1, 2. (1) Ano misiˈayaw to kafahalan a kafalic i, wa ira ko samaanay a harateng ita halatek? (Nengnengen ko satapangan coka.) (2) Mikitini i ˈOlic saka 131 fedengan a sinael, samaan kita ngaˈ mitafo to rihadayay a falocoˈ ita hani?

CI LIYOTE aci Alisantera matayal i Pitil mataˈlifay ko 25 miheca, tiya mafanaˈ cangra to mamanilnil tayra i kilac matayal i, masomaday ko harateng, o sowal ni Liyote: “Cowa sapiliyasaw kako to tayal ato nokaˈorip i Pitil. Soˈlin mafanaˈay kako to kafalican a lalangian, kawrira iraay ko mifalahay ko tao i takowanan sanay a herateng. Taˈangayay ko kafalican no falocoˈ ako, nolatekay tawlikay, nolatekay masomaday.”

² Ano fahal sa ko kafalic i nokaˈorip ita i, alatak calemcemay ko falocoˈ, taˈangayay ko saroero. (Taneng 12:25) Alatek pasangar a micada to hatiniay a kafalic, pakayni toniya pakayraan, samaanen ita ‘parihaday to falocoˈ’ hani? (ˈOsien ko ˈOlic 131:1-3.) Dotoc, wa miˈaraw kita to nolitengan tahanini, ano mafalic ko pakayraan i pairaay to samaanay rihadayay a falocoˈ ko sikawdan ni Yihofa.

3. Malifaay ni Yosif ko maanan a kafalic hani?

³ Nengnengen ita ko tinakoan ni Yosif, o kaolahan ni Yakop a  wawa cingra, maedeng 17 ko mihecaan i, pakayni kaˈinap no kaka ningra pacakayan cingra malo koli. (Satapangan 37:2-4, 23-28) Ikor no 13 a miheca, caka ngaˈay ci Yosif i tatihi no kaolahan a wama ningra, mihadidiay to roray malo koli a maˈorip, mangalef itini kapalitan no Icip a marofo. Kawraan, cowa ka lahdaw ko tokel ningra, padotoc a maketer, samaanay cingra misiˈayaw to malifaay no niyah a pakayraan hani?

4. (1) Misamaanay hano ngaˈay miemem to roray ci Yosif i kapalitan hani? (2) Samaanan ni Yihofa pacaˈofen ko satolon ni Yosif hani?

⁴ Taharoray ci Yosif i kapalitan i, marariday miharateng to samaanay ci Yihofa a padama cingranan. (Satapangan 39:21; ˈOlic 105:17-19) Alatek maharatengay ni Yosif ko paˈayaway to hano ikor a mitiihan, pakasoˈlin to maolahay ci Yihofa to niyah. (Satapangan 37:5-11) Miceriday cingra mitolon alatek, mifanaˈ to roray no falocoˈ ci Yihofaan. (ˈOlic 145:18) Pacaˈofan ni Yihofa ko satolon ni Yosif, padama ci Yosifan a pakasoˈlin, ano samaanto ko mifekaday a demak, o kalacafay Cingra ci Yosifan.​—Dmak 7:9, 10. *

5. O sapafeli no Kawas a rihaday wa samaan padama kitaanan?

⁵ Anini, soˈlin misiˈayaw kita to tatiihay a pakayraan, wa ngaˈay matinako ita ko sapafeli no Kawas a rihaday, o hatiniay a rihaday ngaˈayay midipot to falocoˈ ato ponoˈ no mita. (ˈOsien ko Filipi 4:6, 7.) Mihaenay, ano mamatolem no cariraw ko harateng ita i, cangacangen ko sadama ni Yihofa, o sapafeli Ningra a rihaday wa padama kitaanan padotoc a mihodop Cingraanan, cowa ko mamisawad. Anini o roma salikaka tahalifaay to hatiniay a pakayraan, nengnengen ita ko milifetan nangra.

6, 7. Ano ihkalen ko satolon hano ngaˈay padama kitaanan patikol a rihaday ko falocoˈ? Tinakoen.

⁶ Ci Rian aci Culiya malo mikiriwiˈay misakafahay to cecay liyad, ikor macadaay to mamaharek ko tayal nangra, itiya tada masomaday cangra. Sowal ni Rian: “Mitolonay kami ci Yihofaan, nai falocoˈay a harateng pasowalen Cingra. Mafanaˈay kami o ngaˈayay paihkal to pakasoˈlin ci Yihofaan a toki koni. O kasakopang niyam ˈalomanay ko faelohay a salikaka, mihaenay, micangacangay kami ci Yihofaan padama tamiyanan, mala ngaˈayay a taˈarawan nangra pakayni i pakasoˈlinay a falocoˈ.”

⁷ Samaanay ci Yihofa pacaˈof to satolon nangra hani? Sanay ci Rian: “Ikor no mitolon kami, o cariraw, o tatiihay a harateng, malahdaway maemin. O sapafeli ni Yihofa a rihaday midipotay to falocoˈ ato harateng niyam, mahapinangay niyam, ano kamayan a mitafo to matatodongay a waywayan, wa padadotoc a sakadademaken ni Yihofaan.”

8-10. (1) O fangcalay saocor misamaan padama kitanan pakaremo to cariraw? (2) Ano padadotoc kita misarocod mihodop ci Yihofaan i, wa samaan Cingra padama kitaanan?

⁸ O fangcalay saocor no Kawas cowa ko padama aca patikol to marihaday ko falocoˈ no mita, mikayatho kitaanan misinanot to roma a sinael, patalipaˈelalay kitaanan padotoc misakareteng to noˈadingoan a demak. (ˈOsien ko Yohani 14:26, 27.) Nengnengen ko tinakoan no cecay mararamoday, ci Filip aci Mari maedeng 25 a miheca matayalay i Pitil. Lalomaˈ no sepat a folad, mapatayay ko wina nangra ato cecay salawina, hanaca ci Mari misatapangho a midipot to caka fanaˈ to tamdaw a wama.

⁹ Milomal ci Filip, sanay cingra: “Miharateng kako wa ngaˈay maremo ako saan, kawra, cowa ka ngaˈay. Ikor to, miˈosi to Kolosay 1:11 itiniay i cacekiwen a lalakaw no Mikecolay, cipinangto kako, soˈlin mihadidiay kako, kawra  cowa ko soˈlinay a mihadidi, misaaliay kako to ‘itini i polong a demak mihadidi, o lipahakay a falocoˈ ko saka tanektek.’ Oniya sinael patalipaˈelalay takowanan, o lipahak, cowa ko pakayraan aca, ao pakayniay i sakayat no fangcalay saocor no Kawas i nokaˈorip.”

¹⁰ Ci Filip aci Mari padotoc a misamacay mihodop ci Yihofaan, malifokay nangra ko sapafeli ni Yihofa a sapalemed. Caka halafin miliyas cangra i Pitil i, mahelaay ko roma sapinanamaw to Fangcalay Cudad a tamdaw, oniya pacekiwan maolahay to cecay lipay minanam to kina pinapina to Fangcalay Cudad. Sowal ni Mari: “Oniya pacekiwan pahemekay tamiyanan, ci Yihofa hato pakayniay toniya demak pasowal tamiyanan to ngangaˈayto ko kihcod! Sanay Cingra.”

11, 12. (1) Samaanay ko demak ni Yosif hato malifokay ko sapalemed ni Yihofa? (2) Ci Yihofa samaanay a palemed ci Yosifan hani?

¹¹ Ano fahal sa ko kafalic i nokaˈorip ita i, wa macariraw kita alatek, sahtoay o pasangar no niyah ko maharatengay. O hatiniay a pakayraan mifekaday i tireng ni Yosif alatek, kawra cowa ka toled a masomad cingra, misaˈicelay a midemak, mitala ci Yihofaan pafeli to sapalemed cingraanan. Itini i kapalitan ci Yosif i, misarocoday milaheci to patorodan no tapang no kapalitan a demak cingranan, mahecad o noka pisarocod ningra a dademak ci Potifaan.​—Satapangan 39:21-23.

¹² Ikor, miocoran ci Yosif padama to tatosaay mapalitay, oniya tatosaay mapalitay nao ˈakawangay ko saaroˈan i lomaˈ ni Falaw. Sidaˈitay ci Yosif a micada cangraanan, orato mifanaˈan noniya tatosaay mapalitay ko cariraw ato mitiihan nangra ci Yosifan. (Satapangan 40:5-8) Cowa ka fanaˈ ci Yosif itiya, oniya kasasowal ningra toniya tatosaay mapalitay, o papadama cingraanan milifok to pasalat. Ikor no tosa miheca matedalay ci Yosif, hanaca toya katedalan ningra a romiˈad, manilnilay ni Falaw malo sakatosa ko ˈakawang no saaroˈan a tamdaw i Icip.​—Satapangan 41:1, 14-16, 39-41.

13. Ano samaanto ko pakayraan i, sasamaan ko hademak ita wa malifok ko sapalemed ni Yihofa hani?

¹³ Mahecad ci Yosifan, wa tahasiˈayaw kita to cowa ka remo a pakayraan alatek. Kawraan, ano padotoc kita a mihadidi, misaˈicel a midemak, wa palemeden ni Yihofa kita. (ˈOlic 37:5) Soˈlin nolatekay “awaawa ko pakayraan niyam”, kawra mahecad o sowal ni Pawlo, “caay ka toled kami.” (2 Korinto 4:8) Wa mikapot ci Yihofa kitaanan, mangalef ano padotoc kita misamacay to mitosilay a demak, wa padamaen Ningra kita.

14-16. Ano mafalic ko kaˈorip i, paratohay a Filip misamaanay padadotoc misarocod to mitosilay a demak hani?

¹⁴ O paratohay a Filipan o ngaˈayay a taˈarawan,  soˈlin misiˈayaw cingra to kafalic no pakayraan, kamayan misarocod to mitosilay a demak. Fanekfekay ci Filip midemak to faelohay a minilnilan. (Dmak 6:1-6) Ikor no pakayni soˈlinay kimad mapatay ci Stifano, itini Yirusalim mifekaday ko mipalakay to Krisciyang a pakayraan. * O Krisciyang pakayni sapalak maliwasakay tayra cowacowa pala, kawra kamayan padotoc a ˈifowa ci Filip matayal saki Yihofaan, tayra i niyaroˈ no Samariya a mitosil, samanen ˈalomanay tamdaw itira cowaho pakatengil to ngaˈayay lihaf.​—Matay 10:5; Dmak 8:1, 5.

¹⁵ Makahiay ci Filip micada to sakayat no fangcalay saocor tayra i roma pala, mansa saka dademaken ni Yihofa cingra tayra i cowaho pakatengil to ngaˈayay lihaf a kilac mitosil, itiya ˈalomanay Yutaya tamdaw misakahemaway to Samariya tamdaw, kawra awaay ko misakakinihay a harateng ni Filip, milasilay cingra i Samiriya tamdaw to ngaˈayay lihaf, telocto “lacecay sanay ko falocoˈ” no tamdaw a misinanot to sowal ni Filip.​—Dmak 8:6-8.

¹⁶ Makayatay no fangcalay saocor ci Filip tayra i Astot ato Kaysariya a mitosil, oniya tosa niyaroˈ adihayay ko ˈalafang tamdaw. (Dmak 8:39, 40) Mikitini pitosil ni Filip to Samariya misatapang, mataˈlifayto ko 20 miheca, taˈangayay ko kafalic i nokaˈorip ningra, itiniay i kilac ko kitiraan ningra, iraayto ko paro no lomaˈ. Soˈlin mafalic ko pakayraan, kamayan ci Filip misarocod to mitosilay a demak, telocto cingra ato paro no lomaˈ milifokay to kadofahay a sapalemed ni Yihofa.​—Dmak 21:8, 9.

17, 18. Ano mafalic ko pakayraan i, misarocod to mitosilay a demak hano tataˈangay ko sapadama kitaanan hani?

¹⁷ ˈAlomanay ko mieminay to toki a mitosilay misawacayay cangra, ano mafalic ko pakayraan i, misarocod a mitosil wa padama cangraanan padadotoc mahemak ato tawlikay a harateng. Tinakoen o cecay mararamoday i Nanfi ci Aspen aci Porite, miliyas cangra i Pitil ikor, na kaliki makilim ko kilomaˈan ato katayalan sanay ko harateng nangra. Kawra, o sowal ni Aspen: “Mikilim to katayalan cowa ka haen o maharatengay niyam a madolo.” O sowal no fafahi ci Porite: “Toloay a folad cowa paka kilim kami to katayalan, awaay ko mahopeday a payci, tada pasangarayto itiya.”

¹⁸ O maanan ko padamaay toniya mararamoday pakafilo to hatiniay ka calemceman a  pakayraan hani? Sowal ni Aspen: “Malacafay to kasakopang a salikaka mitosil i, padamaay tamiyanan misamacay to noˈadingoan a demak, tawlikay ko harateng. Misaˈosiay kami ˈifowa to mitosilay a tayal, cowa ka saromiˈamiˈad sa a calemcem i lomaˈ, mihaen to demak tada mahemekay kami. Dotocto misaˈicelay kami mikilim to kataylan, saikor soˈlinayto makilim!”

19-21. (1) Misamaan ko demak ita wa ngaˈay padotoc a rihaday ko falocoˈ? (2) Minanam to kafalic no pakayraan wa malifok ko maanan a haepoc hani?

¹⁹ Mahaen o masowalay i fafekang a tinakoan, ano misaˈicel kita a midemak, ira ko pakasoˈlin no falocoˈ mitala ci Yihofaan, wa ngaˈayto kita mitafo to rihadayay falocoˈ. (ˈOsien ko Mika 7:7.) Latekay minanam to kafalic no pakayraan, wa ngaˈay kita milifok to haepoc. Milengo ci Porite to nalifetan no niyah sanay ko sowal: “Ono kafalic no katayalan pananamay takowanan, itini pasangaray a pakayraan, samaan ko demak o soˈlinay mitiˈer ci Yihofaan. Telocto, matongalay ko tangongol no kalawidang ako ci Yihofaan.”

²⁰ Ci Mari kamayan midipot to matoˈasay a wama, padotocay a misakafah. Sanay ko sowal ningra: “Mananamay ako ano cariraw kako i, wa tomerepho, mitolon, dotoc misakahemaw to tireng. Sakakaay mananamay ako i, paiken han ko demak i kamay ni Yihofa, ano ikorto masakalimlaan ko pihaen to demak.”

²¹ Masowalay i ˈayaw ci Liyote aci Alisantera sanay milengo, mafalic ko pakayraan micadaay ko pakasoˈlin no falocoˈ to sapalifet. Kawra, sanay ko sowal nangra: “O sapalifet paihkalay to iraay ko pakasoˈlinay falocoˈ niyam hokira, pahapinangayho to hakowaay ko tanoktok no pakasoˈlin no niyah, itini tahalifa to pasangaray ngaˈay pafeli to sahinom tamiyanan. Harateng niyam nohatini matongalayto ko pakasoˈlinay falocoˈ.”

22. Misaˈicel a midemak kita i, wa ngaˈay pakasoˈlin to maanan hani?

²² Ano mifekad ko kafahalan a kafalic i nokaˈorip i, anca mafalic ko katayalan, anca adadaay ko tireng, matongal ko ˈinorong no paro no lomaˈ, ngaˈayho pakasoˈlin kita to ciharatengayho ci Yihofa kitaanan, itini i matatodongay a toki padama kitaanan. (Hipray 4:16; 1 Pitiro 5:6, 7) Misiˈayaw to hatiniay a kafalic, wa misaˈicel kita a midemak, pakayni i pitolon miingid ci Yihofaan, minanam a mitadiˈec Cingraanan. Ano mihaenay ko demak ita, wa padotoc marihaday ko falocoˈ ano tahalifa to kafalican a toki.