Oniya Fersay hananay a katatelekan patirengay to Koksay Lin-mong hananay a lekakawa, o araaw i, “saka palacecayaw to kasakitakit, ato saka dipayal no hekal.” Adihayay a kiyokay midamaay toni lekakawa, Kristokiyo no Padaka, “o mitaypiyaway to Hongti Kitakit no Kawas itini i sera koni lekakawa,” sanay. Micorcoray to taypiyaw mirienang tora saˈopo i Paris, o cecay taypiyaw sanay ko sowal, oniya saˈopo “mifohatay to faelohay a lintad no likisi.”

O faelohay lintad misatapangayto, kawra cowa kora mirienangay tora Saˈopo i Paris ko palaˈosiay. Nao ˈicel no finawlan ni Yihofa ko palaˈosiay isaka 1919 miheca, misatapang cangra to sataˈangayay a mitosilay demak itini paro no kakarayan, mifohat to faelohay lintad no mitosilay a demak. Kawra ˈayaw nonini, wa misiˈayawho to kafalic no pakayraan ko Micekiway to Fangcalay Cudad a Tamdaw.

Mitepangay to Cudad no Mikecolay nao misaˈosiay isaka 1919 miheca 1 folad 4 romiˈad, Pieneman, masaˈopo a misinkiw to kakeridan. Kawra oya mikayatay to likakawa no mita a salikaka ci Yosif Rosofo ato romaroma papito a salikaka, tahacadaay to cowa ka sadafdaf a pisawki, marofoayho cangra itini i Atelanta no Padaka a kapalitan. Mihaenay i, cisasaay ko romaroma salikaka, orira mapalitay a salikaka wa ngaˈayho sinkiwen cangra a malo kakeridan a tamdaw han? Anca kilimen ko roma tamdaw mikotay cangranan han?

Salikaka ci Rosofo itini i kapalitan i, calemcemay ko falocoˈ pakayni to noikoran no likakawa. Mafanaˈay cingra to mihalakaay ko salikaka to roma a tamdaw mikotay cingranan, mihaenay patikami sa cingra a minilnil to salikaka ci Iwante Kewot, “o citanengay,” “damsayay,” “madimadiay a tamdaw cingra,” sanay. Kawra o tokel no ˈalomanay tamdaw panayaren to enem folad a misinkiw sanay, mahaenay ko harateng no pingkosi ni Rosofo. ˈArawhan, itini noka lalengo nangra, maketeray ko romaroma salikaka.

 Salikaka ci Papo, milomalay a pasowal, hato ‘marihadayay ko kalalengo nangra itiya.’ Somowalay ko cecay salikaka: “Cowa ko pingkosi kako, cowa ka fanaˈ to holic no kitakit, kawra mafanaˈay kako to saali no Kawas. O saali no Kawas i, madimadi kita, nohatini ano nilnilen ita ci Rosofo i, o patalahkalay to nika madimadi to Kawas.”—ˈOlic 18:25.

Salikaka ci Maykemilon, sanay milomal, tocila a romiˈad, mikongkongay ci Rosofo to cafeng no kapalitan, sanay pasowal: “Layaˈen ko kamay iso”, palayaˈ a pafeli to cecay timpo takowanan. Maˈaraw ni Maykemilon kora lihaf, tangsolay mafanaˈ to tatodong nora sowal. Oya timpo sanay: “Oya kakeridan (Rosofo, Ways, Faanpo, Papo, Antisen, Puli, aci Sepiel) masinkiwayto, ci Rosofo o siyaciw, ci Ways o padamaay a siyaciw, ci Fan o misu.” Mihaenay i, padadotocay malo siyaciw ci Rosofo.

Ta mapalit konini fafaloay salikaka i, madimadiay a Micekiway to Fangcalay Cudad a Tamdaw mipalowaday to panganganay a demak, micangacang to mirikecay pasadak tora fafaloay a salikaka. Oniya timoloay a salikaka masopeday ko 70 ˈofad a pangangaay. Itini 1919 miheca 3 folad 26 romiˈad, caho ka mapatayra kora panganganay a tikami i, matedalayto ko salikaka ci Rosofo ato roma salikaka.

Mikimaday ko salikaka ci Rosofo toya militemohay cingranan a tamdaw, sanay ko sowal: “Pakasoˈlinay kako, o nilifetan ita anini, o sapipasadayaw kitaanan, misiˈayaw to mikikakaay a pasangar . . . Misaˈicel kamo, cowa ko sapilidongaw to salikaka, samanen cowa ko kalimlaan koni . . . Ao sapaˈdilaw to Kawas. Polong a mihaenay to demak a tamdaw, mapalemedayto no Kawas.”

Oya mafekaday a demak tiya pisawkitan a romiˈad, mahapinangay to nika pikayat ni Yihofa. Isaka 1919 miheca ka 5 folad 14 romiˈad, milasilay ko hoing to sasawkit, sanay: “Oniya Micekiway to Fangcalay Cudad a Tamdaw cowa ka masadafdaf a masawkit, mihaenay i, o fafelihen koya isalakatay a sasawkit.” Tada pakidemay koya isalakatay a sasawkit, ano sododen cangra anca milowan to pipalit i, o mamaterek a matilid ko raraw nangra. Kawra, palahdawan a mifelih koya salakatay a sasawkit, hanaca awaay ko faelohay a raraw nangra, mankora, materekay no salikaka ci Rosofo ko tatodong a mala pingkosi, ikor no matedalto cingra i, kinapinapinaay cingra paˈading to tamdaw no Kawas i Padaka.

Sanay ko sowal ni Maykemilon: “Cowa ka paselaˈ kami to demak, mitala to  sakatayraaw i kakarayan. Mafanaˈay kami to papadadotoc a matayal, hongaˈ mahapinang ko araaw no Kawas i tamiyanan.”

Tiya mapalit koya fafaloay salikaka i, oya sapiinsac a lalosidan mipalakan, mansa caay ka tangsol sa miliyaw a misatapang a miinsac. Hato calemcemay ko salikaka, wa haen sato a malaˈeto ko mitosilay a tayal hakiya.

Sakafanaˈaw ko Micekiway to Fangcalay Cudad a Tamdaw, wa iraho ko makahiyay mitengil to lihaf no Hongti Kitakit hokira? Oraanto i, misaˈosiay ci Rosofo a pasadak to pakapapotalay a kimad. Sanay ci Maykemilon: “Ano awa ko tamdaw tayni a mitengil i, soˈlinayto malaˈeto ko demak no mita”.

Itini i isaka 1919 miheca 5 folad 4 romiˈad to Pilipayan, soˈlina karetengay ko adada ni Rosofo, kamayanay cingra a mikimad itini i Losanki, lalangian i: “O Hatokel no Mapadesay a Tamdaw”. Maedeng 3,500 a tamdaw ko tayraay, tona awaay ko kamaroˈan, pinaay soˈot a tamdaw liyas sanayto. Tocila a romiˈad, iraayho ko 1,500 tamdaw tayra a mitengil. Awaay ko sasa, ˈalomanayho ko tamdaw to maolahay a mitengil to lihaf no Hongti Kitakit.

Ora dotoc a demak no salikaka, mipalalanay to hano ikor a mitosilay a demak no Misawacayay Tamdaw ni Yihofa.

Milasilay ko 1919/8/1 a Mikecolay, to aitini i ka Siwaan a folad, mamisikay to taykay i Ohayo Sansuciyaw a pala. O cecay Micekiway a kapah ci Kelarense naitiraay i Misuli a pala, milomal cingra: “Cecacecay tamdaw miharatengay to sapirienangaw toniya taykay.” Teloc i, maedeng 6,000 a salikaka ko mirienangay, mataˈlifay to niharatengan no  salikaka ko kaˈaloman. Kalipahakan i, mataˈlifay ko 200 a tamdaw itini i Ili a fanaw micada to paputisem.

Isaka 1919 ka 9 folad 5 romiˈad, o saka 5 romiˈad no taykay, mikimaday ci Rosofo to “Onika Sasowal to Salikaka” sanay a kimad, milasilay cingra to cecay faelohay casi Ekim a Lalintadan. * Oniya casi “mitiliday to singpon no hekal, mikitini i Fangcalay Cudad a mitadtad hano mafekad ko hatiniay a demak.”

Pakalalokay ko likakawa to polong a salikaka, tano niniyan casi timolo a mitosil. O cecay naitiniay i likakawa a tikami, sanay a mitadtad to hatiniay a tayal, sanay: “Aka mapawan ko cecacecay a micadaay to paputisem a Krisciyang, matayal saki Kawas o tadamaanay a tayal no mita, sarocoden ita a misaˈicel a mitosil to icowacowa pala a tamdaw.” Tawlikay ko salikaka mahemekay a micada toniya satahidang. Tahira i ka 12 folad, iraayto ko 5 ˈofad a tamdaw miyoyakay toniya faelohay casi.

Tahira i 1919 miheca, miliyaw malikakawa ko tamdaw ni Yihofa, ˈifowa ko falocoˈ a mapaˈicel. O roma i, milingatay to “saikoray a romiˈad” a sapairasol malaˈosiayto. Patinakoen, itini i Malaki 3:1-4, mataˈlifayto no tamdaw no Kawas ko pilifetan a lintad. O roma sa i, maliyasayto no tamdaw ni Yihofa ko “Taˈangayay a Papilon”, manilnilayto ni Yis Kristo ko “madimadiay citanengay a koli.” * (Paˈarawan 18:2, 4; Matay 24:45) Nohatini misadayto ko Micekiway, misarocod a matayal saki Kawas.