pakafoladay a Salasil iraay ko cecay nalifetan. Cecay taˈangayay ko picudadn a tamdaw sapitilidaw to pakayniay Misawacayay Tamdaw ni Yihofa a safanaˈ, cowa pakahela to Hongti Kitakit Kasaˈopoan, kawra itini picudadan maˈaraway ningra ko sapaˈaraw to cudad a eto ita, mahelaayto ningra ko safanaˈ a lalakaw. Ikor, micadaay cingra to paputisem, malo misakafahayho. O mahaenay nalifetan mitadtaday, ˈalomanayho ko sapakatengilaw to ngaˈayay lihaf. Pakalalokay koni kitaanan, misetek to falocoˈ padotoc a mitosil.

18. Hano ngaˈay pakasoˈlin kita o mamatoor ko toki malaheci ko mitosilaya tayal?

¹⁸ Ngaˈay kita pakasoˈlin, wa matoor ko toki malaheci ko mitosilay a tayal. Haratengen, mifekaday i lintad ni Nowa a demak misawacayay to mitooray ci Yihofa to toki. Itini ˈayaw no lenlen 120 miheca, misaˈosiayto Cingra to pitefadan to lenlen a toki. Ikor no pina poloˈ miheca, palimoˈotan ni Yihofa ci Nowa misangaˈ to tamina, ˈayaw no matefad ko lenlen, malalokay ci Nowa matayal to 40 tahira 50 miheca. Soˈlin caka pisikor ko tamdaw to pirikec ningra, kamayan padadotoc cingra mitosil, tahira pipasowal ni Yihofa pacomod to pinaˈorip i tamina ko tolas. Ikor, malaod ko misaˈosian a toki, “miˈedefanto ni Yihofa ko fawahan no tamina.”—Satapangan 6:3; 7:1, 2, 16.

19. Caka paselaˈ to kamay kita, padadotoc a mitosil, wa ngaˈay pakaˈaraw to maanan hani?

¹⁹ Cato ka halafin, pasifanaˈento ni Yihofa kita malaheciayto ko mitosilay a tayal. Malaod ko toki, palaˈafoento Ningra ko tatiihay hekal ni Satan, paitini moecelay faelohay hekal paˈorip kitaanan. ˈAyaw nonini, nanay todongen ita ci Nowa, Hapakuk ato tanektekay caka pisawad a tamdaw, padadotoc misarocod ato mihadidi, pakasoˈlin to sakiˈok ni Yihofa!