1-2. (1) O sinael no Isaya 41:10, samaanay mifiyor ci Yosikoan? (2) O sowal ni Yihofa wa ngaˈay mihinom cimaanan?

O CECAY madimadiay fafahiyan salikaka ci Yosiko, pasowalay ko ising cingraanan, edengan pinato a folad ko kaˈorip ningra sanay. Samaanay ko harateng ningra hani? Maharatengay ningra ko cecay a sinael, o Isaya 41:10. (ˈOsien.) Rihadayay ci Yosiko pasowal to ising, cowa ka talaw cingra, samanen mimetmetay ko kamay ni Yihofa cingraanan. * Oniya sinael parihadayay to salikaka ci Yosikoan, padama cingraanan misarocod a mitiˈer ci Yihofaan. Ano misiˈayaw kita to pakidemay a sapalifet, oniya sinael ngaˈay padama kitaanan parihaday to falocoˈ. Sasamaan kita mikitini toniya sinael milifok to sadama hani? Salakat, nengnengen ita, hano pasowal ko Kawas ci Isayaan toniya lihaf hani?

² Papitiliden ni Yihofa ci Isaya toniya lihaf, o mamihinom toya mamaholiw tayra i Papilon a Yutaya tamdaw. Nikawrira, tiliden ni Yihofa koniya lihaf, cowa ko pakayniay aca i maholiway a Yutaya tamdaw, pakayniay i polong a finawlan no Kawas anini. (Isaya 40:8; Loma 15:4) Anini, maˈorip kita i ‘pasangaray siˈayawen a ˈawaled’, mikikakaay ko saali to mihinomay a lihaf no Isaya.—2 Timoti 3:1.

3. (1) 2019 pakamihecaay a sinael o Isaya 41:10, malifokay ita ko maanan a sakiˈok? (2) Hano misaali kita toni sakiˈok hani?

³ Milengo toniya lalakaw i, wa misinanot kita to Isaya 41:10, misowalan ni Yihofa a tolo sakiˈok, pairaay to pakasoˈlin ita: (1) Wa mikapot ci Yihofa kitaanan, (2) o Kawas no mita Cingra, ato (3) wa padama Cingra kitaanan. Misaaliay kita  toniya sakiˈok *, mahecaday kita ci Yosikoan, misiˈayaway to sapalifet i nokaˈorip, misiˈayawayho to saroero noniya hekal. O roma salikaka tahalifaay to pakidemay sapalak no mirikecay. Dotoc, folfolen ita koniya tolo a sakiˈok.

4. (1) O saka cecay sakiˈok ni Yihofa kitaanan, o maanan hani? (Nengnengen ko ilaenoay safanaˈ.) (2) Samaanay ko pinengneng ni Yihofa kitaanan? (3) Cipinang kita to pinengneng ni Yihofa, samaanay ko harateng iso?

⁴ O saka cecay sakiˈok ni Yihofa kitaanan i: “Hamaan matalaw, samanen mikapotan Ako kiso.” * Tada ciharatengay ci Yihofa kitaanan, damsayay kitaanan, pahapinangay konini kitaanan to mikapotay Cingra kitaanan. Sasinanoten ita, samanay ci Yihofa paihkal to olah kitaanan, sanay cingra, “tada o kakalimlaan, o kahemekan, o kaolahan Ako kamo.” (Isaya 43:4) Toniya dohaw awaay ko maanan a ˈicel to mamiconged ci Yihofaan a maolah to mihodopay Cingraanan a tamdaw, o madimadiay a olah Ningra, cowa ka falic. (Isaya 54:10) Ci Yihofa o widang ita, maolahay Cingra kitaanan, mansa iraay ko timolo ita. O mamidipot Cingra kitaanan, mahecad o pidipot Ningra to widang ci Apram (Aprahaman). Pasowalan ni Yihofa ci Apram: “Apramaw, aka ka talaw! [O sapatada iso Kako.]”—Satapangan 15:1.

5-6. (1) Hano cipinang kita to makalimay ci Yihofa padama kitaanan miremo to sapalifet hani? (2) Nai nalifetan ni Yosiko, wa mahatatanaman ita ko maanan?

⁵ Mafanaˈay kita to makalimay ci Yihofa sapadamaaw kitaanan miremo to sapalifet, mikiˈokay Cingra to finawlan Ningra: “Ano pakayra kamo i talolongay a nanom i, ira Kako a mikapot i tamowanan. Ano pakayra kamo i namal i, cowa ko mamatodoh kamo.” (Isaya 43:2) O maanan ko tatodong no sowal ni Yihofa hani?

⁶ Cowa pikiˈok ci Yihofa to papalahdaw to sapalifet i nokaˈorip ita, kawra cowa ko mamihai cingra paˈemek to sano nanomay a pasangar kitaanan, cowa ko mamihai to  sano namalay a sapalifet midaˈoc a midokaˈ kitaanan. Mikiˈokay Cingra to mamikapot kitaanan, padama kitaanan milakowit to masakenaay a pasangaray. Wa samaan ko demak Ningra hani? Wa padama Cingra kitaanan ecato ka talaw, ho ngaˈayto kita mitafo to madimadi i Kawas, soˈlin misiˈayaw to sakapatay, cowa ko tatalalikor. (Isaya 41:13) Mahaenay ci Yosiko, sowal no fafahiyan wawa ningra: “Rihadayay ko falocoˈ no wina, cowa ko mamapawan ako. Mahapinangay niyam ci Yihofa ko parihadayay to falocoˈ ningra. Tahira kapatayan ningra a romiˈad, padotocay a pasowal to kangkofo ato roma adadaay tamdaw to sakiˈok ni Yihofa.” Mikitini nalifetan ni Yosiko, mananamay ita ko maanan hani? Sowal ni Yihofa, “Wa kapoten Ako kamo.” Mitiˈer kita toniya sakiˈok, wa mahecad ci Yosikoan timolo a tanektek a misiˈayaw to sapalifet.

7-8. (1) O saka tosa sakiˈok no Kawas o maanan? O masowalay a cariraw, o maanan ko tatodong hani? (2) Hano pasowalen ni Yihofa koya mamaholiw tayra i Papilon a Yutaya tamdaw, “Hamaan cariraw” hani? (3) O sinael i Isaya 46:3, 4, hano ngaˈay mihinom to finawlan no Kawas?

⁷ Mitilidan ni Isaya ko saka tosa a sakiˈok no Kawas: “Hamaan cariraw, samanen o Kawas iso Kako.” O cariraw o maanan ko mitoroˈan hani? Tatodong no “cariraw” i, “hato mamadokaˈ padotocay misilikor a minengneng,” anca “calemcemay ko tamdaw misacingacinga to taliyok.”

⁸ Hano pasowalen ni Yihofa koya mamaholiw tayra i Papilon a Yutaya tamdaw, to “hamaan cariraw” hani? Samanen mafanaˈay Cingra, o mamatalaw ko tatayra i Papilon a tamdaw. O maanan ko katalawan nangra hani? Ano maraod ko 70 miheca no maholiway a Yutaya tamdaw, o lalooden no Mitiya- Pirsiya ko Papilon. Wa saka dademaken ni Yihofa koniya taˈangayay sofitay a milidong to finawlan Ningra, paliyas to pikowan no Papilon. (Isaya 41:2-4) Tiya mafanaˈ ko Papilon tamdaw ato roma a finacadan no Papilon a tamdaw to mamilood ko ˈada i, wa somowal cangra, “Katanektek”, sanay a pakalalolalok. Mamisangaˈ cangra to samiyay, nanay midipot ko makaniway kawas cangranan. (Isaya 41:5-7) Kawra, mihinoman ni Yihofa ko maholiway a Yutaya tamdaw saan: ‘Kamo coka hecad to roma tamdaw o mitaˈongay i Takowanan a Israil i . . . Hamaan cariraw, samanen o Kawas iso Kako.’ (Isaya 41:8-10) Sinanoten, sowal ni Yihofa, “O Kawas iso Kako,” mihaen ko sowal Ningra papadama to madimadiay finawlan Ningra pakasoˈlin, cowa ka pawan Ningra cangra, kamayan o Kawas nangra Cingra, o finawlan Ningra cangra, mihinoman ni Yihofa cangra: ‘Oha kakeriden Ako kamo . . . milidong tamowanan.’ Oniya sowal maedeng paˈicelay to Yutaya tamdaw, misiˈayaw to mamifekad a demak.—ˈOsien ko Isaya 46:3, 4.

9-10. Matefad matefaday koniya hekal anini, hano cowa ko mamatalaw kita hani? Patinakoen.

⁹ Matefad matefaday koniya hekal anini, tada calemcemay ko ˈalomanay. Kitato mafiyoray no hekal, kawra cowa ko mamatalaw kita. Sowal ni Yihofa: “O Kawas iso Kako.” Oniya sowal hano padama kitaanan mitafo to rihaday hani?

¹⁰ Nengnengen ko cecay tinakoan: Ci Cilo aci Pan mikalicay to hikoki, itira kaefel nangra malitemohay ko taˈangayay fali. Mangelngelay ko hikoki, mahoniay ko laciw no hikoki: “Kakofiten ko telec, wa mitaˈlif kita to taˈangayay fali.” Matengil ni Cilo calemcemay ko falocoˈ, mahoniay aca ko laciw: “Hamaan calemcem. O safanaˈ no palakatay konini.” ˈIngaˈingsa cingra a somowal: “O maa:nan a sakiˈok konini aki?” Kawra cowa ka talaw ci Pan, licayan ni Cilo cingra:  “Hano eca ka talaw kiso aki?” Tawasa ci Pan a pacaˈof: “Samanen mafanaˈay kako tora palakatay. O wama ako cingra!” Sanay midotoc a pasowal cingra: “Pasowalen ako kiso to nalifetan no wama ako, ano mafanaˈ kiso to inaneng ningra, wa rihadayto kiso.”

11. Mikitini tinakoan ni Cilo aci Pan wa mananam ita ko maanan hani?

¹¹ Mikitini toniya tinakoan wa mananam ita ko maanan hani? Mahecad kita ci Panan, mitafo to rihaday samanen mafanaˈay kita to kakarayan Wama ci Yihofaan. Mafanaˈay kita to maˈorip i salikoray romiˈad, oha mamikayat Cingra kitaanan, milakowit to sano faliyosay a pasangaray. (Isaya 35:4) Mitiˈeray kita ci Yihofaan, ano marawraw ko hekal a tamdaw i, wa kamayan a rihaday kita. (Isaya 30:15) Mahecaday kita ci Panan, mihinom to tao, pasifanaˈ to roma tamdaw hano ngaˈay pakasoˈlinen ko Kawas. Mihaen, o roma tamdaw ano samaanto ko masiˈayaway a sapalifet i, ngaˈay pakasoˈlin to papadama ci Yihofa cangraanan.

12. (1) O maanan ko saka tolo a sakiˈok no Kawas hani? (2) Malengoay no Fangcalay Cudad ko “fadangalan” ni Yihofa, patalipaˈelal kitaanan to maanan hani?

¹² Maˈoningay ni Isaya ko saka tolo a sakiˈok no Kawas: “Wa patanekteken Ako kiso, padamaen Ako kiso.” Mitadtaday ci Isaya to, sasamaan ci Yihofa patanoktok to finawlan Ningra, sowal ningra: ‘Mahecaday ci Yihofa o ciˈicelay a tayni, o fadangalan Ningra ko sapikowan.’ (Isaya 40:10) Itini Fangcalay Cudad tocerid tano “fadangalan” a tilid mitaypiyaw to ˈicel. Mihaenay, sowal no Fangcalay Cudad, ‘fadangalan Ningra ko sapikowan,’ patalipaˈelalay kitaanan o ciˈicelay a Hongti ci Yihofa. Iˈayaw, misaka dademakan Ningra ko taˈangayay  a ˈicel, midipot ato padama to sikawdan Ningra; anini, wa padotoc Cingra paˈicel ato midipot to mitiˈeray Cingraanan a tamdaw.—Limoˈot 1:30, 31; Isaya 43:10.

13. (1) Ano malifaay ita ko samaanay a pakayraan, wa tooren ni Yihofa ko sakiˈok Ningra han? (2) O maanan a sakiˈok papaˈicel kitaanan a pakasoˈlin hani?

¹³ Mikiˈokay ci Yihofa: “Patanekteken Ako kiso.” Ano mipalak ko ˈada kitaanan i, wa tooren ni Yihofa koniya sakiˈok. Anini, itini roma kilac, misarocod ko ˈada miconged to mitosilay a tayal anca demak no likakawa no Kawas. Soˈlin mahaen, cowa ko papakidem ko calemcem ita toniya salood. O sapafeli ni Yihofa a sakiˈok, o papaˈicel kitaanan a pakasoˈlin, sanay ko sowal Ningra: ‘O sapilood tisowanan a lalosidan, wa awa ko kapo.’ (Isaya 54:17) Oniya sakiˈok patalipaˈelalay kitaanan to tolo kalimlaan a demak.

14. Micada kita to sapalak no ˈada no Kawas i, hano cowa ko kafahkaˈan a demak hani?

¹⁴ Saka cecay, mafanaˈay kita o kakaˈintehen no tamdaw ko Krisciyang. (Matay 10:22) Paˈayaway ci Yis, itini salikoray romiˈad, wa tahacada ko nisawawaan ningra to pakidemay sapalak. (Matay 24:9; Yohani 15:20) Saka tosa, o sapairasol ni Isaya mirikecay kitaanan, cowa ko kaˈinteh aca no ˈada kitaanan, misaka dademakho to masakenaay lalosidan a milood kitaanan. Oniya lalosidan mahawpay ko makaniway sowal a milipalaw to tamdaw, tano mangah a mitongangan kitaanan, ato tano mariˈangay a pakayraan mipalak kitaanan. (Matay 5:11) Cowa ko mamiconged ci Yihofa to ˈada tano lalosidan a milood kitaanan. (Ifiso 6:12; Paˈarawan 12:17) Kawra kamayan kita cowa ka talaw, misamaanay hani?

15-16. (1) O saka tolo kalimlaan, haharatengen ita o maanan? Samaanen no Isaya 25:4, 5 mitadtad koniya demak? (2) Tooren ko Isaya 41:11, 12, oya ‘mangolaway’ i kitaanan a tamdaw, wa ira ko maanan a teloc hani?

¹⁵ Haratengen ita ko saka tolo a mikiˈokan ni Yihofa, sowal Ningra o sapilood kitaanan a lalosidan, ‘wa awa ko kapo.’ Mahecad ano taˈangay ko ˈorad i, o cafiˈ no lomaˈ wa  ngaˈay midipot kitaanan, soˈlin “piparawraw no mariˈangay a tamdaw”, oha dadipoten ni Yihofa kita. (ˈOsien ko Isaya 25:4, 5.) Awaay ko pakayraan no ˈada ita paira to tahadaˈocay a dokaˈ no mita.—Isaya 65:17.

¹⁶ Ihkalay ci Yihofa mitadtad oya ‘mangolaway’ i kitaanan a tamdaw, wa ira ko maanan a teloc, papadama kitaanan matongal ko pakasoˈlin Cingraanan. (ˈOsien ko Isaya 41:11, 12.) Ano o maanan ko pakayraan no ˈada a milood, anca pakidem ko sapalak kitaanan, cowa ko mamafalic ko teloc nangra: O ˈada no finawlan no Kawas, ‘wa eminen a palaˈafoen.’

17-18. (1) Micekiw kita to Fangcalay Cudad hano mamatongal ko pitiˈer to Kawas hani? (2) Midotim kita to pakamihecaan a sinael no 2019 miheca, wa ira ko maanan a sadama hani?

¹⁷ Matongal ko kafanaˈ ita ci Yihofaan, wa matongal ko pitiˈer cingraanan. Samaan kita ngaˈ matongal ko kafanaˈ ci Yihofaan hani? Micekiw to Fangcalay Cudad to romiˈamiˈad ato midotim to micekiwan lalakaw. Maˈoningay no Fangcalay Cudad to samaanay ci Yihofa a midipot to finawlan Ningra isalakat, oniya lalakaw wa ngaˈay paˈicel to pakasoˈlin no falocoˈ ita, padama kitaanan pakasoˈlin to mamidipot Cingra kitaanan anini.

¹⁸ Tano fangcalay a sowal ko pitadtad ni Isaya to sasamaan ci Yihofa a midipot kitaanan. Sowal ningra mahecaday ci Yihofa to pakaenay a tamdaw, mahecaday o tofor a siri ko sikawdan no Kawas. Milengoan ni Isaya ci Yihofaan: “O mamatiya o pidipot no pakaenay to masafelaway a siri ko nipidipot no Tapang to finawlan Ningra. O sasaˈopoen Ningra ko tofor a siri a miˈafofo.” (Isaya 40:11) Ano mahapinang ita ci Yihofa tano ciˈicelay a fadangalan a mitakec kitaanan i, oha rarihaday ko falocoˈ no mita. Pakayni sapadamaaw kitaanan rihaday ko falocoˈ a misiˈayaw to pasangaray, o madimadiay citanengay a koli mipiliˈay to Isaya 41:10, malo pakamihecaan a sinael no 2019 miheca, sanay koniya sinael, ‘Hamaan cariraw, samanen o Kawas iso Kako.’ Songilaˈen ita a midotim koniya sinael, mihaen wa ngaˈayto tanektek kita a misiˈayaw to masakenaay a sapalifet i ˈaˈayaw.