1. Itini masamanay a pakayraan, pasangaray midoko ci Yihofaan alatek?

HARATENG iso itini masamanay a pakayraan pasangaray midoko ci Yihofaan hani? Itini pasangaray pakayraan, anca itini rihadayay a tatokian hokira? Ano tahalifa to pasangaray i, tocerid maharatengay ita to mamitadiˈec ci Yihofaan. Kawra ano rihaday ko kaˈorip i, makalisangaay ko falocoˈ ita, mapawan to kalimlaan ko pidoko ci Yihofaan. Na mirikecan ni Yihofa ko nolitengan a Israil tamdaw, somowal to mapawanay cangra Cingranan alatek.—Limoˈot 6:10-12.

2. Patirengay ko Hongti ci Asa to maanan taˈarawan?

² Inanengay ko demak no Hongti ci Asa, misarocoday to falocoˈ a mitadiˈec ci Yihofaan, ano rihaday anca pasangar ko pakayraan, madimadiay cingra a midoko to Kawas, ‘hakelong no kaˈorip madimadiay ci Yihofaan.’ (1 Hongti 15:14) Midemakay cingra to maanan hani? Mikoracan ningra ko mararaway pidoko i Yutaya kitakit. Sanay ko Fangcalay Cudad: ‘Palasawadan ningra ko pipatoˈayaan ato cadada no ˈalafang a Kawas, pelpelen ko fokeloh a hecek, tastasen ko samiyay.’ (2 Rayray 14:3, 5) Palasawaden ningra ko kacingangan no mamo ningra tono fafahi no hongti, samanen pakalalokay ci Maciya to tamdaw midoko to samiyay.—1 Hongti 15:11-13.

3. Oniya lalakaw wa milengo to maanan?

³ Cowa ko pifalah aca ni Asa to samiyay, padamaayho to  Yutaya tamdaw miliyaw midoko ci Yihofaan. Orato, palemedan ni Yihofa ci Asa ato finawlan Ningra, paira to dipayalay a tatokian, moetepay miheca ‘awaay ko lalood, dipayalay ko kitakit.’ (2 Rayray 14:1, 4, 6) Oniya lalakaw wa milengo, samanan ni Asa misaka dademak koniya rihadayay a tatokian. Saka 1 hahekalan a Krisciyang ngaˈayay ko pidemak, nengnengen ita ko taˈarawan nangra. Saikor, wa miharateng kita, ano pasalatay kita midoko ci Yihofaan, wa ngaˈay kita misamaan misaka dademak toniya tatokian.

4. Pakayni 2 Rayray 14:2, 6, 7, itini karihadayan a tatokian midemakay ci Asa to maanan a demak?

⁴ ˈOsien ko 2 Rayray 14:2, 6, 7. Pasowalan ni Asa ko finawlan, o ci Yihofa ko padamaay cangranan ‘milifok to rihaday,’ kawra sasinoway sato ko kaˈorip nangra cowa ka saan ko harateng ni Asa. Mimetmetay cangra to toki patireng to niyaroˈ, ato ˈadipel, patireng to pikacawan ato fawahan. Pasowalan ni Asa ko finawlan: ‘Oniya pala itiniayho i kamay ita.’ Tatodong ningra ngaˈayay pasalat ko finawlan i lalomaˈ no kitakit, cowa ko mamacara no ˈada ko patirengay a tayal nangra. Pakalalokan ni Asa ko finawlan misongilaˈ misaka dademak toniya rihadayay a tatokian.

5. Hano paˈicelen ni Asa ko sapilood no sofitay hani?

⁵ Misaka dademakan ni Asa ko rihadayay a tatokian paˈicel to sapilood no sofitay. (2 Rayray 14:8) Mihaen ko demak ningra, o cowa pitadiˈec ci Yihofaan han? Cowa ka hatira. Mafanaˈay ci Asa, malo hongti no kitakit, iraay ko ˈinorong ningra padama to finawlan a misaday, samanen cowa ko tatahadaˈoc a rihaday ko Yutaya kitakit. Soˈlinay mahaen ko demak.

6. O saka 1 hahekalan a Krisciyang itini rihadayay a tatokian samanay ko demak hani?

⁶ O saka 1 hahekalan a Krisciyang soˈlin  marariday micada to sapalak, kawra iraay ko rihadayay a tatokian nangra to latekay. Itiya, mimetmetan nangra ko toki padotoc a mitosil. Sanay ko sowal no Dmak, ‘o waywayan nangra paihkalay to mangodoay ci Yihofaan a falocoˈ.’ Itini karihadayan a tatokian misaˈicelay cangra a milasil to ngaˈayay lihaf, telocto ‘matongalay ko tamdaw.’ Mahapinangay, o pisaˈicel nangra milifokay to sapalemed ni Yihofa.—Dmak 9:26-31.

7-8. Ci Pawlo ato roma tamdaw mimetmetay to toki midemak to maanan hani? Tinakoen mitadtad.

⁷ O saka 1 hahekalan a Krisciyang mimetmetay to toki milasil to ngaˈayay lihaf. Tinakoen, itini Ifiso mahapinangay no tarokos ci Pawlo, iraay ko ‘taˈangayay fawahan’ pasayraay cingranan mafohat, padotocayto cingra materek itira a mitosil, padama to tamdaw malo Krisciyang.—1 Korinto 16:8, 9.

⁸ Pakaynien ci Pawloan ato roma tamdaw ko sowal, ikor no masaysay ko kacisasa to kerit i saka 49 miheca, iraay ko rihadayay a tatokian itiya. (Dmak 15:23-29) Ikor no palihaf ko Mikayatay a Malohemay Malitengay to kasakopang i, misaˈicelay ko ˈalomanay ‘milasil to ngaˈayay lihaf no sowal ni Yihofa.’ (Dmak 15:30-35) Samanay ko minaroˈan hani? Sanay ko Fangcalay Cudad: ‘Mapaˈicelay ko pakasoˈlin no kasakopang, matongalay to romiˈamiˈad ko tamdaw.’—Dmak 16:4, 5.

9. Anini i cowacowa pala ngaˈay kita midemak to maanan hani? Wa ngaˈay kita miharateng to maanan a salicay hani?

⁹ Anini, i cowacowa pala, pasalatay kita a mitosil. Mahaenay ko kitiraan iso a pala han? Ano mahaenay, ngaˈayay miharateng kiso: “Sasamaan kako misaka dademak toniya pasalat hani?” Itini toniya mitemeray to falocoˈ a lintad, o likakawa ni Yihofa i cowacowa pala micowatay to sataˈangayay mitosilay a tayal. (Marko 13:10) Toniya demak, adihayayho ko dademaken ita.

10. Saka 2 Timoti 4:2 pakalalokay kitanan midemak to maanan hani?

¹⁰ Sasamaan kiso misaka dademak to rihadayay a tatokian hani? (ˈOsien ko 2 Timoti 4:2.) Wa ngaˈay kiso miharateng alatek, o niyah ato paro no lomaˈ wa ngaˈay mitongal to mitosilay a tayal, anca misatapang a misakafah. Cowa ko pisaˈicelan cihafay a toki no hatini, samanen cowa ko mamaˈorong ita ko hafay milakowit to taˈangayay padiing.—Taneng 11:4; Matay 6:31-33; 1 Yohani 2:15-17.

11. Sapadamaaw to ˈalomanay tamdaw pakatengil to ngaˈayay lihaf, samanay ko demak no roma a mitosilay hani?

¹¹ Pakayni sapadamaaw to ˈalomanay tamdaw mafanaˈ ci Yihofaan, ˈalomanay mitosilay misatapangay minanam to faelohay a sowal, o likakawa no Kawas misangaˈay to adihayay sasowalen a mitepangan. Tinakoen, itini 2010 miheca, maedeng 500 masasiroma ko sowal no mitepangan, tahanini, mataˈlifayto ko 1000 a sasowalen.

12. Tano wina a sowal no niyah mitengil to ngaˈay lihaf no Hongti kitakit, wa ira ko maanan sadama to tamdaw hani? Patinakoen mitadtad.

¹² O cecay tamdaw ano ngaˈay tano wina a sowal mitengil to kimad no Fangcalay Cudad, wa samaan ko harateng ningra hani? Nengnengen ko nalifetan no cecay fafahiyan salikaka. Ono wina a sowal noniya salikaka o Ciniawanta, o hatiniay a sowal itiniay Rowanta, Kangko, Okanta a kitakit. Oniya fafahiyan salikaka mirienangay to kasapala taykay tano Ciniawanta a sowal i Padaka Tinasi, ikor sanay ko sowal ningra: “Mikitini 17 ko mihecaan ako malinah tayni Padaka  i, sakinacecay cipinang to kamok no tayakay.” Mahapinangay, pakatengil koniya salikaka tono wina sowal a taykay mitemeray ko falocoˈ. Itini pitosilan iso a kilac, mananamay ko roma tamdaw to roma sowal alatek, tano mahaenay a sowal ko pitosil iso cangranan, wa matongal ko pisolot cangranan hokira? Ano ngangaˈay i, wa ngaˈay kiso minanam to hatiniay a sowal han? Mihaen ko demak iso, wa taˈangay ko epoc.

13. Itiniay i Rowasiya a salikaka samanay misaka dademak to karihadayan a tatokian hani?

¹³ Itini roma pala, mikecengay ko mikowanay to mitosilay a tayal ita, cowa ka ngaˈay ko salikaka pasalat a mitosil. Haratengen ko tinakoan no Rowasiyaay a salikaka. Tahalifa to pina poloˈ miheca a sapalak i, itini 1991 miheca 3 folad milifokay cangra to pihayda no mikowanay, itiya maedeng 1 efan 6000 ko mitosilay i Rowasiya, ikor no 20 miheca mataˈlifayto ko 16 efan a mitosilay! Mahapinangay, misaka dademakay ko salikaka to karihadayan a tatokian tawlik a mitosil. Soˈlin ikor miliyaway mikeceng ko mikowanay to tayal nangra, kawra cowa ka fasaw ko fanekfek no salikaka. Kamayan misaka dademak cangra to cecacecay a toki matayal saki Yihofaan.

14-15. Samanan ni Yihofa padama ci Asa hani?

¹⁴ Itini pikowan ni Asa a tatokian, cowa ka padotoc ko rihadayay a tatokian. O Iciyopiya tamdaw ci Cira mikeriday to 100 efan a sofitay milood to Yutaya kitakit, wa madolo a pakalowid sanay miharateng. Kawra o mitadiˈecan ni Asa cowa ko ˈicel no sofitay, oya saˈakawangay a Kawas ci Yihofa. Sanay mitolon cingra: ‘Yihofaaw Kawas niyam, nanay padamaen kami, samanen mitadiˈecay kami Tisowanan, pakayni i ngangan Iso a  micoˈay toniya taˈangayay sofitay.’—2 Rayray 14:11.

¹⁵ O ˈaloman no sofitay no Iciyopiya tosaay tingloh no Yutaya kitakit, kawra pakasoˈlinay ci Asa to iraay ko ˈicel ni Yihofa a milidong to finawlan Ningra. Cowa patoleden ni Yihofa cingra. Salikor, mapadikay ko Iciyopiya tamdaw, mahadefekay maemin.—2 Rayray 14:8-13.

16. Hano mafanaˈ kita o rihadayay a tatokian cowa ko papadotoc hani?

¹⁶ Soˈlin cowa ka fanaˈ kita to sasamaan ko malifaay no kahacecay tamdaw, kawra ngaˈayay saˈosien i, o rihaday no finawlan no Kawas cowa ko papadotoc. Haratengen, na paˈayaway ci Yis itini salikoray romiˈad, o nisawawaan ningra ‘kakaˈintehen no polong a kitakit.’ (Matay 24:9) Mihaenay ko sowal ni Pawlo: “Polong sapikotodaw ci Kristo Yisan ko kaˈorip a tamdaw, wa micada to sapalak.” (2 Timoti 3:12) Ci Satan ‘tada mangolaway,’ o papakaliyas kako to ngolaw ningra ano saan kita miharateng, misakaniway toniyah.—Paˈarawan 12:12.

17. O pakasoˈlin ita wa micada to maanan a sapalifet hani?

¹⁷ Cato ka halafin no ikor, o paksoˈlin ita o kahacecay tamdaw wa micada to sapalifet. Mangataayto, wa mifekadto ko taˈangayay padiing, ‘o mahaenay a padiing, mikitini satapangan no hekal cowaho ka pifekad.’ (Matay 24:21) Itiya, wa maˈodis ko paro no lomaˈ ita alatek, wa makeceng ko mitosilay a tayal ita alatek. (Matay 10:35, 36) Wa malecad kiso ci Asaan, pakasoˈlin to papadamaen ato dipoten ni Yihofa kiso hokira?

18. Mikitini Hipray 10:38, 39, samaan ko demak ita ngaˈay ko pisaday to sapalifet no ikor hani?

¹⁸ Padotocay ci Yihofa padama kitaanan misaday, irako tanektekay a pakasoˈlin misiˈayaw to sapalifet. Mikayatan Ningra ko “madimadiay citanengay a koli” itini matatodongay a tatokian mihadak to sapahaled to pakasoˈlinay a “kakaenen,” ho ngaˈay kita padadotoc a midoko Cingranan. (Matay 24:45) Kawra o mamisaˈicel kita a midemak, mihaen ngaˈ ira ko tanektekay a pakasoˈlin ci Yihofaan.—ˈOsien ko Hipray 10:38, 39.

19-20. Mikitini 1 Rayray 28:9, ngaˈay licayen ita ko niyah to maanan a salicay? Misamanay?

 ¹⁹ Malecad ci Asaan Hongti, oha ‘micangacang ci Yihofaan’ kita. (2 Rayray 14:4 ato roma pihongyak; 15:1, 2) Salakat, wa mafanaˈ kita ci Yihofaan, hanaca micada to paputisem. Ikor, mameten ita ko toki mitongal to kaolah ci Yihofaan. Sakafanaˈaw to samanay ko demak no niyah tonini, ngaˈayay licayen ita ko niyah: ‘Miceriday kako mirienang to saˈopo hokira?’ Mirienang to saˈopo papadama kitaanan milifok to ˈicel padotoc a midoko ci Yihofaan, ngaˈayho milifok to sapakalalok no salikaka. (Matay 11:28) Ngaˈayho licayen ko niyah: ‘Miceriday kako micekiw to Fangcalay Cudad?’ Ano malacafayay kiso to paro no lomaˈ, to lipalipay iraay ko masaˈosiay a toki namo to pakalomaˈay a pidoko? Ano cecayay kiso, iraay ko masaˈosiay a toki micekiw hokira? Roma i, misarocoday kiso a mitosil, padama to tamdaw malo Krisciyang hokira?

²⁰ Hano licayen ita ko niyah toniya salicay hani? Samanen sowal no Fangcalay Cudad ci Yihofa mihapinangay to falocoˈ no mita, mansa songilaˈen ita mihapinang to nafalocoˈan a harateng no niyah. (ˈOsien ko 1 Rayray 28:9.) Ano mahapinang ita misaaliay ko niyah misalof to patosokan, waywayan ato harateng, wa ngaˈay micangacang ci Yihofaan padama kitaanan. Nohatiniho misadayto, misiˈayaw to kaˈayaway a sapalifet. Nanay itini rihadayay tatokian midemak kita to citanengay a demak!