CACEKIWEN LALAKAW 3
Samaan Midipot to Falocoˈ Iso?
Dipoten ko falocoˈ iso, ikaka ko pidipot to kihcod.—TANENG 4:23.
RADIW 52 Dipoten ko Falocoˈ no Mita
KALIMLAAN NO LALAKAW *
1-3. (1) Hano maolah ci Yihofa ci Solomonan? (2) O maanan ko malifokay ni Solomon a sapalemed hani? (3) Oniya lalakaw wa pacaˈof to maanan a salicay?
KAEMANGHO ci Solomon mala hongtiayto no Israil kitakit. Itini satapangan no pikowan ningra, paˈarawan ni Yihofa cingra i mitiihan, pasowal cingraanan: “O maan ko kangalayan iso to sapafeli Ako saw?” Pacaˈof ci Solomon: ‘Ano o wawawawaho kako, cowa ka fanaˈ mikerid to finawlan . . . Nanay pafelien ko sikawdan Iso to midoedoay a falocoˈ, hongaˈ moecel ko pisawkit to finawlan Iso.’ (1 Hongti 3:5-10) Misapoeneray ko falocoˈ ni Solomon, o milongocan ningra to Kawas, edeng o ‘midoedoay a falocoˈ’, onini ko saka olah ni Yihofa cingraanan. (2 Samuil 12:24) Mafanaˈ ci Yihofa to milongocan ni Solomon i, tada mahemekay, pafeliay cingraanan to ‘citanengay a falocoˈ, ngaˈay mihapinang to demak’.—1 Hongti 3:12.
2 Tiya madimadiho ci Solomon ci Yihofaan i, adihayay ko malifokay a sapalemed. Iraay ko tatodong ningra patireng to fangcalay sefi ni Yihofa. (1 Hongti 8:20) Pakayni i sapafeli no Kawas a taneng, mapatenakay ko ngangan ningra. Roma i, o patemeran no Kawas ci Solomonan a sowal, matiliday i tolo cacudadan i Fangcalay Cudad, o cecay i, o Taneng.
3 O “falocoˈ” a tilid, kina 100 a masadak i Taneng. Tinakoen, Taneng 4:23 sanay: ‘Dipoten ko falocoˈ iso, ikaka ko pidipot to kihcod.’ O “falocoˈ”, o maanan ko mitoroˈan hani? Roma i, samaanay ci Satan miwarak to falocoˈ ita? Wa samaan kita a midipot to falocoˈ no niyah? Oniya lalakaw wa pacaˈof toniya salicay. Ano mafanaˈ kita to caˈof noniya kalimlaan a salicay, ngaˈayto padadotoc a madimadi to Kawas.
“FALOCOˈ ISO” —O MAANAN KO MITOROˈAN?
4-5. (1) Itini ˈOlic 51:6, o maanan ko mitoroˈan to “falocoˈ”? (2) Tinakoen ko pakayraan no tireng, mitadtad to kalimlaan ko kemoday a harateng.
4 Itini Taneng 4:23 a “falocoˈ”, o pakayraan no “i kemoday no falocoˈ” ko mitoroˈan, cowa ka ˈaraw no tamdaw. (ˈOsien ko ˈOlic 51:6.) O falocoˈ—mitoroˈay to harateng, nafalocoˈan, araaw, kaolahan. Cowa ko potalay aca a mahapinangay, mahawpay ko kemoday a harateng no mita.
5 Sapitadtadaw to kalimlaan ko kemoday a harateng, ngaˈayay saka dademaken ita ko pakayraan no tireng. Sapitafoaw to tanoktokay a tireng, wa matatodong ko kakaenen no mita, micerid a mionto. Mahecaday, sapitafoaw kita to noˈadingoan a tanoktok, wa komaen to noˈadingoan a kakaenen, micerid a mitiˈer to Kawas, mahawpay ko misaka dademak to minanaman i nokaˈorip ita ato mitosil. (Loma 10:8-10; Yakop 2:26) Latekay, tanoktokayho ko tireng no niyah, sanay ko harateng, ˈarawhan, iraayto ko dangoc no tireng. Mahecaday, miceriday kita mirienang to noˈadingoan a tayal, hato tanoktokay ko pakasoˈlin no niyah, ˈarawhan lomahadayto ko mararaway a harateng i kemod no falocoˈ. (1 Korinto 10:12; Yakop 1:14, 15) Sasinanoten ita, sapinaholaw ci Satan to falocoˈ ita. Wa samaan koha demak ningra hani? Wa samaan kita midipot to falocoˈ no niyah hani?
SAMAANAY CI SATAN MIWARAK TO FALOCOˈ ITA?
6. O harateng ni Satan mamisamaan to demak hani? O maanan ko pakayraan ningra hani?
6 Tokel ni Satan mahecad kita cingraanan, misafelit ci Yihofaan, eca pidoedo to palinian no Kawas, o niyah aca saka ngaˈay ko miharatengan a dademak. Kawra, cowa ka pacieci ci Satan kitaanan, mitoor to harateng ningra a misimsim ato midemak, mihaenay tano roma a pakayraan ko sapifiyor kitaanan. Sowal no Fangcalay Cudad, ano micawmaˈ to “tatiihay a widang i”, wa mipalak to harateng ato waywayan ita. (1 Korinto 15:33) Mansa, misaˈicelay cingra sapinaholaw to harateng no taliyokay ita a tamdaw, ano mararid kita macacawmaˈ to hatiniay tamdaw, wa midenga kitaanan. (1 Yohani 5:19) O pihalaka ni Satan malaˈosiay ci Solomonan. Adihayay ko midokoay to makaniway kawas a fafahi ni Solomon, sowal no Fangcalay Cudad, ‘mioratay to falocoˈ ningra ko fafahi ningra,’ kadayayan a miliyas cingra ci Yihofaan.—1 Hongti 11:3.
Sapiwarakaw ci Satan to falocoˈ ita, samaan kita midipot to niyah hani? (Nengnengen ko saka 7 fatac) *
7. (1) Ci Satan wa misaka dademak to samaanay a pakayraan, mitenak to harateng ningra? (2) Hano sasinanoten ita ko hatiniay a sapilasil ni Satan hani?
7 Misaka dademakan ni Satan ko ika ato kamok no tilifi, mitenak to harateng ningra. Mafanaˈay cingra, o pacamol to tawcikel a lawla, wa miorat to sapisimsim ato harateng no mita, hanaca mifiyor to waywayan ita. Ci Yis tano tawcikel a pakayraan pasifanaˈ to nisawawaan, tinakoen oya sidaˈitay a Samariya tamdaw ato malafelay wawa a sapatinako. (Matay 13:34; Luka 10:29-37; 15:11-32) Mihaenay, mafanaˈay ko mafiyoray no harateng ni Satan a tamdaw, misaka dademakay to citawcikelay a lawla, oha maminahol kitaanan. Mansa, pairaen ita ko matatodongay a pinengneng to lawla. O roma a ika ato kamok no tilifi, iraay ko sapasifanaˈ, cowa ko maminahol to harateng ita, kawra sasinanoten ita, ano mipiliˈ to lawla i, licayen ko niyah: “Maharek minengneng toniya ika anca kamok no tilifi, ‘midoedo to kaolahan no tireng a midemak,’ cowa ko mararaway, wa saan ko harateng ako han? (Kalatiya 5:19-21; Ifiso 2:1-3) Ano mahapinang iso, iraay ko harateng ni Satan no kamok, wa samaan ko demak iso hani? O laliyasen ko hatiniay a lawla, mahecad o piliyas to midengaay a adada.
8. Samaan koha demak no wama wina midipot to falocoˈ no wawa hani?
8 O wama ato wina misaˈicelay a misinanot to tanoktok no tireng no wawa, tinakoen mikorac to lomaˈ, mifalah to saka ciadada no tamdaw a dafong. Mahecaday, iraay ko ˈinorong no wama wina a midipot to wawa, ho eca ka waraken ni Satan ko falocoˈ nangra. Ano mamipalak to harateng no wawa a ika, kamok no tilifi, ta halamaan no tingnaw, wangcan, hamaan papingataen ko wawa. Misaaliay ci Yihofa to wama wina midimokos to tanoktok no wawa i noˈadingoan. Taneng 1:8; Ifiso 6:1, 4) Mihaenay, wa tooren no wama wina ko palinian no Fangcalay Cudad a misaˈosi, pasowal cangraanan o maanan ko ngaˈayay, o maanan ko tatiihay, halo padama to wawa cipinang to lalangian iso. (Matay 5:37) Ano palidlid saan ko wawa lomahad, papasifanaˈen no wama wina ko wawa, samaan mitoor to palinian ni Yihofa a misawkit to o maanan ko ngaˈayay, o maanan ko mararaway. (Hipray 5:14) Sakalimlaan i, haratengen no wama wina, cowa ko sowal aca iso, wa hapinangen no wawa ko waywayan iso.—Limoˈot 6:6, 7; Loma 2:21.
(9. Papiharatengan ni Satan ko tamdaw to maanan mararaway a harateng? O hatiniay a harateng hano o katalawan hani?
9 Misaka dademakayho ci Satan to maanan a pakayraan, miwarak to falocoˈ ita hani? Papicadaay cingra kitaanan to harateng no hekal, ecato pitiˈer to taneng ni Yihofa. (Kolosay 2:8) O cecay tinakoan i, papiharatengan ni Satan ko tamdaw, malo cihafayay a tamdaw o kalimlaan i nokaˈorip sanay. Iraay ko mahaenay harateng a tamdaw, tada katalawan a pakayraan, samanen ano cihafayay cangra hokira, o harateng nangra sahtoay o sapietanaw to payci, telocto malahdaway ko tanoktok no tireng, paro no lomaˈ, ato kalawidang ci Yihofaan. (1 Timoti 6:10) Mihaenay, kakoˈiden ita ko kakarayan Wama padama kitaanan, ira ko matatodongay pinengneng to payci.—Patnakay 7:12; Luka 12:15.
SAMAANEN ITA MIDIPOT KO FALOCOˈ NO NIYAH?
Pahecaden ita to nolitengan a mikecolay ato misimaway tamdaw, ka talipaˈelal, tangsol midemak, aka papinaholen to falocoˈ ita ko maamaan a demakan (Nengnengen ko 10-11 fatac) *
10-11. (1) Ano sapisongilaˈaw kita midipot to falocoˈ no niyah, wa samaan ko demak hani? (2) O manan ko tayal no iti:yaay a mikecolay tamdaw hani? (3) Hano mahecaday o mikecolay tamdaw ko makapahay falocoˈ hani?
10 Ano sapisongilaˈaw kita midipot to falocoˈ no niyah, hapinangen ko maanan a demak, mamipalak kitaanan i, mihaen o saka dipot no niyah. Itini Taneng 4:23 ‘midipot’ sanay maharatengay ko tayal no iti:yaay a mikecolay tamdaw. Itini romiˈad ni Solomon, tomirengay ko mikecolay tamdaw i fafekang no lowil, misinanot to taliyokay a demak, ano maˈaraw ko katalawan i, mamihadak to sarikec. Mikitini i tayal no mikecolay tamdaw, wa cipinang kita to samaanen ita midipot ko falocoˈ, miliyas to pifiyor ni Satan.
11 O mikecolay tamdaw wa malacafay to misimaway to fawahan. (2 Samuil 18:24-26) Ano mingata ko ˈada i, o mikecolay ato misimaway tamdaw mamiˈedef to fawahan, midipot to niyaroˈay a finawlan. (Nihimiya 7:1-3) Mahecaday, ano o ngaˈayay falocoˈ no tamdaw mapahatatanamay no Fangcalay Cudad a malo makapahay a falocoˈ *, ano sapicomodaw ci Satan anca sapifiyoraw to harateng no niyah ato nafalocoˈan, halaka anca kaolahan ita i, o makapahay falocoˈ ita wa mihadak to sarikec. Tatengilen ita a miliyas ko katalawan, mahecad o mikecolay tamdaw miˈedefay to fawahan.
12-13. (1) Wa macada ita ko masamaanay a sakayhid? (2) Ano tahalifa kita to sakayhid i, sasamaan ko demak ita ngaˈ?
12 Samaanen ita midipot ko harateng no niyah eca ka mafiyor ni Satan hani? Tano tinakoan a mitadtad. Palimoˈotay ci Yihofa kitaanan, o “ˈodang ato masamaamaanay a kaackan ato maˈanofay a demak” ilaloma no mita, “caay ka ngaˈay a masowal.” (Ifiso 5:3) Ano masasowalay ko cafay no katayalan ato picudadan to kaackan a sowal, wa samaan ko hademak ita hani? Mafanaˈay kita to ‘mamifalah to cowa ka ngodo a falocoˈ ato coos no hekal.’ (Titus 2:12) O makapahay falocoˈ no mita alatek mahecaday to mikecolay a tamdaw, mirikec kitaanan. (Loma 2:15) Kawra, wa mitengil kita a midofdof to “mirikecay a ngiha” no makapahay falocoˈ han? Anca masolotay no tao a sapitengilaw to maanan ko sowal nangra, anca sapinengnengaw to kaackan a coka han? Toniya toki, ngaˈayay ˈedefen ko fawahan, tangsol a mifalic to hasowal anca tangsol a miliyas.
13 Alatek o cafay no katayalan ato picudadan, sapiparoaw to mararaway a harateng i ponoˈ no mita, anca pacieci kitaanan midemak to mararaway a demak, ira ko timolo ita ngaˈ, ngaˈay maconged koniya saroero. Kawra, mafanaˈay ci Yihofa to mihadakan no mita a ˈicel, papafelien Ningra kita to ˈicel ato taneng a miconged to harateng ni Satan. (2 Rayray 16:9; Isaya 40:29; Yakop 1:5) Sasamaan kita midemak ngaˈ madipot ko falocoˈ no niyah hani?
MITAFO TO TALIPAˈELALAY
14-15. (1) Oha mamicada kita to maanan? Ngaˈay kita midemak to maanan? (2) Mikitini i Taneng 4:20-22, ano miˈosi kita to Fangcalay Cudad i, samaan ko demak ngaˈ, milifok to sakakaay a epoc? (Nengnengen ko sapatongal lalakaw, “ Samaanen Midotim?”)
14 Sapidipotaw to falocoˈ no mita, cowa ko piconged aca to pifiyor no tatiihay demak, micadaho to matatodongay a harateng. Haratengen ko isaˈayaway a tinakoan. O misimaway tamdaw sapicongedaw to ˈada, wa miˈedef to fawahan, kawra, nolatekay papacomoden ningra ko kakaenen ato romaroma dafong. Ano caka fawahen ko fawahan no lowil, wa macahiw a mapatay ko finawlan. Mahecaday, kita i, “fafawahen ko fawahan” no falocoˈ ita, ho ngaˈay micada to sapahaled no harateng no Kawas.
15 O Fangcalay Cudad iraay ko harateng ni Yihofa, mansa misaliyaliyaw kita a miˈosi to Sowal no Kawas, wa makayat no harateng no Kawas ko harateng ato waywayan ita. Ano miˈosi to Fangcalay Cudad i, sasamaan ko demak ita ngaˈ, micada to taˈangayay a epoc hani? Mitolon o masakalimlaan. Sanay ko cecay fafahiyan salikaka: “Iˈayaw no miˈosi kako to Fangcalay Cudad i, mitolonayho ci Yihofaan, milongoc Cingraanan padama takowanan mihapinang to, o ‘kasapaan’ ko sowal Ningra.” (ˈOlic 119:18) O roma i, tangongolen ita a midotim ko miˈosian a lalakaw. Ano mitolon kita, micekiw anca midotim, wa manaˈeng i falocoˈ ko Sowal no Kawas, wa matongal matongal a maolah to harateng ni Yihofa.—ˈOsien ko Taneng 4:20-22; ˈOlic 119:97.
16. Minengneng to kamok no JW Tilifi iraay ko maanan a epoc? Patinakoen.
16 O roma pakayraan ngaˈayay papikayaten ko harateng no Kawas kitaanan, minengneng to kamok no JW Tilifi. Sanay ko cecay mararamoday: “Ano matoˈol kami, o folafoladan a kamok no JW Tilifi, padamaay tamiyanan miliyaw a tanektek, oniya kamok o sapacaˈof ni Yihofa to satolon niyam, sanay ko harateng niyam. Marariday kami mitengil to radiw no JW Tilifi, nolatek mitangtang, micingkiyat anca minanom to ociya i, mitengilay kami toniya fangcalay a radiw.” O kamok no JW Tilifi padamaay kitaanan midipot to falocoˈ, pasifanaˈ kitaanan mitoor to pinengneng ni Yihofa a misimsim, halo papadama kitaanan ira ko timolo a miconged to harateng ni Satan.
17-18. (1) Ano tooren ita ko palinian no Kawas i saka 1 Hongti 8:61, wa ira ko maanan a haepoc? (2) Pakayni ci Hicikiyaan mananamay ita ko maanan? (3) Tooren ko ˈOlic 139:23, 24, wa ngaˈay kita i satolon micangacang to maanan hani?
17 Ano mitoor kita to palinian no Kawas a midemak, wa milifok to epoc, wa matongal Yakop 1:2, 3) Ano maharateng ko cisiniˈadaay a Wama pakayni kitaanan a maliko, wa masalo ko falocoˈ ita, micerid a pakahemek to falocoˈ Ningra. (Taneng 27:11) Ano tahalifa kita to sapalifet, o sangaˈayay a toki paihkal to madimadi to Kawas i pidokoan. (ˈOlic 119:113) Nikawrira, wa misarocod kita a maolah ci Yihofaan, misetek to falocoˈ midoedo to limoˈot Ningra, halo midofdof to araaw Ningra.—ˈOsien ko 1 Hongti 8:61.
ko tanektek no pakasoˈlin no mita. (18 Soˈlin, cowa ko malefotay kita, mararaway ko demak. Kawra ano mararaw kita, haratengen ko tinakoan no Hongti ci Hicikiya. Na mararaway cingra, ikorto pasasiyoray, padadotoc ira ko ‘makoracay falocoˈ’ midoko ci Yihofaan. (Isaya 38:3-6; 2 Rayray 29:1, 2; 32:25, 26) Cacongeden ita ko sakayhid ni Satan, aka papiwaraken cingra to harateng no mita. Wa mitolonho kita, micangacang ci Yihofaan pafeli kitaanan to ‘midofdofay a falocoˈ’. (1 Hongti 3:9; ˈosien ko ˈOlic 139:23, 24.) Nanay songilaˈen ita a midipot ko falocoˈ no niyah, ano mihaen wa ngaˈay tahadaˈoc a madimadi ci Yihofaan.
RADIW 65 O Moecelay Lalan Koni
^ 5段 Wa madimdi kita ci Yihofaan anca makayhid ni Satan a miliyas to Kawas hokira? Wa samaan koha teloc, cowa ko hakowaay ko macadaay ita a sapalak ko piˈarawan, pakayniay i pisongilaˈ ita a midipot to falocoˈ no niyah. Itini Fangcalay Cudad, o falocoˈ—o maanan ko tatodong hani? Samaanay ci Satan a miwarak to falocoˈ ita hani? Sasamaan kita midipot to falocoˈ no niyah? Oniya lalakaw wa pacaˈof toniya kalimlaan a salicay.
^ 11段 SAPITADTAD A SOWAL: Sowal no Fangcalay Cudad, pafelian ni Yihofa kita to inaneng i kemod no falocoˈ. Oniya inaneng, ngaˈay mikinsa to harateng no niyah, nafalocoˈan ato waywayan, ikor pafafidaˈ to matatodongay anca tatiihay. (Loma 2:15; 9:1) O cecay tamdaw ano ira ko mapahatatanamay no Fangcalay Cudad a makapahay falocoˈ, wa mitoor to palinian ni Yihofa a misawkit to niyah, mikinsa to miharatengan, midemakan anca misowalan no niyah matatodongay hokira.
^ 56段 TATODONG NO COKA: Minengnengay to tilifi ko faˈinayan salikaka, fahal sa ira ko kaackan a sasing i tilifi. Wa misaˈosi cingra to sasamaan ko demak.
^ 58段 TATODONG NO COKA: Nolitengan a mikecolay tamdaw, ano maˈaraw ko mingataay a ˈada, tangsol miowaw pakafanaˈ to i laenoay a misimaway to fawahan a tamdaw, oya misimaway a tamdaw wa tangsol miˈedef to fawahan.