1. Fafahiyan salikaka samanay midama to tayal no likakawa? misiˈayaway to maanan a pasangaray hani? (Nengnengen ko papotal coka.)

ITINI kasakopang ˈalomanay ko malalokay a fafahiyan salikaka, tada mahemekay kita! Tawlikay cangra mirienang i kasakopang, fanekfekay a mitosil. O roma fafahiyan salikaka mirienangay to mitomadaway to kasaˈopoan, o roma fafahiyan salikaka tada ciharatengay to roma salikaka. Kawra, misiˈayaway cangra to pasangaray. O roma midimokosay to matoˈasayto a wama wina, o roma micadaay to pisafelit no paro no lomaˈ, o roma awaay ko faˈinay a wina, marorayay paliliˈ to wawa.

2. Hano mamidama kita to fafahiyan salikaka i kasakopang?

² Hano mamidama kita to fafahiyan salikaka i kasakopang hani? Samanen o hekal a tamdaw cowa pikangodo to fafahiyan. Roma i, pakalalokay ko Fangcalay Cudad kitaanan midama to fafahiyan salikaka. Tinakoen, papicadaan ni Pawlo ko Lomaay kasakopang ci Fipian, pafeli cingranan to “sapadama.” (Loma 16:1,  2) Na o Farisay ci Pawlo, itihiay ningra a tamdaw misakahmaway to fafahiyan. Kawra ikor no malo Krisciyang ci Pawlo misatapangay mitodong ci Yisan, paihkal to pikangodo ato patado miharateng to fafahiyan.—1 Korinto 11:1.

3. Samanay ci Yis a micada to fafahiyan? Samanay ko pinengneng ningra to midofdofay to araaw no Kawas dademak a fafahiyan?

³ Mikangodoay ci Yis to fafahiyan, cowa kalecad to ˈaˈideman no pihakelongan a misakahmaw to fafahiyan. (Yohani 4:27) Cecay lalakaw sanay ko sowal: “Cowa ka somowal ci Yis to misakahmaway to fafahiyan a sowal.” Masafelitay, mikangodoay ci Yis to polong midofdofay to araaw no kakarayan Wama midemak a fafahiyan, malecaday o paro no lomaˈ a tamdaw ko pinengneng cangranan, pangangan to “fafahiyan salikaka.”—Matay 12:50.

4. Oniya lalakaw wa milengo to maanan?

⁴ Makalimay ci Yis padama to midokoay to Kawas a fafahiyan,  tada masemeray cingra cangranan, patadoayho cangranan a pasowal. Dotoc nengnengen ita, wa ngaˈay kita samaan toniya pakayraan a mitodong ci Yisan.

5. O roma fafahiyan salikaka hano matoˈolay ko harateng hani?

⁵ Ano faˈinayanto fafahiyanto a salikaka, misaaliay maemin malacafay to ngaˈayay widang a micawmaˈ. Kawra o roma fafahiyan salikaka pasangaran mihaen to demak, misamanay hani? Tengilen ita ko nafalocoˈan nangra. Cecay ci Ciyawtan * fafahiyan salikaka sanay: “Malo cowa ka ciramod a salikaka, cowa ka hapinang ako to o maanan ko sadama no niyah i kasakopang, hato cowa ka salalomaˈ saan ko harateng.” Ci Kelisting o misakafahay, malinahay cingra tayra misaaliay to mitosilay a pala, sanay: “Tiya cecay malinah i faelohay kasakopang i, matoˈolay ko harateng.” Soˈlinayto, mahaenay ko harateng no roma salikaka. O roma fafahiyan salikaka malacafay to cowa pihakelong a paro no lomaˈ, samanen cowa kalecad ko pihakelongan, pasangaray miingid to paro no lomaˈ, toniya tatokian, milaayay to salikaka i kasakopang sanay miharateng. O roma fafahiyan salikaka pakayni ka adada caay ka ngaˈay masadak, roma fafahiyan salikaka midimokosay to halafinay adada a paro no lomaˈ, matoˈolan nanay cangra. Mahaenay ci Annite, sanay cingra: “Midimokosay kako to adadaay a wina, mansa mitahidang ko salikaka takowanan micawmaˈ i, cowato ka ngaˈay malingad kako.”

6. Mikitini Luka 10:38-42, samaanan ni Yis padama ci Marta aci Mariya hani?

⁶ Makahiay ci Yis malacafay to midokoay to Kawas a fafahiyan, mala soˈlinay windang nangra. Tinakoen, windang ni Marta aci Mariya ci Yis, caka ciramod koniya tatosa fafahiyan. (ˈOsien ko Luka 10:38-42.) O sowal ato midemakan ni Yis parihadayay cangranan. Kinacecayay, itini kaˈayaw ni Yis maroˈay ci Mariya mitengil to sowal ningra, cowa ka marawraw. * Tiya caka hemek ci Marta samanen cowa padama ci Mariya a dademak i, mihadakay to nafalocoˈan harateng. Toya tatokian, padamaan ni Yis cangra minanam to kalimlaan a kimad. Roma i, marariday ci Yis micawmaˈ ci Martaan, Mariyaan ato salikaka nangra ci Lacarusan, paihkal to kaciharateng cangranan. (Yohani 12:1-3) Mansa tiya pakidem ko adada ni Lacarus i, cowa ka cisasa ci Marta aci Mariya misaali to sadama ni Yis.—Yohani 11:3, 5.

7. Wa ngaˈay kita misamaan pakalalok to fafahiyan salikaka hani?

⁷ O roma fafahiyan salikaka itini aca i kasaˈopoan ngaˈ iraay ko toki masasoˈaraw to salikaka, mansa mametay cangra to toki a mihamham cangranan, masasowal cangranan, mifanaˈ cangranan tada ciharatengay kami cangranan. Masowalay i fafekang ci Ciyawtan sanay: “Ano ira ko pakahemekay to sapacaˈof ako, talaˈayaw a mitahidang takowanan mitosil, paihkal to kaciharateng takowanan, mitemeray to falocoˈ ako.” O fafanaˈen ita ko fafahiyan salikaka to misaaretengay kita cangranan. Sanay ci Ciya: “Ano cakalingad kako masaˈopo, milinakay ko salikaka takowanan, milicay to ngaˈayay kako hokira, tada matanamay ako ko kaciharateng nangra takowanan.”

8. Wa ngaˈay kita itini maanan a pakayraan minanam ci Yisan hani?

⁸ Wa ngaˈay kita malecad ci Yisan, mipalak to toki kalacafay to fafahiyan salikaka. Ngaˈayay tahidangen cangra malacafay komaen, anca malacafay milawla. Kawra, ano malacafay kita cangranan i, oya ngangaˈay pakalalok cangranan ko hasowal. (Loma 1:11, 12) Mangalef  ko malohemay malitengay maminanam to harateng ato waywayan ni Yis. Mafanaˈay ci Yis pakayni roma tamdaw, padotoc eca ka ciramod cowa ko madoloay, kawra ihkalay ko sowal ningra, ciraramod ato ciwawa awaay ko pinang to tatahadaˈoc a lipahak. (Luka 11:27, 28) Paisalakaten ita ko pidoko to Kawas i kaˈorip, mihaen ngaˈ tahadaˈoc a lipahak.—Matay 19:12.

9. Wa samanen ko malohemay malitengay padama to fafahiyan salikaka hani?

⁹ Mangalef ko malohemay malitengay minengneng to fafahiyan a Krisciyang malecad o salikaka ato wina. (1 Timoti 5:1, 2) Wa mihadak cangra to toki itini ˈayaw anca ikor no saˈopo masasowal to fafahiyan salikaka. Masowalay i fafekang ci Kelisting sanay ko sowal: “Mahapinang no cecay malohemay malitengay to ˈifowaay kako, milicayay takowanan tocerid samanay milimasmas to toki no niyah, tada ciharatengay cingra takowanan, miakoˈiday kako cingranan.” Mararid ko malohemay malitengay masasowal to fafahiyan salikaka, wa ngaˈay paihkal to kaciharateng to fafahiyan salikaka. * Fafekangay lalakaw masowalay ci Annite mararid ko malohemay malitengay masasowal cingranan taˈangayay ko sapadama cingranan, sanay cingra: “Matongalay ko kacipinang ako cangranan, matongalay ko kacipinang nangra takowanan. Mihaen, ano tahalifa kako to pasangaray i, wa madoloto kako a misaali to sadama nangra.”

10. Wa samanen ko demak ita ngaˈay pakahemek to fafahiyan salikaka hani?

¹⁰ Ano faˈinayanto fafahiyanto, ano milifok to pakahemek ato kasemer no tao, wa mahemek ko falocoˈ. Kawra ano saloyaˈen no tao minengneng ko mihadakan ato misaˈicelan no mita, wa matoled ko falocoˈ ita. O cecay caka ciramod misakafahay a fafahiyan salikaka ci Apikaer, harateng ningra misakahmawan no tao ko niyah, sanay ko sowal ningra: “O kafanaˈan no tao takowanan o kaka anca o safa no nima, anca o wawa no roma tamdaw, cowa ka songilaˈ mafanaˈ takowanan, hato awaay materek sanay ko piharateng ako.” O roma caka ciramod a salikaka ci Pami, adihayay a mihecaan malo milakowitay to riyar a mitosilay, ikor minokayay cingra midipot to wama wina no niyah. Anini mataˈlifayto 70 ko mihecaan ningra, kamayan malo misakafahay. Sowal ni Pami: “Ano pasowal ko tao takowanan, tada miˈakoiday cangra to tayal no mako, tada pakalalokay takowanan.”.

11. Samanay ci Yis paihkal to tada miakoˈiday cingra to malacafayay cingranan mitosil a fafahiyan hani?

¹¹ O roma fafahiyan ‘mihadakay to dafong no niyah’ midama ci Yisan, tada miakoˈiday ci Yis cangranan. (Luka 8:1-3) Cowa ko picada aca ni Yis to sadama nangra, pasowalayho to soˈlinay kimad cangranan. Tinakoen, pasowalan ningra cangra, wa patayen cingra, ikor patikol a maˈorip. (Luka 24:5-8) Padama cingra to fafahiyan salikaka misaday to mamasiˈayaw a sapalifet, malecaday o pipadama to tarokos. (Marko 9:30-32; 10:32-34) Tiya malepel ci Yis i, milaliway ko tarokos maemin, tiya paceken ci Yis i pisemseman a hecek i, o roma fafahiyan padotocay a madimadi midama cingranan.—Matay 26:56; Marko 15:40, 41.

12. O maanan kalimlaan a tayal patorodan ni Yis i fafahiyan salikaka hani?

¹² Makahiyay ci Yis patorod to kalimlaan a tayal i fafahiyan salikaka. Tinakoen, papinaay fafahiyan salakatay pakaˈaraw to patikol ni Yis a maˈorip, ikor miocoran ni Yis cangra mifanaˈ to tarokos, patikolayto maˈorip cingra. (Matay 28:5, 9, 10) Ikor, itini saka 33 miheca Kocinsic, tiya matefad ko fangcalay saocor i, iraay ko fafahiyan itiya. Ano mahaenay, o manilnilay no fangcalay saocor a fafahiyan salikaka milifokay to kafahkaan a ˈicel, tano roma sowal a ‘milasil to kasemeran a demak no Kawas.’—Dmak 1:14; 2:2-4, 11.

13. O fafahiyan salikaka midemakay to maanan a tayal hani? Sasamaan kita ngaˈ paihkal to miˈakoiday cangranan hani?

¹³ Adihayay ko nano tayal no fafahiyan salikaka saki Yihofaan, tada papakahemeken ita cangra. O tayal nangra mahawpay ko patirengay ato mitomadaway to kasaˈopoan, midama to roma sowal a mitosilay, itini Pitil matayal, mirienangayho cangra to padamaay to tahapadesay a tayal, mihongyak to masakenaay mitepangan, ato misakafah ato malo milakowitay to riyar mitosil. Fafahiyan salikaka ngaˈay malecad o faˈinayan salikaka mirienangto sapahatatanam to misakafahay, SKE ato Kiliyat Picudadan. Roma i, midamaay to faˈinay ko fafahi, hato ngaˈayay cangra itini kasakopang ato likakawa no Kawas mitamorong to kalimlaan ˈinorong. Oniya salikaka o sapafeli no Kawas a ‘malo sapatelong’ a tamdaw, adihayay ko mihadakan nangra a ˈicel pakayni kitaanan. Ano caay pidama ko fafahi cangranan, cowa ko aadihay ko tayal nangra. (Ifiso 4:8) Adihayay ko nano tayal no fafahiyan salikaka, ngaˈayay miharateng kiso sasamaan a midama cangranan han?

14. Ano haratengen no malohemay malitengay ko ˈOlic 68:11 a sinael, wa samaan ko pidemak hani?

¹⁴ Cipinangay ko malohemay malitengay, o patenakay to ngaˈayay lihaf a fafahiyan salikaka o “masaferenganay,” cowa ko makahi aca mitosil cangra, o sangaˈayay a mitosilay. (ˈOsien ko ˈOlic 68:11.) Mansa mitengilay ko malohemay malitengay to sapaini a sowal nangra.  Fafekangay lalakaw masowalay ci Apikaer sanay, ano milicay ko salikaka cingranan sasamaan misatapang masasowal to tao, wa papalalok cingranan. Sowal ningra: “Mahapinagay ako, pairaan ni Yihofa ko saaroˈan ako itini kasakopang Ningra.” Roma i, mafanaˈay ko malohemay mlitengay, o matenesay fafahiyan salikaka tada mafanaˈay padama to kaemangay fafahiyan salikaka miremo to sapalifet. (Titus 2:3-5) Tada kalimlaan ko fafahiyan salikaka, soˈlinay o kasemeran ita cangranan!

15. Latekay hano misaaliay ko fafahiyan salikaka to papatado cangranan somowal a tamdaw hani?

¹⁵ Latekay, misiˈayaway ko fafahiyan salikaka to mikiriwiˈay pasangaray, misaaliay to papatado cangranan a somowal. (Isaya 1:17) Tinakoen, o maponengay anca milikongay a fafahiyan salikaka misaaliay to papatado cangranan somowal a tamdaw, padama cangranan midemak to nano demak no faˈinay a demak i salakat. O matoˈasay a fafahiyan salikaka misaaliay to papadama cangranan a pasowal to ising. O misakafahay a fafahiyan salikaka mirienangay to roma a tayal no likakawa, caka ngaˈay malecad to roma misakafahay mararid a mitosil, wa malikaf no tao alatek, ano mahaen misaaliay to papatado cangranan somowal a tamdaw. Wa ngaˈayho kita samaan padama to fafahiyan salikaka hani? Nengnengen ita ko taˈarawan ni Yis.

16. Mikitini Marko 14:3-9, samanay ci Yis paˈading ci Mariyaan hani?

¹⁶ Ano mapakararaw ko fafahiyan salikaka i, tangsolay ci Yis masadak patado cangranan a somowal. Tinakoen, tiya mirikec ci Marta ci Mariyaan i, tangsolay paˈadingen ni Yis ci Mariya. (Luka 10:38-42) Kinacecayay, mararaway ko saˈosi ni Mariya sanay ko piharateng no tao a milikaf cingranan, paˈadingan ni Yis ci Mariya. (ˈOsien ko Marko 14:3-9.) Mafanaˈay ci Yis to ngaˈayay ko nafalocoˈan ni Mariya, orato pakahemekay cingranan sanay: “Makapahay ko demak ningra takowanan. . . . misarocoday ko pidemak ningra.” Pairasolayho ci Yis, ‘ano taracowato a mapatenak ko ngaˈayay lihaf,’ wa ira ko mihadakay to nano demak ni Mariya. O tinakoan koniya lalakaw. Palalitingan ni Yis koniya cowa pisateked a demak ni Mariya to miedefay i cikiw a mitosilay tayal, matengil ni Mariya koniya sowal ni Yis, maedeng mamasayal ko falocoˈ.

17. Itini masamanay a pakayraan, papatado kita to fafahiyan salikaka a somowal hani? Tinakoen.

¹⁷ Ano misaali to sapadama ko fafahiyan salikaka i, patadoay kiso cangranan a somowal hokira? Haratengen ko laenoay tinakoan. Cecay fafahiyan salikaka cowa pihakelong ko faˈinay, maosoyayto a mirienang to saˈopo, mahererek tangsolay miliyas, hanaca cowa ka rarid miˈorong to wawa mirienang to saˈopo. Milikafay ko roma tamdaw toniya fafahiyan salikaka, ano samaanto ko harateng no faˈinay papadotoc miˈorong to wawa mirienang to saˈopo saan miharateng. Soˈlinay i, misarocodayto koniya fafahiyan salikaka a midemak. O pilimasmas ningra to toki cowa ka haratengay saan ko niyah misaˈosi, ngangaˈay ko wawa mirienang to saˈopo hokira cowa ko cingra ko mamisaˈosi. Wa samaan kiso a padama toniya fafahiyan salikaka hani? Ano pakahemeken iso koniya fafahiyan salikaka, pasowal to tao ngaˈayay ko midemakan ningra, mihaen ecato pilikaf ko tao cingranan alatek.

18. Wa ngaˈayho kita samaan padama to fafahiyan salikaka hani?

¹⁸ Mihadak kita to ciepocay a sadama, wa matinako no fafahiyan salikaka to soˈlinay kita a ciharateng cangranan. (1 Yohani 3:18) Masowalay i fafekang ci Annite sanay: “Latekay, tayniay i lomaˈ ko widang pacafay takowanan midimokos to wina to cecay liyad, mihaen ngaˈayto kako midemak to roma demak. Latekay miˈorongay cangra to kakaenen. Matinakoay ako tada  maolahay ko ˈalomanay takowanan, soˈlinayto o masalalomaˈay no kasakopang kako.” Ci Ciyawtan milifokay to adihayay sadama, pasifanaˈay ko cecay faˈinayan salikaka cingranan mitomadaw to paliding, sanay cingra: “Ciharatengay ko salikaka to rihaday ako, padihkoay to falocoˈ ako konini.”

19. Wa ngaˈay ko malohemay malitengay samaan padama to fafahiyan salikaka hani?

¹⁹ Tatalaˈayaw ko malohemay malitengay a ciharateng to saali no fafahiyan salikaka, mafanaˈay cangra mitokelay ci Yihofa ngaˈay ko pidimokos to fafahiyan salikaka. (Yakop 1:27) Mihaenay, wa mitodong cangra ci Yisan, paihkal to micaˈiyay a waywayan. Wa patado cangra to fafahiyan salikaka a miharateng, cipinang to nafalocoˈan nangra, cowa ko misaˈosian no tamdaw ko tatooren. (Matay 15:22-28) Talaˈayaw ko malohemay malitengay ciharateng to fafahiyan salikaka, o mamatinako nangra ko pidipot ni Yihofa ato likakawa no Kawas. O kantok no kapot ni Ciya mafanaˈ to mamafolaw cingra i, tangsolay milimasmas to ˈalomanay a pacafay. Sanay ci Ciya: “Malowanay ko saroero ako. Cowa ko pakalalok aca no malohemay malitengay takowanan, mihadakayho to ciepocay a sadama, mahapinangay ako, o kalimlaan no kasakopang kako, hanaca ano tahalifa to pasangaray cowa ka cecay kako a misiˈayaw.”

20-21. Samaan ko demak ita, wa ngaˈay paihkal to maolahay kita to polong a fafahiyan salikaka?

²⁰ Itini kasakopang ˈalomanay ko malalokay a fafahiyan salikaka, ngaˈayay taˈarawan ita cangra, o mamisaˈicel kita a midama cangranan. Ngaˈayay minanam kita ci Yisan, mipalak to toki kalacafay cangranan, mitongal to kacipinang cangranan. Misarocoday cangra matayal saki Kawas, paihkalen ita ko kasemer cangranan. Ano ngaˈay i, masadak a patado cangranan somowal.

²¹ Itini hererekan no Loma mihadakay ko tarokos ci Pawlo to sasiwa fafahiyan salikaka. (Loma 16:1, 3, 6, 12, 13, 15) Matengil nangra ko pihamham ato pakahemek ni Pawlo, maedeng mapakalalokay. Oha mamidama kita to polong a fafahiyan salikaka i kasakopang, mihaen o paihkalay to maolahay kita cangranan, malecad o paro no lomaˈ ko pinengneng cangranan.