1. Hano pakasoˈlinay kita to, o ‘salikoray romiˈad’ nohatini hani?

ITINIAY kiso i ikor no 1914 miheca hofocen han? Ano hatiraay itiniay kiso i ‘salikoray romiˈad’ a maˈorip. (2 Timoti 3:1) O pairasolan ni Yis a demak mifekaday nohatini, tahatengilay kita to lalood, cangoˈotay ko kakaenen, ˈatoray, lifong, matongalay ko mariˈangay a demak, o finawlan ni Yihofa micadaay to sapalak. (Matay 24:3, 7-9, 12; Luka 21:10-12) Maˈarawayho ita ko waywayan no tamdaw malecaday o pairasolan ni Pawlo. (Nengnengen ko sapatongal lalakaw “O Harateng Ato Waywayan no Tamdaw.”) Pakasoˈlinay ko midokoay ci Yihofaan a tamdaw, o salikoray a ˈawaled noniya lekakawa nohatini.—Mika 4:1.

2. Wa cacipinang kita to caˈof no maanan a salicay hani?

² 1914 miheca tahanini mataˈlifayto ko 100 miheca, tahiniayto kita i pahererekan no ‘salikoray romiˈad’. Oniya lekakawa wa mahererekto, mansa, o cacipinang kita to caˈof no laenoay kalimlaan a salicay: O pahererekan no ‘salikoray romiˈad’ wa mifekad ko maanan a demak hani? ˈAyaw nonini, mitokelay ci Yihofa kitaanan samaan ko hademak hani?

3. Pakayni 1 Tisalonika 5:1-3 a sapairasol, o mikowanay no hekal, wa milasil to maanan a lihaf hani?

³ ˈOsien ko 1 Tisalonika 5:1-3. O misowalan ni Pawlo a ‘romiˈad ni Yihofa,’ mikitini picada no ‘Taˈangayay Papilon’ to saˈodis, tahira kahererekan no Armakiton a tatokian ko mitoroˈan. (Paˈarawan 16:14, 16; 17:5) ˈAyaw no misatapang koniya ‘romiˈad,’ wa milasil ko mikowanay no hekal to  ‘dipayalayto’ sanay a lihaf. Ano malalengo ko mikowanay no hekal to sasamaan misalof to kalalaˈed no kitakit i, misaka dademakay to malecaday a sowal. * Kawra o misowalan no Fangcalay Cudad a salasil cowa ka hatira. Itiya wa pakasoˈlin ko tamdaw to, sasoˈlin padipayalen no mikowanay koniya hekal, o rarihaday ko tamdamdaw sanay. Kawraan, o tatangsol a misatapang ko ‘taˈangayay padiing,’ ‘fahal sanay a laˈafo’ wa tangsol sa ira.—Matay 24:21.

4. Pakayni ‘dipayalayto’ a salasil, (1) O maanan a demakan ko cowa ko kafanaˈan ita? (2) Kawra mafanaˈay kita to maanan hani?

⁴ Pakayni ‘dipayalayto’ sanay a salasil, iraayho ko cowa ko kafanaˈan ita a demak. Tinakoen, cowa ka fanaˈ kita to, o maanan a demakan ko miocoray to kalo kitakit a milasil toniya lihaf, cowa ka fanaˈ to tano maanan a pakayraan a milasil. Tano madadoedoay a salasil, anca kina cecay a salasil hokira? Cowa kafanaˈ kita. Kawra mafanaˈay kita, ano samaanto, aka a pakasoˈlin miharateng to, papadipayalen no ˈaˈideman no kitakit koniya hekal. Haratengen ita, patalipaˈelalay ko Fangcalay Cudad kitaanan misinanot toniya salasil, samanen o tahapinangan konini to mamisatapangto ko ‘romiˈad ni Yihofa!’

5. Pakayni 1 Tisalonika 5:4-6, o sasamaan kita talaˈayaw ko pisaday pakayni i ‘romiˈad ni Yihofa’ hani?

⁵ ˈOsien ko 1 Tisalonika 5:4-6. O sapalimoˈot ni Pawlo mifanaˈay kitaanan sasamaan talaˈayaw a misaday pakayni i ‘romiˈad ni Yihofa.’ “Caay ka ngaˈay a matiya o tao kita a mafotiˈ. O nika palal ita a masinanot ko ngaˈay.” O maanan ko sasinanoten ita hani? Tinakoen, wa mitafo kita to misatenokay, cowa ka pirienang to mirikecay a demak, ho eca ko ‘noni hekal’ kita. (Yohani 15:19) Dengan o Hongti Kitakit no Kawas ko papaira to dipayalay a hekal.

6. Papadama kita to tamdaw cipinang to maanan? Misamaanay?

⁶ Cowa ko pisaday aca ita, papadamaho to tao cipinang, pairasolay ko Fangcalay Cudad to mamifekad ko maanan a demak noikor. Haratengen ita, wa itini ˈayaw no misatapang ko taˈangayay padiing mipiliˈto ko tamdaw a midoko ci Yihofaan ngaˈ, ano eca i, wa maosoyto. Mihaenay, o mitosilay a demak tada macalohayto! *

7. Mitokelay ci Yihofa kitaanan midemak to maanan hani?

⁷ O ‘romiˈad ni Yihofa’ wa kalikito a ira, ˈayaw nonini, mitokelay ci Yihofa kitaanan fanekfek a mitosil. Mihaenay, oha ‘mararid a misaˈicel to tayal no Tapang’ kita. (1 Korinto 15:58) Pairasol ci Yis to tahapinangan  i salikoray ˈawaled i, masowalay ko mitosilay a demak, sanay: ‘A isalakaten patenak ko ngaˈayay lihaf i polong a kitakit.’ (Marko 13:4, 8, 10; Matay 24:14) Ano malingad kita a mitosil i, o misadakay to ˈicel a palaˈosi toniya sapairasol.

8. Hano mafanaˈ kita, o mitosilay a demak iraay ko epoc hani?

⁸ Iraay ko epoc no mitosilay a demak ita han? To mihecahecaan, macakatay ko mitosilay a demak ita. Nengnengen ita i ‘salikoray romiˈad,’ katongal no mitosilay a tamdaw. Itini 1914 miheca, 5,155 ko mitosilay i 43 kakitakitan ato kasapala a mitosil. Anini, 850 efan ko mitosilay tamdaw itini 240 kitakit ato pala a mitosil! Kawra, cowaho ka hererek, wa padadotoc kita milasil to, dengan o Hongti Kitakit no Kawas ko mamisaysay to kihcod a pasangaray no tamdaw.—ˈOlic 145:11-13.

9. Misamaanay hano papadotoc kita a mitosil hani?

⁹ ˈAyaw no pasowal ci Yihofa to malaheciayto ko mitosilay a demak i, o papadotoc kita a mitosil. Hakowaayto ko maˈosaway a toki no tamdaw, mafanaˈ ci Yihofaan aci Yisan hani? (Yohani 17:3) Cowa ka fanaˈ kita. Kawra, mafanaˈay kita ˈayaw no misatapang ko taˈangayay padiing i, o matatodongay ko waywayan ngaˈay milifok to tahadaˈocay ˈorip a tamdaw, iraayho ko toki mipiliˈ midoko ci Yihofaan. (Dmak 13:48) Sasamaan kita mimamet to toki padama to hatiniay a tamdaw hani?

10. Samaanay ci Yihofa padama kitaanan pasifanaˈ to tamdaw minanam to Fangcalay Cudad hani?

¹⁰ Pakaynian ni Yihofa i likakawa Ningra mihadak to sapadama, mihaen ngangaˈay kita pasifanaˈ to tao a minanam to Fangcalay Cudad. I Mitosilay ato Nikaˈorip a Saˈopo, minanamay kita to sasamaan i salakatay pitosil ato pilisoˈ a masasowal to tao, mananamayho sasamaan a misikay to pacekiway. Roma i, o likakawa no Kawas iraay ko Sapasifanaˈ a Lalosidan, lalomaˈay a lalosidan wa padama kitaanan . . .

• misatapang masasowal,

• mikidat to hakalim,

• pakalalok to tamdaw minanam to Fangcalay Cudad,

• misikay to pacekiway,

• mitahidang to tamdaw minengneng to wangcan ita ato mirienang to saˈopo.

 Ira ko hatiniay lalosidan ita cangoˈotayho, sasongilaˈen a misaka dademak. * Tinakoen, maharek kita masasowal to makalimay a tamdaw i, ngaˈayay tereken ko tancang ato casi, mihaen ˈayaw no miliyaw milisoˈ cingranan i, wa ngaˈay cingra mikitini lalakaw a cipinang to lihaf no Fangcalay Cudad. Mihaenay, oha fafanekfek kita milasil to ngaˈayay lihaf no Hongti Kitakit, misaˈicel a mitosil to folafoladan.

11. Minanam to Fangcalay Cudad i Wangcan, pakayniay i masamaanay a tamdaw ko pisangaˈ hani?

¹¹ Iraayho ko roma pakayraan ni Yihofa padama to tamdaw minanam to soˈlinay kimad. O wangcan no jw.org iraay ko Minanam to Fangcalay Cudad i Wangcan, sanay a pinanaman. Oniya pinanam pakayniay i masamaanay a tamdaw ko pisangaˈ hani? To folafoladan ˈalomanay ko pasayraay i wangcan mikilim to lalakaw no Fangcalay Cudad a tamdaw, o pinanam ita, wa padama cangranan ira ko salakatay a kafanaˈ to Fangcalay Cudad. Roma i, o malitemohay ita mitosil a tamdaw calemcemay alatek, cowa kakahi malacafay kitaanan minanam to Fangcalay Cudad, paˈarawen cingra toniya pinanaman a wangcan. *

12. O Minanam to Fangcalay Cudad i Wangcan mahawpay ko maanan a lalangian hani?

¹² O lalangian no Minanam to Fangcalay Cudad i Wangcan mahawpay ko: “O Fangcalay Cudad ato Papitiliday,” “O Tamdaw i Fangcalay Cudad,” ato “O Ngaˈayay Lihaf no Fangcalay Cudad.” Oniya pinanam wa pacaˈof to laenoay salicay:

• O Fangcalay Cudad misamaan padama to tamdaw?

• O cima ci Yihofa aci Yis? Samaanay ko coyoh?

• Hano misangaˈ ko Kawas to tamdaw?

• Hano misemsem ko tamdaw? Hano ira ko tatiihay tamdaw ato demak?

Oniya pinanam mamilengo, ci Yihofa wa . . .

• palahdaw to pades ato patay

• patikol paˈorip to mapatayay a tamdaw

• tano Hongti Kitakit mikotay to kalo kitakit.

13. Minanam to Fangcalay Cudad i Wangcan wa mikotay to masiˈayaway a malalengo to Fangcalay Cudad a limasmas han? Tadtaden.

¹³ Minanam to Fangcalay Cudad i Wangcan, cowa ko mamikotay to kalalengo ita to tamdaw to Fangcalay Cudad a limasmas, samanen palimoˈotay ci Yis kitaanan padama to tamdaw malo nisawawaan ningra. O Minanam to Fangcalay Cudad i Wangcan o sapikidat aca to kalim no tamdaw, mihaen o mamakahi cangra malacafay kitaanan milengo to Fangcalay Cudad, halo minanam to adihayay a lalakaw. Mahererek ko cecacecay liyad i, pakalalokay cangranan a pangangan malacafay to Misawacayay Tamdaw ni Yihofa a minanam to Fangcalay Cudad. O wangcan ita to romiˈamiˈad macadaay ko 230 pangangan a minanam to Fangcalay Cudad! O masasiˈayaway a kalalengo to Fangcalay Cudad o masaka limlaan!

14. Pakayni Matay 28:19, 20, wa misaˈicel kita misamaan to demak? Misamanay?

¹⁴ ˈOsien ko Matay 28:19, 20. Ano misikay kita to pacekiway to Fangcalay Cudad i, o papasifanaˈ to tamdaw midofdof to kihcod a limoˈot ni Yis, misaˈicel a padama to tamdaw malo Krisciyang. Padamaen ita ko pacekiwan cipinang, mipiliˈ midoko ci Yihofaan ato midama to Hongti Kitakit  Ningra o masaka limlaan. Sasamaan ko hademak ita hani? Patemeren ko falocoˈ no pacekiwan, saka dademaken ko mananamay nangra, patafang to niyah ci Yihofaan ato micada to inoˈ, mihaen ngaˈ milakowit cangra to romiˈad ni Yihofa.—1 Pitiro 3:21.

15. Cowa ko mamisamaan ko demak ita? Misamaanay?

¹⁵ Masowalay i fafekang, mangataayto ita ko kahererekan noniya lekakawa, mihaenay ano caka kahi ko pacekiwan malo Krisciyang, cowato ko papadadotoc kita malalengo cingranan to Fangcalay Cudad. (1 Korinto 9:26) ˈAlomanayho ko cowa pakatengil to lihaf no Hongti Kitakit, itini ˈayaw no ira ko taˈangayay padiing, mameten ita ko toki a mitosil!

16. Pakayni i Paˈarawan 18:2, 4, 5, 8, sasamaan ko hademak no mita hani? (Nengnengen ko sapatongal lalakaw.)

¹⁶ ˈOsien ko Paˈarawan 18:2, 4, 5, 8. Masowalay no sinael, misaaliay ci Yihofa to midokoay Cingranan a tamdaw miliyas to ‘Taˈangayay Papilon.’ ˈAyaw no minanam to soˈlinay kimad ko pacekiwan itiniay i roma a pihakelongan, mirienangay cingra to pisalisin ato demak no kiyokay, pakiyahoay to kiyokay alatek. Ano sakairaaw no tatodong ningra micada to inoˈ, oha mamiliyas to mararaway a pihakelongan. Wa patikami anca roma pakayraan paihkal cowato ka masalalomaˈ no kiyokay ato milingatay to ‘Taˈangayay Papilon’ a lekakawa ko niyah. *

17. Soˈlinay a Krisciyang cowa ko mamidemak to manan a tayal? Misamaanay?

¹⁷ O soˈlinay Krisciyang cowa ko ngangaˈay matayal to milingatay to ‘Taˈangayay Papilon’ a tayal, tinakoen, malo mawmahay no kiyokay. (2 Korinto 6:14-17) Ano misasingdiay ko Krisciyang, cowa ko mamikafo to milingatay to ‘Taˈangayay Papilon’ a tayal, anca makakiˈok cangranan. Soˈlin o roma kosi ko katayalan no Krisciyang, cowa ko hahalafin i milingatay to mararaway pihakelongan a kitiraan a matayal. Hano pairaen ita ko tanektekay a saaroˈan hani? Samanen pinengneng no Kawas to ‘Taˈangayay Papilon’ o cikaditay, cowa ko mamikihatiya kita to raraw ningra.—Isaya 52:11. *

18. O cecay a salikaka samaanay mitafo to safalod no Fangcalay Cudad i katayalan?

¹⁸ Nengnengen ko milifetan no cecay  malohemay malitengay, iraay ko singdi ningra, ˈayaw no pina miheca o cecay mifafaway to tayal a kosi mikilimay cingranan misamokong i kiyokay. Soˈlin mafanaˈay koya kosi to, cowa ko mamakahi ko salikaka matayal tono kiyokay a tayal, kawra awaay ko mahelaay a tamdaw. Kamayan ko salikaka mitafo to safalod no Fangcalay Cudad, minaˈay toniya tayal. Ikor no cecay lipay, mahadakay ko cecay sasing i sinfon, tora sasing iraay ko cecay misasayhoay pakafitay to ciwcika i kiyokay. Ano haien noya salikaka koniya tayal, ora i sasingay a tamdaw o cingrato alatek. Haratengen hena, o hahakowa ko pipalak to ngangan no salikaka konini! Wa samaan ko piharateng ni Yihofa hani?

19-20. (1) Toniya lalakaw mananamay ita ko manan? (2) Dotoc a lalakaw wa mananam ita ko manan?

¹⁹ Pairasolay ko Fangcalay Cudad, cato ka halafin, wa milasilto ko kalo a kitakit to ‘dipayalayto.’ Kawra, maharekayto mifanaˈ ci Yihofa kitaanan, awaay ko pakayraan no mikowanay no hekal paira to dipayal. Maharek mihadak toniya salasil, wa irato ko ‘fahal sanay a laˈafo.’ Itini ˈayaw no mifekad koniya demak, o sasamaan ko hademak ita hani? Mitokelay ci Yihofa kitaanan padadotoc fanekfek milasil to ngaˈayay lihaf no Hongti Kitakit, misaˈicel padama to tamdaw malo Krisciyang. Roma i, mamiliyas kita to ‘Taˈangayay Papilon,’ tatodong nonini cowa ko mamicapid kita to mararaway pihakelongan, cowa ko mamidemak to milingatay to mararaway pihakelongan a tayal.

²⁰ Itini salikoray ka hererekan a ˈawaled, wa mifekadho ko maanan a demak hani? Mitokelayho ci Yihofa kitaanan midemak to maanan hani? O sasamaan kita a misaday, misiˈayaw to mamifekad a demak hani? O dotoc a lalakaw wa pacaˈof toniya salicay.