ITINIAY I 1934 miheca hofocen kako, o wama ato wina ci Foliter Moloham aci Aiterna, iˈayaw no mahofoc kako 20 miheca, o ˈifowaay a Micekiway to Fangcalay Cudad (Misawacayay Tamdaw ni Yihofa anini) cangra. Tada mikoˈiday kako to wama wina, kaemangho pasifanaˈ cangra takowanan mangodo ci Yihofaan. Mikilomaˈay kami i Kansas a Pasens a niyaroˈ, itiraay a kasakopang maedengay o mapasimalay Krisciyang maemin. O paro no lomaˈ niyam miceriday mirienang to saˈopo ato mitosil. Kalahokan no pieneman mirienang to kaˈalomanay a pisawacayan. Soˈlin marorayay, kawra maherek mitosil i pakaenay ko wama to pingcilin tamiyanan a palifon.

Mimingay ko kasakopang niyam, kawra tada taˈangayay ko pitosilan a kilac, mahawpay ko niyaroyaroˈ ato nociyo. Ano mitosil to mawmahay kami, marariday mifalic to cudad no Fangcalay Cudad to tatokem ato samaˈ nangra, ato fitaˈol, nolatekay mifalic to kokoˈ nangra. Cowa ko cihafayay kami, kawra i saˈayaway a pakiyaho ko wama tono Fangcalay Cudad, mihaenay o mifalican a kakaenen midamaay to saka ˈorip niyam.

Iraay ko cikongki no wama wina ako, sakadademakan i pitosilan. Mimingayho kako itiya caka fanaˈ misakadademak tora kikay, kawra ano milisoˈ ato pacekiw cangra i, maolahay kako padama cangranan pahoni to kimad no salikaka ci Rosofo.

O wama mifalican ko 1936 mihecaan a paliding malo palosiyangay a tosiya, patirengay to taˈangayay a laepa i fadahong no tosiya. Tano palosiyangay a tosiya milasil to lihaf no Hongti Kitakit tada ciepocayto. I satapang pangihaen ko radiw misolot to tamdaw mingata, ikor ngaˈ pangiha to kimad no Fangcalay Cudad. Herek no kimad i,  palilamen niyam to cudad no Fangcalay Cudad i maolahay a tamdaw.

Kinacecayay, itini i mimingay niyaroˈ i Kansas a Ciliwil a mitosil, pasowalay ko dimeng to wama, pilipayan i ˈalomanay ko tamdaw tayni i koying mihalama, mansa aka pangiha to kimad i koying, ano i papotal ngaˈ ngaˈay, sanay. Tooran no wama ko sowal no dimeng patayra to paliding i tatihi no koying a lalan, mihaen wa ihkalho ko tamdaw mitengil to kimad. Tada maolahay kako malacafay to wama ato kaka ci Cili tano hatiniay a pakayraan a mitosil.

Itini ˈayaw no 1940 miheca, mirienangay kami to mikiriwiˈay “milipalaway a demak”, itini macongeday ko mitosilay tayal a kilac, kalikiay a palilam to lalakaw i cilomaˈay. Caho ka taengad lomowadayto kami (Mahecad o nano demak i Misoli Ciyawpolin), awaay ko adeses a pacomod to cowantan ato kihpicay cudad i ngalaˈ no fawahan. Maherek ko tayal, malalitemohay ko ˈalomanay i potal no niyaroˈ, minengneng to iraay ko macepetay no dimeng a tamdaw hokira.

Itiya, iraayho ko tayal no mitosilay—romakatay milasil. Pakayni sapilasilaw to Hongti Kitakit, pakafitan niyam i tireng ko mitilidan a paya, masalayalay romakat i niyaroˈ. Maharatengay ako kinacecayay romakatay ko salikaka i niyaroˈ, o pakafitan i tireng a paya sanay ko mitilidan, “O Talakal Ato Salipalaw ko Pidoyongan.” Maedeng 1.6 kongli ko mirakatan nangra, saikor tayraay i lomaˈ niyam. I karomakat nangra awaay ko micongeday, adihayay ko fahkaˈay a tamdaw mialikotay minengneng.

Tocerid malacafay kako to paro no lomaˈ tayra i Tekesas mirienang to taykay. Ti:yaho matayalay ko wama i kasoling a kosi, mansa ngaˈay tano paya ningra mikalic to cowa papayci a kasoling, milisoˈ to salawina ato mirienang to taykay. O lomaˈ no faki ako ci Foliter Wismael ato fayi ci Erali i Tekesas a Tanpoer a niyaroˈ. 1920 miheca, kaemangho minanamayto to soˈlinay kimad micadaay to ˈino ko faki ako, mitosilay to salawina ningra, mahawpay ko wina ako. O kasakopang i Tekesas a pala mafanaˈay to faki ako, samanen iˈayaw cingra malo mitaliyokay sikawdan (kasakilac kantok) itira. O cisidaˈitay a tamdaw cingra, mamenacay ko pinangan ningra mansa macacawmaˈ cingranan tada kahemekanto. O ˈifowaay mitosil a taˈarawan ningra ngaˈayay ko pilingat takowanan.

1941 miheca, mikalicay kako ato paro no lomaˈ to kasoling tayra i Misoli a Senroy mirienang to taykay. Cecay romiˈad no taykay, polong a wawa ato kaemangay matahidangay tayra misaˈosian no taykay a kitiraan, mitengil to kimad no salikaka ci Rosofo, o lalangian i: “Wawa no Hongti.” Cowa ka harateng, hererekan no kimad, kami maemin macadaay ko mikiriwiˈay a sapatelong, salikaka ci Rosofo ato roma salikaka palilamay tamiyanan to Kaemangay sanay a cudad. Mataˈlifay ko 15,000 a kaemangay tada maolahay toniya kalimlaan a sapatelong.

1943 miheca 4 folad, itini Kansas a Kefiwil mirienangay kami to “Micada to Tahidang a Matayal” a taykay, oniya taykay cowa ka ˈaloman ko mirienangay,  kawra tada kalimlaan. Mihadakay to safanaˈ ko taykay, o faelohay a Pahatatanamay Saˈopo wa misatapang i kasakopang, hanaca mitepangay to sapahatatanam a cudad, 52 a fedengan. Toya mihecaan mihadakay kako to sakina cecay mihatatanamay a kimad. Toya taykay kako ato roma tamdaw itiniay i kietecay a lako i ngata no nociyo micada to inoˈ.

Itini 1951 miheca micudiyap kako i kawcong, wa misaˈosi to hanoikor no niyah itiya. Matayal i Pitil o kaciharatengan ako a patosokan itiya, o kaka ci Cili na matayalay i Pitil, mihaenay hato palakatan ako ko sapangangan tayra i Prokelin. Caka halafin, mahaydaayto ko pipangangan ako, itini 1952 miheca 3 folad 10 romiˈad misatapangay i Pitil a matayal. Oniya saˈosi padamaay takowanan misarocod to falocoˈ mihodop ci Yihofaan.

Soˈlin wa itini i piinsacan matayal sanay kako, kawra mapanilnilan kako tayra i pitahekaan matayal, ikor tayra i cawka mitangtang. Soˈliˈlin, cowato ka tayra kako i piinsacan a matayal. Itini i cawka matayal adihayay ko mananamay ako, maolahay toniya tayal. O macacorekay ko cawka a tayal, mansa ngaˈay i romiˈad a pahanhan. Oniya pahanhanan a toki wa tayra i tosokowan a micekiw, padama takowanan macakat i noˈadingoan, paˈicelay to pasoˈlinay falocoˈ no mako. Misaˈosiay kako ano ngangaˈay ko pakayraan, makalimay kako matayal i Pitil saki Yihofaan. 1949 miheca o kaka ako mararamoday ci Paterisiya, miliyas i Pitil, ikor mikilomaˈay i Prokelin. Miceriday pakalalok takowanan ko kaka ato fafahi ningra, taˈangayay ko padama takowanan i satapang no pina mihecaan i Pitil.

Tiya tahira aca i Pitil a matayal kako i, sapitongalaw ko likakawa to mamikimad to Pitil a kimad. O iraay ko tatodong mikimad a salikaka, wa tayra i 322 kongli ko raay to Pitil a kasakopang, itira mikimad halo kalacafay to salikaka a mitosil. Mahemekay kako masalalomaˈ no mikimaday, sakinacecay mikimad tada marawraway, hanaca o pakapapotalay a kimad itiya cecayay ko toki. Tocerid o kasoling ko mikalican tayra i romaroma kasakopang, maharatengayho i 1954 miheca kasienawan a cecay pilipayan kalahokan, mikalicay kako to tatayra i Niwyok a kasoling, maedeng kalafian tahira i Pitil, kawra, taˈangayay ko soeda mapalakay ko incing no kasoling, cowato ka ngaˈay a romakat. Tahiraay i picecayan 5 ko toki to papacem, tahira sanayho ko kasoling i ciyataw no Niwyok. Tangsolay kako mikalic to pakaseraay a paliding minokay i Prokelin, hanaca sontaday tayra i cawka a matayal. Tahira kako i Pitil mataˈlifayto ko toki, cowa ka fotiˈ misalafii, malotayay ko tireng, kawra ngaˈay i pilipayan tayra i roma kasakopang a matayal i salikaka, mafanaˈ to adihayay faelohay a widang tada kahemekanto, cowato ka samaan ko kaeca kadepoc i lalan.

Matayal itini i Pitil, mirienangay kako to pilokoing no WBBR. Ora pilokoingan itini i Kelonpiya Lotok lalan saka 124, 2 tingloh. Mirienangay kako to cecay kamok, kako ato roma salikaka paˈaraway to samaan micekiw to Fangcalay Cudad. Salikaka ci Maykemilon marariday a mirienang to kamok, tada halafinay a matayal itini i Pitil. Pangangan cingranan to salikaka Mayko. Mihadidiay cingra a midemak to tayal ni Yihofa, patirengay to sangaˈayay a taˈarawan cingra.

1958 miheca, mafalicay ko tayal ako, oniya tayal milingatay to Kiliyat a picudadan. Citatodongay kako padama to micudiyapay misinsi to kitakit a mingkiw, halo pilimasmas to pikalican, ho ngaˈay tayra i minilnilan a kilac koniya fanekfekay a salikaka. Pasangaray ko paya no hikoki itiya, cowa ka hakowa ko micudiyapay ngaˈay mikalic to hikoki tayra i kilac. O ˈalomanay tatayra i Afrika anca Asiya a micudiyapay o tamina ko mikalican. Tahira to kairaan no kalo a hikoki, madoloayto ko paya, mihaen ngaˈayayto ko ˈalomanay milakowitay to riyar a mitosilay paka hikoki tayra i minilnilan a pala.

Samanen 1961 miheca iraay ko koksay taykay, mansa itini 1960 miheca, matongalay ko tayal ako milimasmas to nai Padaka tangasa i Iwropa a hikoki. Kako sai tayra i Towic mirienang to taykay i Hanpaw. Herek no taykay, malacafay to tatoloay  Pitil a salikaka micaliw to paliding tayra i Itali, miˈaraw to i Lomaay a Pitil. Dotoc tayra i Frans mitaˈlif to Piliniw Lotok tayra i Sipanya. Itiya macongeday ko mitosilay i Sipanya, mihaenay, mipawsa kami to cudad no Fangcalay Cudad hato sapatelong a nengnengen, miˈorong tayra i Pasaylongna pafeli to salikaka. Tada mahemekay kako mafanaˈ to itiraay a salikaka! Ikor padotocay kami mitaykay i Amostetan, itira mikalic to hikoki minokay i Niwyok.

Ikor no cecay miheca, o tayal ako mahawpay ko pilimasmas to piliwko no mamirienang to 1963 miheca a koksay taykay a taypiyaw. Polong no taypiyaw 583 tamdaw, wa mirienang to “Tahadaˈoc Ngaˈayay a Lihaf” a taykay, o madadoedoay a taykay icowacowa no kitakit konini. Mirienang cangra i Iwropa, Asiya, Katimolay no Asiya a taykay, ikor tatayra i Hawaii Honololo, saikor tayra Karefoniya a Pasatina a mahererek. Cowa ko pirienang aca to taykay, oniya taypiyaw tayraay i Lipanon ato Yortan mirienang to mikiriwiˈay piliwko, tayra i masowalay no Fangcalay Cudad a pala. O tayal niyam cowa ko pilimasmas aca to hikoki ato liwkang, patadoayho to taypiyaw misinsi to sapicomod i roma kitakit a minkiw.

1963 miheca o tada kalimlaan a miheca, samanen itini saka 6 folad 29 romiˈad, mararamoday kako aci Lila Loces. Naitiraay i Misoli cingra, itini 1960 miheca malo matayalay i Pitil cingra. Ikor no cecay lipay, mirienang kami to miliwkoay i polong no hekal a taykay, tatayra i Sila, Icip ato Lipanon. Mikalicay kami to hikoki nai Lipanon a Pilote tayra i Yortan. Samanen macongeday ko mitosilay a demak, o roma a Misawacayay Tamdaw ni Yihofa, cowa ka ngaˈay milifok to sapicomod i Yortan a minkiw, miharatengay kami to mamifekad ko maanan a demak. Teloc i, tahira i Yortan a hikociw, maˈaraw niyam ko salikaka itini i tingloh no lomaˈ, iraay ko tatafing, matiliday to “Mahemekay a Militemoh to Misawacayay Tamdaw ni Yihofa!” Tada mahemekay kami. Toniya piliwko, tayra i na kitiraan no ˈaˈideman nolitengay iti:yaho, miripaˈ to na mirakatan a lalan ni Yis ato tarokos, ato pisatapangan no Krisciyang a pitenak to Kristokiyo a kilac. (Dmak 13:47) Ngaˈay minengneng kami to milengoan no Fangcalay Cudad a kilac, tada kasemeranto koniya milifetan!

Lalomaˈ no 55 miheca, o madimadiay a kapot ako ci Lila, kalacafay takowanan matayal to masakenaay a demak. Na itiniay kami tiya maconged ko mitosilay a demak i Sipanya ato Potawya a kinapina a milisoˈ, pakalalok to itiraay a salikaka, pafeli cangranan to misaalian nangra a cudad. Itini i Sipanya, o roma salikaka mapalitay i Katise kitiraan no sofitay, iraay ko toki niyam a minengneng cangranan, mahemekay kami mihadak to kimad a pakalalok cangranan.

Mikitini 1963 miheca misatapang, citatodongay kako milimasmas to piliwko no adihayay koksay taykay, o kahiceraan mahawpay ko Afrika, Austrarlia, Tatenok Katimol a Amilika, Iwropa, Etip no Asia, Hawaii, Niu Silan, Potolike. Kako aci Lila mirienangay  to adihayay pasangaray pawanen a taykay, tinakoen, 1989 miheca itini Howasa no Polan a taykay. ˈAlomanay ko tamdaw to mirienangay toniya taykay, ˈalomanay ko naitiniay i Rowasiya a salikaka mirienang toniya taykay, o sakinacecay nangra a mirienang to taykay konini! Malitemohay niyam ko roma salikaka, isalakat pakayni pihakelongan na halafinay cangra a mapalit i Suwiay.

Maolahay kako milisoˈ to icowacowaay a fenpo, pakalalok to matayalay i Pitil ato milakowitay to riyar a mitosilay. Salikoray milisoˈan niyam a Fenpo o Koriya, itiya iraay ko toki niyam minengneng to mapalitay a 50 salikaka i kapalitan. Tawlikay a mahemek ko salikaka, makalimay ano matedal wa miliyaw a mirienang to mitosilay a demak. Mikitini i tireng nangra taˈangayay ko malifokay niyam a sapakalalok.—Loma 1:11, 12.

Toniya pina miheca, matongalay ko midokoay ci Yihofaan a tamdaw, mahapinangay ako palemedan ni Yihofa ko finawlan Ningra. 1943 miheca micada kako to inoˈ i, polong no hekal 10 ˈofad ko mitosilay, nohatini itini 240 kakitakitan kasakilac, mataˈlifayto ko 800 ˈofad a Misawacayay Tamdaw ni Yihofa. Ira ko hatiniay a kacowat, sakakaay lalangian o pikayat no micudiyapay i Kiliyat picudadan a mitosilay. Mahemekay kako malacafay to milakowitay to riyar a mitosilay a matayal, hanaca padama cangranan masongilaˈ ko katayra i minilnilan a pala.

Mahemekay kako kaemangho misaˈosi tayra i Pitil a matayal ci Yihofaan, hanaca hakelong no kaˈorip ako palemeday ci Yihofa takowanan. Toniya pina poloˈ miheca, cowa ko kahemek aca no mako aci Lila matayal i Pitil, maolahayho kami malacafay to masiromaay kasakopang i Prokelin a salikaka mitosil, hanaca mahelaay niyam ko ngaˈayay a widang i kasakopang.

Nohatini kamayan i Pitil a matayal kako, to romiˈamiˈad taˈangayay ko sadama ni Lila takowanan. Soˈlin mataˈlifayto 84 ko mihecaan ako, ngaˈayayho midemak kako to ciepocay a tayal, midama misilsil to tikami i Fenpo.

Mahemekay kako masalalomaˈ no likakawa ni Yihofa, pakahapinang to kasasiroma no finawlan no Kawas ato tamdaw noniya hekal, mahaen o sowal i Malaki 3:18 sanay: ‘Wa miliyaw a mahapinang iso o moecelay tamdaw ato tatiihay tamdaw, mihodopay to Kawas ato cowa pihodop to Kawas a tamdaw, o maanan ko kasasiromaan. Mataˈlif ko romiˈad, malingaday ko tatiih no lekakawa ni Satan, awaay ko hatokel no tamdaw, caay ka lipahak, kawraan o midokoay to Kawas a tamdaw, itini pasangaray siˈayawen a ˈawaled lipahakay ko kaˈorip, hanaca iraay ko tanektekay a hatokel. Ngaˈay kita milasil to ngaˈayay lihaf no Hongti Kitakit, tada o kalikoan a demak. (Matay 24:14) Mitalaay kita caka halafin no ikor, papalaˈafoen no Hongti Kitakit no Kawas ko hekal ni Satan, itini faelohay hekal, wa malaˈosi ko mikiˈokan no Kawas a sapalemed, tatanoktok ko tamdamdaw, tahadaˈoc a maˈorip. Maraod ko toki, o madimadiay a sikawdan ni Yihofa wa tahadaˈoc itini cikiw lipahak a maˈorip.