1. Hano mamisarocod kita maolah ci Yihofaan hani?

CI YIHOFA misangaˈay kitaanan, pafeli to ˈorip, mansa o mamisarocod kita maolah Cingraanan. (Paˈarawan 4:11) Kawra, soˈlin maolahay kita ci Yihofaan, o roma demak misaaretengan ita nokaˈorip, cowato pisarocod a maolah ci Yihofaan. Oniya lalakaw wa misongilaˈ mitadtad hano mahaen. Salakat, nengneng ita o manan ko tatodong no misarocoday maolah ci Yihofaan hani.

2. Pakayni i Kasadakan 34:14, misarocod maolah ci Yihofaan wa misamaan ko demak ita hani?

² O misowalan no Fangcalay Cudad ‘misarocod  a maolah,’ tatodong i tangongolay ko olah ita ci Yihofaan, dengan Cingra ko dadokoen. Cowa ko mamihai kita to polong a tamdaw anca demak a mikotay to saaroˈan ni Yihofa i falocoˈ no mita.—ˈOsien ko Kasadakan 34:14.

3. O olah ita ci Yihofaan hano cowa ko patelasay hani?

³ Kawraan, o olah ita ci Yihofaan cowa ko patelasay. Samanen mafanaˈay kita Cingraanan, cipinangay to masakenaay a makapahay capeling Ningra, mihaydaayho to ngaˈayay ato tatiihay a palinian Ningra. Mafanaˈay kita to araaw ni Yihofa to tamdaw, makahi a mitoor to araaw Ningra a maˈorip. Ngaˈay malo widang no Kawas kita tada o kalikoan a demak. (ˈOlic 25:14) Ano matongal ko kafanaˈ ita to Misangaˈay a Tatapangan, matongal ko sapiingidaw Cingraanan.—Yakop 4:8.

4. (1) Sakadademakan ni Satan ko maanan eacato ka pisarocod kita maolah ci Yihofaan hani? (2) Oniya lalakaw mamilengo to maanan?

 ⁴ Ci Satan ko mikowanay toniya hekal, sakadademakan ningra koniya lekakawa mikayhid kitaanan a misalo to coos, anca papisaareteng kitaanan to sakaˈorip. (Ifiso 2:1-3; 1 Yohani 5:19) Harateng ningra ho masolot no kalo a demak kita, ecato pisarocod a maolah ci Yihofaan. Wa nengnengen ita ko tosa sapilipalaw ningra a pakayraan, miowing kitaanan micangacang to hafay, ato mikayhid kitaanan mipiliˈ to tatiihay a lawla.

5. Hano cowa ko mamaˈanof kita hani?

⁵ Mitokelay kita ira ko kadofahay a kakaenen, matatodongay a rikoˈ ato ngaˈayay a kitiraan, o matatodongay a harateng konini, kawra cowa ko ngangaˈay kita a maˈanof to hafay. Anini, ˈalomanay tamdaw no hekal ‘maˈanofay to payci’ ato dafong. (2 Timoti 3:2) Mafanaˈay ci Yis o mamadenga no hekal ko nisawawaan ningra, mansa mihaen ko sowal: ‘Cowa ka ngaˈay a tosa ko tapang no cecay a matayalay a koli. Kapiliˈen ningra ko cecay, kaolahen ningra ko cecay. Madimadien konini, sakahmawen korira, cowa ka ngaˈay kamo malo koli no Kawas, malo koliho no hafay.’ (Matay 6:24) O midokoay ci Yihofaan a tamdaw ano adihay ko mapalakay a toki ato ˈicel mietan to payci, ciharateng to saka cihafayaw, wa mahecad o misowalan ni Yis, malo tosaay ko tapang a koli, ecato pisarocod a maolah ci Yihofaan.

6. Pakayni i sowal ni Yis to Laotikiya a kasakopang, manana ita ko maanan hani?

⁶ I saikorto no saka 1 hahekalan, itini Laotikiya a kasakopang malikoay ko roma tamdaw a pasowal: ‘O cidafongayto kako, o cihafayayto kako, awaay ko kacangoˈotan  ako to maamaan.’ Kawra pinengneng ni Yihofa aci Yis, “o kakasiniˈadaan, o kakaadayayan, o pakoyocay, o mapohaway, o mawacayay” cangra. Mirikec ci Yis cangranan, cowa ko pakayniay ka cihafay nangra, o pakayniay ka ˈanof nangra to payci, mipalak to kalawidang no niyah ato Kawas. (Paˈarawan 3:14-17) Ano mahapinang ita matongalay ko harateng noniyah micangacang to hafay, tangsolen a mifalic ko harateng. (1 Timoti 6:7, 8) Ano eca i, awato ko pakayraan ita a misarocod maolah ci Yihofaan, cowa ko mamicada Cingra to pidoko no mita, samanen o ‘misaaliay to misarocoday maolah a Kawas’ Cingra. (Limoˈot 4:24) Hano pakidem ko pisaareteng no tamdaw to hafay hani?

7-9. Mikitini ci Tafitian mananamay ita ko maanan hani?

⁷ Nengnengen ita ko nalifetan no salikaka ci Tafiti. Itiniay ci Tafiti i Padaka, o malalokay a malohemay malitengay, misarocoday cingra a matayal, mansa kalikiay cingra macakat ko saaˈroan, tada maanay ko inaneng ningra. Sowal sa ci Tafiti: “O saparaheker ni Yihofa koni, sanay ko harateng ako.” Soˈlinay mahaen ha?

⁸ Ikor mahapinangay ni Tafiti, oniya tayal mipalakay to kalalaˈed ningra aci Yihofaan. Sanay cingra: “Misaˈopo ato mitosil kako i, sahto o tayal a demak ko miharatengan ako. Soˈlin adihayay ko mietanan a payci, kawra taˈangayay ko saroero ako, o kalalaˈed ako ato fafahi cowato kangaˈay.”

⁹ Cipinangay ci Tafiti salofen ko nokaˈorip ngangaˈay, sanay cingra: “Misaˈosiay kako a mifalic.” Mansa liyawen ningra milimasmas ko katayalan a toki, masasowal to tawki, ˈarawhan mafalahay no tawki! Samanay ko harateng ni Tafiti  hani? Sowal sa cingra: “Ikor tangsol sa kako pangangan to padotoc a padamaay misakafahay.” Misatapangay cingra ato fafahi matayal to micingkiyatay a tayal, pakayni sakaˈorip. Mataˈelif ko cecay liyad, misatapangay ci Tafiti malo miceriday misakafah, ikor malo miceriday misakafah ko fafahi ningra. Harateng nangra cowa ko kalimlaan ko katayalan, mansa makahi dademak to kapiliˈan no tamdaw a tayal. Soˈlin cowa ka adihay ko lifon, kawra maedengay sakaˈorip. Paisalakaten ni Tafiti ato fafahi ci Yihofa, tahatanamay cangra, midipotan ni Yihofa ko salakatay micangacang to Hongti Kitakit a tamdaw.

10. Pakayni pidipot to falocoˈ no niyah, sasamaan ko hademak ita hani?

¹⁰ Ano manikawto cihafayto kita, o dadipoten ko falocoˈ no niyah. Sasamaan ko hademak ita hani? Aka a maˈanof to hafay, aka a pakidem ko pisaareteng to tayal, misakahmaw to tayal ci Yihofaan. Sakafanaˈaw to samanay ko harateng no niyah, ngaˈayay licayen ko niyah: “Ano mirienang to saˈopo ato mitosil i, marariday kako miharateng to katayalan han? Calemcemay kako to noikoran, sapitongalaw to sadipot no payci han? Marariday kako pakayni payci a malacongis to raramod han? O cecay kapiliˈan no tamdaw a tayal, kawra o sakangaˈay matayal saki Yihofaan, wa makahi kako a midemak han? (1 Timoti 6:9-12) Ano miharateng kita to fafekangay a salicay i, haratengen, maolahay ci Yihofa kitaanan, mikiˈokay Cingra to misarocoday maolah Cingranan a tamdaw: ‘Cowa ko mamiliyas Kako tisowanan, cowa ko mamifalah tisowanan.’ Mihaenay i, pakalalokay ko tarokos ci Pawlo kitaanan: ‘O waywayan namo malo tamdaw, aka a maˈanof to payci.—Hipray 13:5, 6.

11. O lawla samaanay milingat to tamdaw hani?

¹¹ Tokel ni Yihofa lipahak ko kaˈorip no mita, o lawla pakahemekay kitaanan. Mihaenay ko sowal no Fangcalay Cudad: “Ano maˈdeng ko tamdaw a komaen mitaˈowak a rihaked to nano hci no nika rorayan ningra i, tada o malmeday cingra.” (Patnakay 2:24) Kawra, adihayay a lawla noniya hekal mipalakay to tamdaw, miharateng to cowa ka tatiih ko mirikecan no Fangcalay Cudad a demak, iraay ko ˈicel a misolot sanay.

12. Pakayni 1 Korinto 10:21, 22, hano sasinanoten ita mipiliˈ to lawla hani?

 ¹² Makalimay kita misarocod a maolah ci Yihofaan, mihaenay cowa ka ngaˈay ‘mitahka to tangidaf ni Yihofa,’ ‘mitahkaho to tangidaf no tatiihay coyoh.’ (ˈOsien ko 1 Korinto 10:21, 22.) Malacafay kita to tamdaw komaen, paihkalay to ngaˈayay ko kalawidang ita cingranan. O mipiliˈan ita a lawla ano miowingay to mariˈangay, misakawasay, maˈodangay, anca mikidatay to mararaway a coos ato waywayan, mahecaday to misawidangay to ˈada no Kawas, malacafay komaen mitaˈowak, mitahka to misadayan nangra a tangidaf. Mihaen cowa ko pidokaˈ aca to niyah, mipalakayho to kalawidang ci Yihofaan.

13-14. Pakayni Yakop 1:14, 15, mipiliˈ to lawla hano sasinanoten hani? Tano tinakoen mitadtad.

¹³ Haratengen hena, o lawla hano mahecad to kakaenen. Ngaˈay kita mipiliˈ to o manan ko kakaenen, ano micomod i ngoyos ko kakaenen i, wa tangsol a maselip no tireng. O cihaleday a kakaenen ciepocay ko tireng, o hadec a kakaenen wa mipalak to tireng, ano cowa ka tangsol sa adada, kawra mamapalak noikor.

¹⁴ Mahecaday, wa ngaˈay kita mipiliˈ to halawla, kawra ano maˈaraw matengil i, o kamok no lawla mamisolot to harateng ato falocoˈ no mita. O ciepocay a lawla mikowaday kitaanan, tatiihay a lawla minaholay kitaanan. (ˈOsien ko Yakop 1:14, 15.) Soˈlin caka tangsol mahapinang ita, kawra o tatiihay a pilingat no lawla, wa masadak i waywayan ita noikor. Mansa mihaen ko sowal no Fangcalay Cudad: ‘Aka to maapoh, cowa ka ngaˈay sakahmawen ko Kawas. O maanan ko palomaan no tamdaw, oriraan ko milidongan. Midoedoay to coos no tireng a mikosam, mikitini i coos no tireng milidong to sakapatay.’ (Kalatiya 6:7, 8) Ano sakapahen no lawla ko kaˈintehan ni Yihofa a demak, oha laliyasen ita, tada kalimlaan ko pihaen to demak!—ˈOlic 97:10.

15. Pafelian ni Yihofa kita to maanan a sapatelong hani?

¹⁵ Maolahay ko salikaka minengneng to JW Tilifi, o cecay ci Marilin a salikaka sowal sa cingra: “O kamok no JW Tilifi patawlikay to harateng ako, rihadayay kako minengneng cowa ka talaw to aira ko tatiihay a kamok. Ano matoˈol anca matoled ko falocoˈ i, kiliman ako ko kahemekan a kimad anca no papacem pidoko a kamok, mihaen hato matongalay ko piingid ako ci Yihofaan ato likakawa Ningra. O JW Tilifi mifalicay to nokaˈorip ako!” Maolahay kiso to JW Tilifi, miakoˈiday kiso to sapatelong no Kawas han? Cowa ko folafoladan aca a kamok, o wangcan ita adihayay ko ika, milokoingan ato mitemeray to falocoˈ a radiw, ngaˈay nengnengen ato tengilen ita.

16-17. (1) Hano sinanoten ita hakowaay ko mapalakay a toki milawla hani? (2) Sakaecaaw ka adihay ko mipalakan a toki milawla, samaan ko demak ita ngangaˈay hani?

¹⁶ Sasinanoten, o manan ko mipiliˈan ita a lawlaan, ato hakowaay ko toki a milawla, ano caka pisinanot i, o milawlaay a toki wa mikikaka to katayal saki Yihofaan a toki. Mihayay ko salikaka, miˈmet to toki cowa ko madoloay. O cecay salikaka ci Apikil sowal sa cingra: “Minengneng to tilifi padamaay takowanan mihoka to tireng. Kawra ano caka pisinanot kako i, wa halafin a minengneng to pinapina a toki.” Cecay kapah a salikaka ci Samuil, sanay cingra: “Maolahay kako i tingnaw minengneng to amotoˈay a ika, i  satapang cecay aca ko nengnengen saan kako, ˈarawhan mataˈlifayto ko sepat a tatokian a minengneng.”

¹⁷ Sakaecaaw ka adihay ko mipalakan a toki milawla, samaan ko demak ngangaˈay hani? Salakat cipinang to hakowaay ko mapalakay a toki. Ngaˈayay tiliden iso i cecay lipay, hakowaay ko toki minengneng to tilifi, ato wangcan anca misalama. Ano adihayay ko mipalakan iso a toki i lawla, saˈosien ko halaka, o kalimlaan a demak ko salakaten midemak, ikorto milawla. Cangacangen ci Yihofa padama tisowanan mitoor to toki a midemak, mihaen wa adihayto ko toki iso ato ˈicel micekiw to Fangcalay Cudad, mirienang to pakalomaˈay pidoko, mirienang to saˈopo ato mitosil, milawlato kiso wa lipahak ko falocoˈ.

18-19. Samaan ko hademak ita paihkalay to misarocoday maolah ci Yihofaan hani?

¹⁸ Malengo no tarokos ci Pitiro ko kahererekan no hekal ni Satan ato faelohay hekal i, sanay midotoc somowal: “Kaolahan ako a salikaka, o halamhamay kamo a mitala tonini a demak. Orasaka, saˈicelen ko falocoˈ namo to sakakorac no falocoˈ namo, ta awaay ko tatoroˈen no Kawas a raraw namo ta mararihaday kamo.” (2 Pitiro 3:14) Midoedo kita toniya limoˈot, misaˈicel mitoor to kahemekan ni Yihofa a pakayraan maˈorip ato midoko Cingranan, o paihkalay to misarocoday a maolah Cingranan.

¹⁹ Ci Satan ato niya hakal sapifalicaw to misaaretengan ita i nokaˈorip. (Luka 4:13) Kawra, cowa ko mamakahi kita to roma demak ato tamdaw mikotay to saˈaroan ni Yihofa i falocoˈ no mita. Sarocoden ita maolah ci Yihofaan, dengan Cingra ko citatodongay to hatiniay a olah ato pidoko!