CACEKIWEN LALAKAW 4
Kantangay a Saˈopo Mafanaˈ to i Kakarayan a Hongti
‘O tireng ako konini, o sapikiˈok ako a remes konini.’—MATAY 26:26-28.
RADIW 108 Pahemek ci Yihofaan, Minilnilan Ningra ko Wawa Malo Hongti!
KALIMLAAN NO LALAKAW *
1-2. (1) Patirengan ni Yis a limasmas to piharatengan to kapatay ningra, hano kantangay hani? (2) Oni lalakaw wa milengo to maanan a capeling ni Yis hani?
NGAˈAY mitadtad kiso to limasmas no Lafi no Tapang han? Kita ˈalomanay tamdaw maharatengay ko kalimlaan no Lafi no Tapang, samanen kantangay koniya saˈopo. Kawra, oniya Piharatengan a Saˈopo tada o kalimlaanto. Fahkaˈay ko roma tamdaw: “O misadayan a dafong no Lafi no Tapang, hano kantangay hani?”
2 Mitosil ci Yis i fafekang no sera i, tano kantangay, ihkalay a pakayraan ko pasifanaˈ ni Yis to kalimlaan a kimad. (Matay 7:28, 29) Mahecaday, patirengan ni Yis ko kantangay ciepocay a limasmas to sapiharateng * no mita to kapatay ningra. Wa pakalingaden ita milengo ko Lafi no Tapang ato nano sowal ni Yis ato midemakan a demak, mihaen wa cipinang ita to capeling ni Yis, o misapoeneray, timoloay ato ciolahay a falocoˈ, mananamho ita sasamaan misongilaˈ a mitodong ci Yisan.
MISAPOENERAY KO FALOCOˈ NI YIS
O misaka dademakan i Piharatengan Saˈopo a epang ato epah, papiharatengay kitaanan to kinafalah ni Yis to ˈorip i tamdaw. Nohatini, ci Yis itiniay i kakarayan a mala Hongti (Nengnengen ko 3-5 fatac)
3. (1) Tooren ko Matay 26:26-28, o Lafi no Tapang hano kantangay hani? (2) O misaka dademakan i Piharatengan a Saˈopo a tosa dafong, mitaypiyaway to maanan hani?
3 Malacafay ci Yis to 11 madimadiay a tarokos i, patirengay to sapiharateng to kapatay ningra a limasmas. Tano mikaenan i Pitaˈlifan a Lisin a kakanen, malo dafong no Piharatengan a Saˈopo. (ˈOsien ko Matay 26:26-28.) Ci Yis tano awaay ko tamod a epang ato fadisosoˈ a epah, mitaypiyaway to malefotay a tireng ato kalimlaan a remes no niyah, samanen cato ka halafin wa pitafangto cingra to tireng ato remes no niyah. Pakayni toniya kantangay ato faelohay a limasmas, cowa ko fafahkaˈ ko tarokos, misamaanay hani?
4. O sapalimoˈot ni Yis ci Martaan ato patirengan ningra piharatengan a limasmas, iraay ko maanan kahecadan hani?
4 Saka tolo miheca ci Yis mitosil, tahiniayto i ˈayaw no pina folad ka kinafalah to ˈorip cingra, milisoˈay cingra to ngaˈayay widang ci Lacarus, Marta aci Mariyaan. Tora kahemekan a toki, pasifanaˈan ni Yis cangra to pina demak. Cowa pisamacay ci Marta a mitengil, samanen misadayay cingra to kadofahay kakaenen. Mahapinangay ni Yis, mansa sidaˈitay a palimoˈot ci Martaan, padama cingraanan mihapinang, cowa ko kalimlaan ko pisaday to adihayay kakaenen. (Luka 10:40-42) Ikor, ˈayaw no kinafalah ci Yis to ˈorip pina tatokian, misaka dademakay to sapalimoˈot no niyah, patireng to kantangay sapiharateng a limasmas. Mikitini taˈarawan ni Yis, mananam ita ko maanan hani?
5. (1) Kantangay ko Lafi no Tapang, mahapinangay ita ko maanan a capeling ni Yis? (2) Filipi 2:5-8 samaanay a misawacay tonini hani?
5 O sasowalen ato waywayan ni Yis, paihkalay to misapoeneray ko falocoˈ ningra, soˈlin itini ˈayaw no kinafalah to ˈorip a dadaya, kamayan misapoener ko falocoˈ ningra. (Matay 11:29) Mafanaˈay ci Yis cato ka halafin mamidemak ko niyah to kasapaan a kinafalah i likisi no tamdaw, mafanaˈayho to papatikolen ni Yihofa paˈorip cingra tayra i kakarayan, pafeli cingraanan to ˈodingaray a saaroˈan. Soˈlin mahaen, cowa pisaali ci Yis to misataˈangay a misalisin to kapatay ningra a palosiyang to niyah. Pasowalan ningra ko nisawawaan, cecay miheca kinacecay tano kantangay a limasmas, miharateng to kinafalah ningra. (Yohani 13:15; 1 Korinto 11:23-25) O misaalian a dafong no Lafi no Tapang kantangay, cowa ko misatakalaway ci Yis. O kakarayan a Hongti iraay ko misapoeneray a capeling tada kahemekanto.—ˈOsien ko Filipi 2:5-7, ato ilaenoay safanaˈ. *
6. Ano tahalifa kita to sapalifet i, samaanen mitodong ko misapoeneray a capeling ni Yis hani?
6 Samaanen ita mitodong to misapoeneray a capeling ni Yis hani? Isalakat haratengen ko saali no tao, cowa ko niyah. (Filipi 2:3, 4) ˈAyaw no kinafalah ci Yis to ˈorip a dadaya, mafanaˈay cingra caka halafin mamalifa ko karorayan a kapatay, kawra maharatengay ningra ko tarokos, wa pakayni kinafalah ningra a masomad, mansa ciharatengay cingra to tarokos, misaka dademak to saikoray dadaya pasifanaˈ, pakalalok ato mihinom cangraanan. (Yohani 14:25-31) Tada misapoeneray ci Yis, o kaciharateng ningra to haepoc no tao ikakaay to piharateng to niyah, o ngaˈayay a taˈarawan ita cingra!
TIMOLOAY CI YIS
7. Ikor no patireng ci Yis to Lafi no Tapang i, samaanay paihkal to timoloay a capeling no niyah hani?
7 Ikor no patireng ci Yis to Lafi no Tapang i, paihkalay to tadamaanay a timolo. Soˈlin mafanaˈ wa mitamorong to pakaditay to ngangan no Kawas a raraw ko sakapatay no niyah. Makalimayho ci Yis midofdof to araaw no Wama. (Matay 26:65, 66; Luka 22:41, 42) Tahiraay i patay ko madimadi ni Yis, mihaen ko demak ningra cowa ko paˈdil aca to ngangan ni Yihofa, paihkal to midopoay to saˈakawangay sapikowan a fadangalan no Kawas, pairaayho to toki no pasasiyoray tamdaw, milifok to tahadaˈocay ˈorip. Padamaan ni Yis ko nisawawaan a misaday, misiˈayaw to sapalifet i ˈaˈayaw.
8. (1) Pasowalan ni Yis ko madimadiay a tarokos to maanan a demak? (2) Ikor no kinafalah to ˈorip ci Yis i, samaanay ko tarokos mitodong to timolo ningra hani?
8 O roma tinakoan to paihkal ni Yis to timolo i, cowa ka pakidem ko calemcem ningra to sasiˈayawen a demak, o saali no nisawawaan ko kaciharatengan. Ikor no paliyasen ni Yis ci Yuta patirengay to Lafi no Tapang, oniya limasmas patalipaˈelal to caciepoc nai remes ni Yis a mapasimalay Krisciyang, oya makakiˈokay to faelohay sakiˈok a nisawawaan. (1 Korinto 10:16, 17) Sapadamaaw to tarokos mitafo to madimadi, ngaˈay milifok to kakarayan a sapalifon, pasowalan ni Yis ko tarokos to o maanan ko pilongoc to kakarayan Wama i cangraanan. (Yohani 15:12-15) Mifanaˈan ni Yis ko tarokos to mamasiˈayaw nangra ko maanan a sapalifet. Patinako to niyah, palimoˈot cangraanan ‘ka timolo.’ (Yohani 16:1-4, 33) Ikor no pina miheca, kamayan ko nisawawaan mikotod to kinafalahay a taˈarawan ni Yis, paihkal to timolo. Soˈlin pakayni ko picada to roray, kamayan cangra itini masakenaay sapalifet a madadama.—Hipray 10:33, 34.
9. Samaanen ita mitodong ci Yis paihkal to timolo hani?
9 Anini, mitodongay kita ci Yisan paihkal to timolo. Tinakoen, ira ko timolo ita ngaˈ, ngaˈay padama to pakayniay i pihakelongan a micada to sapalak a salikaka. Latekay tahacadaay ko salikaka to cowa ka sadafdaf a demak a mapalit, toniya toki, saˈicelen ita padama cangra, patado cangraanan a pasowal. (Filipi 1:14; Hipray 13:19) Ano kitato wa padotoc a ‘timolo a mitosil’. (Dmak 14:3) Soˈliˈlin, mahecad ci Yisan micada to pisafelit ato sapalak, kawra, misaˈosiay kita to falocoˈ, milasil to lihaf no Hongti Kitakit. Kawraan, ano cangoˈotay kita to timolo, wa samaan hani?
10. ˈAyaw no Saˈopo no Piharatengan to Kapatay ni Yis pina lipay, wa samaan ko hademak ita hani? Misamaanay?
10 Sapaˈicelaw to timolo a pakayraan i, midotim to hatokel no ikor, oniya tokel pakayniay i patafangan ni Kristo a sapatefoc. (Yohani 3:16; Ifiso 1:7) ˈAyaw no Piharatengan to Kapatay ni Yis a Saˈopo pina lipay, iraay ko toki ita mitongal to piakoˈid to sapatefoc a limasmas. Tooren ita ko limasmas miˈosi to sinael, pairaen ko mangodoay falocoˈ, miharateng to ˈayaw ato ikor no mapatay ci Yis a sinael. Mihaen, ano mirienang kita to Lafi no Tapang wa matongal ko kacipinang to, kalimlaan a tatodong no tahapinangan a dafong, ato kasapaan noniya kinafalah. Ano cipinang kita to nano demak ni Yihofa aci Yis, ngaˈay paraheker kitaanan ato salawina, wa matongal ko pakasoˈlin to hatokel no ikor, wa ira ko ˈicel timolo a mihadidi.—Hipray 12:3.
11-12. Mikitini Lafi no Tapang i, mananam ita ko maanan hani?
11 O Lafi no Tapang papiharatengay kitaanan to, kinafalah ni Yis tada kalimlaanto, mananamayho ita ko misapoeneray ato timoloay capeling ni Yis. Miakoˈiday kita to kakarayan a Sakakaay Saysi ci Yis, padotocay cingra paihkal to hatiniay a capeling, patado kitaanan a micangacang. (Hipray 7:24, 25) Ano miakoˈiday kita ci Yisan, wa midofdof to sapalimoˈot ningra, madimadi a miharateng to kapatay ningra. (Luka 22:19, 20) Wa itini kita i Nisan a folad 14 romiˈad, miharateng to kinafalah ningra. Ilalomaˈ no cecay miheca, o kalimlaan a romiˈad konini.
12 Kantangay ko limasmas no Lafi no Tapang, oniya limasmas pahapinangay kitaanan to roma capeling ni Yis, oniya capeling padamaay ci Yisan makalim patado kitaanan a mapatay. O kafanaˈan no tamdaw koniya capeling ni Yis. O maanan a capeling hani?
IRAAY KO OLAH NI YIS
13. (1) Mikitini i Yohani 15:9 ato 1 Yohani 4:8-10, sasamaan milengo to paihkalan ni Yihofa aci Yis a olah? (2) O cima ko ngaˈay milifok to epoc mikitira i olah Nangra hani?
13 O polong a demak ni Yis malefotay a paihkal to tangongolay a olah ni Yihofa kitaanan. (ˈOsien ko Yohani 15:9; 1 Yohani 4:8-10.) Kalimlaan i, makahiay ci Yis pakayni i kitaanan kinafalah to ˈorip. O mapasimalay a Krisciyang anca o ‘roma lopayˈay siri’, mikitiniay i olah ni Yihofa aci Yis milifok to epoc, pakayniay i sapatefoc a limasmas, paihkal Cangra to olah kitaanan. (Yohani 10:16; 1 Yohani 2:2) Mikitini dafong no Lafi no Tapang mahapinangay ita, maolahay ato siniˈadaay ci Yis to nisawawaan ningra. Hano mihaen ko sowal hani?
Maolahay ci Yis to Krisciyang, cowa patireng cingra to masasifoday a limasmas. Soˈlin mataˈlif ko pina hahekalan, itini masakenaay a pakayraan wa ngaˈay padadotoc cangra miharateng to kapatay ni Yis (Nengnengen ko 14-16 fatac) *
14. Samaanay ci Yis paihkal to olah to nisawawaan hani?
14 Maolahay ci Yis to mapasimalay Krisciyang, cowa patireng cingra to masasifoday a limasmas, papisaday to nisawawaan to kantangay a dafong to Lafi no Tapang. To mihecahecaan miharatengay to kapatay ni Yis ko mapasimalay Krisciyang, itini masakenaay a pakayraan wa mirienang cangra toniya saˈopo, ano mapalitto wa mihaen to demak. (Paˈarawan 2:10) Ano mapalit cangra wa ngaˈayho mitoor to limoˈot ni Yis a midemak han? Soˈlinay matooray nangra.
15-16. O roma tamdaw itini pasangaray pakayraan samaanay mirienang to Lafi no Tapang? Tinakoen.
15 Mikitini saka 1 hahekalan tahanini, misarocoday ko soˈlinay Krisciyang miharateng to kapatay ni Yis, soˈlin pasangaray ko pakayraan, kamayan cangra mihakelong to limasmas no Lafi no Tapang a midemak. Tinakoen salikaka ci King Haro na cecayay mapalit i Kowaping, misaˈicelay cingra mihalaka ngaˈ ngaˈay miharateng to kapatay ni Yis. Misinanotay cingra misaday to tahapinangan a dafong, misinanotayho a misaˈosi to matatodongay romiˈad no Piharatengan a Saˈopo. Maraod koya romiˈad, cecayay cingra i kapalitan romadiw, mitolon, ikor mihadak to pakayniay i Fangcalay Cudad a kimad.
16 O roma tinakoan itini Saka Tosa Kalalood no Hekal, cecay ˈopo fafahiyan salikaka cowa ka talaw a mapatay, mirienangay to Lafi no Tapang. Samanen, kantangay ko dafong no Lafi no Tapang, hato ngaˈayay mirienang to Piharatengan a Saˈopo. Sanay ko sowal nangra: “Makelecay miˈalikot a tomireng cangra. Mitelian ko anengan i tenok, mitelian ko kohcalay kiradom ato tahapinangan
a dafong. Matalaway maˈaraw no tao ko tinghoy, tano losok hananay pataengad ko kafotiˈan . . . miliyaway kami pasayra i kakarayan Wama paihkal to fanekfekay harateng no niyah, misarocod mikorac to fangcalay a ngangan Ningra.” Tada tanektekay ko pakasoˈlin noniya fafahiyan salikaka! Maharateng ita, soˈlin itini pasangaray pakayraan ko Krisciyang ngaˈayayho miharateng to kapatay ni Yis, coko paihkalay konini to maolahay ci Yis kitaanan han?17. Ngaˈay licayen ita ko niyah to samaanay a salicay?
17 Mangataayto ko piharatengan to kapatay ni Yis a romiˈad, ngaˈay licayen ko niyah: “Pakayni pitodong to paihkalan ni Yis a ciolahay a capeling, ngaˈayay ko kacakat ako han? Ciharatengay kako to saali no salikaka anca o niyah aca han? Pakidemay ko saali ako to salikaka, anca siniˈadaay to citolasay ko ˈicel nangra han?” Nanay padotocen ita mitodong ci Yis ‘siniˈada to tao.’—1 Pitiro 3:8.
HARATENGEN KO MANANAMAY A SAPASIFANAˈ
18-19. (1) Pakayni i Lafi no Tapang, cowa ko mamatawal ita ko maanan? (2) Wa seteken iso ko falocoˈ midemak to manan?
18 O limasmas no Piharatengan to Kapatay ni Yis a Saˈopo, cowato ko hahalafin. Ano ‘tayni’ ci Yis i taˈangayay padiing a romiˈad i, “ta pasaˈopoen nangra ko naicowacowaay a nipiliˈan ningra a finawlan,” tayra i kakarayan, itiya o Piharatengan to Kapatay ni Yis wa mahererekto.—1 Korinto 11:26; Matay 24:31.
19 Mikitini i Lafi no Tapang mananamay no finawlan ni Yihofa, ci Yis itini misapoeneray, timoloay ato ciolahay falocoˈ patirengay to mikiriwiˈay a taˈarawan, soˈlin cowato ko mamiharateng to kapatay ni Yis, cowa ko mamatawal cangra toniya kihcod. Noikor, o na mirienangay to Piharatengan a Saˈopo a tamdaw, wa padama to maˈoripay i faelohay hekal a tamdaw, cipinang to tatodong noniya saˈopo. Ano saka ciepocaw kita toniya saˈopo anini, seteken ko falocoˈ mitodong to paihkalan ni Yis misapoeneray, timoloay ato ciolahay falocoˈ. Mihaen ko demak ita wa ngaˈay pakasoˈlin to mamilifok ko niyah to sapalifon ni Yihofa.—2 Pitiro 1:10, 11.
RADIW 5 Taˈarawan Ita ci Kristo
^ 5段 Caka halafin wa mirienangto kita to Lafi no Tapang, miharateng to kapatay ni Yis Kristo. Misaday to dafong noniya saˈopo cowa ka pasangar, kawra mikitini toniya saˈopo wa mananam ita ko paihkalan ni Yis a misapoeneray, timoloay, ciolahay falocoˈ. Oniya lalakaw wa milengo to sasamaan mitodong ci Yisan, paihkal toniya kalimlaan a capeling.
^ 2段 SAPITADTAD A SOWAL: Piharateng pakayniay i sapiharatengaw to cecay demak anca sapipakaka to cecay tamdaw a limasmas.
^ 5段 Filipi 2:8, ‘Sapoeneren ningra ko falocoˈ, tangasa i nika patay ningra i pisemseman a hecek ko nipihakelong ningra to nafalocoˈan no Kawas.’
^ 57段 TATODONG NO COKA: O mirienangay to Lafi no Tapang a saˈopo no madimadiay Krisciyang: Isaka 1 hahekalan a kasakopang, itini isaka 19 hahekalan, itini i pitepengan kapalitan no Naci, aniniay lintad a Hongti Kitakit kasaˈopoan i dihkoay ko romiˈad i Katimol a Amilika.